1-2. (a) Ino ngu mwaaka nshi bamwi ngobasekelela? (Amubone kabokosi kacite mutwi utokwaamba ayi “ Ino Mwaaka wa Lwaanguluko wakalinga mwaaka nshi?”) (b) Kweelana a Luka 4:16-18, ino Yesu wakaamba pamakani nshi?

MUSHISHI shimwi bantu balaba akusekelela kulibetele na mwaami nabi muka mwaami wakwanisha myaaka 50 mubuleelo. Kusekelela kwa mwaaka uyu mpashi inga kwabako bushiku bomwi munsondo na kwiindaawo. Ono mukuya kwaciindi bantu balalubaako sha kusekelela uko.

² Tutoobandika mwaaka wa lwaanguluko winditeewo pa myaaka ya lwaanguluko bantu njobasekelela alimwi winditeewo apa mwaaka wa lwaanguluko wakalinga kusekelela bene Isilaeli. Mwaaka wa Lwaanguluko wakalinga kusekelela bene Isilaeli wakalinga kubapa lwaanguluko. Ino nceebonshi ncotweelete kwiiya pa mwaaka uyu? Mwaaka uyu ulatwiibalusha cintu cibotu abuumbi Yehova ncaakatubambila, ico ceenga catucafwa apacecino ciindi alimwi ceshi cikape kwaamba ayi tukabe alwaanguluko lutamaani. Yesu alakwe wakaambawo pamakani alwaanguluko ulu.​—Amubelenge Luka 4:16-18.

3. Kweelana a Lefi 25:8-12, ino Mwaaka wa Lwaanguluko wakalinga kubacafwa buyani bene Isilaeli?

³ Kwaamba ayi tunyumfwishishe kabotu Yesu nshaakasansulula ndyaakalinga kwaamba sha Lwaanguluko, tulyeelete kutaanguna kubandika pa Mwaaka wa Lwaanguluko Lesa ngwaakalwiita bene Isilaeli ayi banoosekelela. Yehova wakalwiita bene Isilaeli ayi: “Mulyeelete kunoobona mwaaka wa makumi osanwe kuba usalalite akwaambilisha lwaanguluko kubantu boonse bamucishi. Ulaakuba Mwaaka wa Lwaanguluko, womwi awomwi alaakuboolela kumuunda wakwe akuboolela womwi awomwi kumukwashi wakwe.” (Amubelenge Lefi 25:8-12.) Mumutwi wamana twakabandika  bushiku bwa Sabata ya nsondo ansondo mbobwakalinga kucafwa bene Isilaeli. Ano ino Mwaaka wa Lwaanguluko wakalinga kubacafwa buyani? Atwaambe ayi mwine Isilaeli waba ankongole shiinji, wakalinga kuulisha muunda kwaamba ayi abooshe nkongole. Mu Mwaaka wa Lwaanguluko, uyo wakoola muunda wakalinga kuuboosha ku mwiine ngwaakoolaako. Aboobo mwine Isilaeli uyo wakalinga ‘kuboolela ku muunda wakwe,’ alimwi bana bakwe bakalinga kukona muunda uyo. Acimwi cakalinga kucitika ncakwaamba ayi, na musankwa alicite nkongole shiinji, wakalinga kuulisha mwanaakwe mubusha na kulyuulisha mwiine mubusha kwaamba ayi abooshe nkongole. Mu Mwaaka wa Lwaanguluko, musha ‘wakalinga kuboolela kumukwashi wakwe.’ Aboobo taakuwo muntu wakalinga kutolelela kuba mubusha kwakubula bulindilishi! Cakutatoonsha, bubaambo ubu bulatondesha patuba kwaamba ayi Yehova wakalinga kubayeeyelaako bantu bakwe!

4-5. Ino nceebonshi ncotuyandikila kwiiya pa Mwaaka wa Lwaanguluko bene Isilaeli ngobakalinga kusekelela?

⁴ Ino ni nshila nshi imwi bene Isilaeli mbobakalinga kucafwikwa a Mwaaka wa Lwaanguluko? Yehova wakaamba ayi: “Pakati kanu tapeelete kucanika mukandu nabi womwi, mukwiinga Yehova ulaakumupa coolwe cinene abuumbi mucishi ico nceshi akamupe ayi cibe caanu.” (Duto. 15:4) Ano ishi shilipusene abuumbi ashintu mboshibete munshiku shino, ndyetutoobona babile kababililaako, abalo bakandu, bukandu bwabo butooyabo panembo!

