Taakuwo ceelete kutupa kuyeeya ayi ceebo cakwaamba ayi bashikwiiya bakwe Yesu bali 70 tabakalingaawo paciindi ndyaakatalika Mulalilo wa Mwaami, nkokwaamba ayi wakabakaka na bakamushiya. Paciindi ici, Yesu wakalinga kusunibo kuba pomwi abatumwi bakwe.

Bali 12 abali 70 boonse bakalinga bashikwiiya bakwe Yesu. Pa bashikwiiya baanji Yesu mbaakalinga kucite, wakataanguna kusala bashikwiiya bali 12 abo mbwaakatalika kwiita ayi batumwi. (Luka 6:​12-16) Wakalinga ku Galili ‘ndyakabunganya batumwi bakwe bali 12 . . . akubatuma mukushimikila sha Bwaami bwakwe Lesa akushilika balwashi.’ (Luka 9:​1-6) Lyalo Yesu ndyaakalinga ku Judeya, ‘wakasala abamwi basankwa bali 70 akubatuma bobilo bobilo.’ (Luka 9:51; 10:1) Aboobo Yesu wakalinga kucite bashikwiiya mumisena ipusenepusene abo bakalinga kushimikila pali nguwe.

BaJuda abo bakaba bashikwiiya bakwe Yesu bakatolelela kucita kusekelela kwa Kusotokela mwaaka amwaaka, mpashi pomwi amikwashi yabo. (Kulo. 12:​6-11, 17-20) Ndyekwakacaala paniini kwaamba ayi Yesu afwe, wakaya ku Jelusalemu pomwi abatumwi bakwe. Sombi taakwe kwiita bashikwiiya bakwe boonse bakalinga kukala ku Judeya, ku Galili aku Peleya kwaamba ayi bese mukusekelela Kusotokela pomwi. Ncakutatoonsha kwaamba ayi, paciindi ici Yesu wakalinga kusunibo kuba pomwi abatumwi bakwe. Wakabalwiita ayi: “Ndakalinga kusuni amoyo wangu woonse, kwaamba ndye cakulya ici ca bushiku bwa Pasika bwa kwiibaluka kusotokela, pantu pomwi amwebo kaantana kupenshekwa.”—Luka 22:15.

Kuli ceebo cibotu ncaakacitila boobo. Yesu wakalinga pafwiifwi kufwa mbuli “Mwanaambelele wakwe Lesa uyo ukusha shibiibi sha bantu ba mucishi coonse ca panshi.” (Joni 1:29) Wakalinga kweelete kufwita mu Jelusalemu umo bantu mobakalinga kubengela milambu kuli Lesa kwamyaaka iinji. Mbelele njobakalinga kulya pabushiku bwa Kusotokela yakalinga kwiibalusha bene Isilaeli ayi Yehova wakabapulusha ku bene Ijipiti. Sombi Yesu wakalinga kusa mukucita shiinji kwiinda mukulyaaba kwakwe. Wakalinga kusa mukwaangulula bantu boonse kububi alufu! (1 Koli. 5:​7, 8) Ceebo ca mulambu wakwe Yesu, batumwi bali 12 bakalinga kusa mukuba lubasu lwa lwiimbi lwa libungano lya Bwineklistu. (Efe. 2:​20-22) Libuku lya Ciyubululo lilaamba ayi ndabala isalalite ya Jelusalemu ilicite ‘lwiimbi lwa mabwe ali 12’ palembetwe ‘meena a batumwi ba Mwanaambelele bali 12.’ (Ciyu. 21:​10-14) Ici cilaamba ayi batumwi bashomeka bakalinga kusa mukuba alubasu luyandika mukukumanisha kuyanda kwakwe Lesa. Aboobo inga twanyumfwishisha cakapa kwaamba ayi Yesu asaleewo kuba pomwi ambabo pa Kusotokela kwakweelaako anshaakacita ndyebakamanishabo kusekelela Kusotokela, nkokwaamba ayi kutalika Mulalilo wa Mwaami.

Bali 70 abashikwiiya bamwi tabakalingaawo ciindi Yesu ndyaakatalika Mulalilo wa Mwaami. Nacibi boobo, bashikwiiya boonse bakalinga kushomeka bakalinga kusa mukufubilaamo mu Mulalilo wa Mwaami. Bashikwiiya boonse abo bakesa mukuba Beneklistu bananikitwe, bakalinga kusa mukuba mucipangano ca bwaami, ico Yesu ncaakapangana abatumwi bakwe bushiku bulya mashiku.—Luka 22:​29, 30.