1. Kweelana a Malaki 3:16, ino ndibuku nshi Yehova ndyaatolemba kuswabo kale kale, alimwi ino muli nshi mulibuku ili?

 KWAMYAAKA iinji, Yehova atoolemba libuku lilibetele. Libuku ili lilicite mulongo wa meena. Liina lyakutaanguna ndyakwe Abelo kamboni ushomeka wakutaanguna. * (Luka 11:50, 51) Kuswabo ciindi ico, Yehova watolelela kulemba meena mulibuku ili, alimwi pacecino ciindi muli meena aanji abuumbi. Mu Baibo libuku ili lileetwa ayi “libuku lya ciibalusho,” “libuku lya buumi,” alimwi a “libuku lya buumi lyakupeta.” Mumutwi uyu tutoliita ayi “libuku lya buumi.”​—Amubelenge Malaki 3:16; Ciyu. 3:5; 17:8.

2. Ino nga meena abaani ali mulibuku lya buumi, alimwi ino inga twacita buyani kwaamba ayi liina lyesu lilembwe mulibuku ili?

² Mulibuku ili muli meena abaabo boonse balambila Yehova akumulemeka abuumbi alimwi basuni liina lyakwe. Balaakuba acoolwe cakutambula buumi butamaani. Aswebo liina lyesu inga lyalembwa mulibuku ilyo na twaba abushicibusa buyumu a Yehova kwiinda mucilubula ca Mwanaakwe, Yesu Klistu. (Joni 3:16, 36) Inga caba ayi tutolangila kuya kwiculu na kukala pacishi capanshi, soonse tulisuni kwaamba ayi liina lyesu likalembwe mulibuku ili.

3-4. (a) Sa tulaakutambula buumi butamaani na pacecino ciindi liina lyesu lililembetwe mulibuku lya buumi? Amusansulule. (b) Ino nshiinshi nsheshi twiiye mumutwi uyu alimwi autokonkelaawo?

³ Sa ici cilasansulula ayi boonse balembetwe meena mulibuku ili balaakutambula buumi butamaani? Tulacana cikumbulo kumwiipusho uyu mumaswi Yehova ngaakalwiita Mose, ngotucana  pa Kulonga 32:33 Yehova mpakaamba ayi: “Ngameena a bantu abo bambishisha ngweshi nkakushe mulibuku lyangu.” Aboobo meena ali mulibuku ili pacecino ciindi inga akushikwaamo na kufuutwa. Cilibo anga pakutaanguna Yehova wakalemba meena aya a penso. (Ciyu. 3:5) Aboobo tulyeelete kushinisha kwaamba ayi liina lyesu lyatolelela kuba mulibuku ili kushikila ndyeshi likalembwe a peni. Nkokwaamba ayi kutolelela kuba mulibuku ili kwamuyayaya.

⁴ Ici inga catupa kuliipusha miipusho mbuli; Ino Baibo ilaamba nshi pabaabo balembetwe meena mulibuku lya buumi abaabo batalembetweemo? Ino ndilili abo balembetwe meena mulibuku ilyo ndyeshi bakatambule buumi butamaani? Ino mbuyani abo bakafwa kabatana kuba acoolwe cakwiiya pali Yehova? Sa meenaabo inga alembwa mulibuku ilyo? Tutoocana shikumbulo kumiipusho iyi mumutwi uyu alimwi autokonkelaawo.

INO NGAMEENA ABAANI ALI PABAABO BALEMBETWE MULIBUKU LYA BUUMI?

5-6. (a) Kweelana alilembo lya Bene Filipi 4:3, ino ngameena abaani ali pabaabo balembetwe mulibuku lya buumi? (b) Ino ndilili meenaabo ndyeshi akalembwe mulibuku lya buumi kwamuyayaya?

⁵ Ino ngameena abaani ali pabaabo balembetwe mulibuku lya buumi? Kwaamba ayi tucane cikumbulo kumwiipusho uyu, amuleke tubandike pamakoto abantu ali 5. Pakati kamakoto aya pali amwi acite meena alembetwe mulibuku lya buumi, lyalo amwi taalembetweemo.

