1. Ino nceebonshi tulyeelete kupaila Yehova eenkabo?

TULYEELETE kupaila Yehova eenkabo mukwiinga ngo Mulengi wesu alimwi ngowakatupa buumi. (Ciyu. 4:11) Nacibi boobo, kuli lipenshi lyomwi. Nabi kwaamba ayi tulisuni Yehova alimwi tulamulemeka, cimwi ciindi shintu shimwi inga shatupilinganya mubuumi bwesu cakwaamba ayi twaalilwa kusuna akupaila Yehova eenkabo. Tulyeelete kutaanguna kushiba kabotu ceenga capa kwaamba ayi ishi shicitike. Aboobo amuleke tubandike kupaila Yehova eenkabo ncocaamba.

2. Kweelana a Kulonga 34:14, ino tulaakucita buyani na twakalyaaba cakumaninina kuli Yehova?

² Na Baibo yaamba pamakani akupaila Lesa eenkabo, nkokwaamba ayi itoosansulula ayi tulyeelete kumusuna abuumbi. Na twalyaaba cakumaninina kuli Yehova, nkokwaamba ayi tulaakunoopailabo nguwe eenka. Teshi tukasuneewo muntu na cintu cimwi cili coonse, kwiinda mbotusuni Yehova.​—Amubelenge Kulonga 34:14.

3. Ino nshiinshi Yehova nshaakatupa kwaamba ayi tulyaabe kuli nguwe?

³ Tatuna kulyaababo kuli Yehova kwakubula kushiba ncetutoocita. Ino nciinshi ncetwaambila boobo? Twaamba boobo mukwiinga twakataanguna kwiiya pali nguwe. Twakasuna mibo yakwe ibotu. Tulishi shintu Yehova nshaasuni alimwi anshaapatite, aswebo tulipatite shintu nshaapatite akusuna nshaasuni. Tulishi kuyanda kwakwe aboobo aswebo nkotuyuminisha. Tulishi ayi wakatupa coolwe cinene abuumbi cakuba beshicibusa bakwe. (Kulu.  25:14) Makani ali woonse ngotwiiya pa Mulengi wesu alatucafwa kusena pafwiifwi anguwe.​—Jemu. 4:8.

4. (a) Ino Satana alacita buyani kwaamba ayi atulengeshe kwaalilwa kulyaaba cakumaninina kuli Yehova? (b) Ino tutokwiiya nshi mumutwi uyu?

⁴ Satana ngootokweendelesha nsengwe ino, alimwi ngoopa kwaamba ayi tutalike kubona shintu shili mucishi ici anga shilicindeme abuumbi cakwaamba ayi twatalika kushikumbwa. (Efe. 2:1-3; 1 Joni 5:19) Ncaasuni ncakwaamba ayi tusune bunene shintu sha mucishi cakwaamba ayi twaalilwe kulyaaba cakumaninina kuli Yehova. Amuleke tubandike nshila shobilo Satana nsheenga wasebensesha. Nshila yakutaanguna, nkusuna kubila, alimwi yabili, nkutasala kabotu shakulikondelesha.

5. Ino nceebonshi ncotweelete kuleya mushimu wakusuna maali?

⁵ Muntu uli woonse alisuni kuba ashakulya shikwene, shakufwala shibotu, alimwi amusena ubotu pakukala. Nacibi boobo, tulyeelete kucenjela kwaamba ayi tutabi amushimu wakusuna maali. Bantu baanji munshiku shino ‘balayandishisha buboni’ alimwi balisuni abuumbi shintu nsheenga maali oola. (2 Timo. 3:2) Yesu wakalinga kucishi ayi bashikwiiya bakwe mpashi abalo inga batalika kusuna maali. Nceceeco ncakaambila ayi: “Taaku muntu weenga wasebensela baami bobilo, mukwiinga ulapata womwi akusuna umwi, nabi kunyumfwila womwi akusuula umwi. Tamukoonshi kusebensela Lesa abuboni.” (Mate. 6:24) Muntu usebensela Yehova akusebensa cankusu kwaamba ayi abe abuboni mucishi ici, inga twamusansulula ayi atoosebensela baami bobilo. Inga taacikoonshi kulyaaba cakumaninina kuli Yehova.

