1. Ino bantu baanji balaabona buyani makani akusebensa?

INO bantu baanji nkomukala balaabona buyani makani akusebensa? Mushishi shiinji bantu baanji balasebensa mawoola aanji kwiinda kale kale. Liinji bantu basebensa cakwiindilila tababiiwo aciindi cakookesha, ciindi cakuba pomwi amukwashi wabo na ciindi cakwiiya pali Lesa. (Shiku. 2:23) Bamwi tabasuniiwo kusebensa nabi paniinibo alimwi balicite mwakubekeshela muunji.​—Tus. 26:13, 14.

2-3. Ino Yehova a Yesu balaabona buyani makani akusebensa?

² Mubupusano abantu baanji mbobabona kusebensa, amubone Yehova a Yesu mbobakubona kusebensa. Tulicishi kwaamba ayi Yehova alisuni kusebensa. Nceceeco Yesu ncaakaambila ayi: “BaTa balasebensa ciindi coonsebo, aboobo anebo ndyeelete kusebensa.” (Joni 5:17) Amuyeeyebo pancito shiinji Yehova nshaakasebensa ndyaakalinga kulenga baanjelo baanji, nyenyeenshi alimwi amapulaneti. Alimwi tulabona shintu shiinji shibotu Lesa nshaakalenga pacishi capanshi. Ncakwiila shikulumbaisha wakalemba shancine ndyakaamba ayi: “Nshemwakalenga, No Yehova, nshiinji abuumbi! shoonsebo mwakashilenga mumaano anu. Cishi ciliswitebo shilengwa shanu.”​—Kulu. 104:24.NWT

³ Yesu wakakonkela cakubonenaako ca Baishi. Lesa ndyaakalinga ‘kubamba cishi,’ Mwaana uyo Baibo ngoiita ayi maano, alakwe wakasebensako ncito iyi. Wakalinga pomwi a Yehova “mbuli musebenshi ucishi kabotu ncito.” (Tus. 8:27-31 NWT) Pesule lya myaaka iinji abuumbi, Yesu wakesa pacishi capanshi alimwi wakasebensa ncito shibotu abuumbi. Yesu wakaamba ayi incito Yehova njaakamupa yakalinga anga ncakulya kuli nguwe, alimwi shintu  shoonse nshaakacita pacishi capanshi shakatondesha ayi ncakwiila wakatumwa a Lesa.​—Joni 4:34; 5:36; 14:10.

4. Ino nshiinshi nshetutokwiiya kucakubonenaako cakwe Yehova a Yesu pamakani akookesha?

⁴ Sa cakubonenaako cakwe Yehova a Yesu cakusebensa cankusu cilaamba ayi tatweelete kookesha? Sobwe napaceyi. Yehova taalemi, aboobo ncatookesheli pesule lyakusebensa. Ncakwiila Baibo ilaamba ayi Yehova ndyaakamanisha kulenga liculu acishi capanshi, ‘wakacileka kusebensa akookesha.’ (Kulo. 31:17) Nacibi boobo, ici cilaamba ayi Yehova wakacileka kulenga shintu kwaamba ayi asekelele pashintu nshaakalenga. Alimwi nabi kwaamba ayi Yesu alakwe wakalinga kusebensa cankusu ndyaakalinga pacishi capanshi, wakalinga kubaako aciindi cakookesha akulya cakulya pomwi abeshicibusa bakwe.​—Mate. 14:13; Luka 7:34.

5. Ino nciinshi basebenshi bakwe Lesa cimwi ciindi ncobaalilwa?

⁵ Baibo ilayuminisha bantu bakwe Lesa kuba bantu basuni kusebensa. Basebenshi bakwe Lesa balyeelete kuba bantu basebensa cankusu kuteshi batolo. (Tus. 15:19) Mpashi mulasebensa kwaamba ayi mulame mukwashi wanu. Alimwi bashikwiiya bakwe Klistu boonse balicite mukuli wakwaabanamo lubasu muncito yakushimikila makani abotu. Nacibi boobo, mulyeelete kuba aciindi cikwene cakookesha. Sa cimwi ciindi mulaalilwa kwaabanya kabotu ciindi cakusebensa ncito yakumubili, kushimikila, alimwi akookesha? Ino inga twacita buyani kwaamba ayi twaabanye kabotu ciindi cakusebensa aciindi cakookesha?

6. Ino lilembo lya Maako 6:30-34 lilatondesha buyani ayi Yesu wakalinga kucishi ciindi ndyaakalinga kweelete kusebensa andyaakalinga kweelete kookesha?

