1. Ino nshiinshi sheenga shatupa kulisukama, alimwi ino ici inga catupa kutalika kuyeeya buyani?

SA kuliko cimwi ciindi ndyemwakalisukama? * Mpashi mwakalisukama ceebo cakwaamba ayi muntu umwi wakaamba na kucita cintu cimwi cakamukalasha. Na mpashi mwakalisukama ceebo ca shimwi nshemwakaamba na nshemwakacita. Kucakubonenaako, mpashi mwakacita cibiibi alimwi mulabona ayi Yehova inga tamulekeleli. Alimwi mpashi mulayeeya ayi mulalisukama ceebo cakwaamba ayi lushomo lwanu teshi luyumu alimwi muli muntu mubiibi. Ano sa ici ncakwiila?

2. Ino nshakubonenaako shili shamu Baibo shitondesha ayi kulisukama teshi kubula lushomo?

² Atubandike shakubonenaako shimwi shamu Baibo. Aana wakalinga mushali wakwe Samwelo uyo wakalinga mulaluki, alimwi Aana wakalinga kucite lushomo luyumu. Nacibi boobo, wakalisukama abuumbi ndyaakalinga kupenshekwa kuli nabukashinyina. (1 Samwe. 1:7) Mutumwi Paulo alakwe wakalinga kucite lushomo luyumu, sombi wakalinga ‘kulisukama abuumbi ceebo cakuyeeya mabungano oonse.’ (2 Koli. 11:28) Defedi wakalinga Mwaami ucite lushomo luyumu alimwi Yehova wakalinga kumusuni abuumbi. (Milimo 13:22) Nacibi boobo, paciindi cimwi Defedi wakacita cibiibi, alimwi ici cakamupa kulisukama abuumbi. (Kulu. 38:4) Yehova wakayuminisha Aana, Paulo a Defedi, alimwi wakabacafwa kukalika myoyo. Atubandike nsheenga tweeya kuswa kubasebenshi bakwe Yehova aba.

3. Ino shintu sheenga shaamba bamwi inga shatupa buyani kulisukama?

³ Na muntu umwi waamba nabi kucita shintu sheenga shatukalasha, inga twalisukama. Tulalisukama abuumbi na watukalasha ngushikamukowa na shicibusa wesu. Mpashi inga twabona anga uku nkokumana kwa bushicibusa bwesu. Cimwi ciindi muntu inga waamba maswi eenga atukalasha nabi kwaamba ayi taakwe kucita kashanga, alimwi inga twalinyumfwa anga watuyasa mupeeni! (Tus. 12:18) Ano cimwi ciindi, muntu inga waamba kashanga maswi abiibi kwaamba ayi atukalashe. Ishi nsheshakacitikila nankashi umwi wacanike, wakaamba ayi: “Myaaka yaiinda shicibusa ngondakalinga kusuni abuumbi wakatalika kwaamba makani akubeca pali ndime kusebensesha Intaneti. Ndakalinyumfwa cibiibi abuumbi alimwi ndakalisukama. Nshindakalinga kuyeeyawo ayi shicibusa ngondakalinga kusuni abuumbi inga wacita cintu ca mushobo uyu.” Na shikamukowa nabi shicibusa ngomusuni abuumbi wamukalasha, inga mweeya shiinji kucakubonenaako cakwe Aana.

4. Ino ngamapensho nshi Aana ngaakalinga kucite?

⁴ Aana wakalinga kucite mapensho. Wakekala myaaka iinji kwakubula kubaawo amwaana. (1 Samwe. 1:2) Paciindi cilya bene Isilaeli bakalinga kubona ayi na mwanakashi taashali, nkokwaamba ayi wakashinganishikwa. Aboobo Aana wakalinga kulinyumfwa cibiibi abuumbi. (Mata. 30:1, 2) Cakeendawo kubica ncakwaamba ayi, nabukashinyina Penina, lakwe wakalinga kuba abaana. Penina wakalinga kubona Aana anga ngumulwani wakwe, alimwi “wakalinga kumuseka abuumbi.” (1 Samwe. 1:6) Pakutaanguna, Aana wakalinga kuba abuumba abuumbi ceebo camapensho ngaakalinga kwiindaamo. Wakalinyumfwa cibiibi abuumbi cakwaamba ayi “wakalinga kunoolilabo akukaka kulya.” Alimwi ‘wakapenga abuumbi mumoyo.’ (1 Samwe. 1:7, 10) Ino Aana wakacita buyani kwaamba ayi acileeke kulisukama?

