1. Ino nciinshi soonse ncetusuni ayi beshikamukowa besu bacite?

NANKASHI Pauline wakaamba ayi: “kuswabo ciindi ndyendakeeya cancine, ndakalinga kusuni ayi nkabe amukwashi wangu woonse mu Paladaiso . * “Ndakalinga kusuni bunene bunene ayi beebangu ba Wayne, amwaneesu musankwa mwanikebantu batalike kusebensela Yehova.” Sa mulicite beshikamukowa batana kwiiya cancine pali Yehova? Mpashi amwebo mulisuni kwaamba ayi munosebensela Yehova pomwi amukwashi wanu.

2. Ino njimiipusho nshi njeshi tubandike mumutwi uyu?

² Inga tatukakatishi beshikamukowa kusumina cancine, sombi inga twabayuminisha kuyeeya Baibo nshoiisha akushikonkela. (2 Timo. 3:14, 15) Ino nceebonshi tulyeelete kushimikila beshikamukowa? Ino nceebonshi tulyeelete kweelesha kunyumfwishisha mbobalinyumfwa? Ino inga twacita buyani kwaamba ayi tucafwe beshikamukowa kusuna Yehova bweenka mbotumusuni? Alimwi ino bamakwesu abenankashi mulibungano inga batucafwa buyani?

3. Kweelana a 2 Pita 3:9, ino nceebonshi tulyeelete kushimikila beshikamukowa?

³ Yehova alaakunyonyoola bweende bwashintu ubu conoonobo. Alaakupulushabo abo “balibambite kutambula buumi butamaani.” (Milimo 13:48) Na tulasebensa cankusu akutola ciindi cilaamfu kushimikila bantu mbotuteshiwo, nkokwaamba ayi tulyeelete kuba alusuno lwakucafwa beshikamukowa kusa mukusebensela Yehova pomwi andiswe. Alimwi Ishiwesu shilusuno Yehova “taasuni muntu nabi womwi kunyonyoolwa sombi alisuni kwaamba ayi boonse baane  kuswa kushibiibi shabo.”—Amubelenge 2 Pita 3:9.

4. Ino nciinshi nceenga twaalilwa kucita ndyetutooshimikila shikamukowa?

⁴ Tulyeelete kwiibaluka kwaamba ayi kuli nshila itabete kabotu anshila ibete kabotu ya mbweenga twashimikila makani alupulusho. Kucakubonenaako, inga twabandika ca bulemu ankuumbu ndyetutooshimikila muntu ngotuteshiwo, ano mpashi inga twaalilwa kucita boobo ndyetutooshimikila shikamukowa.

5. Ino nshiinshi nshotweelete kwiibaluka katutana kutalika kushimikila beshikamukowa?

⁵ Buunji bwandiswe tulanyumfwa cibiibi na twayeeya nshila njetwakasebensesha kushimikila beshikamukowa ciindi cakutaanguna, alimwi tulayeeya ayi nakwiinga twakasebenseshako nshila imwi. Mutumwi Paulo wakalulika Beneklistu ayi: “Ciindi coonse myaambo yanu ibe ya nkumbu iyaka bamwi alimwi mulyeelete kushiba bwakukumbula kabotu muntu uli woonse.” (Kolo. 4:5, 6 nwt) Inga cabota kwiibaluka maswi aya ndyetutobandika abeshikamukowa. Mukwiinga na twaalilwa kucita boobo, inga twabakalasha muciindi cakubacafwa kwaamba ayi batukutike.

6-7. Amwaambe cakubonenaako citotondesha Beneklistu ncobayandikila kuyeeyelako baabo mbobeebenabo bateshi bakamboni.

⁶ Tulyeelete kubayeeyelaako. Nankashi Pauline ngotwabandikawo pakutaanguna, wakaamba ayi: “Pakutaanguna ndakalinga kusuni kubandikabo pashintu shakumushimu abeebaangu. Tatwakalinga kubandikawo makani amwi.” Nacibi boobo, beebaye nankashi Pauline tabakalinga kucishiwo shiinji pamakani amu Baibo, aboobo taakuwo ncebakalinga kunyumfwawo pamakani mukaabo ngaakalinga kubandika. Beebaye nankashi Pauline bakalinga kubonabo anga mukaabo wakalinga kuyeeyabo pabupailishi bwakwe. Bakatalika kulisukama akuyeeya ayi mpashi wakenjila likoto lya bupailishi butabete kabotu.

