Ndakashalwa mu 1934. Bashali bangu bakalonga kuswa ku Switzerland kuya ku Canada akutalika kukala mutauni ya Timmins muli maini, iyo ili kumusena wiitwa ayi Ontario. Pafwiifwi amwaaka wa 1939, bama bakatalika kubelenga magazini ya Njashi Yamulindilishi akutalika kucanika kumabungano a Bakamboni Bakwe Yehova. Twakalinga kuya kumabungano pomwi ambabo soonse sobaana sotuli 7. Ndyepakeendabo ciindi ciniini, bakaba womwi wa Bakamboni Bakwe Yehova.

Bata tabakwe kukondwa bama ndyebakasalawo kuba Kamboni, sombi bama bakalinga kucisuni cancine alimwi bakalinga kushinishite kutolelela kushomeka kuli Yehova. Bakacita boobo nabi kwaamba ayi kumatalikilo kwamyaaka yamuma 1940, incito ya Bakamboni Bakwe Yehova yakalinga yakashikwa mu Canada. Alimwi lyoonse bakalinga kucita shibotu kuli bata akubatondesha bulemu nabi kwaamba ayi bakalinga kubalwiita maswi atabete kabotu. Cakubonenaako cabo cibotu cakatucafwa soonse sobaana kusalawo kusebensela Yehova. Mukuya kwaciindi twakasangalala abuumbi bata ndyebakaaluka akutalika kutondesha nkuumbu ku bamumukwashi wesu.

Mu August mumwaaka wa 1950, ndakacanika kukubungana kunene kwakalinga mutauni ya New York, kwakalinga kucite mutwi wakalinga kwaamba ayi “Theocracy Increase.” Ndakayuminishikwa abuumbi kucita shiinji muncito yakwe Yehova, pesule lya kubonana abamakwesu abenankashi bakaswa mushishi shipusenepusene akukutika ku mbasu shisangalasha shakwiipusha miipusho abo bakamanisha Cikolo ca Gilyadi! Ndakaba ushinishite kutalika ncito ya ciindi coonse. Ndyendakaboolelabo kuŋanda, ndakalemba foomu yakutalika bupainiya bwaciindi coonse. Baku ofesi yamusampi waku Canada bakandembela nkalata akundwiita ayi ndyeelete kutaanguna kubombekwa. Ndakacita  boobo pa 1 October, 1950. Ndyepakeendabo mweenshi womwi, ndakatalika bupainiya bwaciindi coonse alimwi ndakapekwa ncito yakuya mukusebensa mbuli painiya mutauni ya Kapuskasing. Tauni iyi yakalinga kulaamfu abuumbi ankondakalinga kukala.

Mu 1951 baku ofesi yamusampi bakasenga Bakamboni bacikonsha kwaamba ciFrench na inga balyaaba kuya mukusebensela kumusena wa Quebec bantu nkobaamba ciFrench. Kumusena uku kwakalinga kuyandika beshikushimikila baanji. Ndakalinga kucishi kwaamba ciFrench a Cisungu, aboobo ndakasumina kuya mukusebensela kumusena uku lyalo bakantuma mutauni ya Rouyn. Taakuwo ngondakalinga kushi kumusena uku. Ndakalinga kushibo ŋanda mpondakalinga kweelete kuya bweenka mbondaambaawo kumatalikilo. Sombi shoonse shakeendabo kabotu. Nebo aba Marcel twakatalika kunyumfwana abuumbi, alimwi ndakasangalala kusebensela mu Quebec kwamyaaka ili 4 yakakonkelawo, andyendakatalika kusebensa mbuli painiya ulibetele.

Ndyendakalinga ku Quebec, ndakasangalala abuumbi kutambula nkalata yakunjita kuya mukucanika ku Cikolo ca Gilyadi ca namba 26 ku South Lansing mu New York. Twakamanisha cikolo ici pa 12 February, 1956 alimwi bakantuma kuya kumusebensela kucishi pacecino ciindi ciitwa ayi Ghana, b ico cili kumbo lya Africa. Sombi kaantana kuya ndakalinga kweelete kuboolela ku Canada kulindila kwaamba ayi nkabe ashipepa shakalinga kuyandika kwaamba ayi ndongele ku Ghana. Ndakalinga kuyeeya ayi ntookalabo nsondo shobilo na shotatwe mu Canada.