⁵ Mbuli Beneklistu, tatukonkeli milawo yakwe Mose. Nkokwaamba ayi tatukonkeli mulawo wakusekelela Mwaaka wa Lwaanguluko, uyo wakalinga kucafwa basha kwaanguluka kuswa kubusha, kulekelelwa nkongole, alimwi akubabooshesha myuunda ya mikwashi yabo. (Loma. 7:4; 10:4; Efe. 2:15) Nacibo boobo, kwiiya makani alwaanguluko ncintu ciyandika. Ino nceebonshi? Mukwiinga aswebo inga twaba alwaanguluko ulo lutwiibalusha loolo Yehova ndwaakalinga apa bene Isilaeli.

6. Ino bantu batoyandika kwaangululwa kuswa ku nshi?

⁶ Soonse tulayandika kwaangululwa kuswa kubusha bubiibi abuumbi, busha bwa bubi. Mukwiinga tatusalalite, tulacembela, kuciswa, alimwi akufwa. Bantu baanji balabona cipa bumboni bwa kwaamba ayi tatusalalite na  balilanga muligilasi, nabi na baya mukushilikwa kucipatela. Alimwi tulalinyumfwa cibiibi na twabisha. Mutumwi Paulo wakaamba ayi wakalinga kutolwa ‘busha amulawo wa bubi wakalinga mumubili wakwe.’ Wakatolelela akwaamba ayi: “Maawe nemucaangu! Ino ngani eshi akamfuneeko kumubili uyu utontola kulufu?”​—Loma. 7:23, 24.

7. Ino Isaya wakaamba nshi pamakani alwaanguluko?

⁷ Cabotaako ncakwaamba ayi Lesa wakabika bubaambo bwa kwaamba ayi tukapulushikwe na kwaangululwa kuswa kububi. Yesu ngweshi akape kwaamba ayi tukaangululwe. Ndyekwakacaala myaaka iindilila 700 kwaamba ayi Yesu ese pacishi capanshi, mushinshimi Isaya wakaambila limwi ayi kulaakuba lwaanguluko lunene abuumbi kwiinda lwakalinga kusekelela bene Isilaeli mu Mwaaka wa Lwaanguluko. Isaya wakalemba ayi: ‘Mushimu wa Mwaami Shinkusu Shoonse Yehova uli pali ndime, mukwiinga wakansala kwaamba ayi nshimikile babombu myoyo makani abotu. Wakantuma kwaamba ayi nkaange shilonda sha baabo balefukite mumoyo, akwaambilisha lwaanguluko kubasha.’ (Isa. 61:1, NWT) Ino bushinshimi ubu bwakalinga kwaamba pali baani?

8. Ino bushinshimi bwa lwaanguluko bwakaamba Isaya bulasansulula baani?

⁸ Bushinshimi buyandika ubu bwaamba sha lwaanguluko, bwakatalika kukumanishikwa Yesu ndyaakatalika ncito yakushimikila. Ndyaakalinga mu sunagogi ku Nasaleti tauni nkwaakakulila, Yesu wakabelengela ba Juda bakalinga kubungene bushinshimi ubu. Yesu wakaamba ayi bushinshimi ubu bwakalinga kwaamba pali nguwe ayi: “Mushimu wa Mwaami Shinkusu Shoonse Yehova uli pali ndime, mukwiinga wakansala kwaamba ayi nshimikile babombu myoyo makani abotu. Wakantuma kwaamba ayi nkaange shilonda sha baabo balefukite mumoyo, akwaambilisha lwaanguluko kubasha akucalula meenso aboofu, akwaangulula baabo balyatililwa, akwaambilisha mwaaka wa shoolwe shakwe Yehova.” (Luka 4:16-19) Ino Yesu wakacita buyani kwaamba ayi akumanishe bushinshimi ubu?

9. Ino bantu baanji muciindi cakwe Yesu bakalinga kulangila lwaanguluko lwa mushobo nshi?

⁹ Yesu ndyaakalinga pacishi capanshi bantu ndyebakatalika kuba alwaanguluko lwa kaamba Isaya alimwi ulo Yesu ndwaakabelenga. Inga twaamba ayi ishi nshetwaamba nshancine mukwiinga Yesu wakashinisha ayi: “Sunu lilembo ili ndyemwanyumfwa lyakumanishikwa.” (Luka 4:21) Baanji bakanyumfwako bushinshimi Yesu mbwaakabelenga, mpashi bakalinga kulangila ayi balaakwaangululwa kuswa kubweendeleshi bwa bene Loma. Na mpashi bakalinga kuyeeya bweenka mbuli basankwa bobilo bakaamba ayi: “Twakalinga kulangila ayi uyu muntu ngweshi  akalubule bene Isilaeli.” (Luka 24:13, 21) Ano tulicishi kwaamba ayi Yesu taakalinga kuyuminisha bashikwiiya bakwe kubukila buleelo bwa bene Loma abo bakalinga kubeendelesha calunkutwe. Sombi wakabalwiita ayi “Amupe Sisa shintu shakwe Sisa.” (Mate. 22:21) Aboobo ino Yesu wakaleta buyani lwaanguluko paciindi cilya?

