1-2. Ino nciinshi cipa basebenshi bakwe Lesa kuba alusangalalo? (Jemusi 1:​22-25)

 YEHOVA alimwi a Mwanaakwe ngwaasuni, balisuni ayi tunoosangalala. Wakalemba Kulumbaisha 119:2 wakaamba ayi: ‘Balisangalete abo bakonkela kwiisha kwa Mwaami Lesa, abo bamunyumfwila amyoyo yabo yoonse.’ Yesu alakwe wakaamba ayi: ‘Balisangalete abo banyumfwa maswi akwe Lesa akucita mbwaamba!’—Luka 11:28.

² Basebenshi bakwe Yehova mbantu basangalete. Ino nceebonshi? Kuli sheebo shiinji shitupa kusangalala. Sombi ceebo comwi ciyandika ncakwaamba ayi tulabelenga Baibo bushiku abushiku akweelesha kukonkela nshotwiiya.—Amubelenge Jemusi 1:​22-25.

3. Ino tulafubilaamo buyani na katukonkela nshotwiiya mu Maswi akwe Lesa?

³ Na twaba ‘beshikucita shaamba maswi akwe Lesa’ tulafubilaamo munshila shiinji. Kucakubonenaako, na twakonkela nshotwiiya mu Maswi akwe Lesa, tulasangalasha Yehova alimwi kucita boobo kulatusangalasha. (Shiku. 12:13) Alimwi na katukonkela kululika kwamu Maswi akwe Lesa, tulaba abushicibusa bubotu abamumukwashi wesu abamakwesu abenankashi mulibungano. Mpashi ubu mbocibete kuli ndimwe. Kwiilikaawo, tulaleya mapensho aanji ngobalicanaamo abo batakonkeli milawo yakwe Yehova. Ishi shileendelana amaswi Mwaami Defedi ngaakaamba. Pesule lyakwaamba pa milawo, milasho akoombolosha kwakwe Yehova, wakaamba ayi: “Ndatambula cilambu cinene kwiinda mukukukonkela.”—Kulu. 19:​7-11.

4. Ino nceebonshi teshi lyoonse ndyecitubeta cuubu kukonkela nshotwiiya mu Maswi akwe Lesa?

⁴ Kwaamba ayi tube beshikucita shaamba Maswi akwe Lesa, tulayandika kubelenga akwiiya Baibo kwaamba ayi tunyumfwishishe Yehova nshaasuni ayi tunoocita. Sombi teshi lyoonse ndyecitubeta cuubu kucita boobo ceebo cakwaamba ayi tulicite shakucita shiinji mubuumi. Aboobo tulyeelete kunoocana ciindi cakubelenga  akwiiya Baibo. Amuleke tubandike pashintu shimwi sheenga shatucafwa kunobelenga Baibo bushiku abushiku. Alimwi tutobandika asheenga shatucafwa kunookutumana kuyeeya pa nshotubelenga akubona mbweenga twashikonkela mubuumi bwesu.

AMUCANE CIINDI CAKUBELENGA MASWI AKWE LESA

5. Ino njimikuli nshi imwi njotucite ipa kwaamba ayi cinootubeta ciyumu kucana ciindi cakubelenga Baibo bushiku abushiku?

⁵ Basebenshi bakwe Yehova baanji balicite shakucita shiinji mubuumi. Tulatola ciindi cinene kucita shintu Baibo nshoyaamba ayi shilayandika. Kucakubonenaako, sobaanji tulasebensa ncito yakumubili kwaamba ayi tunoolilama akulangweta mukwashi wesu shiyandika. (1 Timo. 5:8) Beneklistu baanji balalama beshikamukowa balwashi na bacinene. Alimwi soonse tulayandika kucita sheenga shapa kwaamba ayi tube abuumi buli kabotu, alimwi kucita shintu isho kulayandika ciindi. Kwiilikaawo, tulicite mikuli iyandika njotuyandika kukumanisha mulibungano. Mukuli womwi uyandika abuumbi ngotucite, nkucita nsheenga twacikonsha kushimikilako bamwi makani abotu. Ano nabi kwaamba ayi mulicite shakucita shiinji, ino inga mwacita buyani kwaamba ayi munoocana ciindi cakubelenga Baibo bushiku abushiku, kukutumana kuyeeyawo alimwi akukonkela nshemwiiya?

