1-2. Ino shakeendaamo mukwesu Angelito shilatwiisha kucita nshi?

SA bashali banu Mbakamboni Bakwe Yehova? Na Mbakamboni, amwiibaluke kwaamba ayi inga tamupyani bushicibusa a Yehova kuswa kubashali banu. Muntu womwi awomwi alyeelete kusebensa cankusu palwaakwe kwaamba ayi abe abushicibusa a Yehova.

² Atubandike cakubonenaako ca mukwesu Angelito. Mukwashi wakwe woonse bakalinga Bakamboni Bakwe Yehova. Nacibi boobo, ndyaakalinga mwanike taakalinga kulinyumfwa ayi ngushicibusa wakwe Yehova. Wakaamba ayi, “Ndakalinga kusebensela Yehova ceebo cakukonkela bashali bangu.” Nacibi boobo, mukuya kwaciindi mukwesu Angelito wakatalika kubelenga Maswi akwe Lesa akukutumana kuyeeya nshaakalinga kubelenga. Alimwi wakeelikawo akupaila abuumbi kuli Yehova. Ino nshiinshi shakaswaamo? Mukwesu Angelito wakaamba ayi, “Ndakesa mukushiba kwaamba ayi ceenga cancafwa kuba abushicibusa a Yehova nkucita ciiyo capalwaangu.” Makani akaamba mukwesu Angelito inga atupa kuyeeya pamiipusho mbuli: Ino kushibabo makani amwi pali Yehova akumushiba kabotu shilipusene buyani? Alimwi ino inga twacita buyani kwaamba ayi tumushibe kabotu Yehova?

3. Ino kushibabo makani amwi pali Yehova akumushiba kabotu shilipusene buyani?

³ Inga twayeeya ayi tulimushi Yehova ceebo cakwaamba ayi tulishi liina lyakwe ashintu shimwi nshaakacita. Nacibi boobo,  ici tacaambi ayi tulimushi kabotu Yehova, kuli ashimwi nshotweelete kucita. Tulyeelete kwiiya shiinji pali Yehova amibo yakwe ibotu. Ici cilaakutucafwa kushiba Yehova ncaacitila shintu shimwi na ncaatulwiitila kucita shintu shimwi. Alimwi kucita boobo kulaakutucafwa kushiba na Yehova alishisuni isho nshetutooyeeya na nshetwasala kucita. Na twashiba Yehova nshaasuni ayi tunoocita, isho sheenka nshotweelete kunoocita.

4. Ino kwiiya shakubonenaako shamu Baibo kutootucafwa buyani?

⁴ Na tulisuni kusebensela Yehova, bantu bamwi inga batalika kutuseka na kutupensha, bunene bunene na twatalika akucanika kumabungano. Ano na twacinka manungo muli Yehova, teshi akatulekelesheewo mukwiinga kucita sheeshi kulaakutucafwa kutalika kuyaka bushicibusa bwesu anguwe, ubo bweshi bukatolelele kwa muyayaya. Ano sa inga cakonsheka kumushiba kabotu Yehova? Cakutatoonsha! Shakubonenaako sha bantu batasalalite mbuli Mose alimwi a Mwaami Defedi, shilatondesha ayi aswebo inga twamushiba kabotu Yehova. Ndyetutobandika nshebakacita, tutookumbula miipusho yobilo: Ino bakacita buyani kwaamba ayi bamushibe kabotu Yehova? Alimwi ino nshiinshi nsheenga tweeya kuswa ku shakubonenaako shabo?

5. Ino nciinshi Mose ncaakasala kucita?

⁵ Mose wakasala kusebensela Lesa. Ndyaakalinga kucite myaaka 40, Mose wakasala kuba abantu bakwe Lesa, muciindi cakushibikwa mbuli “mushikulu wakwe Falawo.” (Ebu 11:24) Mose wakashiya musena wa peculu abuumbi akuba kulubasu lwa bene Isilaeli abo bakalinga basha mu Ijipiti. Kucita boobo naakwiinga kwakamuletelela ku mwaami Falawo, uyo wakalinga kucite nkusu abuumbi cakwaamba ayi bene Ijipiti bakalinga kumubonabo anga ngu Lesa. Mose wakacita sheeshi ceebo ca lushomo lwakwe luyumu muli Yehova, alimwi ici cakapa kwaamba ayi abe shicibusa wakwe Yehova.​—Tus. 3:5.

6. Ino inga tweeya nshi kuswa kucakubonenaako cakwe Mose?

⁶ Ino nciinshi ncetutokwiiyawo? Bweenka mbuli Mose, soonse tulyeelete kusalawo na tulaakunoosebensela Lesa akuba mulibunga lyakwe nabi sobwe. Kusebensela Yehova inga kwayandika kulyaaba, alimwi cimwi ciindi bantu batamushi Yehova inga batalika kutupensha. Ano na twacinka manungo muli Ishiwesu wakwiculu, inga watucafwa!