Ndakalindila kwamyeenshi ili 7 mu Toronto kwaamba ayi ntambule shipepa isho. Paciindi ici ndakalinga kukala amukwashi waba Cripps alimwi ndakashibana a Sheila mwanaabo mwanakashi. Ndakamusuna kwaamba ayi kunembo tukeebane. Ndyendakalinga kusunibo kumulwiita ayi tweebane, ndakatambula cipepa ca kunsuminisha kuya kucishi cimwi. Nebo aba Sheila twakapaililaawo pamakani aya akusalawo ayi nje nkobakantuma. Sombi twakasalawo ayi tulakunoolembelana makalata akubona na tulakweebana kunembo. Ici tacakalinga cakusala cuubu, sombi mukuya kwaciindi twakesa mukushiba ayi twakasala kabotu.

Pesule lyakweenda kwa mweenshi womwi kusebensesha sitima, bwaato bunyamuna shintu alimwi a ndeke, ndakashika mu tauni ya Accra mucishi ca Ghana.  Ndyendakashika ndakapekwa ncito yakusebensa mbuli shikufwakashila bamatanjilili balubasu. Aboobo ndakalinga kuya mumisena ipusenepusene mucishi ca Ghana amushishi shili pafwiifwi mbuli Ivory Coast (pacecino ciindi ciitwa ayi Côte d’Ivoire) alimwi a cakalinga kwiitwa ayi Togoland (pacecino ciindi ciitwa ayi Togo). Liinji ndakalinga kweendabo neenka kusebensesha motoka yamusampi. Ndakalinga kusangalala abuumbi kufwakashila bamakwesu abenankashi!

Pacibelu a Pasondo, ndakalinga kuba ambasu pakubungana kwalubasu. Tetwakalinga kucitewo misena yakayakwa mwakucitila mabungano anene. Aboobo bamakwesu bakalinga kupanga pulatifomu ya nteele akuyalaawo matewu ashipukupuku kwaamba ayi bapange cimfule. Ceebo cakwaamba ayi takwakalingawo ma filiji akulaminamo nyama mobakalinga kuulishila shakulya, bamakwesu bakalinga kulama shinyama pafwiifwi kwaamba ayi abo bacanikaako kukubungana banocaya na bayandika kulya nyama.

Kuli shintu shimwi shisekesha shakalinga kucitika pakubungana kwalubasu nkotwakalinga kubaako. Ba Herbert Jennings c abalo bakalinga kusebensa mbuli mishonali ndyebakalinga kwaamba likani, ŋombe imwi yakaswaamo mobakalinga kushilamina. Yakacicila pakati ka pulatifomu abantu. Ba Herbert bakacileka kwaamba lyalo ŋombe yakatalika kuboneka anga yasoweka. Sombi bamakwesu bali 4 bacite nkusu bakacikonsha kwiiboosha moshakalinga kulaminwa ŋombe, bantu bakalinga mulikoto kabaseka.

Munsondo ndyetwakalinga kuba akubungana kwalubasu, ndakalinga kutondesha bantu bakalinga kukala mumishi ili kufwiifwi filimu yakalinga kwaamba ayi Libunga Lyakwe Yehova Mbolitosebensa. Kwaamba ayi ncite boobo, ndakalinga kwaanga cisani cituba kutusamu tobilo twakushimpika na kushisamu shobilo shiimfwi, lyalo akutalika kubeebelesha filimu kusebensesha pulojekita. Bamumishi bakalinga kusangalala! Baanji nje filimu yakutaanguna kubonaawo. Bakalinga kukaamba mumaansa abuumbi na babona bantu batobombekwa mu filimu. Filimu iyi yakacafwa bantu bakalinga kuyeebela kushiba ayi Bakamboni Bakwe Yehova bakalinga kucatene nsengwe yoonse.

Pesule lyakukala pafwiifwi amyaaka yobilo mu Africa, mu 1958 ndakasangalala kucanika kukubungana kunene kwabaabo baswa mushishi kwakabeta mutauni ya New York. Ndakasangalala abuumbi kubonana aba Sheila, abo bakaswa ku Quebec uko nkobakalinga kusebensa mbuli painiya ulibetele. Twakalinga kubandikishanyaabo kusebensesha makalata, sombi paciindi ici twakabonana alimwi. Alimwi ndakabasenga na inga tweebana lyalo bakasumina. Ndakalembela nkalata mukwesu Knorr d kumusenga na ba Sheila inga bacanikako ku Cikolo ca Gilyadi kwaamba ayi bakese tukatalike kusebensela pomwi mu Africa. Mukwesu Knorr wakasumina.  Ba Sheila bakesa ku Ghana. Pa 3 October, 1959 twakeebana ndyetwakalinga mutauni ya Accra. Twakalinyumfwa ayi Yehova watupa shoolwe ceebo cakwaamba ayi twakabika sha Bwaami panembo mubuumi bwesu.