⁶ Likoto lyakutaanguna ndyabaabo bakasalwa kuya mukweendelesha pomwi a Yesu kwiculu. Sa meenaabo pacecino ciindi alilembetwe mulibuku lya buumi? Ee. Kweelana amaswi mutumwi Paulo ngaakalembela ‘basebenshinyina’ baku Filipi, meena abananikitwe abo bakasalwa kuya mukweendelesha pomwi a Yesu, alilembetwe mulibuku lya buumi.  (Amubelenge Bene Filipi 4:3.) Ano kwaamba ayi meenaabo atolelele kuba mulibuku ilyo, balyeelete kutolelela kushomeka. Pesule lyakutambula keshibilo kakweelaako, meenaabo alaakutolelela kuba mulibuku ili kwamuyayaya. Ishi shilaakucitika kabatana kufwa na mapensho anene kaatana kutalika.​—Ciyu. 7:3.

7. Kweelana a Ciyubululo 7:16, 17 ino ndilili meena abamulikoto linene lya mbelele shimwi ndyeshi akalembwe mulibuku lya buumi kwamuyayaya?

⁷ Likoto lyabili ndyaba mulikoto linene lya mbelele shimwi. Sa meenaabo pacecino ciindi alilembetwe mulibuku lya buumi? Ee. Sa meenaabo alaakutolelela kuba mulibuku lya buumi pesule lya Amagedoni? Ee. (Ciyu. 7:14) Yesu wakaamba ayi bantu aba bali anga nimbelele “balaakutambula buumi butamaani.” (Mate. 25:46, NWT) Nacibi boobo, abo beshi bakapuluke Amagedoni teshi bakashikilebo kutambula buumi butamaani. Meenaabo alaakutolelela kuba anga alilembetwe a penso. Yesu ndyeshi Akanookweendelesha Kwamyaaka 1,000, “ulaakubeembela akubatanjilila kutuntupu twa maanshi apa buumi.” Abo beshi bakakonkele butanjilishi bwakwe Klistu akutolelela kushomeka kuli Yehova, meenaabo alaakutolelela kuba mulibuku lya buumi kwamuyayaya.​—Amubelenge Ciyubululo 7:16, 17.

8. Ino ngameena abaani atalembetwe mulibuku lya buumi, alimwi ino nshiinshi sheshi shikabacitikile?

⁸ Likoto lyatatu ndyabantu basansululwa ayi mpongo abo beshi bakanyonyoolwe pa Amagedoni. Meenaabo taalembetwe mulibuku lya buumi. Yesu wakaamba ayi ‘balaakunyonyoolwa kwamuyayaya.’ (Mate. 25:46, NWT) Kwiinda mukutanjililwa amushimu, Paulo wakalemba ayi ‘mulandu wabo, ulaakuba kunyonyoolwa kwamuyayaya.’ (2 Tesa. 1:9; 2 Pit. 2:9) Ubu mbweshi cikabe akubaabo boonse bacita kashanga kulengesha mushimu usalashi kuungumana kuswabo kale kale. Abalo balaakunyonyoolwa kwamuyayaya kuteshi kutambula buumi butamaani. Aboobo ncakutatoonsha kwaamba ayi teshi bakabushikwe. (Mate. 12:32; Maako 3:28, 29; Ebu. 6:4-6) Amuleke tubikile maano pamakoto obilo abantu beshi bakabushikwe pacishi capanshi.

ABO BESHI BAKABUSHIKWE

9. Kweelana a Milimo 24:15, ino ngamakoto obilo ali abantu beshi bakabushikwe pacishi capanshi, alimwi ino makoto aya alipusene buyani?