7-8. Ino nshiinshi Mose nshaakatolelela kwiiya?

⁷ Mose wakatolelela kwiiya pamibo yakwe Yehova akucita kuyanda Kwakwe. Kucakubonenaako, Yehova ndyaakamutuma kuya mukukusha bene Isilaeli mubusha, Mose wakalinga kubona anga inga taacikoonshi. Yehova wakatondesha nkumbu kuli Mose, nkokwaamba ayi wakanyumfwishisha mbwaakalinga kulinyumfwa akumucafwa. (Kulo. 4:10-16) Ici cakacafwa Mose kuyuma akucikonsha kuya mukwaambila Falawo pa boomboloshi bwakwe Yehova. Lyalo Mose wakabona Yehova mbwaakasebensesha nkusu Shakwe, kupulusha bene Isilaeli akunyonyoola Falawo pantu pomwi abeshinkondo bakwe palweenge Lusalala.​—Kulo. 14:26-31; Kulu. 136:15.

⁸ Mose ndyaakakusha bene Isilaeli mu Ijipiti, bakatalika kunootongooka. Nacibi boobo, Mose wakabona Yehova mbwaakatondesha kukalika moyo kubantu mbwaakaangulula kuswa mubusha. (Kulu. 78:40-43) Alimwi Mose wakabona Yehova mbwaakatondesha kuliceesha ndyaakaalula nshaakalinga kusuni kucita ceebo cakukutika Mose nshaakasenga.​—Kulo. 32:9-14.

9. Kweelana a Bene Ebulu 11:27, ino bushicibusa bwakwe Mose a Yehova bwakalinga buyumu buyani?

⁹ Bene Isilaeli ndyebakaswa mubusha, Mose  wakalinga kumushi kabotu abuumbi Yehova cakwaamba ayi cakalingabo anga atoobona Ishi wa kwiculu. (Amubelenge Bene Ebulu 11:27.) Mukutondesha Mose mbwaakalinga abushicibusa buyumu a Yehova, Baibo ilaamba ayi: “Yehova wakabandika a Mose meenso ameenso, bweenka mbuli muntu mbwaabandika amubye.”​—Kulo. 33:11.NWT

10. Ino nshiinshi nshotweelete kucita kwaamba ayi tumushibe kabotu Yehova?

¹⁰ Ino nciinshi cakutaanguna ncetutokwiiyawo? Kwaamba ayi tumushibe kabotu Yehova, tatweelete kweelabo pakushiba mibo yakwe, sombi tulyeelete kunoocita akuyanda kwakwe. Luyaando lwakwe Yehova pacecino ciindi ndwa kwaamba ayi “bantu boonse bakapuluke akuba alushibo lwiine lwiine lwa cancine.” (1 Timo. 2:3, 4 NWT) Nshila yomwi mbweenga twacita kuyanda kwakwe Yehova nkwiinda mukwiisha bamwi pali nguwe.

11. Ino kwiisha bamwi pali Yehova kulatucafwa buyani kumushiba kabotu?

¹¹ Liinji ndyetutokwiisha bamwi pali Yehova, aswebo tulacafwikwa kumushiba kabotu. Kucakubonenaako, na twabona Yehova mbwaatucafwa kucana bantu bacite myoyo isuni kwiiya cancine, tulabona ayi ncakwiila Yehova alicite nkumbu. (Joni 6:44; Milimo 13:48) Tulabona Maswi akwe Lesa mbwaacite nkusu na twabona baabo mbotwiisha Baibo mbobacileka mibo ibiibi akutalika kufwala buntu bupya. (Kolo. 3:9, 10) Alimwi tulabona ayi Lesa ulakalika moyo na twalanga pacoolwe ncaapa bantu baanji mumisena motushimikila kwaamba ayi beeye pali nguwe akupuluka.​—Loma. 10:13-15.

12. Kweelana a Kulonga 33:13, ino Mose wakasenga nshi, alimwi ino nceebonshi?

¹² Mose wakalinga kulemeka bushicibusa bwakwe a Yehova. Yehova wakapa kwaamba ayi Mose acite shaankamiko shiinji, alimwi ici cakamucafwa kumushiba kabotu Yehova. Nacibi boobo, Mose wakasenga Yehova ayi amucaafwe kumushiba kabotu. (Amubelenge Kulonga 33:13.) Paciindi ici kaali mumyaaka yamuma 80. Nacibi boobo, wakalinga kucishi ayi wakalinga kweelete kutolelela kwiiya pali Baishi bakwiculu beshilusuno.

