1-2. Ino nceebonshi Yehova wakatulenga munshila yakwaamba ayi tunoosangalala na twapako bamwi?

 YEHOVA wakatulenga munshila yakwaamba ayi katusangalala abuumbi na twapako bamwi kwiinda mbotusangalala na twapeekwa. (Milimo 20:35) Ano sa ici cilaamba ayi tatusangalali na muntu watupa cipo? Sobwe. Soonse tulasangalala na twapekwa cipo. Sombi tuleendaawo kusangalala na twapako bamwi. Alimwi ncibotu kwaamba ayi Yehova wakatulenga munshila iyi. Ino nceebonshi?

² Ceebo cakwaamba ayi Yehova wakatulenga munshila iyi, inga twacitawo comwi kwaamba ayi tunoosangalala abuumbi. Inga twaba alusangalalo abuumbi na twayeeya panshila mbweenga twapako bamwi lyalo akucita boobo. Cilasangalasha kwaamba ayi Yehova wakatulenga munshila iyi.—Kulu. 139:14.

3. Ino nceebonshi Yehova ncaabetele “Lesa usangalete”?

³ Ceebo cakwaamba ayi Baibo ilatulwiita ayi abo bapako bamwi balaba alusangalalo, inga catubeta cuubu kunyumfwishisha Yehova ncabetele “Lesa usangalete.” (1 Timo. 1:​11, NWT) Ngowakalinga wakutaanguna kupa bamwi alimwi taakuwo upa kwiinda Yehova. Yehova wakatupa buumi alimwi ceebo ca nguwe “tuleenda alimwi akuba mbuli mbotubete.” (Milimo 17:28) Ncakutatoonsha kwaamba ayi “shipo shoonse shibotu shitacite kampenda” shilaswa kuli Yehova.—Jemu. 1:17.

4. Ino nciinshi ceshi cikatucaafwe kunooba alusangalalo abuumbi?

⁴ Soonse mpashi inga twasuna kuba alusangalalo abuumbi ulo ndotubaalo na katupako bamwi. Inga twacita boobo kwiinda mukukonkela cakubonenaako cakwe Yehova cakutondesha mushimu wa bwaabi. (Efe. 5:1) Mumutwi uyu, tutokwiiya pacakubonenaako cakwe cibotu cakutondesha mushimu wa bwaabi alimwi ansheenga  twaciita na tutolinyumfwa ayi bamwi tabatulumbi pashintu nshotubacitila. Kucita boobo kutotuyuminisha kutolelela kunoopako bamwi lyalo akuba alusangalalo.

AMUBE BAABI BWEENKA MBULI YEHOVA

5. Ino nshintu nshi shimwi Yehova nshaatupa?

⁵ Ino nshintu nshi shimwi Yehova nshaatupa? Atubandike pashakubonenaako shiniini. Yehova alatupa nshetuyandika lwakumubili. Inga tatubi ashintu shiinji lwakumubili, sombi Yehova alashinisha kwaamba ayi lyoonse katuba anshetuyandika. Kucakubonenaako, alatucafwa kuba ashakulya, shakufwala amwakukala. (Mate. 6:​31-33; 1 Timo. 6:​6-8) Sa Yehova alatupa nshetuyandika lwakumubili ceebo cakwaamba ayi alyeeletebo kucita boobo? Sobwe napaceyi! Aboobo ino nceebonshi Yehova alatupa nshetuyandika?