6. Ino inga mwacita buyani kwaamba ayi mushinishe kunobelenga Baibo bushiku abushiku? (Amubone acikope.)

⁶ Kubelenga Baibo ncintu comwi ‘ciyandika abuumbi’ kuli ndiswe so Beneklistu, aboobo tulayandika kunoocana ciindi cakucita boobo. (Filip. 1:10) Kwaamba pamuntu usangalala, libuku lya Kulumbaisha lilaamba ayi: ‘Alacana lusangalalo mumilawo yakwe Lesa alimwi alaibelenga akukutumana kuyeeyawo mashiku amalumwi.’ (Kulu. 1:​1, 2) Ici cilaamba ayi tulyeelete kunoocana ciindi cakubelenga Baibo. Ino nciindi nshi cili kabotu kubelenga Baibo kuli ndimwe? Womwi awomwi inga walisalila ciindi ndyeenga kaacita boobo. Sombi ciyandika abuumbi nkusala ciindi ndyeenga twacikonsha kunobelenga Baibo bushiku abushiku. Mukwesu waliina lya Victor wakaamba ayi: “Ndasuna kubelenga Baibo macuunsa. Nabi kwaamba ayi nshinyumfwi kabotu kufuma kubuka, macuunsa nciindi cili  kabotu mukwiinga nshipilinganishikwi bunene. Miyeeyo ilaba kailibambite kwiiya alimwi cilambeta cuubu kubikila maano ku nshontobelenga.” Mpashi andimwe ici ncociindi ndyemubelenga Baibo. Amuliipushe ayi, ‘Ino nciindi nshi cili kabotu kuli ndime ndyeenga kaambelenga Baibo?’

AMUKUTUMANE KUYEEYA PA NSHOMWABELENGA

7-8. Ino nciinshi ceenga capa kwaamba ayi tutafubiliimo abuumbi mu nshotwabelenga? Amwaambe cikoshanyo.

⁷ Na mwasala ciindi cakubelenga Baibo, kuli cintu cimwi ncomweelete kucenjela. Sa mwakabelengawo kale makani amwi, lyalo ndyepakeendabo ciindi ciniini mwaluba nshomwabelenga? Soonsebo ici cakatucitikilaawo. Ici inga cacitika andyetutobelenga Baibo. Kucakubonenaako, mpashi inga twasalawo kunobelenga macapita aanji amu Baibo pabushiku. Kucita boobo kulibo kabotu. Tulayandika kusala shakucita akweelesha kushikumanisha. (1 Koli. 9:26) Sombi na tulisuni kwaamba ayi tufubileemo abuumbi ndyetutobelenga Baibo, tatweelete kweelabo pa kwiibelenga.

⁸ Amuyeeye pacikoshanyo ici: Shishango shilayandika maanshi kwaamba ayi shikule kabotu. Sombi na imfula yaloka abuumbi muciindi ciniinibo, maanshi alacileka kunjila paanshi. Na ico cacitika, maanshi aanji inga taapi kwaamba ayi shishango shikule kabotu. Cilabota na imfula kailoka kabotu mukwiinga maanshi alanjila paanshi akupa kwaamba ayi shishango shikule kabotu. Aswebo tulayandika kuleya kubelenga Baibo calubilo cakwaamba ayi twaalilwa kukutumana kuyeeyawo, kwiibaluka nshotwabelenga akushikonkela.—Jemu. 1:24.

9. Ino tulyeelete kucita buyani na twashiiba ayi tulabelenga Baibo calubilo?

⁹ Sa cimwi ciindi mulabelenga Baibo calubilo kwaamba ayi mumanishebo lubasu ndomutobelenga? Ino mulyeelete kucita buyani? Amutalike kubelenga cakukalika moyo. Amweeleshe kukutumana kuyeeya pa nshemutobelenga na nshomwaswabo mukubelenga. Kucita boobo teshi ciyumu. Inga mwasalawo kunootola ciindi cilaamfuko ndyemutobelenga Baibo kwaamba ayi mube aciindi cakukutumana kuyeeyawo. Na mpashi inga mwasalawo kunobelenga mavesi aniini lyalo ciindi cacaala mwacisebensesha kukutumana  kuyeeya pa nshomwabelenga. Ba Victor abo mbotwalinga twaambaawo bakaamba ayi: “Ndabelenga mavesi aniini amu Baibo, mpashi capita yomwibo. Ceebo cakwaamba ayi ndabelenga Baibo macuunsacuunsa, bushiku boonse ndacikonsha kukutumana kunoyeeyawo pa nshendabelenga.” Inga mwalisalila kufula kwa mavesi ngeenga mwabelenga. Sombi ciyandika nkubelenga cakukalika moyo kwaamba ayi mucikoonshe kukutumana kuyeeya pa nshemutobelenga.—Kulu. 119:97; amubone kabokosi kacite mutwi utokwaamba ayi “ Miipusho Njeenga Mwaliipusha.”