6. Ino inga tweeyawo nshi pa maswi Yesu ngaakalwiita bamulibungano lyaku Lawodisiya?

⁶ Mwaaka wa 100 Yesu kaali waboolela kale kwiculu kautana kushika, bamulibungano lya Lawodisiya bakalinga kulinyumfwa akwaamba ayi: “Ndimubile, ndicite buboni buunji, taakuwo  ncentacite.” Ano kuli Yehova a Yesu bakalinga ‘bapengete alimwi balensha nkumbu, bakandu, boofu alimwi bakalinga matakosha.’ Aboobo Yesu wakabalulika kuteshi ceebo cakwaamba ayi bakalinga babile, sombi ceebo cakwaamba ayi bakalinga kusuni bunene buboni cakwaamba ayi bakanyonyoola bushicibusa bwabo a Yehova. (Ciyu. 3:14-17) Na twabona kwaamba ayi twatalika kusuna bunene maali na bubile, tulyeelete kucileka cakufwambaana. (1 Timo. 6:7, 8) Mukwiinga na twaalilwa kucita boobo, nkokwaamba ayi tulaakutalika kusuna shimwi shintu, aboobo Yehova teshi akatambule kulambila kwesu. Mukwiinga “alisuni ayi tunoopaila nguwe eenkabo.” (Duto. 4:24, NWT) Ino nciinshi ceenga capa kwaamba ayi tutalike kusuna maali abuumbi?

7-9. Ino mweeya nshi kuswa kushakeendamo munene wa liina lya David?

⁷ Atubandike cakubonenaako cakwe David, munene mulibungano usebensa cankusu abuumbi ukala ku United States. Wakaamba ayi wakalinga muntu usebensa cakulyaaba kuncito yakumubili njaakalinga kusebensa. Bakamupa ncito ibotu abuumbi ya maali aanji kukampani nkwaakalinga kusebensa, alimwi wakalinga kushibikitwe mbuli muntu ucishi kabotu abuumbi incito mucishi coonse. Mukwesu David wakaamba ayi: “paciindi cilya, ndakalinga kubona anga ishi shoonse shakalinga shoolwe kuswa kuli Yehova.” Ano sa ncakwiila Yehova ngowakamupa shoolwe ishi?

⁸ Mukuya kwaciindi mukwesu David wakatalika kubona ayi bushicibusa bwakwe a Yehova bwatalika kuboolela mwisule ceebo ca ncito yakwe. Wakaamba ayi: “Ndyetutoobungana na ndyentooshimikila, ndakalinga kutalika kunooyeeyabo mapensho ali kuncito. Ndakalinga kufola maali aanji, sombi ndakalinga kulisukama abuumbi, alimwi twakatalika kuba amapensho mucikwati cesu.”

⁹ Aboobo wakesa mukushiba ayi alyeelete kusalawo comwi ncaakalinga kweelete kunoobikila  maano abuumbi. Wakaamba ayi: “Ndakasala nshondakalinga kweelete kucita kwaamba ayi ntolelele kuba shicibusa wakwe Yehova.” Wakalinga kusuni kwaalula mbwaakalinga kusebensa ncito yakwe, aboobo wakalwiita munene wakamunjisha ncito. Ino munene wancito wakamulwiita nshi mukwesu uyu? Wakamutanda ncito! Ino mukwesu David wakacita buyani? Wakaamba ayi: “Bushiku bwakaboolaawo, ndakabwesa foomu akulembesha bupainiya bwakucafwilisha, bwakutolelela.” Mukwesu David amukaakwe bakatalika kusebensa ncito yakubotesha maanda anene kwaamba ayi banolicafwilisha. Lyalo mukuya kwaciindi boonse bobilo bakatalika bupainiya bwa ciindi coonse. Beebene aba bakasala kucita ncito bantu baanji njebasuulite, nacibi boobo, cintu cinene ncobakalinga kubikila maano teshi ncito iyo sombi kusebensela Yehova. Nabi kwaamba ayi tabacani maali aanji mbuli kale kale, mweenshi uli woonse balaba amaali akwene kuula shoonse nshebayandika. Balisuni kubikila maano abuumbi kukusebensela Yehova, alimwi balibonena beene ayi ncakwiila Yehova alabalama abo bataanguna kubika sha Bwaami panembo.​—Mate. 6:31-33.