6. Ino Mateyo 6:​25, 26 ilatwiisha nshi?

⁶ Yehova alatupa nshetuyandika lwakumubili mukwiinga alitusuni. Amuyeeye pa maswi Yesu ngakaamba ngotucana pa Mateyo 6:​25, 26. (Amubelenge.) Yesu wakaamba pashintu Lesa nshaakalenga. Kucakubonenaako, Yesu wakaamba pa bayuni ayi: “Tabashangi, tabatebuli nabi kubika mumatala.” Nacibi boobo, amunyumfwe maswi atokonkelaawo ngakaamba: “Ishiwanu uli kwiculu ulabasanina.” Lyalo Yesu wakeepusha bakalinga kumukutika ayi: “Sa mwebo tamuyandiki kwiinda bayuni?” Ino wakalinga kutwiisha nshi? Basebenshi bakwe Yehova balayandika abuumbi kuli nguwe kwiinda bayuni. Aboobo na Yehova alababikilako maano bayuni, inga twashoma ayi alaakunootupa nshetuyandika! Bweenka mbuli mushali musankwa ulama kabotu mukwashi wakwe, Yehova alapa mukwashi wakwe nshoyandika ceebo ca lusuno.—Kulu. 145:16; Mate. 6:32.

7. Ino ninshila nshi yomwi mbotukonkela cakubonenaako cakwe Yehova cakutondesha mushimu wa bwaabi? (Amubone acikope.)

⁷ Bweenka mbuli Yehova, inga twapako bamwi nshebatoyandika ceebo cakwaamba ayi tulibasuni. Kucakubonenaako, sa mulishiko mukwesu nabi nankashi utoyandika shakulya nabi shakufwala? Yehova inga wasebensesha ndimwe kwaamba ayi mucafwe mushominyinaanu uyo. Alimwi bantu bakwe Yehova balafwambaana kucafwako bamwi na kwacitika mapensho akuteengashila. Kucakubonenaako, paciindi ca bulwashi bwa COVID-19, bamakwesu abenankashi bakacafwa baabo bakalinga kuyandika lucafwo kwiinda mukubapako shakulya, shakufwala ashintu shimwi shakusebensesha. Alimwi baanji bakapa maali mukuliyandila akucafwilisha ncito icitwa nsengwe yoonse. Maali ayo akasebenseshekwa kucafwilisha bamakwesu bakalinga kuyandika lucafwo nsengwe yoonse ceebo ca mapensho acitika cakuteengashila. Bamakwesu abenankashi abo  bakatondesha mushimu wa bwaabi kwiinda mukukonkela maswi ngotucana pa Bene Ebulu 13:16 paamba ayi: ‘Mutaluubi kucita shibotu alimwi akupako bamwi shintu nshemucite, ceebo iyi njemilambu isangalasha Lesa.’

8. Ino Yehova alatupa nkusu shakucita nshi? (Isaya 40:29)

⁸ Yehova alatupa nkusu. Yehova alicite nkusu shiinditeewo alimwi alasangalala kupako nkusu basebenshi bakwe bashomeka. (Amubelenge Isaya 40:29.) Sa mwakapailawo kale kuli Yehova kwaamba ayi amupe nkusu shakukaka bweelesho na kuliyumya mubukaalo buyumu? Alimwi mpashi mwakapailawo kale kusenga nkusu kwaamba ayi mucikoonshe kucita shintu nshomuyandika kucita bushiku abushiku. Yehova ndyaakakumbula mupailo wanu akumupa nkusu, mpashi mwakalinyumfwa mbuli mutumwi Paulo uyo wakalemba ayi: ‘Ndakonsha kucita shintu shoonse kwiinda muli wooyo umpa nkusu.’—Filip. 4:13.

9. Ino ni nshila nshi shimwi mbweenga twakonkela cakubonenaako cakwe Yehova kwiinda mukusebensesha nkusu shesu kucafwako bamwi? (Amubone acikope.)

⁹ Tatucite nkusu shiinditeewo mbuli Yehova alimwi tatukoonshi kupa bamwi nkusu mbuli mbwaacita. Sombi inga twakonkela cakubonenaako cakwe kwiinda mukusebensesha nkusu shesu kucafwako bamwi. Kucakubonenaako, inga twacafwako bamakwesu abenankashi bacinene na balwashi kwiinda mukuboolilaako shintu na kubacafwaako anciito shapaŋanda. Alimwi na kacikonsheka, inga twaabanamo lubasu mukubotesha akubamba Ŋanda ya Bwaami. Na katusebensesha nkusu shesu kucita shintu ishi, tulacafwa bamwi abo balambila Yehova.

