Sa inga mwacikonsha kucana shikumbulo kumiipusho iyi kusebensesha Njashi Yamulindilishi yamu 2019?

Ino cishomesho cakwe Lesa cakwaamba ayi: “Taakuwo cilwanisho cakapangilwa kulwana ndiwe ceshi cikaswitilile” cilasansulula nshi? (Isa. 54:17)

Bweenka mbuli lubumbu mbolutushitilisha ku mfula yacipuupu, alakwe Yehova mbwaatushitilisha “kubantu batacite nkumbu bali anga ncipuupu citookuma kulubumbu.” (Isa. 25:4, 5) Balwani besu teshi bakacikoonshe kutukasha kusebensela Yehova cakwaamba ayi tukaalilwe akucana buumi butamaani.—w19.01, mape. 6-7.

Ino Lesa wakatondesha buyani ayi uleelanya shintu ndyaakaanisha bene Kenani alimwi abene Isilaeli batakalinga kunyumfwila?

Lesa wakaanisha baabo boonse bakalinga kucita bulale na abo bakalinga kupensha banakashi abaana. Wakapa shoolwe bantu bakalinga kumunyumfwila abaabo bakalinga kutondesha nkumbu kubantu bamwi.—w19.02, mape. 22-23.

Ino inga twacita buyani na tuli mubukaalo bwakwaamba ayi uyo uteshi Kamboni ngweshi apaile?

Inga toomunabo cabulemu alimwi tatweelete kwaambako ayi “ameni” nabi kucatanaabo kumaansa ndyebatopaila. Na tulisuni inga twaamba mupailo wesu mumoyo.—w19.03, pe. 31.

Ino kucita mwaana muniini shintu shitabete kabotu ncilubo cinene buyani?

Ncilubo cinene mukwiinga kucita boobo nkubisha kumwaana, kulibungano, kumfulumeende, akuli Lesa. Bamanene balakonkela mulawo wakucishi nkobakala wakutola makani kupolisi na kuli umwi wanyumfwika ayi wacata mwaana muniini.—w19.05, mape. 9-10.

Ino nshiinshi nsheenga mwaciita kwaamba ayi mwaalule miyeeyo imweendelesha?

Shiyandika nsheeshi: Amupaile kuli Yehova. Amukutumane akuyeeya akulilanga langa kabotu. Amusale kabotu beshicibusa.—w19.06, pe. 11.

Ino nshiinshi nshotweelete kucita kwaamba ayi tulibambile limwi kupenshekwa?

Tulyeelete kuyumya bushicibusa bwesu a Yehova. Tulyeelete kushoma ayi alitusuni alimwi teshi akatulekeleshewo. Amubelenge Baibo bushiku abushiku, akupaila lyoonse. Amushome cakutatoonsha kwaamba ayi Lesa alaakukumanisha shoolwe sha Bwaami. Amwiibaluke malembo ngomusuni mumutwibo anyimbo shakulumbaisha Yehova.—w19.07, mape. 2-4.

Ino inga twacita buyani kwaamba ayi tucafwe beshikamukowa kupuluka?

Tulyeelete kubayeyelaako ndyetutoobacafwa. Tulyeelete kutondesha mibo ibotu yeenga yapa kwaamba ayi basune kusebensela Lesa. Alimwi tulyeelete kukalika moyo, sombi kutabasuminisha kwaamba ayi baalule nshetwakasala kucita.—w19.08, mape. 15-17.

Ino tulayuminishikwa buyani, kweelana a Yesu mbwaakashomesha pa Mateyo 11:28?

Tulicite bamatanjilili ba Bwineklistu batondesha lusuno, beshicibusa bali kabotu, alimwi anciito ibotu abuumbi.—w19.09, pe. 23.

Ino Yehova inga watulengesha buyani ayi tusune kucitawo comwi? (Fili. 2:13)

Ndyetutobelenga Maswi akwe akukutumana kuyeeyawo, Lesa inga watupa kusuna kucita kuyanda kwakwe alimwi akutupa ankusu sha kucitawo comwi. Inga watupa mushimu usalashi uyo weenga watupa kushiba kabotu bwakumusebensela.—w19.10, pe. 21.

Ino nshiinshi nshotweelete kucita katutana kusalawo shakucita?

Tulyeelete kucita shintu shosanwe: Tulyeelete kulangoola kabotu makani. Tulyeelete kusenga busongo. Akwiinduluka muceeco catupa kwaamba ayi tusalewo kucita shintu shimwi. Tulyeelete kuba ashakucita. Tulyeelete kushiba nsheenga twacikonsha ansheenga tatucikoonshi.—w19.11, mape. 27-29.

Sa Satana ndyaakalwiita Efa ayi teshi ukafwewo, wakalinga kusansulula ayi bantu balicite buumi butafwi?

Citooboneka ayi teshi nshaakalinga kusansulula. Satana wakaambila Efa ayi teshi akafwe, taakwe kwaamba ayi mubili wakwe ulaakufwa sombi mushimu wakwe ulaakutolelela kuba abuumi kumusena kumwi sobwe. Beshibupailishi bwakubeca boonse bakanyonyoolwa ciindi ca Muyoba unene. Aboobo njiisho yakwaamba ayi bantu balicite buumi butafwi ilyeelete yakatalika pesule lyakupilinganishikwa kwa milaka ya bantu bakalinga kuyaka njashi ya Babelo.—w19.12, pe. 15.