⁶ Kushiba mbotweelete kubona kusebensa kulayandika. Lesa wakatanjilila Mwaami Solomoni kulemba ayi: “Cintu cili coonse cilicite ciindi cancico.” Solomoni wakaamba pakushanga, kuyaka, kulila, kuseka, kushana, alimwi ashintu shimwi. (Shiku. 3:1-8) Aboobo mbasu shobilo shicindeme mubuumi nkusebensa alimwi akookesha. Bushiku bumwi batumwi bakwe Yesu ndyebakaswa nkobakalinga baya mukushimikila “bakabula aciindi ca kookesha kwaamba ayi balye.” Aboobo Yesu wakabaambila ayi: “Atuye kumwi kulubasu nkweshi tubebo sweenka kwaamba ayi tukookesheeko paniini.” (Amubelenge Maako 6:30-34.) Nabi kwaamba ayi Yesu abashikwiiya bakwe cimwi ciindi tabakalinga kuba aciindi cakookesha cikwene, Yesu wakalinga kucishi ayi boonse bakalinga kuyandika kookesha.

7. Ino kwiiya pamulawo wa Sabata inga kwatucafwa buyani?

⁷ Cimwi ciindi, soonse tulyeelete kookesha na kwaalula nshetucita bushiku abushiku. Ishi nshetubona na twalanga pamulawo wa bushiku bwa Sabata ya nsondo ansondo iyo yakalinga kukonkela bantu bakwe Lesa kale kale. Nabi kwaamba ayi tatukonkeli milawo yakwe Mose, kuli nsheenga tweeyawo pamulawo wakukonkela Sabata. Nsheenga tweeya inga shatucafwa kushiba mbotweelete kubona makani akusebensa akookesha.

8. Kweelana a Kulonga 31:12-15, ino bushiku bwa Sabata bwakalinga bushiku bwa nshi?

⁸ Maswi akwe Lesa alaamba ayi pesule lya nshiku 6 sha kulenga, Lesa wakacileka kulenga shintu pacishi capanshi. (Mata. 2:2) Nacibi boobo, Yehova alisuni kusebensa, alimwi munshila shimwi “watolelela kusebensa.” (Joni 5:17) Yehova wakalenga shintu munshiku 6, lyalo pabushiku bwa namba 7 wakookesha. Alimwi wakalwiita bene Isilaeli ayi bakalinga kweelete kunokookesha nsondo ansondo pabushiku bwa namba 7. Lesa wakaamba ayi Sabata yakalinga keshibilo kuli nguwe abene Isilaeli. Bwakalinga bushiku bwa “kookesha kushintu shoonse.” Alimwi bwakalinga “bushiku busalalite kuli Yehova.” (Amubelenge Kulonga 31:12-15.) Lesa wakakasha bantu boonse kusebensa pabushiku ubu kwiilikaawo  abaana, basha, alimwi ashifubwa. (Kulo. 20:10) Bushiku ubu bwakapa bantu coolwe cakubikila maano kushintu shakumushimu.

9. Ino bantu bakalinga kububona buyani bushiku bwa Sabata Yesu ndyaakalinga pacishi?

⁹ Bushiku bwa Sabata bwakalinga bushiku bubotu kubantu bakwe Lesa; nacibi boobo, Yesu ndyaakalinga pacishi capanshi, bamatanjilili babupailishi bakabika milawo iyumu ya bwakulama Sabata. Bakalinga kwaamba ayi pabushiku bwa Sabata bantu tabeelete kupulula mitwi ya witi na kushilika mulwashi. (Maako 2:23-27; 3:2-5) Lesa teshi mbwaakalinga kubona shintu ubu, alimwi ishi Yesu nshaakalwiita baabo bakalinga kumukutika.