10. Ino moyo wesu inga twaulama buyani?

¹⁰ Inga caba ayi tulicite maali aanji nabi sobwe, sombi soonse tulyeelete kulama myoyo yesu. Munshila nshi? Tuteeleshi kutalika kusuna bubile. Alimwi tuteeleshi kusuna bunene incito yakumubili kwiinda kusebensela Yehova. Ino inga mwashiba buyani na mwakatalika kusuna bunene incito yakumubili? Inga mwaliipusha miipusho mbuli: ‘Sa lyoonse na kaandi kumabungano nabi muncito yakushimikila ndayeeyabo pancito yakumubili? Sa lyoonse ndalisukama na ndaakuba amaali eenga ancafwa kunembo? Sa ndicite mapensho mucikwati cangu ceebo camakani amaali abuboni? Sa inga ndasumina kusebensa ncito bantu baanji njobasuulite na njeenga yancafwa kusebensela kabotu Yehova?’ (1 Timo. 6:9-12) Ndyemutooyeeya pamiipusho iyi, mutaluubi kwaamba ayi Yehova alimusuni abuumbi, aboobo washomesha baabo boonse bakalyaaba kuli nguwe ayi: “Teshi nkamushiyeewo nabi kumulekelesha sobwe.” Nceceeco mutumwi Paulo ncaakalembela ayi: “Mutasunishi bunene maali mubukaalo bwanu.”​—Ebu 13:5, 6.

11. Ino shakulikondelesha muntu nshaasala inga shamukuma buyani?

¹¹ Yehova alisuni kwaamba ayi tunosangalala mubuumi, alimwi shakulikondelesha inga shatucafwa kucita boobo. Aboobo, Maswi akwe Lesa alaamba ayi “kumuntu, taaku cintu cibotu kwiinda kulya, kunwa alimwi akusangalala muncito njaasebensa cankusu.” (Shiku. 2:24) Nacibi boobo, shakulikondelesha shiinji sha mucishi  inga shapa kwaamba ayi tube amibo ibiibi. Inga shapa bantu kusuna mibo ibiibi Baibo njoikasha.

12. Kweelana a 1 Bene Kolinto 10:21, 22, ino nceebonshi tulyeelete kusala kabotu shakulikondelesha?

¹² Tulisuni kulyaaba cakumaninina kuli Yehova, aboobo inga katutali ‘patebulu yakwe Yehova’ alimwi ‘apatebulu ya bashikaswa.’ (Amubelenge 1 Bene Kolinto 10:21, 22.) Liinji bantu mbotulyaabo shakulya mbeshicibusa besu. Na twasala kweebela shakulikondelesha shitondesha nkondo, shamishimu, bulale, na lunkumbwa lwa mubili a mibo imwi ibiibi, nkokwaamba ayi tutoolya shakulya shakabambwa abalwani bakwe Lesa. Aboobo bushicibusa bwesu a Yehova inga bwanyonyooka.

13-14. Kweelana a Jemusi 1:14, 15, ino nceebonshi tulyeelete kucenjela ashakulikondelesha nshetusala? Amwaambe cikoshanyo.

¹³ Shakulikondelesha inga twashikoshanisha kushakulya. Ndyetutoolya, inga twasalawo nsheenga twabika mukanwa. Ano na twaminabo shakulya isho, tatuciteewo nkusu shakusala mbweshi shisebense mumibili yesu. Shakulya shibotu inga shapa kwaamba ayi tube abuumi bubotu; ano shakulya shitabete kabotu inga shatupa kuciswa. Na twaswabo mukulya, inga tatuboni shakulya mboshitucafwa peenkapo, sombi paleenda ciindi.

¹⁴ Ubu mbocibete akushakulikondelesha, inga twalisalila sobeene shakulikondelesha nshetusuni, ano cancine ncakwaamba ayi shakulikondelesha nshetusala shilakuma mbotuyeeya ambotulinyumfwa. Shakulikondelesha shibotu inga shatusangalasha, ano shakulikondelesha shitabete kabotu inga shatunyonyoola. (Amubelenge Jemusi 1:14, 15.) Mpashi shibiibi shiswa mushakulikondelesha shitabete kabotu inga tatushibooni peenkapo, ano cancine ncakwaamba ayi mukuya kwaciindi shilaakubonekela. Nceceeco Baibo ncoitucenjeshela ayi: “Mutabecekwi: muntu inga taalengi Lesa buluya. Muntu woonse ulatebula sheesho nshaakashanga; mukwiinga uyo ushanga kweelana ashiyanda mubili wakwe alaakutebula kubola kuswa kumubili.” (Gala. 6:7, 8, NWT) Aboobo tulyeelete kuleya shakulikondelesha shili shoonse shitondesha shintu Yehova nshaapatite!​—Kulu. 97:10.