10. Amwaambe cakubonenaako ca mbweenga mwakutumana kuyeeya pa nshomwabelenga akushikonkela. (1 Bene Tesalonika 5:​17, 18)

¹⁰ Na mwabelenga mavesi amwi amu Baibo, amuyeeye mbweenga mwakonkela nshomwabelenga. Ndyemutobelenga Maswi akwe Lesa, amuliipushe ayi, ‘Ino makani aya inga ndaakonkela buyani pacecino ciindi na kunembo?’ Kucakubonenaako, amuyeeye ayi mwabelenga 1 Bene Tesalonika 5:​17, 18. (Amubelenge.) Pesule lyakubelenga mavesi aya, inga mwakutumana kuyeeya pakufula kwa mankanda ndyemupaila a na mipailo yanu ilaswa paanshi lyamoyo. Alimwi inga mwayeeya pashintu nshomulumba. Mpashi inga mwasalawo kulumba Yehova pashintu shotatwe shimwi. Nabi kwaamba ayi mwatolabo mamineti aniini kuyeeya pa nshomweeya mu Baibo, kucita boobo kulaakumucafwa kunyumfwishisha Maswi akwe Lesa akukonkela nshemwiiya. Alimwi na bushiku abushiku kamukonkela nshemubelenga mu Baibo, mukuya kwaciindi mulaakuba musebenshi wakwe Yehova ucita shaamba Maswi akwe Lesa. Ano ino nshiinshi nshomweelete kucita na kuli shiinji nshomutoyandika kusebenselaawo?

AMUSALE NSHEENGA MWACIKOONSHA KUKUMANISHA

11. Ino nceebonshi cimwi ciindi inga mwalinyumfwa kulefuka? Amwaambe cakubonenaako.

¹¹ Na mwabelenga Baibo, mpashi cimwi ciindi inga mwalefuka ceebo cakushiba ayi kuli shiinji nshemutoyandika kusebenselaawo. Amuyeeye pacakubonenaako ici: Amuyeeye ayi bushiku bwakutaanguna mwabelenga makani amu Baibo aamba pakuleya kuba akasalulushi. (Jemu. 2:​1-8) Mwaboona ayi mutoyandika kwaalulako nshomucita kubamwi, lyalo mwacitawo comwi. Ingayi mwacita kabotu! Lyalo bushiku bwabili mwabelenga mavesi aamba pakuyandika kwa kusala kabotu shakwaamba. (Jemu. 3:​1-12) Mwashiiba ayi cimwi ciindi mulaamba maswi atabete kabotu na eenga alefula bamwi. Aboobo mwasalawo ayi munanokweelesha cankusu kwaamba maswi ayuminisha ndyemutobandika abamwi. Bushiku bwatatu ndyemutobelenga Baibo, mwabelenga makani atucenjesha kutaba bushicibusa acishi. (Jemu. 4:​4-12) Lyalo mwaboona ayi mutoyandika kunoosala kabotu nshomubelenga, nshomweebela anyimbo nshomukutika. Kusa mukushika pa bushiku bwane, mpashi inga mwalinyumfwa ayi nciyumu abuumbi kusebenselaawo pasheeshi shoonse.

12. Ino nceebonshi tamweelete kulefuka na ndyemutobelenga Baibo mwashiiba ayi kuli mbasu shimwi nshomutoyandika kusebenselaawo? (Amubone amakani amweela.)

 ¹² Na kuli shiinji nshomutoyandika kusebenselaawo, mutalefuki. Ubu mbumboni butondesha ayi mulaliceesha alimwi mulabelenga Baibo aluyaando luli kabotu. Na tulaliceesha, tulaakunobelenga Malembo aluyaando lwa kubona mbasu nshetutoyandika kusebenselaawo. a Alimwi munokwiibaluka ayi tulyeelete kutolelela ‘kufwala buntu bupya.’ (Kolo. 3:10) Ino nciinshi ceshi cikamucaafwe kutolelela kucita shaamba Maswi akwe Lesa?