13. Ino inga twatondesha buyani ayi tulabikila maano kubushicibusa bwesu a Lesa?

¹³ Ino tutokwiiyawo nshi? Nabi kwaamba ayi twasebensela Yehova kwa myaaka iinji buyani, tulyeelete kubikila maano kukuyumya bushicibusa bwesu anguwe. Nshila yomwi mbweenga twatondesha ayi tulabikila maano kubushicibusa bwesu a Lesa, nkwiinda mukubandika anguwe mumupailo.

14. Ino nceebonshi mupailo ncoyandikila na tulisuni kuyumya bushicibusa bwesu a Lesa?

¹⁴ Kubandikishanya kulayumya bushicibusa. Aboobo inga twayumya bushicibusa bwesu a Lesa na katubandika anguwe mumupailo lyoonse, akumulwiita nshetutooyeeya ambotutoolinyumfwa. (Efe. 6:18) Nankashi Krista, uyo ukala ku Turkey, wakaamba ayi: “Lyoonse na ndalwiita Yehova nshentooyeeya akubona mbwancafwa, lusuno lwangu lulaya panembo alimwi ndamushoma abuumbi. Kubona Yehova mbwaakumbula mipailo yangu, kulancafwa kumubona mbuli Ta alimwi Shicibusa.”

15. Ino Yehova wakaamba nshi pa Mwaami Defedi?

¹⁵ Mwaami Defedi wakashalilwa mumukwashi wakalinga kulyaabite kuli Yehova Lesa. Nacibi boobo, Defedi taakalinga kupaila Yehova ceebo cakukonkelabo mukwashi wakwe. Wakasebensa cankusu kwaamba ayi abe abushicibusa a Lesa, alimwi Yehova wakalinga kumusuni abuumbi. Yehova mwiine wakaamba ayi Defedi wakalinga ‘musankwa ngwaakalinga kusuni abuumbi.’ (Milimo 13:22) Ino  Defedi wakacita buyani kwaamba ayi abe abushicibusa buyumu a Yehova?

16. Ino Defedi wakeeya nshi pali Yehova ndyaakalanga pa shilengwa?

¹⁶ Defedi wakeeya pali Yehova kwiinda mukulanga shilengwa. Ndyaakalinga mwanike, wakalinga kukala ciindi cilaamfu pansengwe kaalama mbelele sha baishi. Mpashi nceciindi ndyaakalinga kukutumana akuyeeya shintu Yehova nshaakalenga. Kucakubonenaako, muciindi ca mashiku Defedi wakalinga kubona nyenyeenshi shiinji abuumbi. Taakalinga kweelabo pa kushibona, sombi wakalinga kukutumana akuyeeya pamibo ya wooyo wakashilenga. Defedi wakalemba ayi: “Liculu lilaambilisha bulemu bwakwe Lesa; shili mwiculu shilashibisha milimo ya maansaakwe.” (Kulu. 19:1, 2) Alimwi na wayeya Yehova mbwakabumba bantu, wakalinga kubona ayi ncakwiila Yehova alicite busongo bwiinditeewo. (Kulu. 139:14) Kukutumana kuyeya pashintu Yehova nshaakabumba kwakacafwa Defedi kuliceesha abuumbi.​—Kulu. 139:6.

17. Ino nshiinshi nsheenga tweeya pali Yehova na katukutumana akuyeeya pashintu nshaakalenga?

¹⁷ Ino tutokwiiyawo nshi? Tulyeelete kubikila maano kushintu Yehova nshaakalenga, akukutumana kuyeeya mbwaakashilenga kabotu. Aboobo bushiku abushiku amukutumane akuyeeya nsheenga mweeya pamibo yakwe Yehova kuswa kushintu nshaakalenga mbuli shishango, shinyama, alimwi abantu. Kucita boobo bushiku abushiku kulaakutucafwa kwiiya shiinji pali Ishiwesu wakwiculu utusuni abuumbi. (Loma. 1:20) Alimwi ici cilaakunooyumya lusuno lwesu pali nguwe bushiku abushiku.

