Miipusho Kuswa Kubeshikubelenga

AMULISHE

Baibo ilaamba ayi kulyeelete kuba bakamboni bobilo kwaamba ayi mulandu ushinishikwe. (Shakube. 35:30; Duto. 17:6; 19:15; Mate. 18:16; 1 Timo. 5:19) Ano kweelana a Mulawo wakwe Mose, na musankwa wacata mwanakashi “muluundu” wakamamikilwa akoonaakwe cakumukakatisha, lyalo wooloma, mwanakashi tabakalinga kumupa mulandu wakucita bulale sombi musankwa lakwe bakalinga kumupa mulandu. Ino nceebonshi ncobatakalinga kumupeta mulandu mwanakashi sombi musankwa lakwe wakalinga kupekwa nabi kwaamba ayi takwakalinga wakabonaako ndyeshakalinga kucitika?

Makani ngotucana palilembo lya Dutolonomi 22:25-27 taatokwaambabo pamakani akushinisha ayi musankwa uyo wacita mulandu, mukwiinga pamakani aya cakalinga kushibikitwe kale kwaamba ayi musankwa alicite mulandu. Mulawo uyu wakabetako bunene bunene kukushibilaako na ncakwiila mwanakashi taacite mulandu. Amubone nshoyaambawo.

Vesi 23 a 24 itokwaamba pa musankwa wakoona amwanakashi wakamamikilwa “mundabala.” Aboobo wakalinga kucite mulandu wakucita bulale, mukwiinga mwanakashi wakamamikilwa wakalinga kubonwa mbuli mwanakashi weebetwe. Ino mwanakashi lakwe? “Taakwe kutama mundabala.” Mukwiinga naakwiinga wakatama, bamwi naakwiinga bakanyumfwa akusa mukumufuna. Ano taakwe kutama. Aboobo, nkokwaamba ayi alakwe wakaabanamo lubasu mukucita bulale, nceceeco boonse ncobakalinga kupekwa mulandu.—Duto. 22:23, 24.

Mulawo wakatolelela akwaamba ayi: “Na musankwa umwi wacana mwanakashi wakamamikilwa muluundu akukumanaakwe cakumukakatisha, musankwa eenkabo ngoweelete kucaikwa, taaku ceelete kucitwa ku mwanakashi ceebo taaku mulandu ngwaacite ngweenga wacailwaawo. Mulandu uyu ulyeelenebo amuntu waya mukulwana mubye akumucaya. Mukwiinga wakamucana muluundu. Mwanakashi wakamamikilwa uyu wakatama, sombi taakuwo nabi womwi wakalingaako ayi amufuneeko.”—Duto. 22:25-27.

Na caba boobo, beshikoombolosha bakalinga kubona ayi mwanakashi taacitewo mulandu. Ino nceebonshi? Mukwiinga bakalinga kubona ayi mwanakashi alyeelete “wakatama, sombi taakuwo nabi womwi wakalingaako ayi amufuneeko.” Aboobo taakalinga kucita bulale. Ano musankwa lakwe bakalinga kumupa mulandu wakucata mwanakashi akoonaakwe, alimwi amulandu wa bulale ceebo cakwaamba ayi wakasebensesha nkusu kwaamba ayi oone amwanakashi wakamamikwa.

Aboobo inga twaamba ayi, nabi kwaamba ayi mulawo uyu wakalinga kwaamba bunene pa mwanakashi mbwatakalinga kucite mulandu, makani aya alatondesha amusankwa mbwaakalinga kuba amulandu wakucata mwanakashi akoonaakwe, alimwi amulandu wakucita bulale. Inga twashooma kwaamba ayi boomboloshi bakalinga “kuulanga langa kabotu mulandu” alimwi bakalinga koombolosha kweelana anjiisho Lesa nshaakabebalusha mankanda aanji.—Duto. 13:14; 17:4; Kulo. 20:14.