Citooboneka ayi teshi nshaakalinga kusansulula. Satana taakwe kulwiita Efa ayi na akalye kucisamu Lesa ncaakakasha alaakubabo anga wafwa sombi mushimu ulaakutolelela kuba kumusena umwi sobwe. Satana wakasebensesha nsoka kulwiita Efa ayi na akalye cisepo kuswa kucisamu cilya teshi akafweewo. Maswi aya akalinga kusansulula ayi Efa alaakutolelela kusangalala abuumi pacishi capanshi kwakubula kutanjililwa a Lesa.—Mata. 2:17; 3:3-5.

Na njiisho yakubeca iyi yakwaamba ayi bantu balicite buumi butafwiwo, iyo ipukite munshiku shino taina kutalika mu Edeni, nkokwaamba ayi yakatalika lili? Kwalo tatucishiwo kabotu. Ncotushi ncakwaamba ayi bupailishi bwakubeca boonse bwakaloba ciindi ca Muyoba unene muciindi cakwe Nowa. Aboobo takwakalingaawo njiisho nabi yomwi yakubeca yakatolelela pesule lya Muyoba, mukwiinga Nowa eenkabo amukwashi wakwe mbobakalinga kupaila Yehova paciindi cilya.

Aboobo njiisho yakwaamba ayi bantu balatolelela kuba abuumi na bafwa yakatalika pesule lya Muyoba unene. Lesa ndyaakapilinganya mulaka bantu ngobakalinga kwaamba pa Babelo, alimwi bantu ‘bakapalanganina mumbasu shoonse sha cishi capanshi,’ cakutatoonsha balyeelete bakaya anjiisho yakwaamba ayi bantu balicite buumi butafwiwo. (Mata. 11:8, 9) Nabi kwaamba ayi tatucishiwo njiisho iyi ndyeyakatalika, tulishi kwaamba ayi Satana Diabolosi “ishi wa bubeshi,” ngowakaleta njiisho iyi alimwi wakakondwa ndyaakabona ayi yapalangana cishi coonse capanshi.—Joni 8:44.