1-2. Ino Yehova wakacita buyani kwaamba ayi tube mumukwashi wakwe, alimwi ino nceebonshi?

YEHOVA wakatuleta mumukwashi wakwe wabaabo bamupaila. Ici ncoolwe cibotu abuumbi! Mumukwashi wakwe muli bantu bakalyaaba kuli nguwe alimwi bashoma mumulambu wacilubula ca Mwanaakwe. Uyu ngumukwashi usangalete. Tulicite buumi bucite mpindu pacecino ciindi, alimwi tulasangalala abuumbi ceebo ca bulindilishi bwakuba abuumi butamaani kwiculu na mu Paladaiso pacishi capanshi.

² Lusuno ndolwakapa kwaamba ayi Yehova alyaabe akucitawo comwi kwaamba ayi tube mumukwashi wakwe. (Joni 3:16) ‘Twakoolwa amuulo unene abuumbi.’ (1 Koli. 6:20) Twakacikonsha kuba abushicibusa anguwe ceebo ca cilubula ncaakatupa. Wakatupa coolwe cinene abuumbi cakutusuminisha kumwiita ayi Ishiwesu. Alimwi bweenka mbuli mbotwakeeya mumutwi wamana, Yehova ngu Mushali uli kabotu abuumbi.

3. Ino njimiipusho nshi njeenga tweepusha? (Amubone kabokosi katokwaamba ayi “ Sa Yehova Alambikila Maano?”)

³ Bweenka mbuli shikulemba Baibo umwi, aswebo inga tweepusha ayi: “Anu nebo inga ndamupanshi Yehova pashintu shibotu shoonse ishi nshaancitila?” (Kulu. 116:12) Cikumbulo ncakwaamba ayi taakuwo nceenga twabooshesha Ishiwesu wakwiculu. Nacibi boobo, lusuno lwakwe lulatupa kuba alusuno pali nguwe. Mutumwi Joni wakalemba ayi: “Tulatondesha lusuno, mukwiinga lakwe ngowakataanguna kutusuna.” (1 Joni 4:19, NWT) Ino inga twatondesha buyani ayi tulimusuni Ishiwesu wakwiculu?

4. Kweelana a Jemusi 4:8, ino nceebonshi tulyeelete kweelesha cankusu kusena pafwiifwi a Yehova?

⁴ Yehova alisuni ayi tube beshicibusa bakwe alimwi akunoobandika anguwe. (Amubelenge Jemusi 4:8.) Alatuyuminisha ayi “munoopaila lyoonse,” alimwi alakutika lyoonse na twapaila kuli nguwe. (Loma. 12:12) Taabete anga mbashali baalilwa kukutika kubana babo ceebo cakutaatilwa. Aswebo tulakutika kuli nguwe kwiinda mukubelenga Maswi akwe Baibo, amabuku esu atucafwa kunyumfwisha kabotu Baibo. Alimwi tulakutika kuli nguwe kwiinda mukukutika cakubikila maano ndyetuli kumabungano. Bweenka mbuli kubandikishanya lyoonse mbokucafwa baana kuba abushicibusa bubotu abashali babo, kubandika a Yehova lyoonse kulaakutucafwa kutolelela kuba abushicibusa bubotu anguwe.

5. Ino inga twacita buyani ndyetutopaila kuli Yehova?

⁵ Amuyeeye mipailo yanu kuli Yehova mboibete. Yehova alisuni ayi tunoomulwiita shoonse shili kumoyo ndyetutopaila. (Kulu. 62:8) Aboobo inga cabota kuliipusha ayi: ‘Sa mipailo yangu ili anga ninkalata yakukopololabo, na mpashi ili anga ninkalata yalembwa kuswa panshi lya moyo?’ Cakutatoonsha Yehova mulimusuni abuumbi, alimwi mulisuni kutolelela kuyumya bushicibusa bwanu anguwe. Ano kwaamba ayi ici cikonsheke, mulyeelete kunopaila lyoonse. Amumulwiite shili mumoyo wanu. Amumulwiite shintu shimupa kuba alusangalalo asheesho shimusukamika. Amushome cakutatoonsha ayi inga wamucafwa.

