1. Ino muntu wakalinga kweelete kucita nshi na kaasuni kubonana a mwaami waku Pesha?

AMUYEEYE kwaamba ayi muli mucishi ca Pesha myaaka 2,500 yaiinda. Kuli makani ngomusuni kulwiita mwaami wakumusena uko, aboobo mwaya kuŋanda ya mwaami mundabala ya Shushani. Kamutana kubonana a mwaami mulyeelete kutaanguna kusenga, mukwiinga na mwayabo kwakubula kusenga inga mwacaikwa!​—Esita 4:11.

2. Ino Yehova alisuni ayi tunoolinyumfwa buyani kwaambaakwe?

² Tulalumba abuumbi mukwiinga Yehova taabete mbuli bwakalinga mwaami waku Pesha! Nabi kwaamba ayi Yehova alicite nkusu kwiinda mweendeleshi umwi uli woonse, alatusuminisha kubandikaakwe paciindi cili coonse. Alisuni ayi tutanoolonda kwaambaakwe. Kucakubonenaako, nabi kwaamba ayi aleetwa amaswi abulemu mbuli Mulengi Munene, Shinkusu Shoonse, Mwaami Wiinditewo, alisuni ayi tunoomwiita ayi ‘Ishiwesu.’ (Mate. 6:9) Kushiba kwaamba ayi Yehova alisuni ayi tube pafwiifwi anguwe kulatupa lusangalalo!

3. Ino nciinshi nceenga twaambila ayi Yehova ngu “Ishiwesu,” alimwi ino nshiinshi nsheshi tubandike mumutwi uyu?

³ Yehova alyeelete kwiitwa ayi “Ishiwesu” mukwiinga Ngowakatupa buumi. (Kulu. 36:9) Mukwiinga ngu Ishiwesu, tulyeelete kumunyumfwila. Alaakutupa shoolwe na katukonkela nshaatulwiita kucita. (Ebul. 12:9) Shoolwe ishi shileelikaawo abuumi bwamuyayaya kwiculu na pacishi capanshi. Alimwi nabibo pacecino ciindi tulacana shoolwe. Mumutwi uyu tutobandika Yehova nshaatoocita pacecino ciindi shitondesha kwaamba ayi  ncakwiila ngu Ishiwesu shilusuno alimwi anceenga twashomena cakutatoonsha kwaamba ayi teshi akatushiyewo. Cakutaanguna, amuleke tubandike nceenga twashomena ayi Ishiwesu wakwiculu alitusuni abuumbi alimwi alatubikila maano.

4. Ino nciinshi cipa bamwi kubona anga nciyumu kubona Yehova mbuli Ishiwesu?

⁴ Sa mulabona ayi nciyumu kubona Lesa mbuli Ishiwesu? Bamwi balayeeya ayi taakuwo mbotubete kuli Yehova. Balatoonsha na Lesa Shinkusu Shoonse inga wabikila maano kumuntu womwi awomwi. Nacibi boobo, Ishiwesu shilusuno taasuniiwo ayi tunoyeeya boobo. Wakatupa buumi alimwi alisuni ayi tube abushicibusa anguwe. Pesule lyakusansulula cancine ici, mutumwi Paulo wakalwiita baabo bakalinga kukutika nshaakalinga kwaamba ku Atenisi ayi Yehova “taabete kulaale aswebo soonse.” (Milimo 17:24-29) Lesa alisuni kwaamba ayi tunobandikaakwe bweenka mbuli mwaana mbwaabandika amushali shilusuno alimwi ubikila maano.

5. Ino nshiinshi nshetutokwiiya kushakacitikila nankashi umwi?

⁵ Bamwi inga cabayumina kubona Yehova mbuli mushali ceebo cakwaamba ayi tabakwe kutondeshekwawo lusuno akubikilwa maano kubashali babo. Nankashi umwi wakaamba ayi, “Bata bakalinga kundwita maswi abiibi,” aboobo ndyendakatalikabo kwiiya Baibo, cakalinga ciyumu kubona Yehova mbuli Ishiwesu wakwiculu. Ano ndyendakatolelela kwiiya, ndakaalula mbondakalinga kuyeeya.” Sa amwebo cimwi ciindi mbomulinyumfwa ubo? Na mbomulinyumfwa, mutalisukami mukwiinga mukuya kwaciindi mulaakutalika kubona Yehova mbuli Ishiwanu umusuni abuumbi kwiinda muntu umwi uli woonse.