⁹ Baibo ilaamba pamakoto obilo abantu beshi bakabushikwe akulangila kukala kwamuyayaya pacishi capanshi, “baluleme” alimwi a “bataluleme.” (Amubelenge Milimo 24:15.) “Baluleme” mbaabo bakasebensela Yehova cakushomeka kabatana kufwa. Lyalo “bataluleme” mbaabo batana kusebensela Yehova cakushomeka. Alimwi tabakalinga kucita shintu shiluleme. Ano sa inga twaamba ayi boonse meenaabo alilembetwe mulibuku lya buumi, ceebo cakwaamba ayi balaakubushikwa? Kwaamba ayi tucane cikumbulo kumwiipusho uyu, amuleke tubandike palikoto lyomwi alyomwi.

10. Ino nceebonshi “baluleme” balaakubushikwa, alimwi ino ncoolwe nshi bamwi nceshi bakapekwe? (Amubone makani aamwi mu Njashi yeenka iyi palubasu lwa “Miipusho Kuswa Kubeshikubelenga” atokwaamba pa beshibakabushikwe pacishi capanshi.)

¹⁰ Likoto lya namba 4 ndyabantu “baluleme.” Meenaabo akalinga kulembetwe mulibuku lya buumi kabatana kufwa. Sa meenaabo akakushikwaamo mulibuku ndyebakafwa? Sobwe. Mukwiinga Yehova acibeebaluka, cilibo anga mboomi kuli nguwe. Yehova “teshi Lesa wabafu, ngu Lesa wa boomi, kuli nguwe boonse mboomi.” (Luka 20:38) Aboobo ici cilasansulula ayi na baluleme bakabushikwe pacishi capanshi, meenaabo alaakucanika  kalembetwe kale mulibuku lya buumi, nabi kwaamba ayi paciindi ici alaakunoolibo anga alilembetwe a “penso.” (Luka 14:14) Ncakutatoonsha bamwi pabaluleme beshi bakabushikwe balaakupekwa coolwe cakusebensa mbuli “bamaami mucishi coonse capanshi.”​—Kulu. 45:16.

11. Ino “bataluleme” balaakuyandika kucita nshi kwaamba ayi meenaabo akalembwe mulibuku lya buumi?

¹¹ Mukweelaako, likoto lya namba 5 ndyabantu “bataluleme.” Mpashi bakalinga kucita shitaluleme kabatana kufwa ceebo cakuteshiba milawo yakwe Yehova. Aboobo meenaabo taakwe kulembwa mulibuku lya buumi. Sombi Lesa alaakubabusha kwaamba ayi bakabe acoolwe cakulembwa meenaabo mulibuku lya buumi. Bantu “bataluleme” aba balaakuyandika kucafwikwa abuumbi, mukwiinga bamwi pabaabo bakalinga kucita shintu shibiibi abuumbi. Aboobo balaakuyandika kwiishikwa mbweenga bakonkela njiisho shakwe Yehova shiluleme. Kwaamba ayi cikakonsheke kubaiisha, Bwaami bwakwe Lesa bulaakubika bubaambo bwa ncito inene abuumbi yakwiisha bantu itana kucitwawo kale pacishi capanshi.

12. (a) Ino mbaani beshi bakaiishe bataluleme? (b) Ino nciinshi ceshi cikacitike kubaabo beshi bakakake kwiishikwa?

¹² Ino mbaani beshi bakaiishe bataluleme? Bamulikoto linene alimwi abaluleme beshi bakabushikwe. Kwaamba ayi bataluleme bakalembwe meena mulibuku lya buumi, balaakuyandika kuba abushicibusa a Yehova alimwi akulyaaba kuli nguwe. Yesu Klistu alimwi abananikitwe balaakunoolangilisha cakubikila maano kwaamba ayi babone bataluleme aba mbweshi bakacite pesule lya kwiishikwa. (Ciyu. 20:4) Uli woonse weshi akakake kwiishikwa teshi akatolelele kuba abuumi, nabi akanoocite myaaka 100. (Isa. 65:20) Yehova a Yesu balabona shili mumoyo wa muntu aboobo balaakushinisha ayi taakuwo muntu nabi womwi weshi akasuminishikwe kucita shintu shibiibi mucishi cipya.​—Isa. 11:9; 60:18; 65:25; Joni 2:25.