10. Ino inga twacita buyani kwaamba ayi tuyuminishe bamwi kwiinda mushintu nshotwaamba?

¹⁰ Kwiilikaawo, munokwiibaluka ayi inga mwayuminisha bamwi kwiinda mushintu nshomwaamba. Sa kuli umwi ngomutoobona ayi inga wayuminishikwa na mwamulumba pashintu nshaacita? Sa kuli ucite buumba ngomushi utoyandika kuumbulushikwa? Na kuli ngomushi, amweeleshe kubandika amuntu uyo akutondesha ayi mulamubikilako maano. Inga mwamufwakashila, kumutumina fooni, na mpashi kumulembela nkalata, imelo nabi meseji. Mutanoolisukama abuumbi pa nsheshi muye mwaambe. Maswi aniini atondesha ayi mulimusuni, mpashi ngeenga mukwesu nabi nankashi wayandika kunyumfwa kwaamba ayi atolelele kushomeka akulangila ayi shintu shilaakuba kabotu.—Tus. 12:25; Efe. 4:29.

11. Ino Yehova alatupa buyani busongo bwakwe?

¹¹ Yehova alatupa busongo. Shikwiiya Jemusi wakalemba ayi: ‘Na umwi pakati kanu taacite busongo, atolelele kusenga kuli Lesa, uyo upa bantu boonse camaansa obilo akutatongooka, ncakwiila ulaakupekwa.’ (Jemu. 1:5) Maswi aya alatondesha ayi Yehova alapako bamwi busongo mukuliyandila. Alimwi Jemusi wakaamba ayi na Yehova wapa muntu busongo, alapa “camaansa obilo akutatongooka.” Taasuniiwo kwaamba ayi tunoolinyumfwa cibiibi na twamusenga butanjilishi bwakwe. Alimwi cancine ncakwaamba  ayi alisuni ayi tunoosenga butanjilishi bwakwe.—Tus. 2:​1-6.

12. Ino nshoolwe nshi nshotucite ndyeenga twalwiitako bamwi nshotwakeeya?

¹² Sa aswebo inga twakonkela cakubonenaako cakwe Yehova cakupako bamwi busongo? (Kulu. 32:8) Bantu bakwe Yehova balicite shoolwe shiinji shakulwiitako bamwi nshobakeeya. Kucakubonenaako, liinji tuleeishako bapya ndyetuli muncito yakushimikila. Cakukalika moyo bamanene balacafwa basebenshi bacafwilisha abamakwesu bakabombekwa kushiba bwakusebensa mikuli yabo mulibungano. Alimwi bamakwesu abenankashi bacite lushibo mukuyaka akubamba misena njotusebensesha muncito yakwe Yehova, balacafwilisha kwiishako bamwi bwakusebensa ncito ishi.

13. Ino cakubonenaako cakwe Yehova inga twacikonkela buyani ndyetutokwiishako bamwi?

¹³ Amweeleshe kukonkela cakubonenaako cakwe Yehova ndyemutokwiishako bamwi. Yehova alasangalala kupako bamwi busongo bwakwe. Aswebo tulisuni kulwiitako mbotutokwiisha shoonse nshotucishi. Tatusisi shimwi nshotucishi ceebo cakuloonda ayi mukuya kwaciindi uyo ngotutokwiisha inga watunyaya mukuli. Alimwi tatuyeeyi ayi: ‘Nebo taakuwo bakanjiisha! Alakwe alyeelete kwiiya mwiine.’ Taakuwo musebenshi wakwe Yehova weelete kunoyeeya boobo. Muciindi cakucita boobo, tulasangalala kulwiitako bamwi shoonse nshotucishi akucita nsheenga twacikonsha kubacafwa. (1 Tesa. 2:8) Tulisuni kwaamba ayi abalo “beelele cancine kwiisha bamwi.” (2 Timo. 2:​1, 2, NWT) Na soonse katutondesha mushimu wa bwaabi kwiinda mukulwiitako bamwi shintu shoonse nshotucishi, tulaakuba basongo alimwi basangalete pomwi abaabo mbotwiisha.

