1. Ino Yehova inga wacita buyani kwaamba ayi akumanishe kuyanda kwakwe?

YEHOVA inga waba cili coonse ncaasuni kwaamba ayi akumanishe kuyanda kwakwe. Kucakubonenaako, Yehova inga waba Mufundishi, Shikuyuminisha, Shikushimikila, kwiilikaawo ashimwi nsheenga waba kwaamba ayi akumanishe kuyanda kwakwe. (Isa. 48:17; 2 Koli. 7:6; Gala. 3:8) Nacibi boobo, liinji alakumanisha kuyanda kwakwe kwiinda mukusebensesha bantu. (Mate. 24:14; 28:19, 20; 2 Koli. 1:3, 4) Yehova inga watupa busongo ankusu shiyandika kwaamba ayi tukumanishe kuyanda kwakwe. Ishi nshetwaambawo, mbobusansulushi abumwi bwa liina lyakwe, bweenka mbuli bantu baanji beeya shamu Baibo mbobaamba.

2. (a) Ino nciinshi cimwi ciindi ceenga catupa kutoonsha na Yehova inga watusebensesha? (b) Ino tutokwiiya nshi mumutwi uyu?

² Soonse tulisuni kusebenseshekwa a Yehova mukukumanisha kuyanda kwakwe, ano bamwi balatoonsha na Yehova inga wabasebensesha. Ino nceebonshi? Mukwiinga balalinyumfwa ayi inga tabacikoonshi kucita shiinji ceebo cakukula, bukaalo buyumu, na kubula lushibo. Bamwi balabona ayi batoocita kale shiinji, aboobo taakuwo shimwi nsheenga banungaawo. Mumutwi uyu, tutokwiiya Yehova mbweenga watucafwa kwaamba ayi tucikoonshe kukumanisha kuyanda kwakwe. Lyalo tutobandika shakubonenaako shamu Baibo, sha basebenshi bakwe Yehova basankwa abanakashi abo mbwaakapa kuyanda alimwi ankusu shakucita. Mukweelaako, tutokwiiya nsheenga twaciita kwaamba ayi Yehova atusebenseshe.

3. Kweelana a Bene Filipi 2:13, ino Yehova inga watulengesha buyani ayi tusune kucitawo comwi?

³ Amubelenge Bene Filipi 2:13. * Yehova inga watupa kwaamba ayi tusune kucitawo comwi. Ino nshiinshi nsheenga wacita? Kucakubonenaako, mpashi inga twanyumfwa ayi kuli umwi mulibungano utoyandika lucafwo na mpashi kuli ncito imwi yeelete kucitwa. Na mpashi kulibungano inga kwesa nkalata kuswa kumusampi yakutushibisha ayi kuli kumusena kumwi kutoyandika lucafwo. Ici inga catupa kuliipusha ayi, ‘Ino inga ndacafwilisha buyani?’ Na mpashi batupa ncito imwi iyumu, aboobo tatucishiiwo na inga twacikonsha kwikumanisha kabotu incito iyo. Na mpashi pesule lyakubelenga lilembo limwi mu Baibo, mwatalika kuliipusha ayi, ‘Ino makani aya inga ndaasebensesha buyani kucafwako bamwi?’ Yehova teshi akatukakatisheewo kucitawo comwi. Ano na wabona ayi tutooyeeya nsheenga twaciita, inga watulengesha kukonkela nshetwabelenga akucitawo comwi.

4. Ino Yehova inga wacita buyani kwaamba ayi atupe nkusu shakucitawo comwi?

⁴ Yehova inga watupa nkusu shakucitawo comwi. (Isa. 40:29) Inga watupa mushimu wakwe usalashi weenga watucafwa kushiba kabotu bwakusebensa ncito imwi. (Kulo. 35:30-35) Kwiinda mulibunga lyakwe, Yehova inga watwiisha bwakusebensa kabotu incito shimwi. Na tamucishi kabotu bwakusebensa ncito imwi, amusenge lucafwo. Kwiilikaawo, paciindi cili coonse inga mwasenga Ishiwesu wakwiculu “nkusu shiindaawo nshetucite.” (2 Koli. 4:7; Luka 11:13) Mu Baibo muli shakubonenaako shiinji sha basankwa abanakashi Yehova mbwaakalengesha ayi basune kumusebensela akubapa nkusu shakucitawo comwi. Ndyetutobandika shakubonenaako ishi, amuyeeye Yehova mbweenga wamusebensesha amwebo bweenka mbwaakasebensesha bamwi.

