AMUYEEYE kwaamba ayi shikulanga pamakani abushiku mbobwaca washiba kwaamba ayi kumusena kukala bantu baanji kutoosa mfula yacipuupu. Mukwiinga alisuni bantu, wacita shoonse nsheenga wacikonsha kwaamba ayi acenjeshe bantu imfula kaitana kutalika.

Yehova alakwe mbwaatoocita munshiku shino, atoocenjesha bantu boonse pacishi ca panshi kwaamba ayi kutoosa cintu cinene abuumbi ciinda pa mfula “yacipuupu” njeenga bantu bacenjeshekwa kuswa kubaabo balanga sha bushiku mbobwaca. Ino Yehova atoocenjesha bantu kwiinda mukusebensesha nshi? Alimwi ino nciinshi nceenga twashomena ayi Yehova alacenjesha bantu ciindi kaciciliiko cakwaamba ayi baciteewo comwi? Kwaamba ayi tushibe shikumbulo, atutaangune kubandika Yehova mbwaakacenjesha bantu muciindi cakale kale.

Muciindi camu Baibo, Yehova wakacenjesha ayi alaakuleta boomboloshi buli anga “ncipuupu ciyoosha” pabantu batakalinga kukonkela kashanga milawo yakwe. (Tus. 10:25; Jele. 30:23) Lyoonse wakalinga kutaanguna kucenjesha bantu batakalinga kumunyumfwila alimwi wakalinga kubalwiita anshobeelete kucita kwaamba ayi banoomunyumfwila. (2 Baami 17:12-15; Neye. 9:29, 30) Liinji Yehova wakalinga kusebensesha basebenshi bakwe bashomeka bapacishi ca panshi kucenjesha bantu kwaamba ayi baaluke cakufwambaana.​—Amosi 3:7.

Kucakubonenaako, Yehova wakasebensesha Nowa kwaambilisha boomboloshi bwakwe. Kwa myaaka iinji, Nowa taakwe kuloonda kucenjesha bantu bakalinga kucite mibo ibiibi alimwi beshilunkutwe pamakani aMuyoba unene wakalinga kusa kunembo. (Mata. 6:9-13, 17) Wakabalwiita anshobakalinga kweelete kucita kwaamba ayi bapuluke​—Nowa wakashimikila abuumbi cakwaamba ayi wakesa mukushibikwa ayi ‘ngushikushimikila bululami.’​—2 Pita 2:5.

Nabi kwaamba ayi Nowa wakeelesha cankusu, bantu bamuciindi cilya tabakwe kubikilaako maano kukucenjesha kwakwe Lesa. Bakatondesha ayi tabakalinga kucitewo lushomo nabi paniinibo. Aboobo, Muyoba unene ndiwakesa “wakabalobya boonse.” (Mate. 24:39; Ebu 11:7) Tabakalinga kucitewo pakubekeshela ayi Lesa taakwe kutucenjesha ciindi kaciciliiko.

Cimwi ciindi, Yehova wakalinga kucenjesha bantu na kwacaalabo ciindi ciniini kwaamba ayi alete boomboloshi bwakwe buli anga ‘ncipuupu’. Nacibi boobo, wakalinga kushinisha kwaamba ayi abo boonse beelete koomboloshekwa, bapekwa ciindi cikwene kwaamba ayi baaluke. Myaalu 10 ndyeyakalinga kucitika ku Ijipiti, wakalinga kubacenjeshela limwi. Kucakubonenaako, Yehova wakatuma Mose a Aloni kwaamba ayi baye bacenjeshe Falawo abasebenshi bakwe pa mwaalu wa namba 7 uyo wakanyonyoola shintu shiinji. Mukwiinga mwaalu uyu wakalinga kweelete kutalika bushiku bwakalinga kukonkelawo, sa Lesa wakabapa ciindi cakwaamba ayi bacane kwakuyuba kwaamba ayi bapuluke mfula ya mabwe? Baibo ilaamba ayi: “Mpeeke bacinenenene bamwi ba mwaami Falawo bakaloonda ceebo ca maswi ayo akaamba Yehova, aboobo bakaleta akwinjisha basha babo alimwi ashifubwa shabo mumaanda, nacibi boobo bamwi tabakwe kubikaako maano, aboobo bakashiya basha ashifubwa shabo pansengwe.” (Kulo. 9:18-21) Cakutatoonsha, Yehova wakabapa ciindi cikwene boonse kwaamba ayi bakonkele nshaakabalwiita akuleya mapensho akacana baabo batana kunyumfwila.