NA CABONEKA ANGA BAMWI TABATULUMBI PANSHOTUBACITILA

14. Ino bantu baanji balacita buyani na twabacitila cintu cimwi?

¹⁴ Na katutondesha mushimu wa bwaabi bunene bunene kubamakwesu abenankashi, liinji balatulumba. Inga batulembela nkalata yakulumba na kutondesha kulumba munshila imwi. (Kolo. 3:15) Na batulumba, tulasangalala abuumbi kwaamba ayi twakabacitila cintu cimwi.

15. Ino nciinshi ncotweelete kunookwiibaluka na bamwi tabatulumbi?

¹⁵ Sombi cimwi ciindi bantu bamwi tabatulumbiiwo pashintu nshotwakabacitila. Cimwi ciindi cilaboneka anga bantu bamwi tababikiiko amaano kushintu shoonse nshotwakacita kwaamba ayi tubacaafwe, na kuyeeya pa kukomena kwaciindi, nkusu nshotwakasebensesha na maali kwaamba ayi tubacaafwe. Ino inga twacita buyani kwaamba ayi tuleye kukalala na camushobo uyu cacitika? Munookwiibaluka maswi ali palilembo lya Milimo 20:35 paswa mutwi uyu. Lusangalalo ndotubaalo na twapako bamwi teshi ceebo cakwaamba ayi batulumba nabi sobwe. Inga twasalawo kunosangalala kupako bamwi nabi caboneka anga tabatulumbi. Ino nshiinshi sheenga shatucafwa? Atubandike panshila shimwi shiniini.

16. Ino nciinshi ceenga catucafwa kutolelela kupako bamwi calusangalalo?

¹⁶ Munokwiibaluka ayi na mwapako bamwi, mulakonkela cakubonenaako cakwe Yehova. Alapa shintu shibotu kubantu inga caba ayi balamulumba nabi sobwe. (Mate. 5:​43-48) Yehova wakatushomesha ayi aswebo na twapa kwakubula kulangila ayi bakatuboosheshe, tulaakutambula “cilambu cinene.” (Luka 6:35) Aboobo mutalefuki na teshi lyoonse bantu ndyebamulumba. Munokwiibaluka ayi lyoonse Yehova ananoomupa shoolwe pashintu shibotu nshomucita kwaamba ayi mucafwe bamwi aceebo cakwaamba ayi ‘mulapa cakusangalala.’—Tus. 19:17; 2 Koli. 9:7.

17. Ino ninshila nshi imwi mbweenga twakonkela cakubonenaako cakwe Yehova ndyetutoopa bamwi? (Luka 14:​12-14)

¹⁷ Cintu acimwi nceenga twaciita kwaamba ayi tukonkele cakubonenaako cakwe Yehova ndyetutoopa bamwi, nkucita Yesu nshakaamba pa Luka 14:​12-14. (Amubelenge.) Kwalo, cilibo kabotu kwiita bamwi kusa mukulita pomwi andiswe shakulya na kucita shibotu kubaabo mbotubona  ayi abalo inga batucitila shintu isho. Ano ino mbuyani na twashiiba ayi liinji tulapako bamwi ceebo cakulangila ayi abalo inga batupako shimwi? Na ubo mbocibete, amweeleshe kucita Yesu nshakaamba. Amutondeshe mushimu wa bwaabi kubaabo beenga tabacikonshi kumubooshela cintu cili coonse. Lyalo tulaakuba alusangalalo ceebo cakwaamba ayi tutokonkela cakubonenaako cakwe Yehova. Alimwi na katutalangili bamwi kutubooshela cintu nabi comwi, lyoonse tulaakunosangalala kupako bamwi nabi babula kutulumba.