6. Kweelana a Mateyo 11:27, ino ni nshila nshi yomwi Yehova mbwakatucafwa kwaamba ayi tunoomubona mbuli Ishiwesu shilusuno?

⁶ Nshila yomwi Yehova mbwakatucafwa kunoomubona mbuli Ishiwesu shilusuno, nkwiinda mukupa kwaamba ayi shakalinga kwaamba Yesu anshaakacita shilembwe mu Baibo. (Amubelenge Mateyo 11:27.) Yesu wakalinga kucita shintu bweenka mbuli Baishi, aboobo ncaakaambila ayi: “Uyo wabona ndime wabona abaTa.” (Joni 14:9) Liinji Yesu wakalinga kwiita Yehova ayi Ta. Mumabuku Amakani Abotu one, Yesu wakasebensesha liswi lyakwaamba ayi “Ta” mankanda eendilila 165 ndyaakalinga kwaamba pali Yehova. Ino nceebonshi Yesu ncakaambila bunene pali Yehova? Ceebo comwi ncakwaamba ayi wakalinga kusuni ayi bantu bashome cakutatoonsha kwaamba ayi Yehova ngu Ishiwesu shilusuno.​—Joni 17:25, 26.

7. Ino cakubonenaako cakwe Yehova mbwaakalinga kulama Mwanaakwe cilatwiisha nshi?

⁷ Amuyeeye nshetwiiya kuswa kucakubonenaako cakwe Yehova mbwaakalinga kulama mwanaakwe, Yesu. Yehova lyoonse wakalinga kukutika akukumbula mipailo yakwe Yesu. (Joni 11:41, 42) Mumapensho oonse Yesu ngaakalinga kwiindaamo, lyoonse wakalinga kubona ayi Baishi balimusuni alimwi bakalinga kumucafwa.​—Luka 22:42, 43.

8. Ino Yehova wakalinga kumucafwa buyani Yesu?

⁸ Yesu wakalinga kucishi ayi Baishi mbobakamupa buumi anshaakalinga kuyandika kwaamba ayi atolelele kuba abuumi. Nceceeco ncakaambila ayi: “Ndimuumi ceebo ca baTa.” (Joni 6:57) Yesu wakalinga kubashoma abuumbi Baishi, alimwi Yehova ngowakalinga kumupa nshaakalinga kuyandika. Ciinditeewo abuumbi, Yehova wakacafwa Yesu kutolelela kushomeka.​—Mate. 4:4.

9. Ino Yehova wakatondesha buyani ayi wakalinga mushali shilusuno wakwe Yesu?

⁹ Mukwiinga Yehova ngu Ishiwesu shilusuno, wakacafwa Yesu kushiba kwaamba  ayi alaakunoomucafwa. (Mate. 26:53; Joni 8:16) Nabi kwaamba ayi Yehova taakalinga kushitilisha Yesu kumapensho oonse ngaakalinga kwiindaamo, wakamupa nkusu shakuliyumya. Yesu wakalinga kucishi ayi mapensho ngaakalinga kwiindaamo ngapakaciindi. (Ebul. 12:2) Yehova wakatondesha ayi wakalinga kusuni Yesu kwiinda mukumukutika, kumupa shiyandika, kumwiisha, akumucafwa. (Joni 5:20; 8:28) Ano atubandike Ishiwesu wakwiculu mbwaatucafwa bweenka mbuli mbwaakacafwa Yesu.

10. Kweelana a Kulumbaisha 66:19, 20, ino Yehova alatondesha buyani ayi alitusuni?

¹⁰ Yehova alakutika kumipailo yesu. (Amubelenge Kulumbaisha 66:19, 20.) Yehova taatubikili mpweenga tweela ndyetutopaila kuli nguwe sombi alatuyuminisha ayi tunopaila kuli nguwe lyoonse. (1 Tesa. 5:17) Inga twapaila kuli Lesa paciindi cili coonse, alimwi kumusena kuli koonse. Nabi kwaamba ayi Yehova alicite shiinji shakucita, lyoonse alakutika kumipailo yesu. Kushiba kwaamba ayi Yehova alakutika kumipailo yesu kulatupa kumusuna abuumbi. Shikulumbaisha wakaamba ayi, “Ndimusuni Yehova mukwiinga ulanyumfwa mipailo yangu.”​—Kulu. 116:1.