13. Ino ninshila nshi ibotu yeenga yamucafwa kukonkela nshemwiiya? (Amubone acikope.)

¹³ Muciindi cakweelesha kukonkela shoonse nshomweeya paciindi comwi, amusale cintu comwi nabi shobilo nsheenga mwataanguna kusebenselaawo. (Tus. 11:2) Amweeleshe kucita sheeshi: Amulembe mulongo wa shintu nshomutoyandika kusebenselaawo lyalo amusalewo comwi na shobilo nshomusuni kutaanguna kusebenselaawo. Shacaala inga mwasebenselaawo panembo. Ino nciinshi nceenga mwataanguna kusebenselaawo?

14. Ino nshiinshi nsheenga mwataanguna kusebenselaawo?

¹⁴ Inga mwasalawo kutaanguna kusebensela pacintu ncomutoobona ayi ncuubu. Na mpashi inga mwasalawo kusebensela palubasu ndomutoobona ayi mutoyandika kusebensealawo abuumbi. Na mwasalawo ncomusuni kusebenselaawo, amulangoole makani mumabuku esu mpashi kwiinda mukusebensesha Watchtower LAIBULALI YAPA INTANETI na libuku lyamu Chitonga lyaamba ayi Bbuku Ligwasya Kuvwuntauzya lya Bakamboni ba Jehova. Amupailileewo paceeco ncomusuni kucita akusenga Yehova kwaamba ayi amupe ‘kusuna ankusu shakucita.’ (Filip. 2:13) Lyalo amweeleshe kukonkela nshomweeya. Na  mwacikonsha kusebensela palubasu ndomwakasala pakutaanguna na kunotondesha mubo umwi wa Bwineklistu, mulaakuyuminishikwa kutolelela kusebensela apa mbasu shimwi. Alimwi mpashi cilaakumubeta cuubu kucita boobo.

AMUSUMINISHE MASWI AKWE LESA ‘KWAALULA BUUMI BWANU’

15. Ino basebenshi bakwe Yehova balipusene buyani abantu bamwi baanji babelenga Baibo? (1 Bene Tesalonika 2:13)

¹⁵ Bantu bamwi bakabelenga Baibo mankanda aanji. Ano sa ncakwiila balashoma Baibo nshoyaamba? Sa balakonkela nshoyaamba akwaalula buumi bwabo? Sobwe. Bantu baanji tabakonkeli Baibo nshoyaamba. Ano mubupusano, basebenshi bakwe Yehova balakonkela Baibo nshoyaamba! Bweenka mbuli Beneklistu bakutaanguna, tulashoma Maswi akwe Lesa “bweenka mbwaabete, ncakwiila ayi ngakwe Lesa.” Kwiilikaawo, tulacita nsheenga twacikonsha kukonkela kululika kwamu Baibo mubuumi bwesu.—Amubelenge 1 Bene Tesalonika 2:13.

16. Ino nshiinshi nsheenga twaciita kwaamba ayi tube beshikucita shaamba Maswi akwe Lesa?

¹⁶ Teshi lyoonse ndyeciba cuubu kubelenga akukonkela nshotwiiya mu Maswi akwe Lesa. Mpashi inga catuyumina kucana ciindi cakubelenga. Na mpashi inga katubelenga Baibo calubilo cakwaamba ayi katwaalilwa kukutumana kuyeeya pa nshotubelenga. Alimwi mpashi inga twalinyumfwa kulefuka ceebo cakwaamba ayi kuli shiinji nshetutoyandika kusebenselaawo. Tacicite mulandu asheenga shapa kwaamba ayi munookwaalilwa kubelenga Baibo bushiku abushiku, Yehova inga wamucafwa. Atube bashinishite kusumina lucafwo lwakwe Yehova akuleya kuba beshikukutikabo Maswi akwe, sombi kuba beshikucita nshaamba. Ncakutatoonsha kwaamba ayi, tulaakuba bantu basangalete na katubelenga Maswi akwe Lesa akukonkela nshaamba mubuumi bwesu.—Jemu. 1:25.