5. Ino mupailo wakamucafwa buyani Aana?

⁵ Aana wakapaila kuli Yehova akumusansulwiita shoonse shakalinga kumoyo. Pesule lyakupaila, wakalwiitako Mupailishi Munene Eli mapensho ngaakalinga kucite. Eli wakamulwiita ayi: “Kooya muluumuno, alimwi Lesa wa bene Isilaeli aakupe ncowamusenga.” Ino nshiinshi shakacitika? “Wakaya walya alimwi abuumba bwakamana.” (1 Samwe. 1:17, 18) Mupailo wakacafwa Aana kukalika moyo.

6. Ino nshiinshi nsheenga tweeya pamakani amupailo kuswa kucakubonenaako cakwe Aana alimwi akumaswi ngotucana pa Bene Filipi 4:6, 7?

⁶ Inga twaba aluumuno alimwi na twatolelela  kupaila kuli Yehova. “Aana wakatolelela kupaila ku Mwaami Lesa kwa ciindi cilaamfu.” (1 Samwe. 1:12) Aswebo inga twapaila kuli Yehova kwa ciindi cilaamfu alimwi inga twamusansulwiita shitootusukamika, shitootuloondesha alimwi anshotutatoocita kabotu. Nabi kwaamba ayi tatucishi kabotu mbweenga twasansulula shili kumoyo, inga twapaila kuli Yehova. Cimwi ciindi inga twalila akulila ndyetutosansulwiita Yehova mapensho ngotucite. Nacibi boobo, Yehova taalemi kukutika kumipailo yesu. Alimwi lyoonse na twaba mumapensho tulyeelete kwiibaluka maswi ngotucana pa Bene Filipi 4:6, 7. (Amubelenge.) Paulo wakaamba ayi tulyeelete kupaila mipailo yakulumba. Kuli shintu shiinji sheenga shatupa kulumba Yehova. Kucakubonenaako, inga twalumba Yehova pabuumi mbwaakatupa, pashilengwa shakwe shiboneka kabotu, palusuno lwakwe, alimwi aceebo ca bulindilishi mbwaakatupa. Ino nshiinshi shimwi nsheenga tweeya kucakubonenaako cakwe Aana?

7. Ino Aana aibaye bakalinga kucita nshi lyoonse?

⁷ Ciindi ndyaakalinga kucite mapensho, lyoonse Aana wakalinga kuya ku Shilo abebaye kwakalinga musena wakupaililako Yehova. (1 Samwe. 1:1-5) Aana wakalinga kumusena uyu usalalite Mupailishi Munene Eli ndyaakamuyuminisha ayi alishomete ayi Lesa alaakukumbula mupailo wakwe.​—1 Samwe. 1:9, 17.

8. Ino kucanika kumabungano inga kwatucafwa buyani? Amusansulule.

⁸ Inga twaba aluumuno alimwi na katucanika kumabungano lyoonse. Mumupailo wakutaanguna kumabungano, liinji mukwesu upaila alasenga ayi mushimu wakwe Lesa ube andiswe. Luumuno ncisepo comwi camushimu. (Gala. 5:22) Aboobo kucanika kumabungano nabi ndyetwalisukama, nkupa coolwe Yehova abamakwesu kwaamba ayi batuyuminishe akutucafwa kuumbulusha moyo wesu. Yehova alatuumbulusha kwiinda mumupailo amabungano. (Ebul. 10:24, 25) Atubandike ashimwi nsheenga tweeya kuswa kucakubonenaako cakwe Aana.

