1-2. (a) Ino beendeleshi bashishi balaakwaambilisha nshi conoonobo? (b) Ino njimiipusho nshi njotweelete kucana shikumbulo?

AMUYEEYE mbweshi cikabe na beendeleshi bashishi bakaambilishe ayi “luumuno akuliiba.” Mpashi balaakulinyumfwa akwaamba ayi twaba aluumuno nsengwe yoonse ano. Beendeleshi aba balaakusuna ayi tukayeeye ayi inga bacikonsha kumana mapensho oonse ali pacishi capanshi. Nacibi boobo teshi bakacikoonshe kukasha sheshi shikakonkelewo! Ino nceebonshi? Kweelana abushinshimi bwamu Baibo, “cakuteengashila bunyonyooshi bulaakubashikila, . . . alimwi taakuwo eshi akacicewo.”​—1 Tesa. 5:3 nwt.

² Ano atubandike miipusho itokonkelaawo: Ino nshiinshi sheshi shikanoocitika ciindi ca “mapensho anene”? Ino Yehova alaakutulangila kucita nshi paciindi ico? Ino nciinshi ncotweelete kucita kwaamba ayi tukatolelele kushomeka ciindi ca “mapensho anene”?​—Mate. 24:21.

3. Kweelana a Ciyubululo 17:5, 15-18, ino Lesa alaakumunyonyoola buyani “Babiloni Munene”?

³ Amubelenge Ciyubululo 17:5, 15-18. “Babiloni Munene” alaakunyonyoolwa! Bweenka mbuli mbotwaambawo kale, paciindi ici beendeleshi bashishi taakuwo nceshi bakacikoonshe kucita. Ino nceebonshi? Mukwiinga “Lesa [alaakucibika] mumyoyo yabo kwaamba ayi bakumanishe muyeeyo wakwe.” Ino ngumuyeeyo  nshi? Muyeeyo wakunyonyoola bupailishi bwakubeca boonse, kwiilikaawo abaabo baliitabo ayi mBeneklistu sombi batapaili kweelana akuyanda kwakwe. Lesa alaakupa kwaamba ayi “meeca likumi” a “munyama usalala pyu” akacite sheeshi. Meeca likumi aleemikaninaako mfulumeende shoonse sheendeleshekwa a “amunyama”​—uyo wiimikaninaako United Nations. (Ciyu. 17:3, 11-13; 18:8) Mfulumeende ishi ndyeshi shikalwane bupailishi boonse bwakubeca, mapensho anene ndyeshi akatalike. Ishi shilaakucitika cakuteengashila alimwi cilaakuba ciindi ciloondesha abuumbi ceshi cikakume bantu boonse pacishi capanshi.

4. (a) Ino shishi shilaakwaamba ayi nciinshi cabapa kwaamba ayi banyonyoole bupailishi bwakubeca? (b) Ino bakalinga kuya kubupailishi ubu batoboneka ayi balaakucita buyani?

⁴ Tatucishiiwo ceshi cikape kwaamba ayi shishi shikalwane Babiloni Munene. Mpashi balaakumulwana ceebo cakuyeeya ayi ngotolengesha ayi kutabi luumuno ceebo cakwaabanamo lubasu kwakwe mushamapolitiki. Na mpashi balaakwaamba ayi walibunjikila bubile buunji abuumbi alimwi ashintu. (Ciyu. 18:3, 7) Na shishi shikalwane bupailishi bwakubeca, mpashi teshi boonse bali mubupailishi ubu beshi bakanyonyoolwe. Sombi citoboneka kwaamba ayi shilaakunyonyoola mabunga abupailishi. Na mabunga aya akanyonyoolwe, abo bakalinga kupailaako ndyeshi bakese mukushiba ayi bamatanjilili babupailishi bakababeca, aboobo mpashi balaakuswa mumabunga ayo.