10. Ino Yesu wakaangulula bantu kuswa ku nshi?

¹⁰ Mwanaakwe Lesa wakesa pacishi capanshi kwaamba ayi alubule bantu munshila shobilo. Cakutaanguna, Yesu wakacafwa bantu kwaanguluka kuswa kunjiisho shakubeca shakalinga kwiisha beshibupailishi. Ba Juda baanji paciindi ici bakalinga mubusha bwa kushoma akukonkela milawo anjiisho shakubeca. (Mate. 5:31-37; 15:1-11) Abo bakalinga kwaamba ayi mbobatoocafwa bantu kusebensela Lesa, abalo tabakalinga kumushiiwo kabotu Lesa, aboobo bakalingabo anga mboofu. Mukwiinga bakakaka Mesiya acancine ncaakalinga kwiisha, bakaalilwa kumushiba Lesa, bakatolelela mbuli boofu alimwi kubisha kwabo takuna kulekelelwa. (Joni 9:1, 14-16, 35-41) Mukwiinga Yesu wakalinga kwiisha cancine akutondesha cakubonenaako cibotu, wakacafwa bantu baliceesha kushiba nsheenga bacita kwaamba ayi baangululwe kuswa kunjiisho shakubeca.​—Maako 1:22; 2:23–3:5.

11. Ino ninshila nshi yabili Yesu mbwaakalubula bantu?

¹¹ Cabili, Yesu wakapa kwaamba ayi bantu baangululwe kuswa kubusha bwa bubi. Mukwiinga Yesu wakaaba buumi bwakwe mbuli cilubula, Lesa wakalekelela shibiibi sha baabo bashoma mulambu wacilubula, akucita shitondesha ayi balicite lushomo. (Ebu 10:12-18) Yesu wakaamba ayi: “Na Mwaana wamwaangulula, ingayi mwaangululwa cancinencine.” (Joni 8:36) Lwaanguluko ulu lwakalinga kwiinditewo pa lwaanguluko lwakalinga kuba abantu mu mwaaka wa Lwaanguluko! Kucakubonenaako, musankwa waangululwa mu Mwaaka wa Lwaanguluko, mpashi wakalinga kuba musha alimwi, mukuya kwaciindi wakalinga kufwa.

12. Ino mbaani bakalinga bataanshi kufubilaamo mu lwaanguluko lwa kaambilisha Yesu?

¹² Pabushiku bwa Pentekositi yamu mwaaka wa 33 Yesu kaali waboolela kale kwiculu, Yehova wakasebensesha mushimu wakwe usalashi kunanika batumwi alimwi abasankwa abanakashi bamwi bashomeka. Wakabapa coolwe cakuba bana bakwe kwaamba ayi kunembo bakabushikwe kwiculu akunoolela pomwi a Yesu. (Loma. 8:2, 15-17) Aba mbobakalinga bataanshi kufubilaamo mu lwaanguluko lwa kaambilisha Yesu kaali mu sunagogi ku Nasaleti. Banakashi abasankwa aba bakaangululwa kuswa kunjiisho shakubeca alimwi amilawo yakalinga kuyuminisha bapailishi baba Juda, iyo yakalinga kupusene a Maswi akwe Lesa mbwaakalinga kwiisha. Alimwi  Lesa wakalinga kubabona ayi bakaangululwa kuswa ku bubi ubo bupa kwaamba ayi tunoofwa. Mwaaka wa Lwaanguluko lwa cikoshanyo ulo lwakatalika Yehova ndyaakananika bashikwiiya bakwe Yesu mu mwaaka wa 33 Yesu kaali waboolela kale kwiculu, ulaakumana kumamanino a buleelo bwakwe Yesu bwa myaaka 1000. Ino nshibotu nshi sheshi shikakumanishikwe paciindi ico?

13-14. Ino mbaani bamwi kwiilika pa Beneklistu bananikitwe beenga batambula lwaanguluko Yesu ndwakaambilisha?