5. Ino tutokwiiyawo nshi pamakani atokwaamba Yehova mbwaakapa Mose ncito yakulubula bantu bakwe?

⁵ Yehova wakalengesha Mose kuba shikulubula wa bene Isilaeli. Ano ino ndilili Yehova ndyaakamupa ncito iyi? Sa cakalinga ciindi Mose ndyaakalinga kulinyumfwa ayi inga weelela pesule lyakwiishikwa ‘mubusongo boonse bwa bene Ijipiti’? (Milimo 7:22-25) Sobwe, Yehova wakapa Mose ncito iyi pesule lyakumucafwa kuba uliceesha alimwi utakalali bwaangu. (Milimo 7:30, 34-36) Yehova wakapa Mose nkusu shakutaloonda kwiimikana kunembo lya mwaami wa bene Ijipiti wakalinga kucite nkusu abuumbi. (Kulo. 9:13-19) Ino ishi shoonse shitootwiisha nshi? Yehova alapa ncito bantu beelesha kutondesha mibo yakwe alimwi abo bacinka manungo muli nguwe kwaamba ayi abape nkusu.​—Fili. 4:13.

6. Ino tutokwiiyawo nshi pamakani atokwaamba Yehova mbwaakasebensesha Basilayi kupa lucafwo ku Mwaami Defedi?

⁶ Pesule lya myaaka iinji abuumbi kuswa ciindi Yehova ndyaakalengesha Mose kulubula bene Isilaeli, wakapa kwaamba ayi Basilayi ape Mwaami Defedi nshaakalinga kuyandika. Defedi abantu bakwe ‘bakafwa nsala, nyotwa alimwi akulema’ ndyebakalinga kucica Abisalomu mwanaakwe Defedi. Basilayi wakalinga wacinene paciindi ici, nacibi boobo, wakabika buumi bwakwe mumapensho pantu pomwi abamwi kwaamba ayi atolele Defedi abaabo mbwakalingaabo nshobakalinga kuyandika. Basilayi taakwe kuyeeya ayi ndacembela ano aboobo Yehova inga taansebenseshiiwo. Sombi wakasebensesha nshaakalinga kucite kwaamba ayi acafwe basebenshi bakwe Lesa. (2 Samwe. 17:27-29) Ino nshiinshi nshotutokwiiyawo? Tacicite mulandu aciimo ncotubeteemo, Yehova inga watusebensesha kucafwaako bashominyineesu babulishite shiyandika, nkotukala nabi kucishi cimwi. (Tus. 3:27, 28; 19:17)  Nabi kwaamba ayi inga tatubapi lucafwo cakubalulama, inga twapa maali akucafwilisha ncito yesu nsengwe yoonse kwaamba ayi akacafweko bamakwesu abenankashi babulishite shiyandika.​—2 Koli. 8:14, 15; 9:11.

7. Ino Yehova wakamusebensesha buyani Simyoni, alimwi ino nceebonshi ishi shilayuminisha?

⁷ Yehova wakashomesha Simyoni musankwa wacinene ushomeka uyo wakalinga kukala mu Jelusalemu, ayi teshi akafwe kaatana kubona Mesiya. Cishomesho ici cilyeelete cakamuyuminisha abuumbi Simyoni, mukwiinga wakalinga kulindila kubona Mesiya kwa myaaka iinji. Yehova wakapa cilambu Simyoni ceebo calushomo akuliyumya kwakwe. Bushiku bumwi, “mushimu wakamutanjilila,” kusa ku tempele. Ndyaakalinga kutempele wakabona Yesu kaacili kateta, alimwi Yehova wakapa Simyoni kwaamba bushinshimi pa mwaana uyu wakalinga kusa mukuba Klistu. (Luka 2:25-35) Nabi kwaamba ayi Simyoni taakwe kukala myaaka iinji kwaamba ayi aboneeko Yesu mbwaakakumanisha ncito yakushimikila, Simyoni wakalumba abuumbi pacoolwe ncaakalinga kucite, alimwi alaakuba ashoolwe shiinji kunembo! Mucishi cipya, musankwa ushomeka uyu alaakubona buleelo bwakwe Yesu mbweshi bukalete shoolwe kumikwashi yoonse pacishi capanshi. (Mata. 22:18) Aswebo tulalumba abuumbi pashoolwe shili shoonse nsheenga twapeekwa muncito yakwe Yehova.