15. Ino ncipo nshi Yehova ncaakatupa?

¹⁵ Basebenshi bakwe Yehova baanji balasangalala kweebela pulogilamu ibotu abuumbi ya JW Bulodikasiti^®, iyo njotucana pa Intaneti. Nankashi wa liina lya Marilyn wakaamba ayi: “JW Bulodikasiti yancafwa abuumbi kuba muntu usangalete, alimwi ndeebela makani oonse mukwiinga alikabotu. Na ndalinyumfwa kuumuninwa nabi kulefuka, ndayuminishikwa na ndeebela lubasu lwa Kulambila Kwamacuunsa lucanika pa JW Bulodikasiti. Ici cilampa kulinyumfwa kuba pafwiifwi a Yehova alimwi alibunga lyakwe. Pulogilamu ya JW Bulodikasiti yaalula buumi bwangu.” Sa amwebo mutoofubilaamo mucipo ici cakaswa kuli Yehova? Kwiilikaawo pa pulogilamu ya mweenshi a mweenshi, pa JW Bulodikasiti palacanika mapulogilamu amwi aanji amaswi akalekodwa, mavidyo alimwi anyiimbo shiyuminisha abuumbi nsheenga mweebela akukutika paciindi cili coonse ncemusuni.

16-17. Ino nceebonshi tulyeelete kucenjela aciindi ncetusowa kushakulikondelesha, alimwi ino inga twacita buyani kwaamba ayi tutanoosowa ciindi cilaamfu kushakulikondelesha?

¹⁶ Tulyeelete kubikila maano kushakulikondelesha nshetusala alimwi abulaamfu bwaciindi ncetusowa. Mukwiinga na tatuna kucenjela, inga katusowa ciindi cilaamfu kushakulikondelesha kwiinda mukusebensela Yehova. Bantu baanji balapenga ambweenga balama ciindi ncobeelete kusebensesha pashakulikondelesha. Nankashi wa liina lya Abigail ucite myaaka 18 wakaamba ayi: “Ndanyumfwa kabotu kweebela TV ndyentokookesha. Ano na nshikwe kucenjela, inga ndamana mawoola aanji kaanjebelabo TV.” Mukwesu wacanike wa liina lya Samuel wakaamba ayi: “Cimwi ciindi ndeebela tumavidyo tufwiifwi pa Intaneti mawoola aanji. Inga ndatalika akweebelabo  komwi, ano cakutayeeyawo ndacanabo ayi ndamana mawoola otatwe na one.”

¹⁷ Ino inga mwacita buyani kwaamba ayi mutanoosowa ciindi cilaamfu kushakulikondelesha? Cakutaanguna, mulyeelete kushiba bulaamfu bwaciindi ncemusowa pashakulikondelesha. Inga cabota na mwalemba ciindi ncemusowa kushakulikondelesha munsondo. Amulembe ciindi ncemusowa kweebela tv, kulangoola shintu pa Intaneti, na kucita shisekano shapa fooni na patabuleti. Na mwacana kwaamba ayi mulasowa ciindi cilaamfu kushakulikondelesha, amweeleshe kulemba mulongo washakucita. Inga cabota na mwataanguna kubika ciindi cilaamfu pashintu shiyandika abuumbi, lyalo ciindi ciniini kushakulikondelesha. Kuboolaawo, amupaile kuli Yehova kwaamba ayi amucaafwe kukonkela mulongo ngomwalemba. Kucita boobo kulaakumucafwa kuba aciindi ankusu shakucita ciiyo ca Baibo capalwaanu, kulambila kwamukwashi, kulibambila mabungano, akusebensela Yehova muncito yakushimikila akwiisha. Lyalo inga mwasangalala aciindi ncemusowa pashakulikondelesha mukwiinga mwabika Yehova citaanshi.

18-19. Ino inga twatondesha buyani ayi twakalyaaba cakumaninina kuli Yehova?

¹⁸ Pesule lyakwaamba sha mamanino acishi cakwe Satana alimwi akubandika makani acishi cipya citoosa kunembo, mutumwi Pita wakaamba ayi: “Nomusunikwi, mukwiinga mutoolindila shintu ishi, amusebense cankusu kwaamba ayi mukacanike kamuli muluumuno, kamusalalite alimwi kamutacite kampenda.” (2 Pita 3:14) Na twanyumfwila kululika uku akusebensa cankusu kwaamba ayi tutolelele kuba basalalite mumibo akupaila kweelana akuyanda kwakwe Yehova, tulaakutondesha ayi ncakwiila twakalyaaba cakumaninina kuli Yehova.

¹⁹ Satana acishi cakwe balaakutolelela kutweelesha kwaamba ayi tutalike kubika shintu shimwi panembo muciindi cakubikila maano kuli Yehova. (Luka 4:13) Ano nabi tukacane mapensho ali buyani, teshi tukalekele muntu na cintu cili coonse kutupa kwaamba ayi tucileeke kusebensela Yehova. Tulishinishite kutolelela kulyaaba cakumaninina kuli Yehova mukwiinga lakwe eenkabo ngotweelete kupaila!