5. Ino Yehova washomesha nshi pamakani amapensho anene, alimwi ino nceebonshi?

⁵ Baibo tayaambiwo na kunyonyoolwa kwa Babiloni Munene kulaakutola ciindi cilaamfu buyani, sombi tulishi kwaamba ayi teshi cikabwese ciindi cilaamfu. (Ciyu. 18:10, 21) Yehova wakashomesha ayi ‘alaakushifwiimpyaako nshiku’ sha mapensho anene ceebo ca “basalitwe” bakwe alimwi bali mubupailishi bwancine balaakupuluka. (Maako 13:19, 20) Ano ino Yehova alakutulangila kunoocita nshi kuswa ciindi mapensho anene ndyeshi akatalike kushika kuciindi ca nkondo ya Amagedoni?

6. Ino nciinshi ncotweelete kucita kwaamba ayi tuswite limwi mubupailishi bwakubeca?

⁶ Bweenka mbuli mbotwakeeya mumutwi wamana, Yehova alisuni kwaamba ayi bantu bakwe  baswite limwi mu Babiloni Munene. Nacibi boobo, ici tacaambibo kuswa mu bupailishi bwakubeca. Sombi tulyeelete kuba bashinishite kusebensela Yehova. Atubandike nshila shobilo mbweenga twacita boobo.

7. (a) Ino inga twatondesha buyani ayi tulakonkela njiisho shakwe Yehova shiluleme? (b) Ino lilembo lya Bene Ebulu 10:24, 25 lilaamba nshi citucafwa kubona kuyandika kwakubungana?

⁷ Cakutaanguna, tulyeelete kuba bashinishite kukonkela njiisho shakwe Yehova shiluleme shaamba pakuba amibo ibotu. Tatweelete kuba amibo ibiibi icite bantu bamucishi ici. Kucakubonenaako, tatweelete kusuminisha mushobo uli woonse wabulale, mbuli kweebana kwabasankwa beenka beenka na banakashi amibo imwi itabete kabotu. (Mate. 19:4, 5; Loma. 1:26, 27) Cabili, tulyeelete kutolelela kunoocanika kumabungano aBwineklistu. Inga twacita boobo kuli koonse nkweenga twaba, inga kwaba Kuŋanda ya Bwaami na mpashi muŋanda ya mukwesu, na kaciyandika nabibo kumwi nkweenga bamwi tabashibiiwo. Tatweelete kucileka kuya kumabungano nabi shintu shayuma buyani. Alimwi tulyeelete kunobungana pomwi “bunene bunene ndyetutoobona bushiku mbobwasena pafwiifwi.”​—Amubelenge Bene Ebulu 10:24, 25.

8. Ino makani ngweshi tukanooshimikila alyeelete alakwaaluka buyani?

⁸ Muciindi camapensho anene, mpashi makani ngeshi tukanooshimikila alaakwaaluka. Pacecino ciindi, tulashimikila makani abotu a Bwaami akweelesha kucafwa bantu kuba bashikwiiya. Ano paciindi ico, mpashi tulaakunooshimikila makani acisa abuumbi anga nga mabwe amfula. (Ciyu. 16:21) Mpashi tulaakunoshimikila ayi cishi cakwe Satana cili pafwiifwi kunyonyoolwa cakumaninina. Mukuya kwaciindi, tulaakushiba kabotu makani ngeshi tukanooshimikila ambweshi tukanoocita. Ano sa tulaakunooshimikila akwiisha bweenka mbotwakalinga kucita kwa myaaka iinji? Na mpashi tulaakusebensesha nshila shimwi? Kwalo, tatucishiiwo. Muli moonse mweshi cikabete, citoboneka kwaamba ayi tulaakuba acoolwe cakwaambilisha cakutaloonda, makani aboomboloshi bwakwe Yehova!​—Ese. 2:3-5.

9. Ino nshiinshi mpashi beendeleshi nsheshi bakacite ceebo ca makani ngeshi tukanooshimikila, sombi ino nciinshi nceenga twashoma cakutatoonsha?