18. Kweelana a Kulumbaisha 18, ino Defedi wakaamba nshi?

¹⁸ Defedi wakalinga kubona Yehova mbwaakalinga kumucafwa. Kucakubonenaako, ndyaakashitilisha mbelele sha baishi kuswa ku nkalamu alimwi a beya, wakeshiba ayi Yehova ngowakamucafwa kwaamba ayi acikoonshe kucaya shinyama shobilo shikali shilya. Ndyaakakoma shilumamba ndundwa minkulwa Golyati, Defedi wakabona patuba kwaamba ayi Yehova ngowakamucafwa. (1 Samwe. 17:37) Alimwi nabi ndyaakacikonsha kuloboka Mwaami wakalinga kucite munyono Saulo, Defedi wakaamba ayi Yehova ngowakamufuna. (Kulu. 18, maswi ali peculu) Naakwiinga Defedi wakalinga muntu ulilumbaisha, naakwiinga taakwe kwaamba ayi ngu Yehova wakamucafwa. Sombi Defedi wakalinga muntu uliceesha, alimwi ici cakapa kwaamba ayi anoobona ayi Yehova ngowakalinga kumucafwa mubuumi bwakwe.​—Kulu. 138:6.

19. Ino inga tweeya nshi kuswa kucakubonenaako cakwe Defedi?

¹⁹ Ino tutokwiiyawo nshi? Tatweelete kusengabo ayi Yehova atucaafwe. Tulyeelete kunoobona mbwaatucafwa akushiba ciindi ndyaatucafwa. Na tulaliceesha, tulaakushiba kwaamba ayi Yehova ngootucafwa kukumanisha shintu nsheenga tatucikoonshi. Alimwi na lyoonse katubona Yehova mbwaatucafwa, bushicibusa bwesu anguwe bulaakunooyuminaako. Mukwesu Isaac, ukala ku Fiji uyo wasebensela Yehova kwa myaaka iinji wakabona ayi makani aya ngancine. Wakaamba ayi: “Ndabona Yehova mbwancafwa kuswabo ciindi ndyendakatalika kwiiya Baibo. Ici capa kwaamba ayi bushicibusa bwangu a Yehova buyumineeko.”

20. Ino nshiinshi nsheenga tweeya ku bushicibusa bwakwe Defedi a Lesa?

²⁰ Defedi wakakonkela cakubonenaako cakwe Yehova. Yehova wakatulenga ankusu shakucikonsha kukonkela mibo yakwe. (Mata. 1:26) Cilaakuba cuubu kukonkela mibo yakwe Yehova na katwiiya pamibo yakwe. Defedi wakalinga kumushi kabotu Ishi wakwiculu Yehova, alimwi ici cakapa kwaamba ayi cibe cuubu  kukonkela cakubonenaako cakwe. Kucakubonenaako, paciindi cimwi Defedi wakacita bulale a Batisheba akucaya ibaye. Ici cakalinga cilubo cinene abuumbi kuli Yehova. (2 Samwe. 11:1-4, 15) Nacibi boobo, Yehova wakamunyumfwila nkumbu, mukwiinga alakwe wakalinga kutondesha bamwi inkumbu. Mukwiinga Defedi wakalinga kucite bushicibusa bubotu abuumbi a Yehova, bene Isilaeli bakalinga kumusuni abuumbi alimwi Yehova wakalinga kweelanya shakalinga kucita baami bamwi bamu Isilaeli ashakalinga kucita Defedi ndyaakalinga kulela.​—1 Baami 15:11; 2 Baami 14:1-3.

21. Kweelana a Bene Efeso 4:24 a Bene Efeso 5:1, ino “kukonkela mibo yakwe Lesa” kulacafwa buyani?

²¹ Ino tutokwiiyawo nshi? Tulyeelete “kukonkela mibo yakwe Lesa.” Kucita boobo kulaakutucafwa kumushiba kabotu akutupa kutondesha kwaamba ayi ncakwiila tuli bana bakwe Lesa.​—Amubelenge Bene Efeso 4:24; 5:1.

22-23. Ino nshiinshi sheshi shikacitike na katukonkela nshetwiiya pali Yehova?

²² Bweenka mbuli mbotwabona, inga tweeya pali Yehova na katubikila maano kushintu nshaakalenga akwiiya Maswi akwe, Baibo. Baibo ilicite shakubonenaako shiinji sha bantu bakasebensela Lesa cakushomeka abo mbweenga twakonkela mbuli Mose alimwi a Defedi. Yehova wakatupa shoonse shiyandika kwaamba ayi tumushibe kabotu. Aboobo aswebo tulyeelete kucitawo comwi kwaamba ayi tumushibe kabotu.

²³ Kwiiya pali Yehova teshi kukamaane. (Shiku. 3:11) Cintu ciyandika teshi kushibabo shiinji pali Yehova, sombi kukonkela nshetwiiya. Na katukonkela nshetwiiya pali Yehova kwiinda mu Maswi akwe akushintu nshaakalenga akukonkela mibo yakwe, alaakusena pafwiifwi andiswe. (Jemu. 4:8) Wakashomesha kwiinda mu Maswi akwe ayi teshi akabalekeleshewo abo beelesha cankusu kumushiba.