8. Ino Yehova inga watusebensesha buyani bweenka mbuli mbwaakasebensesha Banabasi?

⁸ Muciindi ca batumwi, musankwa wa liina lya Josefu wakalyaaba kusebenseshekwa a Yehova. (Milimo 4:36, 37) Mutumwi Paulo wakalinga kumwiita ayi Banabasi nkokwaamba ayi “Mwaana Uyuminisha,” mpashi ceebo cakwaamba ayi Josefu wakalinga kucishi kabotu bwakuyuminisha bamwi. Kucakubonenaako, Saulo ndyaakaba mushomi, bamakwesu baanji bakalinga kumuloonda ceebo cakwaamba ayi wakalinga kushibikitwe ayi ulapensha bashikwiiya bakwe Yesu. Nacibi boobo, Banabasi wakaya mukucafwa Saulo, alimwi Saulo wakalumba abuumbi kumutondesha nkumbu. (Milimo 9:21, 26-28) Pesule, bamanene ku Jelusalemu bakabona ayi bamakwesu abenankashi ku Antiyoki waku Asilya bakalinga kuyandika kuyuminishikwa. Aboobo ino bakatumaako ani? Banabasi! Bakasala kabotu abuumbi. Baibo ilatulwiita ayi Banabasi, “wakabayuminisha ayi batolelele kushoma mu Mwaami amyoyo yabo yoonse.” (Milimo 11:22-24) Amunshiku shino, Yehova inga watucafwa kuyuminisha bamakwesu abenankashi. Kucakubonenaako, inga watulengesha ayi tuyuminisheko baabo bakafwitwa. Na mpashi kutupa kwaamba ayi tufwakashile nabi kuyuminishako balwashi na abo balefukite. Sa mulaakusuminisha Yehova kwaamba ayi amucaafwe kucitawo comwi bweenka mbuli mbwaakacafwa Banabasi?​—1 Tesa. 5:14.

9. Ino tutokwiiyawo nshi pamakani atokwaamba Yehova mbwaakacafwa mukwesu Vasily kuba mweembeshi mubotu?

⁹ Yehova wakacafwa mukwesu wa liina lya Vasily kuba mweembeshi mubotu. Mukwesu Vasily wakaba munene ndyaakalinga kucite myaaka 26, wakalinga kuloonda ayi inga taacikoonshi kucafwa bamakwesu abenankashi mulibungano, bunene bunene abo bakalinga kwiinda mumapensho. Nacibi boobo, wakatambula lucafwo luyandika kuswa kubamanene bamwi bacishi kabotu bwakucafwa mbelele mulibungano. Kwiilikaawo, wakeeya shiinji ndyaakacanika Kucikolo ca Ncito ya Bwaami. Mukwesu Vasily wakasebensa cankusu kwaamba ayi aye panembo. Kucakubonenaako, wakalemba mulongo wa shintu shiniini niini nsheenga wacita. Kukumanisha shintu ishi nshaakalemba, kwakamucafwa kukoma boowa mbwaakalinga kucite. Aboobo wakaamba ayi: “Nshendakalinga kuloonda paciindi cilya, nsheshinsangalasha abuumbi ano. Ndanyumfwa kabotu abuumbi na Yehova wancafwa kucana lilembo ndyeenga ndabelenga kwaamba ayi njuminishe mukwesu na nankashi mulibungano.” Nobamakwesu, na amwebo mwasumina kusebenseshekwa a Yehova bweenka mbuli mukwesu Vasily, inga wamucafwa kucikonsha kukumanisha mikuli inene mulibungano.

