Kweelana a 1 Bene Kolinto 15:8, Paulo wakaamba ayi: “Cakweelaako wakaboneka akuli ndime nakubi kwaamba ayi ndi anga ngumuntu utakwe kushalwa paciindi ceelete.” Kale kale twakalinga kwaamba ayi Paulo palilembo ili wakalinga kusansulula nshaakeendaamo paciindi ndyaakabona Yesu mubulemu bwa kwiculu mucili anga nciloto. Cakalinga anga wapekwa coolwe ca kushalwa, na kubushikwa kubuumi bwakumushimu myaaka iinji ciindi ca kubushikwa kwa mushobo uyu kacitana kushika. Nacibi boobo, pesule lyakwiiya shiinji pavesi iyi, citoboneka kwaamba ayi busansulushi ubu butoyandika kwaalulwa.

Ncakwiila kwaamba ayi Paulo palilembo ili wakalinga kwaamba shakamucitikila kwaamba ayi abe Mwineklistu. Ano ino wakalinga kusansulula nshi ndyaakaamba ayi “ndi anga ngumuntu utakwe kushalwa paciindi ceelete”? Inga twaamba ayi kuli sheebo shipusenepusene.

Wakaaluka akuba Mwineklistu paciindi ncaatakalinga kuyeeyela alimwi munshila iloondesha. Kushalwa paciindi citeelete liinji kulacitika cakutengashila. Saulo (uyo wakatalika kwiitwa ayi Paulo) ndyaakalinga kuya ku Damasikasi mukupensha Beneklistu, taakalinga kulangila kubona cili anga nciloto mwakabona Yesu wakabushikwa. Paulo wakaba Mwineklistu munshila ikankamika kuteshibo kuli nguwe mwiine, sombi aku Beneklistu abo mbwakalinga kuya mukupensha mundabala iyo. Kwiilikaawo, shakamucitikila shakalinga shiloondesha abuumbi cakwaamba ayi pakeenda nshiku shotatwe kaataboni.​—Milimo 9:1-9, 17-19.

Wakaaluka akuba Mwineklistu “paciindi citeelete.” Muci Giliki maswi asansululwa ayi “utakwe kushalwa paciindi ceelete” cimwi ciindi inga asansululwa ayi “mwaana wakashalwa paciindi citeelete.” Mu Baibo iitwa ayi The Jerusalem Bible maswi aya akasansululwa ayi: “Cakalinga anga ndakashalwa paciindi ndyendatakalinga kulangilwa.” Paciindi Paulo ndyaakaba Mwineklistu, Yesu kaali waboolela kale kwiculu. Mubupusano abaabo Paulo mbwakaambawo mumavesi akwisule, taakwe kumubonawo Yesu kaatana kuya kwiculu pesule lyakubushikwa. (1 Koli. 15:4-8) Yesu wakapa Paulo coolwe cakumubona kwiinda mukubonekela kuli nguwe paciindi ncaatakalinga kulangila, nabi kwaamba ayi cakalinga kuboneka anga tacakalinga “ciindi ceelete.”

Wakalinga kwaamba pali nguwe mwiine munshila ya kuliceesha. Kweelana abamwi bakeeya abuumbi, maswi Paulo ngakaamba apa inga anyumfwika anga wakalinga kulibona kuteelela. Na ubu Paulo mbwakalinga kusansulula, nkokwaamba ayi wakalinga kulibona ayi taakalinga kweelela kuba mutumwi. Alimwi wakatolelela akwaamba ayi: ‘Ceebo nebo nshiindi mutumwi nabi womwi alimwi nsheeletewo akwiitwa ayi mutumwi ceebo ndakalinga kupensha libungano lyakwe Lesa. Sombi kwiinda muluse lwakwe Lesa ndakaba mbuli mboombete bulya.’​—1 Koli. 15:9, 10.

Citoboneka kwaamba ayi Paulo wakalinga kusansulula mbwakaaluka kuba Mwineklistu alimwi a Yesu mbwakabonekela kuli nguwe paciindi ncaatakalinga kwiingashila, na ceebo ca cancine cakwaamba ayi lwakumushimu taakalinga kweelela kuyubulwitwa cintu cikankamika ici. Muli moonse mweenga cabeta, cakucitika ici cakalinga cintu ciyandika abuumbi mubuumi bwakwe Paulo. Ici cakamupa kushoma cakutatoonsha ayi Yesu wakabushikwa kuswa kubafu. Nceceeco liinji ndyaakalinga kushimikila bamwi pamakani akubuka kwakwe Yesu, wakalinga kwaamba pa cakucitika ici cakamucitikila cakutengashila.​—Milimo 22:6-11; 26:13-18.