⁹ Citoboneka anga makani ngeshi tukanooshimikila ngeshi akape kwaamba ayi beendeleshi ba shishi bakatukaashe kushimikila. Tulaakuyandika lucafwo lwakwe Yehova kwaamba ayi tukacikoonshe kushimikila bweenka mbocibete amunshiku shino. Inga twashoma kwaamba ayi Lesa wesu alaakutupa nkusu shakucikonsha kucita kuyanda kwakwe.​—Mika 3:8.

10. Kweelana a Luka 21:25-28, ino bantu baanji balaakucita buyani ciindi camapensho anene?

¹⁰ Amubelenge Luka 21:25-28. Ciindi camapensho anene, bantu balaakukankamana abuumbi ndyeshi bakabone kunyonyooka kwashintu shamucishi nshobakalinga kubona anga nshamuyayaya. Balaakuba “abuumba,” ceebo cakuloonda ayi batoofwa mukwiinga kulaakuba makatasho atana kucitikaawo kale. (Sefa. 1:14, 15) Paciindi ico, citooboneka ayi shintu shilaakuba shiyumu nabi kubantu bakwe Yehova. Mukwiinga tatubete lubasu lwa cishi, mpashi tulaakwiindako mumapensho amwi. Mpashi tulaakubulishako shiyandika shimwi.

11. (a) Ino nceebonshi pesule lyakunyonyoolwa kwa bupailishi bwakubeca, bantu abeendeleshi bashishi balaakululamabo pa Bakamboni bakwe Yehova? (b) Ino nceebonshi tatweelete kuloonda mapensho anene?

¹¹ Mpashi kulaakuba ciindi abo bakalinga mubupailishi bwakubeca ubu bwakanyonyoolwa, ndyeshi bakakalale ceebo cakwaamba ayi Bakamboni bakwe Yehova beenkabo mbobacaala kabapaila Lesa. Mpashi balakusebensesha Intaneti kutondesha bantu ayi tabana kukondwa. Beendeleshi  bashishi a Satana mweendeleshi wabo, balaakukalala mukwiinga ndiswebo sobeshi bakacaale katupaila Yehova pacishi capanshi. Balaakukalala mukwiinga balaakubona ayi baalilwa kukumanisha kuyanda kwabo kwakunyonyoola bupailishi boonse pacishi ca panshi. Aboobo balaakululamabo pali ndiswe. Paciindi ici, shishi shilaakuba Gogi wakucishi ca Magogi. * Balaakucatana pomwi akulwana bantu bakwe Yehova ankusu shabo shoonse. (Ese. 38:2, 14-16) Inga twatalika kulisukama asheshi shikacitike ciindi ca mapensho anene, bunene bunene ceebo cakwaamba ayi tatucishiiwo makani oonse ashintu mbweshi shikabe. Nacibi boobo, ncetushi ncakwaamba ayi: Tatweelete kuloonda mapensho anene. Yehova alaakutulwiita nsheshi tukayandike kucita kwaamba ayi tukapuluke. (Kulu. 34:19) “Tulaakwiimikana akwinuna mitwi yesu,” mukwiinga “kulubuka kwesu kulaakuba pafwiifwi.” *

12. Ino “musebenshi ushomeka alimwi ucite maano” watucafwa buyani kulibambila shitoosa kunembo?

¹² “Musebenshi ushomeka alimwi ucite maano” alatulwiita nshotweelete kucita kwaamba ayi tukacikoonshe kutolelela kushomeka muciindi camapensho anene. (Mate. 24:45) Alacita boobo munshila shiinji, kucakubonenaako, kubungana kwesu kunene kwamu 2016, 2017, alimwi a 2018, kwakatucafwa kushiba mibo njotweelete kubaayo bushiku bwakwe Yehova ndyebuli pafwiifwi. Amuleke tubandikewo paniini pamibo iyi.

13. Ino inga twacita buyani kwaamba ayi tuyumye kushomeka kwesu kuli Yehova, alimwi ino nceebonshi ncotutoyandikila kucita boobo pacecino ciindi?