18. Ino nciinshi ncotweelete kuba bashinishite kuleya, alimwi ino nceebonshi?

¹⁸ Mutanoyeeyelabo ayi bamwi tabalumbi. (1 Koli. 13:7) Na bamwi babula kutulumba, inga twaliipusha ayi: ‘Sa tabalumbi na mpashi balubakobo kulumba?’ Mpashi inga kakuli shimwi shapa kwaamba ayi batatulumbi kweelana ambotwalinga kulangila. Bamwi inga balinyumfwa kabotu abuumbi pacintu ncomwabacitila, sombi kacibabeta ciyumu kulumba. Inga kabanyumfwa nsoni kucafwikwa, bunene bunene na kale kale bakalinga kucafwako bamwi. Sombi na katusuni bamakwesu abenankashi abuumbi, teshi tukanoyeeya shitabete kabotu pali mbabo alimwi tulaakutolelela kupa calusangalalo.—Efe. 4:2.

19-20. Ino nceebonshi kukalika moyo kulayandika na twapako bamwi? (Amubone acikope.)

¹⁹ Amukalike moyo. Mwaami Solomoni uyo wakalinga musongo wakalemba ayi: “Waala shinkwa yako peculu pa maanshi, mukwiinga na pakeende nshiku shiinji ulaakwicana alimwi.” (Shiku. 11:​1, NWT) Maswi aya alatwiisha ayi cimwi ciindi bantu inga batulumba pesule lyakwiinda ciindi cilaamfu. Ici ncocakacitikila nankashi umwi.

²⁰ Myaaka iinji yainda, nankashi uyo wakalinga kweebetwe kumutanjilili walubasu wakalembela nkalata nankashi waliina lya Sandra uyo wakaswabo mukubombekwa, umo mwakalinga maswi ayuminisha. Munkalata iyo wakaamba pakuyandika kwakutolelela kushomeka kuli Yehova. Ndipakeenda myaaka pafwiifwi a ili 8, ba Sandra bakakumbula nankashi wakalinga kweebetwe kumutanjilili walubasu kwiinda mukumulembela nkalata. Bakaamba ayi: “Tamucishiwo maswi ngomwakaamba mbwaakanjuminisha. Sombi ndisunishishi kumulwiita ayi mwancaafwa abuumbi mumyaaka iyi yainda.” Bakatolelela akwaamba ayi: “Mwakalemba maswi ayuminisha alimwi nshililuubi  lilembo ndyemwakaamba.” a Ba Sandra bakasansulula mapensho ngobakeendaamo lyalo akwaamba ayi: “Pashiindi shimwi ndakalinga kusunibo kushileka shoonse akucileka kusebensela Yehova. Sombi lyoonse ndakalinga kwiibaluka lilembo ndyomwakeelikaamo alimwi lyakancafwa kutolelela kushomeka.” Bakeelikaawo akwaamba ayi: “Mumyaaka iyi ili 8, taakuwo cakanjuminisha abuumbi anga ni nkalata njomwakalemba alilembo ndyemwakeelikaamo.” Amuyeeyebo nankashi wakalinga kweebetwe kumutanjilili walubasu mbwakasangalala abuumbi ndyaakatambula nkalata iyo pesule lya “nshiku shiinji!” Andiswe mpashi inga peenda ciindi cilaamfu kwaamba ayi muntu atulumbe pesule lya kumucitila cintu cibotu.

21. Ino nceebonshi mulishinishite kutolelela kukonkela cakubonenaako cakwe Yehova cakutondesha mushimu wa bwaabi?

²¹ Kweelana ambotweeya, Yehova wakatulenga ayi tunoosangalala abuumbi na twapako bamwi kwiinda na twapeekwa. Alimwi tulasangalala na batulumba. Nacibi boobo, inga caba ayi uyo ngotwacitila shibotu watulumba nabi sobwe, inga twasangalala ceebo cakushiba ayi twacita ciluleme. Munokwiibaluka ayi ‘Yehova alaakumupa shiinji kwiinda nshomupa.’ (2 Maka. 25:9) Aboobo inga tamucikonshi kupa bamwi kwiinda Yehova mbwaacita! Alimwi tulasangalala abuumbi na Yehova mwiine watupa shoolwe pashibotu nshotwakacitila bamwi. Aboobo atube bashinishite kutolelela kukonkela cakubonenaako cakwe Ishiwesu wakwiculu uyo ushikwaaba.