¹³ Munshiku shino, bantu baanji abuumbi kuswa mumishobo ipusenepusene bakaba lubasu lwa “mbelele shimwi.” (Joni 10:16) Lesa taakwe kubasala kuya mukulela pomwi a Yesu kwiculu. Sombi balicite bulindilishi bwakuba abuumi butamaani pacishi capanshi kweelana a Baibo mboyakashomesha. Sa amwebo mbobulindilishi mbomucite?

¹⁴ Nabi pacecino ciindi inga mwafubilaamo mushintu shibotu Lesa nshaakapa bananikitwe. Na mwashoma mumulambu wakwe Yesu, inga mwasenga ayi Lesa amulekelele shibiibi shanu. Na Lesa walekelela shibiibi shanu, inga mwasangalala akuba anjeelacaamba isalalite. (Efe. 1:7; Ciyu. 7:14, 15) Alimwi amuyeeye Lesa mbwaamupa shoolwe ceebo cakwaamba ayi wakamwaangulula kuswa kunjiisho shakubeca. Yesu wakaamba ayi: “Mulaakushiba cancine, alimwi cancine cilaakumwaangulula.” (Joni 8:32) Aboobo tulicite lusangalalo abuumbi ceebo ca kulubulwa!

15. Ino ndwaanguluko ashoolwe nshi nsheenga twalangila kunembo?

 ¹⁵ Inga mwalangila lwaanguluko lwiinditeewo pasheeshi nshetwabandika. Kunembo, Yesu alaakunyonyoola bupailishi boonse bwakubeca alimwi amfulumeende shilyatilila bantu. Lesa alaakushitilisha “likoto lya bantu baanji” abo bamusebensela, alimwi alaakupa kwaamba ayi bakacane shoolwe shiinji mupaladaiso pacishi capanshi. (Ciyu. 7:9, 14) Bantu bamwi baanji balaakubushikwa akuba acoolwe cakwaangululwa kuswa kumapensho esa ceebo cakubisha kwakwe Adamu.​—Milimo 24:15.

16. Ino ndwaanguluko nshi bantu ndweshi bakabe aalo kunembo?

¹⁶ Mubuleelo bwa Myaaka 1000, Yesu abaabo mbweshi akanookweendeleshaabo balaakupa kwaamba ayi bantu batasalalite bakabe abuumi busalalite abushicibusa bubotu a Lesa. Ciindi ici cilaakuba anga ngu Mwaaka wa Lwaanguluko uyo wakalingaako muciindi ca bene Isilaeli, bantu balaakuba abushicibusa bubotu a Lesa akwaangululwa. Ishi shilaakupa kwaamba ayi bantu batasalalite boonse basebensela Lesa ca kushomeka bakabe abuumi busalalite kwakubula kubishaawo.

17. Kweelana a Isaya 65:21-23, ino bantu bakwe Lesa balaakunokala buyani kunembo? (Amubone cikope pa peeji yakutaanguna)

¹⁷ Baibo palilembo lyakwe Isaya 65:21-23 yakaambila limwi bantu mbweshi bakanookala pacishi capanshi (Amubelenge.) Tulaakuba ashiinji shakucita mucishi cipya. Baibo ilaamba ayi bantu bakwe Lesa paciindi ico balaakunoosebensa ncito shibotu sheshi shikanoobapa kuba basangalete. Inga tatutoonshi akutoonsha kwaamba ayi Myaaka 1000 ndyeshi ikanoomana “shilengwa ashalo shilaakwaangululwa kuswa kubusha bwa kubola akuba bana bakwe Lesa.”​—Loma. 8:21.

18. Ino nceebonshi nceenga twashomena ayi kunembo shintu shilaakubota?

¹⁸ Bweenka Yehova mbwaakalinga wabika bubaambo bwakwaamba ayi bene Isilaeli banooba aciindi cakusebensa alimwi akookesha, mbweshi akacite akubantu bakwe mu Myaaka 1000 ya Buleelo Bwakwe Klistu. Kwakubula akutoonsha ico cilaakuba ciindi cakucita shiinji shakumushimu. Tulyeelete kunopaila Lesa kwaamba ayi tunooba alusangalalo, alimwi mucishi cipya tulaakunooba aciindi cakucita boobo. Bantu boonse bashomeka balaakukondwa Klistu ndyeshi akanookweendelesha kwa Myaaka 1000, mpashi ceebo cakwaamba ayi soonse tulaakunoosebensa ncito yeshi ikanootupa lusangalalo mukwiinga soonse tulaakunoosebensela Lesa.