Mu 1961 twakatumwa kuya mukusebensela ku cishi ca Cameroon. Bamakwesu bakansenga ayi nje mukucafwilisha kutalikisha maofesi amusampi apya, aboobo ndakalinga kucite shakucita shiinji. Mbuli musebenshi wa musampi mupya, ndakalinga kweelete kwiiya shiinji. Lyalo mu 1965 twakesa mukushiba ayi ba Sheila balicite lifumo. Kwaamba cancine, kuyeeya ayi tulaakuba bashali cakalinga ciyumu kuli ndiswe. Sombi ndyetwakatalikabo kusangalala ayi tulaakuba bashali alimwi katuyeeya kuboolela ku Canada, cintu cibiibi abuumbi cakacitika.

Mwaana ba Sheila ngobakalinga kumitite wakeendilila. Ba dokota bakatulwiita ayi mwaana wakeendilila wakalinga musankwa. Peenda myaaka 50 kuswa ndyeshakacitika ishi, sombi kushika asunu tuciibaluka. Nabi kwaamba ayi shakatucitikila shakatupa kulinyumfwa cibiibi abuumbi, twakatolelela kusebensa ncito njotwakapekwa iyo njotwakalinga kusuni abuumbi.

Mu Cameroon liinji bamakwesu bakalinga kupenshekwa ceebo cakukaka kwaabanamo lubasu mushamapolitiki. Shintu shakalinga kubica abuumbi bunene bunene na batovoota kwaamba ayi basale pulesidenti. Pa 13 May, 1970 kwakacitika cintu ncotwatakalinga kulangilaawo. Mfulumeende yakakasha ncito ya Bakamboni Bakwe Yehova. Alimwi yakatunyaya musampi wesu upya ubotu, umo motwakekalabo kwamyeenshi 5. Nsondo yomwibo kaitana kumana, bamishonali boonse kwiilikaawo aba Sheila andime bakatutandaamo mucishi. Cakalinga ciyumu abuumbi kushiya bamakwesu abenankashi mukwiinga twakalinga kubasuni abuumbi alimwi twakalinga kulisukama sheshi shikabacitikile.

Mu myeenshi 6 yakakonkelawo twakekala ku ofesi yamusampi waku France. Ndyetwakalinga kumusampi uyu, ndakatolelela kucita nsheenga ndacikonsha kucafwa bamakwesu baku Cameroon. Mu December mumwaaka weenka uyu ndyetwakaswa ku Cameroon, bakatutuma kuya mukusebensela ku musampi waku Nigeria uyo wakatalika kutanjilila ncito yesu mu Cameroon. Bamakwesu abenankashi baku Nigeria bakatutambula kabotu abuumbi alimwi twakasangalala kusebensela pomwi ambabo kwamyaaka iinji.

Mu 1973 twakalinga kweelete kusalawo cakucita ciyumu abuumbi. Ba Sheila bakalinga kuciswa abuumbi. Ndyetwakalinga kukubungana kunene ku New York, bakalila akundwiita ayi: “Inga nshicikoonshi kutolelela kusebensa ncito iyi! Liinji ndalinyumfwa kulema alimwi ndaciswa ciswa.” Bakasebensela pomwi andime kwamyaaka iindilila 14 kulubasu lwa kumbo lya Africa. Ndakalinga kusangalete kubona mbobakalinga kusebensa cakushomeka, sombi twakalinga kuyandika kwaalulako shimwi. Pesule lyakubandikawo akupaililawo abuumbi pabukaalo bwesu, twakasalawo kuboolela ku Canada kwaamba ayi bakashilikwe kabotu. Kucileka kusebensa bumishonali akucileka kusebensa ncito yaciindi coonse cakalinga cintu ciyumu abuumbi ncotwakasalawo kucita mubuumi bwesu.

Ndyetwakaboolela ku Canada, ndakatalika kusebensa ncito kuli shicibusa umwi wakale kale uyo wakalinga kuulisha myotoka mutauni ya Toronto kumatwa. Twakatalika kucita lenti ŋanda akuula shintu sha muŋanda bamwi nshobakasebenseshawo kale. Aboobo twakacikonsha kutalika buumi bupya kwakubula kunjila munkongole. Twakalinga kusuni kukala buumi  bwakutalila shiinji mukwiinga twakalinga kulangila ayi bushiku bumwi inga twatalika alimwi kusebensa ncito yaciindi coonse. Twakankamana ndyetwakatalika kusebensa ncito yaciindi coonse ndyepakeendabo ciindi ciniini mubupusano ambotwakalinga kulangila.