10. Ino Abigelo wakacita buyani, alimwi tutokwiiyako nshi kucakubonenaako cakwe?

¹⁰ Defedi abantu bakwe bakalinga kucica Mwaami Saulo, aboobo bakalinga kuyandika lucafwo. Basebenshi bakwe Defedi bakaya mukusenga shakulya kuli Nabali mwine Isilaeli mubile. Tabakwe kuloonda kuya mukusenga lucafwo mukwiinga bakalinga bashitilisha mbelele shakwe muluyanga. Nacibi boobo, Nabali wakakaka kubapa nabi comwi ceebo ca buunyu. Aboobo Defedi wakakalala abuumbi cakwaamba ayi wakalinga kusuni kuya mukucaya Nabali abasankwa boonse bamuŋanda yakwe. (1 Samwe. 25:3-13, 22) Ano Abigelo mukaakwe Nabali, wakalinga mwanakashi mubotu alimwi ucenjete. Aboobo wakatondesha kutaloonda, kwiinda mukuya kuli Defedi akufukama cakushisha ciwa panshi akumusenga ayi ataciti mulandu wakutila bulowa kwiinda mukucaya Nabali abasankwa bakwe. Cabulemu wakalwiita Defedi ayi ashiye mulandu uyu mumaansa akwe Yehova. Maswi abotu akaamba Abigelo alimwi akuliceesha kwakwe shakamushika pamoyo Defedi. Defedi wakeshiba ayi Yehova ngwaamutuma. (1 Samwe. 25:23-28, 32-34) Mibo ibotu yakwe Abigelo yakalengesha kwaamba ayi Yehova amulengeshe kucita kuyanda kwakwe. Apacecino ciindi, banakashi bayeeya kabotu alimwi bacishi kwaamba maswi abotu, Yehova inga wabalengesha kuyumya mikwashi yabo abamakwesu abenankashi mulibungano.​—Tus. 24:3; Taitasi 2:3-5.

11. Ino bana bakwe Shalumu bakacita buyani, alimwi ino mbaani bakonkela cakubonenaako cabo munshiku shino?

¹¹ Ndipakeenda myaaka iinji, baana banakashi bakwe Shalumu bakalinga pabaabo Yehova mbwakasebensesha kwaabanamo lubasu mukubamba lubumbu lwa Jelusalemu. (Neye. 2:20; 3:12) Nabi kwaamba ayi Shalumu wakalinga mwanaabaami, bana bakwe bakalinga kulibambite kusebensa ncito iyumu iyi. (Neye. 4:15-18) Bakalinga kupusene abuumbi abamatanjilli baku Tekoya, abo “bakakaka kwabanaamo lubasu” muncito! (Neye. 3:5) Ano amuyeeyebo mbobakasangalala incito iyi ndyeyakamana munshiku 52 bo! (Neye. 6:15) Amunshiku shino, benankashi balalyaaba kusebensaako ncito shilibetele mbuli kuyaka akubamba misena yakwe Yehova. Kwaamba ayi incito iyi ikumanishikwe, kulayandika benankashi bacite lushibo, basebensa cankusu, alimwi bashomeka.

12. Ino Yehova inga watulengesha kucita nshi bweenka mbuli mbwaakacita Tabita?

¹² Yehova wakapa kwaamba ayi Tabita acite “ncito shibotu akucafwa bakandu,” bunene bunene bamukalubinje. (Milimo 9:36) Mukwiinga wakalinga kucite mushimu wakwaaba akutondesha nkumbu, bantu baanji bakamulila ndyaakafwa. Sombi bakasangalala abuumbi mutumwi Pita ndyaakamubusha. (Milimo 9:39-41) Ino tutokwiiya nshi kuswa kucakubonenaako cakwe Tabita? Inga caba ayi muli bacanike na bacinene, basankwa na banakashi, soonse inga twacikonsha kucitawo comwi kwaamba ayi tucafwe bamakwesu abenankashi.​—Ebu 13:16.