¹³ Kushomeka: Kubungana kunene kwamu 2016 kwakalinga kucite mutwi wakalinga kwaamba ayi “Amutolelele Kushomeka Kuli Yehova!” Pakubungana uku twakeeya ayi tulyeelete kuba abushicibusa buyumu a Yehova kwaamba ayi tucikoonshe kushomeka kuli nguwe. Twakeeya ayi inga twaba abushicibusa buyumu a Yehova na katupaila akwiiya Maswi akwe Lesa cakubikila maano. Kucita boobo kulatupa nkusu sha kukoma mapensho nabi akomene buyani. Bweende bwakwe Satana ndyebuli pafwiifwi kumana, inga twalangila kwiinda mumeelesho aanji ayumu abuumbi akuma kushomeka kuli Lesa a Bwaami bwakwe. Alimwi inga twalangila ayi bantu balaakutolelela kwaamba shibiibi pali ndiswe. (2 Pita 3:3, 4) Cintu comwi ceenga calengesha ayi bantu baambe shibiibi pali ndiswe ncakwaamba ayi tatwaabanimo lubasu mushintu shamucishi cakwe Satana. Tulyeelete kuyumya kushomeka kwesu pacecino ciindi kwaamba ayi tukacikoonshe kucita boobo ciindi camapensho anene.

14. (a) Ino nciinshi ceshi cikacitike kubamakwesu batanjilila? (b) Ino nceebonshi tulaakuyandika kushomeka paciindi ico?

¹⁴ Ciindi camapensho anene, bamakwesu bamwi mbweshi bakatalike kutanjilila bantu bakwe Lesa. Kulaakuba ciindi bananikitwe boonse bacili pacishi ca panshi ndyeshi bakabunganishikwe kwiculu kwaamba ayi bakaabanemo lubasu mukulwana nkondo ya Amagedoni. (Mate. 24:31; Ciyu. 2:26, 27) Nkokwaamba ayi paciindi ici Bamulikoto Litanjilila teshi bakabe andiswe pacishi ca panshi. Nacibi boobo, bamulikoto linene balaakutolelela kuba bacatene. Bamakwesu beelela bamulikoto lya mbelele shimwi mbeshi bakatalike kutanjilila. Tulaakuyandika kutondesha kushomeka kwesu kuli Yehova  kwiinda mukunyumfwila akukonkela butanjilishi bwakwe Lesa mbweshi akanootupa kwiinda mubamakwesu aba. Tulyeelete kunyumfwila nsheshi bakanootulwiita kwaamba ayi tukapuluke!

15. Ino inga twacita buyani kwaamba tuyumye kuliyumya kwesu, alimwi ino nceebonshi ncotutoyandikila kucita boobo pacecino ciindi?

¹⁵ Kuliyumya: Kubungana kunene kwamu 2017 kwakalinga kucite mutwi wakalinga kwaamba ayi “Mutabooli Pesule!” Kubungana uku kwakatucafwa kushiba mbweenga twatolelela kuliyumya. Twakeeya kwaamba ayi kuliyumya kwesu takwiimfwi pabukaalo mbotubeteemo sobwe. Tulaliyumya ceebo ca kucinka manungo muli Yehova. (Loma. 12:12) Aboobo tutaluubi cishomesho cakwe Yesu ncakaamba ayi: ‘Uyo eshi akaliyumye kushika akumamanino ulaakupulushikwa.’ (Mate. 24:13) Maswi aya alasansulula ayi tulyeelete kutolelela kushomeka mumapensho ali woonse. Mukwiinga kuliyumya mumapensho ali woonse pacecino ciindi kulaakuyumya lushomo lwesu mapensho anene kaatana kutalika.

16. Ino nciinshi citupa kuba bantu bataloondi, alimwi ino inga twacita buyani kwaamba ayi tuyumye kutaloonda kwesu pacecino ciindi?