Ndakatalika kucafwilishako lyoonse Pasondo nkobakalinga kuyaka musena mwakucitila mabungano anene ku Norval, mu Ontario. Mukuya kwa ciindi, ndakapekwa ncito yakutalika kulama musena mwakucitila mabungano anene. Ba Sheila bakatolelela kuya cilinyumfwako kabotu alimwi twakabona ayi inga bacikonsha kusebensa ncito iyi ipya. Aboobo mu June 1974, twakalongela muŋanda yakalinga pamusena mpotucitila mabungano anene. Twakasangalala abuumbi kutalika alimwi kusebensa ncito yaciindi coonse!

Cakabota ncakwaamba ayi ba Sheila bakatolelela kuya ciba kabotu. Ndyepakeenda myaaka yobilo, twakasumina ndyebakatupa ncito yakutalika kufwakashila mabungano. Twakalinga kufwakashila mabungano akalinga kumusena wiitwa ayi Manitoba, musena wamu Canada kushikutontola abuumbi. Nacibi boobo, bamakwesu abenankashi bakalinga kututondesha lusuno abuumbi. Twakeeya ayi ciyandika abuumbi nkutolelela kusebensela Yehova, tacicite mulandu amusena nkotubete.

Pesule lyakusebensa myaaka iinji muncito yakufwakashila mabungano, mu 1978 bakatwiita kuya mukusebensela pa musampi waku Canada. Kapatana kwiinda aciindi cilaamfu, ndakeeya ciiyo ciyandika sombi ciyumu. Ndakapekwa coolwe cakwaamba likani lya liwoola lyomwi amamineti 30 mu ciFrench pakubungana kulibetele kwakabeta ku Montreal. Cakabicaako ncakwaamba ayi, bantu tabakwe kutolelela kukutika kulikani ndyendakaamba alimwi mukwesu womwi wakalinga kusebensela mu Dipatimenti ya Ncito wakandulika ceebo ca mbondakaamba likani. Kwaamba lushinisho, ndyendakalulikwabo ndakalinga kweelete kushiba ayi nshicishi kabotu kwaamba makani. Sombi nshina kukutambula kabotu kululikwa uku. Mubandi wesu taukwe kweenda kabotu alimwi ndakakalala mukwiinga ndakalinga kuyeeya ayi wakalinga kushupite alimwi taakwe kwaambawo pa mbasu mondakacita kabotu. Ndakabisha kubikila maano kunshila mbondakalulikwa ambondakalinga kulinyumfwa pa mukwesu uyo wakandulika.

Ndyepakeendabo nshiku shiniini, womwi waba mu Komiti ya Musampi wakabandika andime pashakacitika. Ndakasumina ayi nshina kucita kabotu ndyendakalulikwa alimwi ndakasenga kulekelelwa. Lyalo ndakabandika amukwesu wakandulika. Wakandekelela ca nkuumbu. Shakacitika ishi shakancafwa kubona kuyandika kwa kuliceesha alimwi teshi nkalubewo shakacitika. (Tus. 16:18) Mankanda aanji ndakapaila kuli Yehova pamakani aya alimwi ndishinishite kuleya kubona kululikwa munshila itabete kabotu.

Ndasebensela pa musampi waku Canada kwamyaaka iindilila 40 ano, alimwi kuswabo mu 1985 ndicite coolwe cakusebensela mu Komiti Yamusampi. Mu February 2021 ba Sheila bakaangu mbondakalinga kusuni abuumbi bakafwa. Ndabayeeya abuumbi alimwi anebo ndaciswa bulwashi bumwi. Sombi ndicite shakucita shiinji muncito yakwe Yehova alimwi ndisangalete cakwaamba ayi ‘nshiboni anshiiku mboshitokweenda.’ (Shiku. 5:20) Nabi kwaamba ayi ndicite mapenshi aanji mubuumi, kuli shintu shiinji shinsangalasha. Ncoolwe cinene abuumbi kubika Yehova panembo mubuumi bwangu alimwi akumusebensela mu ncito yaciindi coonse kwamyaaka 70. Ndapaila ayi bamakwesu abenankashi bacanike, batolelele kubika Yehova panembo mukwiinga ndishomete cakutatoonsha ayi abalo balaakucana shoolwe akukala buumi busangalasha ceebo cakusebensela Yehova.