11. Ino Yehova alaikumbula buyani mipailo yesu?

¹¹ Mbuli Ishiwesu, Yehova alakutika akukumbula mipailo yesu. Mutumwi Joni wakaamba ayi: “Ulanyumfwa na twasenga cintu cili coonse kweelana akuyanda kwakwe.” (1 Joni 5:14, 15) Nacibi boobo, cimwi ciindi Yehova taakumbuli mipailo yesu kweelana ambweenga twalangila. Mukwiinga alishi nshetuyandika, cimwi ciindi inga taatupiwo nshetwasenga alimwi cimwi ciindi alisuni ayi tulindile.​—2 Koli. 12:7-9.

12-13. Ino Ishiwesu wakwiculu alatucafwa buyani?

¹² Yehova alatupa nshetuyandika. Alacita bweenka mbuli nshalangila mushali musankwa uli woonse kucita. (1 Timo. 5:8) Alatupa nshetuyandika lwakumubili. Taasuniiwo kwaamba ayi tunoolisukama pashintu mbuli shakulya, shakufwala, amwakukala. (Mate. 6:32, 33; 7:11) Mbuli mushali shilusuno, Yehova wabika abubaambo bwakutupa nshetuyandika shoonse kunembo.

¹³ Ciyandika kwiindaawo, Yehova alatupa nshetuyandika lwakumushimu. Kwiinda mu Maswi akwe watwiisha cancine pali nguwe, ncaakatubumbila, abuumi mbweshi bukabe kunembo. Wakatutondesha ayi alitusuni kwiinda mukutwiisha cancine, kwiinda mukusebensesha bashali besu na muntu umwi wakalinga kutwiisha Baibo. Alimwi watolelela kutucafwa kwiinda mukusebensesha bamanene mulibungano, abamakwesu abenankashi bashimpite lwakumushimu. Kwiilikaawo, Yehova alatwiisha kwiinda mumabungano ndyetuli pomwi amukwashi wesu wakumushimu. Nshila shoonse ishi alimwi ashimwi, shilatondesha kwaamba ayi ncakwiila Yehova alatubikila maano soonse mbuli Ishiwesu.​—Kulu. 32:8.

14. Ino Yehova alatululika buyani alimwi ino nceebonshi?

¹⁴ Yehova alatwiisha. Mubupusano a Yesu, tatumaninite. Aboobo cimwi ciindi, Ishiwesu shilusuno alatwiisha kwiinda mukutululika. Maswi akwe alaamba ayi: “Abo Yehova mbwaasuni alabalulika.” (Ebul. 12:6, 7) Yehova alatululika munshila shipusenepusene. Kucakubonenaako, inga twabelenga makani amwi kuswa mu Baibo na kwiiya makani amwi kumabungano eenga atupa kwaaluka mushintu shimwi. Na mpashi cimwi ciindi kululikwa inga kwaswa kubamanene. Teshi mulandu anshila Yehova njeenga wasebensesha kwaamba ayi atululike, alacita boobo mukwiinga alitusuni.​—Jele. 30:11.

15. Ino Yehova alatucafwa buyani?

¹⁵ Yehova alatucafwa kuliyumya mumapensho. Bweenka mbuli mushali musankwa mbwaacafwa bana bakwe ciindi ndyebali mumapensho, Ishiwesu wakwiculu alatupa nkusu shakuliyumya ndyetuli mumapensho. Alatupa mushimu usalashi uyo utushitilisha lwakumushimu. (Luka  11:13) Kwiilikaawo, Yehova alatuyuminisha na twalisukama nabi ndyetucite buumba. Kucakubonenaako, wakatupa bulindilishi bubotu bwakwaamba ayi shintu shilaakubota kunembo. Bulindilishi ubu bulatucafwa kuliyumya ndyetuli mumapensho. Amuyeeye ceeci: Mapensho ngotwiindaamo nabi afule buyani, Ishiwesu shilusuno alaakusa mukwaakushawo oonse. Aboobo mapensho ali woonse ngweenga tweendaamo ngapakaciindi, ano shoolwe Yehova nsheshi akatupe nshamuyayaya.​—2 Koli. 4:16-18.