 KUBUKILA KUBUUMI ALIMWI AKUBUKILA KUKOOMBOLOSHEKWA

13-14. (a) Ino kale kale twakalinga kushoma ayi maswi Yesu ngakaamba pa Joni 5:29 akalinga kusansulula nshi? (b) Ino nshiinshi maswi Yesu ngakaamba ncaatakalinga kusansulula?

¹³ Yesu wakaamba apabaabo beshi bakabushikwe akuba abuumi pacishi capanshi. Kucakubonenaako, wakaamba ayi: ‘Ciindi cilaakushika abo boonse bali mushuumbwe ndyeshi bakanyumfwe liswi lyakwe akuswaamo. Abo bakalinga kucita shibotu balaakubukila kubuumi, abalo bakalinga kucita shibiibi balaakubukila kukoomboloshekwa.’ (Joni 5:28, 29) Ino Yesu wakalinga kusansulula nshi?

¹⁴ Kale kale twakalinga kushoma ayi maswi Yesu ngakaamba akalinga kusansulula beshi bakabushikwe nsheshi bakacite pesule lyakubushikwa; nkokwaamba ayi bamwi balaakubushikwa akucita shintu shibotu lyalo bamwi balaakubushikwa akucita shintu shibiibi. Nacibi boobo, Yesu taakwe kwaamba ayi abo beshi bakabushikwe balaakushikilabo kucita shintu shibotu na kucita shintu shibiibi. Yesu wakasebensesha maswi akwaamba ayi abo “bakalinga kucita shintu shibotu” alimwi abaabo “bakalinga kucita shintu shibiibi.” Ici cilasansulula shintu nshebakalinga kucita kabatana kufwa. Ubu mboceelete kuba mukwiinga taakuwo muntu weshi akasuminishikwe kucita shintu shibiibi mucishi cipya. Cilyeelete shibiibi ishi nsheesho bataluleme nshebakalinga kucita kabatana kufwa. Aboobo ino maswi Yesu ngakaamba ayi ‘kubukila kubuumi,’ alimwi a ‘kubukila kukoomboloshekwa’ alasansulula nshi?

15. Ino mbaani beshi ‘bakabukile kubuumi,’ alimwi ino nceebonshi?

¹⁵ Baluleme bakalinga kucita shintu shibotu kabatana kufwa ‘balaakubukila kubuumi’ mukwiinga meenaabo alaakunoolembetwe kale mulibuku lya buumi. Ici citosansulula ayi kubushikwa ‘kwabaabo bakalinga kucita shibotu’ baambwa pa Joni 5:29 nkokubushikwa kwa ‘baluleme’ baambwa pa Milimo 24:15. Kunyumfwisha uku kuleendelana amaswi ngotucana pa Bene Loma 6:7 aamba ayi: “Muntu na wafwa alaangululwa kububi bwakwe.” Aboobo baluleme aba ndyebakafwa Yehova wakabalekelela shibiibi shabo, sombi alaakwiibaluka shintu shoonse nshebakacita cakushomeka ndyebakalinga boomi. (Ebu. 6:10) Nacibi boobo, kwaamba ayi meena abaluleme aba beshibakabushikwe akatolelele kuba mulibuku lya buumi, balaakuyandika kutolelela kushomeka.