6. Ino nshiinshi nshetweelete kucita kwaamba ayi tutolelele kuba abushicibusa bubotu a Ishiwesu wakwiculu?

⁶ Tulyeelete kunoolumba Ishiwesu wakwiculu lyoonse kwaamba ayi tutolelele kuba abushicibusa bubotu anguwe. Shikulumbaisha wakaamba cancine ndyakalemba ayi: “Nshiinji abuumbi shintu nshemwakatucitila, No Yehova Lesa wesu, incito yanu ikankamika aluyaando ndomucite kulindiswe. Taakuwo weenga weelanishikwa andimwe; na ndelesha kushimika akushaamba, nshiinji abuumbi cakwaamba ayi inga nshicikoonshi!” (Kulu. 40:5, NWT) Tatweelibo pakulumba Yehova mumoyo, sombi tulatondesha ayi tulalumba kwiinda mushintu nshetwaamba anshetucita. Ici cilatupa kuba bantu bapuseneeko abantu baanji munshiku shino. Bantu baanji mucishi tabaluumbi Lesa pashintu nshaabacitila. Alimwi citondesho comwi cakwaamba ayi tutokala “munshiku shakweelaako,” ngumubo wakutalumba. (2 Timo. 3:1, 2) Atweeleshe cankusu kuleya mushimu wakutalumba!

7. Ino Yehova alisuni ayi tunoocita nshi, alimwi ino nceebonshi?

⁷ Bweenka mbuli mushali uli woonse mbwaasuni bana bakwe kunonyumfwana mbuli beshicibusa, Yehova alisuni ayi abo boonse bamupaila banoonyumfwana. Kwiilikaawo, kutondesha lusuno ku umwi amubye kulapa kwaamba ayi tushibikwe ayi tuli Beneklistu bancinencine. (Joni 13:35) Alimwi tulasuminisha maswi akaamba shikulumbaisha ayi: “Amubone mbocibete cibotu alimwi cisangalasha kwaamba ayi bamakwesu kabekala pomwi mulucatano!” (Kulu. 133:1, NWT) Tulatondesha ayi tulisuni Yehova na katutondesha lusuno kubamakwesu abenankashi. (1 Joni 4:20) Cilasangalasha abuumbi kuba mumukwashi wabamakwesu abenankashi ‘banyumfwilana nkumbu akulekelelana camoyo woonse’!​—Efe. 4:32.

8. Kweelana a 1 Joni 5:3, ino nciinshi cinene citupa kunyumfwila Yehova?

⁸ Yehova alisuni ayi baana banonyumfwila bashali babo, alimwi alisuni ayi soonse tunomunyumfwila. (Efe. 6:1) Tulyeelete kumunyumfwila mukwiinga ngo Mulengi wesu, Ngowakatupa buumi, alimwi ngo mushali ucite busongo bwiinditeewo. Nacibi boobo, cinene citupa kunyumfwila Yehova nceebo cakwaamba ayi  tulimusuni. (Amubelenge 1 Joni 5:3.) Nabi kwaamba ayi kuli shintu shiinji sheelete kutupa kunyumfwila Yehova, taatukakatishi kucita boobo. Yehova wakatupa nkusu shakulisalila, aboobo alasangalala na twasala kumunyumfwila ceebo cakwaamba ayi tulimusuni.

9-10. Ino nceebonshi kushiba akukonkela milawo yakwe Lesa kulayandika?

⁹ Mushali uli woonse alisuni kushitilisha bana bakwe. Aboobo alabapa milawo yeenga yabacafwa kuba amibo ibotu akushitilishikwa. Na baana bakonkela milawo iyo balatondesha ayi balamushoma mushali wabo alimwi balamupa bulemu. Anu ncintu ciyandika abuumbi kushiba akukonkela milawo yakatupa Ishiwesu wakwiculu. Na twacita boobo tulatondesha ayi tulimusuni Yehova alimwi tulamulemeka, alimwi ici cilatucafwa sobeene. (Isa. 48:17, 18) Ano abo bakaka kukonkela milawo yakwe Yehova balaliletela mapensho.​—Gala. 6:7, 8.

¹⁰ Kucita shintu shisangalasha Yehova kulatushitilisha lwakumubili, mumiyeeyo, alimwi alwakumushimu. Yehova ngooshi kabotu nshotweelete kukonkela kwaamba ayi shintu shitweendele kabotu. Nankashi Aurora, ukala ku United States wakaamba ayi, “Ndishi kwaamba ayi kunyumfwila Yehova kulatupa kuba abuumi bubotu kwiindaawo.” Alimwi soonse inga twasuminisha ayi maswi aya ngancine. Ino kunyumfwila milawo yakwe Yehova kwamucafwa buyani?

11. Ino mupailo ulatucafwa buyani?

¹¹ Mupailo ulatucafwa kuba bantu banyumfwila, nabi ndyecibete ciyumu kucita boobo. Cimwi ciindi cilaba ciyumu kunyumfwila Yehova ceebo ca bubi mbotwakapyana kuli Adamu, nacibi boobo,  tulyeelete kweelesha cankusu kwaamba ayi tube bantu banyumfwila. Shikulumbaisha wakasenga kuli Lesa ayi: “Amunengeshe kuba amoyo ulibambite kumunyumfwila.” (Kulu. 51:12, NWT) Nankashi Denise, painiya waciindi coonse wakaamba ayi, “Na canjumina kunyumfwila mulawo womwi wakwe Yehova, ndapaila akusenga ayi Yehova ampe nkusu shakucita ciluleme.” Inga twashoma kwaamba ayi Yehova alakumbula mipailo ya mushobo uyu.​—Luka 11:9-13.