Falawo alakwe abasebenshi bakwe bakacenjeshekwa mwaalu wa namba 10 kootana kushika. Abalo bakakaka kukonkela nshebakalwiitikwa kucita. (Kulo. 4:22, 23) Aboobo shakaswaamo nshakwaamba ayi bana babo bakwiiya boonse bakafwa. Cakabica abuumbi! (Kulo. 11:4-10; 12:29) Ono sa bakalinga kucite ciindi cakwaaluka mwaalu kautana kutalika? Ee! Mose wakalwiita bene Isilaeli cakufwambaana sha mwaalu wa namba 10 wakalinga kusa alimwi wakabalwiita anshobakalinga kweelete kucita kwaamba ayi bapuluke amikwashi yabo. (Kulo. 12:21-28) Ino mbantu  bongaye bakanyumfwila nshaakabalwiita Mose? Kweelana abeshikubelenga bamwi, bantu 3 miliyoni na kwiindaawo, kwiilikaawo “abantu bamwi baanji bateshi bene Isilaeli” nabi bene Ijipiti, boonse bakapuluka boomboloshi bwakwe Lesa akuswa mu Ijipiti.​—Kulo. 12:38.

Shakubonenaako shoonse ishi nshetwabandikaawo, shilatondesha patuba kwaamba ayi Yehova alapa bantu ciindi cakwaamba ayi baaluke kaatana kuleta boomboloshi. (Duto. 32:4) Ino nceebonshi ncaakalinga kucitila boobo? Mutumwi Pita wakaamba ayi Yehova ‘taasuniiwo muntu nabi womwi kunyonyoolwa, sombi kwaamba ayi boonse baane kuswa kushibiibi shabo.’ (2 Pita 3:9) Ncakwiila, Lesa alabikila maano kubantu bakwe. Wakalinga kusuni kwaamba ayi baane akuswa kushibiibi shabo boomboloshi kabutana kushika.​—Isa. 48:17, 18; Loma. 2:4.

Amunshiku shino, bantu boonse balyeelete kunyumfwila Yehova nshaatocenjesha bantu nsengwe yoonse. Yesu ndyaakalinga pacishi capanshi, wakacenjesha bantu ayi Yehova alaakunyonyoola bweende bwa shintu buno ciindi ca “mapensho anene.” (Mate. 24:21) Ndyaakalinga kwaamba sha mapensho aya, wakaambila limwi kwakubula kwiinda mweela bashikwiiya bakwe nshobakalinga kweelete kulangila, asheshi shikanoocitika na mapensho anene akacaale pafwiifwi kutalika. Nceceeco Yesu ncaakaambila limwi shintu shinene shitoocitika munshiku shino.​—Mate. 24:3-12; Luka 21:10-13.

Kweelana abushinshimi ubu, Yehova atooyuminisha bantu boonse kusalawo kumusebensela akumunyumfwila kwaamba ayi bakapuluke mapensho anene. Pacecino ciindi, alisuni kwaamba ayi shintu shinoobeendela kabotu bantu bamunyumfwila alimwi shilaakuba kabotu abuumbi kunembo mucishi cipya mweshi mukabe bululami. (2 Pita 3:13) Kwaamba ayi bantu bashome Yehova nshaakabashomesha, wakabapa makani eenga abapulusha, aya ngamakani aamba sha Bwaami,’ ayo Yesu ngaakaambila limwi ayi alaakushimikilwa kubantu boonse bapacishi capanshi kwaamba ayi akabe mbobukamboni kubantu boonse.’ (Mate. 24:14) Lesa wakabamba ayi basebenshi bakwe “bashimikile” makani kuswa kuli nguwe, mushishi shishika kuma 240. Yehova alisuni kwaamba ayi bantu baanji abuumbi banyumfwe kucenjesha kwakwe kwaamba ayi bakapuluke boomboloshi bwakwe bululeme buli anga “ncipuupu” ubo butoosa kunembo.​—Sefa. 1:14, 15; 2:2, 3.

Aboobo tatweelete kutoonsha na Yehova alapa bantu ciindi cikwene kwaamba ayi baaluke nabi sobwe. Shakubonenaako shoonse nshetwabandika shatondesha patuba kwaamba ayi alabapa ciindi. Mwiipusho unene ngotweelete kuyeyawo ngwakwaamba ayi: Sa bantu balaakunyumfwila kucenjesha kwakwe Lesa ciindi kacitana kumana? Mbuli beshinkombe bakwe Lesa, atutolelele kucafwa bantu baanji kwaamba ayi bakapuluke mamanino abweende bwa shintu buno.