10. Ino nshiinshi nsheenga tweeya palilembo lya Mateyo 12:9-12 pamakani a Yesu mbwaakalinga kubona Sabata?

¹⁰ Yesu abashikwiiya bakwe bakalinga ba Juda, bakalinga kulama Sabata mukwiinga bakalinga kukonkela milawo yakwe Mose. * Nacibi boobo, kwiinda mushintu nshaakalinga kwaamba akucita, Yesu wakatondesha ayi cilibo kabotu kucita shintu shibotu, akucafwa bantu pabushiku bwa Sabata. Wakaamba cakuteenda mweela ayi: “Cilasuminishikwa kucita ciluleme pabushiku bwa Sabata.” (Amubelenge Mateyo 12:9-12.) Yesu taakalinga kubona ayi kucita shintu shibotu akucafwa bantu pabushiku bwa Sabata nkupwaya mulawo. Nshaakalinga kucita pabushiku bwa Sabata, shakalinga kutondesha kwaamba ayi wakalinga kucishi kabotu Lesa ncaakabikilako bubaambo bwa Sabata. Mukwiinga bantu bakwe Lesa tabakalinga kusebensa pabushiku bwa Sabata, bakalinga kubikila maano abuumbi kukwiiya pali Lesa. Yesu alyeelete wakakulila mumukwashi  mobakalinga kupaila Lesa pabushiku bwa Sabata. Tulishi sheeshi ceebo ca nshotubelenga pali Yesu. Baibo ilaamba ayi: “Wakaya ku Nasaleti, uko nkwaakakulila; wakenjila mu sunagogi kweelana ambwaakalinga kushibite pabushiku bwa Sabata, wakanyamuka kwaamba ayi abelenge.”​—Luka 4:15-19.

11. Ino ngani wakalinga cakubonenaako cibotu kuli Yesu?

¹¹ Cakutatoonsha Josefu alyeelete wakalinga kubona kusebensa bweenka mbuli Yehova mbwaakubona, alimwi ici cakapa kwaamba ayi aiishe Yesu incito yakubesa mapulanga. (Mate. 13:55, 56) Alimwi cilyeelete kwaamba ayi bushiku abushiku Yesu wakalinga kubona Josefu mbwaakalinga kusebensa cankusu kwaamba ayi alame mukwashi wakwe wakalinga unene. Paciindi cimwi, Yesu wakalwiita bashikwiiya bakwe ayi: “Musebenshi woonse ulalita pamulimo wakwe.” (Luka 10:7) Ncakwiila, Yesu wakalinga kucishi kusebensa cankusu ncocaamba.

12. Ino nga malembo nshi atondesha Baibo nshoyaamba pamakani akusebensa cankusu?

¹² Mutumwi Paulo alakwe wakalinga kucishi kusebensa cankusu ncocaamba. Incito inene njaakalinga kucite nkwiisha bantu pali Yesu alimwi apamakani Yesu ngaakalinga kwiisha. Nacibi boobo, Paulo wakalinga kusebensa kwaamba ayi acane maali akulicafwilisha. Bene Tesalonika bakalinga kucishi mbwaakalinga “kusebensa cankusu mashiku amalumwi” kwaamba ayi atapenshi muntu nabi womwi mushintu nshaakalinga kuyandika. (2 Tesa. 3:8; Milimo 20:34, 35) Mpashi Paulo wakalinga kwaamba pancito yakupanga matente njaakalinga kusebensa. Ndyaakalinga ku Kolinto wakalinga kukala a Akwila a Pulisila akusebensela pomwi ambabo ‘muncito yabo yakupanga matente.’ Nabi kwaamba ayi Baibo yaamba ayi Paulo wakalinga kusebensa ‘mashiku amalumwi’ ici tacaambi ayi taakalinga kookesha. Taakalinga kukalilabo kupanga matente sobwe, kwakalinga kuba ciindi ndyaakalinga kookesha mbuli pabushiku bwa Sabata. Pabushiku ubu Paulo wakalinga kushimikila ba Juda abalo bakalinga kookesha.​—Milimo 13:14-16, 42-44; 16:13; 18:1-4.

13. Ino inga tweeya nshi kucakubonenaako cakwe Paulo?

¹³ Mutumwi Paulo wakatondesha cakubonenaako cibotu. Nabi kwaamba ayi wakalinga kweelete kusebensa ncito yakumubili, lyoonse wakalinga kuba aciindi ‘cakusebensa ncito isalalite yakushimikila makani abotu akwe Lesa.’ (Loma. 15:16; 2 Koli. 11:23) Wakayuminisha abamwi kwaamba ayi abalo bakalinga kweelete kunooshimikila makani abotu lyoonse. Kucita boobo kwakapa kwaamba ayi Akwila a Pulisila babe ‘basebenshinyina muli Yesu Klistu.’ (Loma. 12:11; 16:3) Paulo wakayuminisha bene Kolinto kuba “ashintu shiinji shakucita muncito ya Mwaami.” (1 Koli. 15:58; 2 Koli. 9:8) Yehova wakatanjilila mutumwi Paulo kulemba ayi: “Na muntu wakaka kusebensa, akulya mutamusuminishi.”​—2 Tesa. 3:10.