9. Sa mapensho akalinga kwiindaamo Aana akamana peenka palya, alimwi ino nciinshi cakamucafwa kucileka kulisukama?

⁹ Mapensho Aana ngaakalinga kucite taakwe kumana peenkapo. Ndyaakaswa kumusena usalalite akuboolela kuŋanda, Aana wakatolelela kukala a Penina muŋanda yomwi. Alimwi Baibo tayaambiwo ayi Penina wakacileka kupensha Aana. Aboobo cilyeelete kwaamba ayi Aana wakatolelela kuliyumya Penina ndyaakalinga kumwaambila maswi abiibi, sombi wakacileka kuba abuumba. Mutaluubi kwaamba ayi ndyaakapaila kuli Yehova, wakacileka kulisukama. Wakasuminisha Yehova kumuyuminisha akumucafwa kukalika moyo. Mukuya kwaciindi, Yehova wakakumbula mupailo wakwe Aana, lyalo wakaba abaana!​—1 Samwe. 1:19, 20; 2:21.

10. Ino nshiinshi nshotweeya pamakani akwe Aana?

¹⁰ Inga twaba aluumuno alimwi nabi kwaamba ayi mapensho ngotucite atolelela. Nabi kwaamba ayi twapaila kuli Yehova kuswa panshi lya moyo alimwi akucanika kumabungano lyoonse, mapensho amwi alatolelela. Ano bweenka mbotweeya pamakani akwe Aana, Yehova inga taalilwiiwo kuyuminisha myoyo yesu. Yehova teshi akatulekelesheewo, alimwi alaakutupa shoolwe na twatolelela kuliyumya.​—Ebul. 11:6.

11. Ino ngamapensho nshi akapa Paulo kulisukama?

¹¹ Kwakalinga mapensho aanji akapa kwaamba ayi Paulo alisukame. Kucakubonenaako, mukwiinga wakalinga kubasuni abuumbi bamakwesu, wakalinga kulisukama abuumbi ceebo ca mapensho ngobakalinga kwiindaamo. (2 Koli. 2:4; 11:28) Ndyaakalinga kusebensa ncito yakushimikila, balwani bakwe liinji bakalinga kumuuma akumubika mujeele. Kwiilikaawo, mapensho amwi mbuli ‘kubulisha’ aalo akalinga kumupa kulisukama. (Fili. 4:12) Alimwi mutaluubi kwaamba ayi bwaato bwakamunyonyookelawo mankanda otatwe kaali palweendo, aboobo inga twayeeyabo mbwaakalinga kulisukama na watanta  bwaato. (2 Koli. 11:23-27) Ino nciinshi cakapa Paulo kucileka kulisukama abuumbi?

12. Ino nciinshi cakacafwa Paulo kucileka kulisukama abuumbi?

¹² Paulo wakalisukama bamakwesu ndyebakalinga kucite mapensho, sombi taakwe kweelesha kumanisha mapensho ayo munkusu shakwe. Mukwiinga Paulo wakalinga muntu uliceesha, wakeshiba kwaamba ayi wakalinga kuyandika bamwi kwaamba ayi bamucafweeko ncito yakulama bamakwesu bakalinga kucite mapensho. Aboobo wakalwiita bamwi kwaamba ayi bamucafweko kusebensa ncito iyi. Kucakubonenaako, wakapa ncito shiinji kubasankwa bashomeka mbuli Timoti alimwi a Taitasi. Inga tatutoonshi kwaamba ayi incito yakasebensa bamakwesu aba, yakacafwa Paulo kucileka kulisukama abuumbi.​—Fili. 2:19, 20; Taitasi 1:1, 4, 5.

13. Ino bamanene inga bakonkela buyani cakubonenaako cakwe Paulo?

¹³ Amusenge bamwi kwaamba ayi bamucaafwe. Bweenka mbuli Paulo mbwaakalisukama, bamanene baanji bacite nkumbu balalisukama na bamwi mulibungano balicite mapensho. Nacibi boobo, munene womwi inga taacikoonshi eenka kucafwa libungano lyoonse. Aboobo na munene alaliceesha bweenka mbuli Paulo mbwaakalinga, inga walwiitako bamakwesu bamwi bashimpite lwakumushimu kwaamba ayi bamucaafwe, alimwi inga waiishako bamakwesu bamwi bacanike kwaamba ayi banoomucafwako muncito yakulama litanga lyakwe Lesa.​—2 Timo. 2:2.