¹⁶ Kutaloonda: Kubungana kunene kwamu 2018 kwakalinga kucite mutwi wakalinga kwaamba ayi “Mutaloondi!” Kubungana uku kwakatucafwa kwiibaluka kwaamba ayi teshi nkusu shesu shitupa kwaamba ayi tucikoonshe kuba bantu bataloondi. Bweenka mbuli kuliyumya, tulyeelete kushoma muli Yehova kwaamba ayi tucikoonshe kuba bantu bataloondi. Ino nshiinshi nsheenga twaciita kwaamba ayi tuyumye kucinka manungo kwesu muli Yehova? Tulyeelete kubelenga Maswi akwe Lesa bushiku abushiku akukutumana kuyeeya Yehova mbwaakapulusha bantu bakwe muciindi cakale kale. (Kulu. 68:20; 2 Pita 2:9) Shishi na shikalwane bantu bakwe Lesa ciindi camapensho anene, tulaakuyandika kutaloonda akushoma muli Yehova abuumbi. (Kulu. 112:7, 8; Ebu 13:6) Kucinka manungo muli Yehova pacecino ciindi, kulaakutucafwa kutaloonda ciindi Gogi ndyeshi akatulwaane. *

17. Ino nceebonshi ncotuteelete kuloondela Amagedoni? (Amubone cikope pa peeji yakutaanguna.)

¹⁷ Bweenka mbuli mbotwakeeya mumutwi wamana, buunji bwandiswe twakashalwa munshiku  shakweelaako. Nacibi boobo, tutoolangila kupuluka mapensho anene. Inkondo ya Amagedoni njeshi ikamane cishi cakwe Satana. Nacibi boobo, tatweelete kuloonda nabibo paniini. Ino nceebonshi? Mukwiinga inkondo teeshi yesu, njakwe Yehova. (Tus. 1:33; Ese. 38:18-20; Seka. 14:3) Yehova alaakulwiita Yesu Klistu shakucita ndyeshi akanotanjilila beshinkondo bakwe Lesa. Yesu alaakulwana nkondo pomwi abananikitwe boonse kwiilikaawo abaanjelo baanji. Boonse pomwi balaakulwana Satana, bashikaswa bakwe, abeshinkondo babo bapacishi capanshi.​—Danye. 12:1; Ciyu. 6:2; 17:14.

18. (a) Ino Yehova watushomesha nshi? (b) Ino Ciyubululo 7:9, 13-17 ilatucafwa buyani kushoma cakutatoonsha kwaamba ayi ncakwiila Yehova alaakutupulusha?

¹⁸ Yehova watushomesha ayi: “Taakuwo cilwanisho cakapangilwa kulwana ndiwe ceshi cikaswitilile.” (Isa. 54:17) “Likoto linene” lya basebenshi bakwe Yehova bashomeka “balaakupuluka mapensho anene,” lyalo akutolelela kusebensela Yehova. (Amubelenge Ciyubululo 7:9, 13-17.) Baibo ilatucafwa abuumbi kushoma cakutatoonsha ayi ncakwiila tulaakupuluka! Tulishi kwaamba ayi “Yehova alashitilisha bantu bakwe bashomeka.” (Kulu. 31:23) Abo boonse basuni Yehova alimwi akumulumbaisha, balaakukondwa Yehova ndyeshi akasalashe liina lyakwe.​—Ese. 38:23.

19. Ino ncoolwe nshi cibotu abuumbi nceshi tukacane conoono?

¹⁹ Amuyeeyebo makani akalinga kweelete kuba pa 2 Timoti 3:2-5 naakwiinga akalinga kusansulula bantu beshi bakabe mucishi cipya kwakubula Satana. (Amubone kabokosi kacite mutwi utokwaamba ayi “ Bantu Mbweshi Bakabe Mucishi Cipya.”) Mukwesu George Gangas, * uyo wakalinga womwi wa Bamulikoto Litanjilila, wakaamba ayi: “Cishi cilaakubota abuumbi na muntu uli woonse akanosebensela Yehova! Conoonobo mulaakuba acoolwe cakuba mubweende bwashintu bupya. Mulaakukala kwamuyayaya bweenka mbuli Yehova mbwaatolelela kubaako kwamuyayaya.” Ici ncoolwe cinene abuumbi!