14. Ino Yesu wakalinga kusansulula nshi ndyaakaamba maswi ngotucana pa Joni 14:12?

¹⁴ Incito iyandika abuumbi njotweelete kunosebensa munshiku shakweelaako shino, nkushimikila akucafwa bantu kuba bashikwiiya. Nceceeco Yesu ncakaambila ayi bashikwiiya bakwe balaakucita shiinji kwiinda nshaakacita! (Amubelenge Joni 14:12.) Taakalinga kusansulula ayi abalo balaakucita shaankamiko bweenka mbuli nshaakacita sobwe. Wakalinga kusansulula ayi bashikwiiya bakwe balaakushimikila makani abotu akwiisha bantu mumisena iinji, kubantu baanji, alimwi kwaciindi cilaamfu kwiinda ciindi ncaakasebensa.

15. Ino njimiipusho nshi njotweelete kuliipusha, alimwi ino nceebonshi?

¹⁵ Na mwakalembwa ncito, amuliipushe miipusho iyi: ‘Sa kuncito ndishibikitwe mbuli muntu usebensa cankusu? Sa ndamanisha bwangu ncito akusebensa peela nkusu shangu?’ Na  mwakumbula ayi ee, nkokwaamba ayi inga bamushoma kuncito. Alimwi ici inga capa kwaamba ayi abo mbomusebensaabo basumine makani a Bwaami. Pancito yakushimikila akwiisha amuliipushe miipusho iyi: ‘Sa ndishibikitwe mbuli shikushimikila usebensa cankusu muncito yakushimikila? Sa ndalibambila kabotu nsheenga ndaamba palweendo lwakutaanguna? Sa ndafwambaana kuboolelaako kubaabo basuni kwiiya? Sa ndaabanamo lubasu mumbasu shipusenepusene sha ncito yakushimikila?’ Na mwakumbula ayi ee, nkokwaamba ayi mulaakucana lusangalalo muncito yanu.

16. Ino Yesu abatumwi bakwe balipusene buyani abantu baanji mbobabona kookesha?

¹⁶ Yesu wakalinga kucishi kwaamba ayi cimwi ciindi wakalinga kuyandika kookesha abashikwiiya bakwe. Nacibi boobo, bantu baanji paciindi cilya alimwi amunshiku shino, bali anga ngumusankwa mubile Yesu ngwaakaambawo mucikoshanyo. Musankwa ulya wakalishomesha mwiine ayi: “Liibe, kolya, konwa akusekana.” (Luka 12:19; 2 Timo. 3:4) Wakalinga kuyeeya ayi cicindeme kuli nguwe nkookesha akusekana. Ano Yesu abatumwi bakwe tabakalinga kubona ayi cintu cicindeme kuli mbabo nkunoocitabo sha kulikondelesha beene.

17. Ino nshiinshi nsheenga twaciita ndyetutabete kuncito?

¹⁷ Bweenka mbuli Yesu, aswebo munshiku shino tulashimikila akucanika kumabungano, muciindi cakookeshabo. Incito yakucafwa bantu kuba bashikwiiya akucanika kumabungano, nshintu shiyandika abuumbi, aboobo tulacita shoonse nsheenga twacikonsha kwaamba ayi tutolelele kucita shintu ishi shisalalite. (Ebu 10:24, 25) Nabi ndyetuli palweendo, tatucileeki kucita shintu shakumushimu mbuli kucanika kumabungano kuli koonse nkweenga twaba, alimwi tuleelesha kulangoola coolwe cakushimikila uli woonse ngweenga twakumanya.​—2 Timo. 4:2.

18. Ino Mwaami wesu Klistu Yesu, alisuni ayi tunoocita nshi?

¹⁸ Tulalumba abuumbi mukwiinga Mwaami wesu Klistu Yesu taatulangili kucita nsheenga tatucikoonshi, alimwi tulalumba ambwaatucafwa kushiba mbotweelete kubona kusebensa akookesha. (Ebu 4:15) Alisuni kwaamba ayi tunooba aciindi cakookesha. Alimwi alisuni kwaamba ayi tunosebensa cankusu kwaamba ayi tucane nshetuyandika akusebensako ncito yakucafwa bantu kuba bashikwiiya iyo itupa lusangalalo. Mumutwi utokonkelaawo tulaakwiiya Yesu nshaakacita kwaamba ayi tulubulwe kuswa mubusha bubiibi abuumbi.