16. Ino ‘kubukila kukoomboloshekwa’ cilasansulula nshi?

¹⁶ Ino mbuyani kubaabo bakalinga kucita shintu shibiibi kabatana kufwa? Nabi kwaamba ayi bakaangululwa kushibiibi shabo ndyebakafwa, tabakwe kusebensela Yehova cakushomeka ndyebakalinga boomi. Meenaabo taalembetwe mulibuku lya buumi. Aboobo kubushikwa ‘kwabaabo bakalinga kucita shibiibi’ nkokubushikwa kwa ‘bataluleme’ baambwa pa Milimo 24:15. Kubushikwa kwabo kulaakuba ‘kubukila kukoomboloshekwa.’ * Ici cilasansulula ayi Yesu alaakubikila maano kunsheshi bakanoocita bataluleme aba. (Luka 22:30) Cilaakutola ciindi kwaamba ayi Yesu akeshibe na inga beelela kulembwa meena mulibuku lya buumi. Bataluleme aba balaakulembwabo meenaabo mulibuku lya buumi na bakakake kucita shintu  shibiibi nshobakalinga kucita kale kale alimwi akwaaba buumi bwabo kuli Yehova.

17-18. Ino abo boonse beshi bakabushikwe pacishi capanshi balaakuyandika kucita nshi, alimwi ino Ciyubululo 20:12, 13 ilaamba pa “micito” ili?

¹⁷ Baluleme nabi bataluleme beshi bakabushikwe boonse balaakuyandika kukonkela milawo yeshi ikabe mumabuku akupeta apya eshi akacalulwe mubuleelo bwa myaaka 1,000. Mutumwi Joni wakasansulula nshaakabona mucili anga nciloto ayi: “Lyalo ndakabona bafu, balemekwa abantubo, boonse kabeemfwi kunembo lya cuuna ca bwaami. Lyalo mabuku akacalulwa alimwi libuku limwi lyakacalulwa, ndyelibuku lya boomi. Bafu bakoomboloshekwa kweelana amicito yabo bweenka mbomwakalinga kulembetwe mumabuku.”​—Ciyu. 20:12, 13.

¹⁸ Ino beshi bakabushikwe balaakoomboloshekwa kweelana “amicito” ili? Sa balaakoomboloshekwa kweelana amicito njebakalinga kucita kabatana kufwa? Sobwe! Mutaluubi kwaamba ayi bakaangululwa kushibiibi shabo ndyebakafwa. Aboobo iyi teshi “micito” njebakacita kabatana kufwa. Sombi cilyeelete njimicito njeshi bakacite mucishi cipya pesule lya kwiishikwa. Kwiilikaawo, basankwa bashomeka mbuli Nowa, Samwelo, Defedi, alimwi a Danyelo abalo balaakuyandika kwiiya pali Yesu Klistu alimwi akutondesha ayi balashoma mumulambu wakwe. Na basankwa aba balaakuyandika kwiiya shiinji, nkokwaamba ayi bataluleme balaakuyandika kwiiya shiinji abuumbi!

19. Ino nciinshi ceshi cikacitike kubaabo beshi bakakake coolwe ici cilibetele?

¹⁹ Ino nciinshi ceshi cikacitike kubaabo beshi bakakake coolwe ici cilibetele? Ciyubululo 20:15 ilaamba ayi: “Uyo woonse utakwe kulembwa liina mulibuku lya boomi, wakawaalwa mulweenge lwa mulilo.” Ncakwiila balaakunyonyoolwa cakumaninina kwamuyayaya. Aboobo cilayandika abuumbi kucita nsheenga twacikonsha kwaamba ayi liina lyesu lilembwe akutolelela kuba mulibuku lya buumi!

20. Ino ni ncito nshi isangalasha yeshi ikacitwe mu Buleelo bwa Myaaka 1,000? (Amubone cikope cili papeeji yakutaanguna.)

²⁰ Cilaakuba ciindi cisangalasha abuumbi mu Buleelo bwa Myaaka 1,000! Buleelo ubu bulaakwiilikaawo a nciito inene abuumbi yakwiisha bantu itana kucitwawo kale pacishi capanshi. Sombi alimwi cilaakuba nceciindi baluleme abataluleme micito yabo ndyeshi ikalangilishikwe cakubikila maano. (Isa. 26:9; Milimo 17:31) Ino ncito iyi yakwiisha bantu ilaakucitwa buyani? Mutwi utokonkelaawo ulaakutucafwa kunyumfwisha akulumba pabubaambo ubu bubotu abuumbi.