16. Ino nshiinshi shakacitika Adamu ndyaakakaka kunyumfwila Yehova?

¹⁶ Tulabona Yehova mbwaatusuni na twayeeya nshaakacita Adamu ndyaakakaka kumunyumfwila. Adamu ndyaakakaka kunyumfwila Baishi bakwiculu, wakaswa mumukwashi wakwe Yehova usangalete pomwi abana bakwe. (Loma. 5:12; 7:14) Nacibi boobo, Yehova wakacitawo comwi kwaamba ayi acafwe bana bakwe Adamu.

17. Ino nciinshi Yehova ncaakacita Adamu ndyaakabishabo?

¹⁷ Yehova wakamwaanisha Adamu, sombi wakashomesha ayi alaakucafwa bana bakwe. Wakashomesha ayi bantu boonse banyumfwila balaakubooshekwa alimwi mumukwashi wakwe. (Mata. 3:15; Loma. 8:20, 21) Kwaamba ayi ishi shikonsheke, Yehova wakaaba Mwanaakwe ngwaasuni abuumbi mbuli cilubula. Ici cakatondesha patuba kwaamba ayi Yehova alitusuni abuumbi.​—Joni 3:16.

18. Ino nciinshi nceenga twaambila ayi Yehova alisuni ayi tutolelele kuba mumukwashi wakwe nabi ndyetwamubishisha?

¹⁸ Nabi kwaamba ayi tatumaninite, Yehova alisuni ayi tube mumukwashi wakwe, alimwi taaboni ayi kutucafwa ngumukuli unene ulemya. Cimwi ciindi inga twacita sheenga shamukalasha na kuswa mulibungano lyakwe, sombi alatolelela kulangila ayi bushiku bumwi tulaakuboolela. Yesu wakatondesha Yehova mbwaasuni bana bakwe kwiinda mukwaamba cikoshanyo ca  mwaana wakasoweka. (Luka 15:11-32) Mushali wakaambwa mucikoshanyo wakatolelela kulangila ayi mwanaakwe alaakuboolela bushiku bumwi. Ndyaakaboola, baishi bakamutambula camaansa obilo. Na twakabisha kuli Yehova sombi twaana, Ishiwesu shilusuno alilibambite kututambula.

19. Ino Yehova alaakwakushawo buyani mapensho ngotwiindaamo ceebo cakutanyumfwila kwakwe Adamu?

¹⁹ Ishiwesu alaakukushawo mapensho oonse ngotwiindaamo ceebo cakutanyumfwila kwakwe Adamu. Pesule lyakupondoka kwakwe Adamu, Yehova wakasala bantu 144,000 kuswa pacishi capanshi kwaamba ayi bakanoolela pomwi a Mwanaakwe, mbuli bamaami alimwi bapailishi. Yesu abaabo mbweshi akanoolelaabo balaakucafwa bantu bashomeka kushika pakuba bamaninite mucishi cipya. Pesule lyakweeleshekwa kwa kweelaako, Lesa alaakubapa buumi butamaani. Lyalo Ishiwesu alaakusangalala pacishi capanshi ndyeshi pakasulebo bana bakwe basankwa abanakashi bamaninite. Ici cilaakuba ciindi cisangalasha abuumbi!

20. Ino Yehova watutondesha buyani ayi alitusuni abuumbi, alimwi ino tulaakwiiya nshi mumutwi utokonkelaawo?

²⁰ Yehova watondesha kwaamba ayi ncakwiila alitusuni abuumbi. Ngu Ishiwesu uli kabotu kwiindaawo. Alakutika mipailo yesu akutupa nshetuyandika, lwakumubili alimwi alwakumushimu. Alatwiisha akutupa lucafwo ndotuyandika. Alimwi alaakutucitila shintu shibotu abuumbi kunembo. Cilayuminisha abuumbi kushiba kwaamba ayi Ishiwesu alitusuni abuumbi alimwi alatubikila maano! Mumutwi utokonkelaawo tulaakwiiya mbweenga twatondesha ayi tulalumba palusuno Yehova ndwaatutondesha.