14. Ino nshiinshi Paulo nshaatakalinga kuyeeya, alimwi ino nshiinshi nshotutokwiiyawo?

¹⁴ Amusuminishe bantu kumuyuminisha. Mukwiinga Paulo wakalinga kuliceesha, wakeshiba kwaamba ayi wakalinga kuyandika beshicibusa bakumuyuminisha. Taakalinga kuyeeya ayi na beshicibusa bakwe bamuyuminisha nkokwaamba ayi bantu batoomubona anga teshi muyumu lwakumushimu. Munkalata njaakalembela Filimoni, Paulo wakaamba ayi: “Mukwaabo, lusuno lwako lwansangalasha alimwi akunjuminisha.” (Filimo. 7) Paulo wakaamba ameena abamakwesu bamwi baanji bakalinga kumuyuminisha na waba mumapensho. (Kolo. 4:7-11) Aswebo na twaliceesha akwiibaluka kwaamba ayi tulayandika kuyuminishikwa abamwi, bamakwesu abenankashi bananoosa mukutucafwa.

15. Ino Paulo wakacita buyani ndyaakalinga kubona anga atoofwa?

¹⁵ Amushome Maswi akwe Lesa. Paulo wakalinga kucishi ayi Malembo inga amuyuminisha. (Loma. 15:4) Alimwi wakalinga kucishi ayi inga amucafwa akuliyumya mumeelesho. (2 Timo. 3:15, 16) Ndyebakamwaanga ku Loma linkanda lyabili, Paulo wakalinga kubona anga atoofwa. Ino nciinshi ncaakacita ndyaakalinga mulipenshi  ili? Wakalwiita Timoti ayi afwambaane amuletele ‘mabuku akupeta.’ (2 Timo. 4:6, 7, 9, 13) Ino nciinshi cakapa kwaamba ayi Paulo alwiite Timoti kumuletela mabuku aya? Cilyeelete kwaamba ayi mabuku aya akalinga mbasu sha Malembo amuci Ebulu ngaakalinga kusuni kusebensesha pakucita ciiyo capalwaakwe. Na katucita ciiyo capalwesu bushiku abushiku bweenka mbuli Paulo mbwaakalinga kucita, Yehova alaakutuyuminisha kwiinda mukusebensesha Malembo, nabi tube mumapensho ali buyani.

16. Ino Defedi wakacita nshi ico cakamupa kulisukama abuumbi?

¹⁶ Defedi wakacita cilubo cinene. Wakacita bulale a Batisheba, wakalwiita munene wabashilumamba shakucita kwaamba ayi bacaye ibaye Batisheba, alimwi wakalinga kusuni ayi asise nshaakacita. (2 Samwe. 12:9) Pakutaanguna, Defedi taakwe kunyumfwila njeelacaamba yakwe. Ici cakanyonyoola bushicibusa bwakwe a Yehova, alimwi cakamupa kulisukama abuumbi akuciswa. (Kulu. 32:3, 4) Ino nciinshi cakacafwa Defedi kucileka kulisukama abuumbi pashibiibi nshaakacita, alimwi ino nciinshi ceenga catucafwa na twaciita cilubo cinene?

17. Ino maswi ngotucana pa Kulumbaisha 51:1-4, alatondesha buyani ayi Defedi wakaana?

¹⁷ Amupaile kuli Yehova kwaamba ayi amunyumfwile nkumbu. Mukuya kwaciindi, Defedi wakapaila kuli Yehova kwaamba ayi amunyumfwile nkumbu. Wakalinyumfwa cibiibi pashibiibi nshaakacita, alimwi wakasansulwiita Yehova shoonse nshaakacita. (Amubelenge Kulumbaisha 51:1-4.) Kucita boobo kwakamucafwa kuba aluumuno mumoyo akuba alusangalalo alimwi! (Kulu. 32:1, 2, 4, 5) Na mwaciita cilubo cinene, tamweelete kusisa. Sombi mulyeelete kupaila kuli Yehova akumulwiita shoonse nshomwakacita. Kucita boobo kulaakumucafwa kuba aluumuno mumoyo akucileka kulinyumfwa cibiibi ceebo ca shibiibi nshemwakacita. Ano na mulisuni kuba shicibusa wakwe Yehova alimwi, kuli ashimwi nshomweelete kucita.