12. Kweelana a Bene Efeso 5:1, ino nshiinshi nshotweelete kucita?

¹² Amubelenge Bene Efeso 5:1. Mukwiinga tuli “bana bakwe mbwaasuni,” atweeleshe cankusu kunokonkela cakubonenaako cakwe Yehova. Inga twakonkela mibo yakwe na katutondesha lusuno kubamwi, inkumbu alimwi akulekelela. Na bantu batamushi Lesa babona mibo yesu ibotu, inga basuna kwiiya shiinji pali Yehova. (1 Pita 2:12) Bashali balyeelete kunoolama kabotu bana babo bweenka mbuli Yehova mbwaatulama. Kucita boobo kulaakupa kwaamba ayi abalo bakabe beshicibusa bakwe Ishiwesu shilusuno.

13. Ino nshiinshi nshotweelete kucita kwaamba ayi tube bataloondi?

¹³ Mwaana muniini alanyumfwa kabotu pabashali bakwe alimwi alisuni kwaamba pali mbabo. Aswebo tulanyumfwa kabotu kwaamba pali Ishiwesu wakwiculu, Yehova, aboobo tulisuni kwaamba ayi bantu bamwi abalo bamushiibe. Tulalinyumfwa bweenka mbuli Mwaami Defedi mbwaakalinyumfwa ndyaakaamba ayi: “Ndanoolisumpula muli Yehova.” (Kulu. 34:2, NWT)  Ino na tulaloonda kulwiitako bamwi pali Yehova? Ino nshiinshi sheenga shatucafwa kuba bataloondi? Inga twakoma kutaloonda na katuyeeya kulwiitaako bamwi pali Yehova mbokupa kwaamba ayi Yehova asangalale ambweenga muntu wafubilaamo na weeya cancine. Yehova alaakutupa nkusu nshetuyandika. Alakutucafwa bweenka mbuli mbwaakacafwa bamakwesu bamuciindi ca batumwi.​—1 Tesa. 2:2.

14. Ino nceebonshi ncotushimikila makani abotu?

¹⁴ Yehova taacite kasalulushi, aboobo alanyumfwa kabotu na katutondesha lusuno kubamwi, tacicite mulandu ankulilo yabo. (Milimo 10:34, 35) Nshila yomwi mbweenga twatondesha ayi tulisuni bantu nkwiinda mukubashimikila makani abotu. (Mate. 28:19, 20) Ino bantu balafubilaamo buyani na katubashimikila makani abotu? Bantu boonse beshikukutika kumakani abotu ngotushimikila, balaba alusangalalo pacecino ciindi, alimwi balaakuba abuumi bwamuyayaya kunembo.​—1 Timo. 4:16.

15-16. Ino nshiinshi sheenga shatupa kutolelela kuba alusangalalo?

¹⁵ Yehova ngu Ishiwesu shilusuno, aboobo alisuni ayi abo boonse bali mumukwashi wakwe banooba alusangalalo. (Isa. 65:14) Kuli shintu shiinji shitupa kuba alusangalalo pacecino ciindi, nabi kwaamba ayi tuleenda mumapensho. Kucakubonenaako, tulishi kwaamba ayi Ishiwesu wakwiculu alitusuni abuumbi. Kwiilikaawo, tulishi cancine ncetucana mu Maswi akwe Lesa, Baibo. (Jele. 15:16) Alimwi tuli mumukwashi ulibetele muli bantu basuni Yehova, bakonkela milawo yakwe, alimwi basunene.​—Kulu. 106:4, 5.

¹⁶ Inga twatolelela kuba alusangalalo mukwiinga tulicite bulindilishi bwakwaamba ayi shintu shilaakubota kunembo. Tulishi kwaamba ayi conoonobo Yehova alaakukushaawo shibiibi shoonse, alimwi kwiinda mu Bwaami bwakwe cishi cilaakuba Paladaiso. Kwiilikaawo, tutoolangila ciindi abo boonse bakafwa ndyeshi bakabushikwe akuba pomwi alimwi amikwashi yabo abeshicibusa. (Joni 5:28, 29) Ici cilaakuba ciindi cisangalasha abuumbi! Alimwi ciinditeewo kubota ncakwaamba ayi, conoonobo abo boonse beshibakabe lubasu lwakwiculu lwa mukwashi wakwe Yehova, abaabo beshi bakanookala pacishi capanshi, balaakunoolumbaisha Ishiwesu shilusuno.