13. Ino Yehova wakamusebensesha buyani nankashi Ruth uyo wakalinga kucite nsoni, alimwi wakaamba nshi?

¹³ Nankashi waliina lya Ruth uyo wakalinga kucite nsoni, wakalinga kusuni kuba mishonali. Ndyaakalinga mwanike wakalinga kucicaana kuya bwaabila matilakiti kuŋanda aŋanda. Wakaamba ayi: “Ndakalinga kusangalala abuumbi kusebensa ncito iyi.” Nacibi boobo, na washika paŋanda cakalinga kumuyumina kubandika abantu sha Bwaami bwakwe Lesa. Nabi kwaamba ayi wakalinga kucite nsoni, Ruth wakatalika bupainiya bwaciindi coonse kaacite myaaka 18. Mu 1946, wakaya ku Cikolo ca Kwiiya Baibo ca Gilyadi, pesule lyacikolo ici bakamutuma kuya mukusebensela ku Hawaii alimwi aku Japan. Yehova wakamusebensesha kucita shiinji muncito yakushimikila makani abotu kumisena iyi. Pesule lyakusebensa myaaka pafwiifwi a 80 muncito yakushimikila, nankashi Ruth wakaamba ayi: “Yehova ngoompa nkusu lyoonse. Wakancafwa  kukoma lipenshi lyakunyumfwa nsoni. Ndishomete cakutatoonsha kwaamba ayi Yehova inga wasebensesha muntu uli woonse ucinka manungo muli nguwe.”

14. Kweelana a Bene Kolose 1:29, ino tulyeelete kucita buyani kwaamba ayi Yehova atusebenseshe?

¹⁴ Kuswabo kale kale, Yehova wasebensesha basebenshi bakwe munshila shipusenepusene. Ino mwebo alaakumusebensesha kucita nshi? Kuba balibambite kusebensa cankusu nkweshi kukape kwaamba ayi Yehova amusebenseshe kweelana akuyanda kwakwe. (Amubelenge Bene Kolose 1:29.) Na mulisuni kumusebensela, Yehova inga wamucafwa kuba shikushimikila usebensa cankusu, ucishi kabotu kwiisha, ucikonsha kuyuminisha bamwi, ucite lushibo lwakusebensa kabotu incito, shicibusa ucafwa, na kumulengesha kuba cili coonse nceenga wasuna kwaamba ayi akumanishe kuyanda kwakwe.

15. Kweelana a 1 Timoti 4:12, 15, ino bamakwesu bacanike balyeelete kusenga Yehova kwaamba ayi abacafwe kucita buyani?

¹⁵ Ino mwebo nobamakwesu bacanike nshiinshi nsheenga mwaciita? Basebenshi bacafwilisha beenga basebensa ncito shimwi shiinji batoyandika abuumbi. Mumabungano aanji muli bamanene baanji kwiinda basebenshi bacafwilisha. Sa nobamakwesu nobacanike inga mwasuna kusebensaako ncito ashimwi mulibungano? Cimwi ciindi bamakwesu bamwi balaamba ayi, “nebo ndisuni kusebensabo mbuli shikushimikila mulibungano camana.” Na amwebo mbomuyeeya ubo, amusenge Yehova kwaamba ayi amupe kuba alusuno lwakuya panembo akweelela kusebensa mbuli musebenshi ucafwilisha, akumupa nkusu shakwaamba ayi mucikoonshe kusebensa ncito yakwe. (Shiku. 12:1) Lucafwo lwanu lutoyandika abuumbi!​—Amubelenge 1 Timoti 4:12, 15.

16. Ino nshiinshi nshotweelete kusenga Yehova, alimwi ino nceebonshi?

¹⁶ Yehova inga walengesha kwaamba ayi mube cili coonse ncaasuni ayi mube, kwaamba ayi akumanishe kuyanda kwakwe. Aboobo amumuseenge kwaamba ayi amucaafwe kuba alusuno lwakusebensaako ncito yakwe, alimwi amumuseenge kwaamba ayi amupe nkusu nshemutoyandika. Inga caba ayi muli bacanike na bacinene, cino nceciindi ncomweelete kusebensesha ciindi canu, nkusu shanu, ashili shoonse nshomucite kukulemeka Yehova. (Shiku. 9:10) Na bamulwiita ayi kuli ncito shimwi shiinji sheelete kucitwa mulibungano, mutakaki ceebo cakuyeeya ayi inga tamucikoonshi. Ncoolwe cinene abuumbi kusebensela Ishiwesu shilusuno akumupa bulemu mbwaeelela!