18. Ino Defedi wakacita buyani ndyaakalulikwa?

¹⁸ Amusumine kululikwa. Yehova ndyaakatuma mulaluki Natani kuyubulula cibiibi Defedi ncaakacita, Defedi taakwe kulifuna na kuceesha cilubo ncaakacita. Wakasumina kwaamba ayi taakwe kubishishabo ibaye Batisheba, sombi wakabisha akuli Yehova. Defedi wakasumina kululikwa a Yehova, aboobo Yehova wakamunyumfwila nkumbu. (2 Samwe. 12:10-14) Na twaciita cilubo cinene, tulyeelete kulwiitako bamanene mulibungano. (Jemu. 5:14, 15) Alimwi tatweelete kunoolifuna  ndyebatootucafwa. Na twafwambaana kunyumfwila kululikwa, tulaakufwambaana kuba aluumuno mumoyo akuba alusangalalo alimwi.

19. Ino nshiinshi nshomweelete kusunishisha kucita?

¹⁹ Mulyeelete kweelesha cankusu kutabooshawo shibiibi nshemwakacita. Mwaami Defedi wakalinga kucishi ayi wakalinga kuyandika lucafwo lwakwe Yehova kwaamba ayi atakabooshiwo lyobilo kucita shibiibi nshaakacita. (Kulu. 51:7, 10, 12) Yehova ndyaakamunyumfwila nkumbu, Defedi taakalinga kusuni kubooshawo kuyeeya pashibiibi. Aboobo wakaba aluumuno alimwi.

20. Ino inga twatondesha buyani ayi tulalumba Yehova mbwaatulekelela?

²⁰ Inga twatondesha ayi tulalumba Yehova mbwaatulekelela na katusenga ayi anotunyumfwila nkumbu, katusumina kululikwa, akweelesha cankusu kutabooshawo kucita shibiibi nshetwakacita. Kucita boobo, kulaakutucafwa kuba aluumuno alimwi. Mukwesu James, uyo wakalinga wacita cilubo cinene, wakabona ayi ishi nshetwaambawo nshancine. Wakaamba ayi: “Ndyendakalwiita bamanene cilubo ncendakacita, ndakanyumfwa anga ndatula mukuli unene. Ici cakampa kutalika kuba aluumuno alimwi.” Cilayuminisha abuumbi kushiba kwaamba ayi “Yehova ulibo muliimfwa kubaabo balefukite mumoyo; abo bapengete mumiyeeyo ulabafuna”!​—Kulu. 34:18.

21. Ino nshiinshi nshotweelete kunoocita kwaamba ayi Yehova ayuminishe myoyo yesu?

²¹ Mamanino abweende bwashintu buno ndyaali pafwiifwi, mapensho ngotwiindaamo ananoofulilakobo. Aboobo na mwalisukama, mulyeelete kufwambaana kupaila kuli Yehova kwaamba ayi amucaafwe. Munoobelenga Baibo lyoonse. Amuyeeye apabasebenshi bakwe Lesa baambwa mu Baibo mbuli Aana, Paulo a Defedi. Amusenge Ishiwesu wakwiculu kwaamba ayi amucaafwe kushiba capa kwaamba ayi mulisukame. (Kulu. 139:23) Amusuminishe Yehova kumucafwa ndyemucite mapensho, bunene bunene na mutokwiinda mumapensho ngeenga tamucikoonshi kukoma munkusu shanu. Kucita boobo kulaakumupa kulinyumfwa bweenka mbuli shikulumbaisha mbwaakalinyumfwa ndyaakaamba ayi: “Kulisukama ndikwakalinga kuncata, mwebo mwakanjumya.”​—Kulu. 94:19.