 ⁷ Nankashi Pauline wakaamba ayi ncakwiila cimwi ciindi wakalinga kutola ciindi cilaamfu macolesha alimwi akumamanino ansondo kaali abamakwesu abenankashi kumabungano, mukushimikila, amukusekana pomwi ambabo. “Cimwi ciindi na ba Wayne besa, bakalinga kucana ŋanda yeenkabo, aboobo bakalinga kuumuninwa.” Cakutatoonsha, ba Wayne bakalinga kusuni kubaako pomwi amukaabo amwanaabo. Tabakalinga kucishi na mukaabo amwanaabo bali abantu ba mushobo nshi, alimwi cakalinga kuboneka anga abo bantu mbobakaba bacindeme kuli ba Pauline kwiinda beebaabo. Aboobo ba Wayne bakacenjesha bakaabo ayi cikwati citoomana na utolelele. Ino nshiinshi nankashi Pauline nshaakalinga kweelete kucita kwaamba ayi atondeshe ayi alayeeyelako beebaye?

8. Kweelana a 1 Pita 3:1, 2, ino nshiinshi beshikamukowa nshobabikilako maano abuumbi?

⁸ Amutondeshe cakubonenaako cibotu. Liinji beshikamukowa balabikila maano abuumbi kushintu nshetucita kuteshi nshetwaamba. (Amubelenge 1 Pita 3:1, 2.) Mukuya kwaciindi nankashi Pauline wakesa mukushiba makani aya. Wakaamba ayi: “Ndakalinga kucishi ayi ba Wayne balinsuni alimwi teshi cancine kwaamba ayi bakalinga kusuni ayi tulekane.” “Nacibi boobo, ndyebakaamba maswi akulekana ndakesa mukwiibaluka ayi ndyeelete kucita shintu kweelana a Yehova mbwaasuni. Ndakalinga kweelete kutondesha cakubonenaako cibotu, muciindi cakwaambabo.” Nankashi Pauline wakacileka kukakatisha beebaye kubandika pamakani amu Baibo, akutalika kubandikaabo makani amwi acitika bushiku abushiku. Beebaye abalo bakatalika kubona ayi uyu muntu waba muntu shiluumuno, alimwi mwanaabo alakwe waba mwaana ucite bulemu alimwi unyumfwila. (Tus. 31:18, 27, 28) Ndyebakabona Baibo mboyakacafwa mukwashi wabo kuba mukwashi uli kabotu, bakatalika kuyeeya pa Maswi akwe Lesa ambweenga bakonkela nshaamba.—1 Koli. 7:12-14, 16.

9. Ino nceebonshi tulyeelete kutolelela kucafwa beshikamukowa?

 ⁹ Amutolelele kucafwa beshikamukowa banu. Yehova wakatupa cakubonenaako cibotu. Wapa bantu ciindi cakwaamba ayi basumine makani abotu akucana buumi butamaani. (Jele. 44:4) Mutumwi Paulo alakwe wakalwiita Timoti ayi alyeelete kutolelela kucafwa bamwi. Ino nceebonshi? Mukwiinga kucita boobo, kwakalinga kusa mukumupulusha abaabo bamukutika. (1 Timo. 4:16) Tulibasuni beshikamukowa besu, aboobo tulisuni kwaamba ayi bashibe cancine ncetucana mu Maswi akwe Lesa. Mukuya kwaciindi, nshaakalinga kwaamba anshaakalinga kucita nankashi Pauline shakacafwa mukwashi wakwe. Pacecino ciindi alikondetwe abuumbi mukwiinga atosebensela Yehova pomwi abeebaye. Boonse bobilo mbapainiya, alimwi mukwesu Wayne atosebensa mbuli munene mulibungano.

10. Ino nceebonshi tulyeelete kukalika moyo?

¹⁰ Amukalike moyo. Ndyetwakasala kunyumfwila Lesa, twakaalula buumi bwesu akucileka kushoma njiisho shimwi. Cimwi ciindi cilaba ciyumu kwaamba ayi beshikamukowa banyumfwishishe kusala kwesu. Liinji ncobataanguna kubona ncakwaamba ayi twacileka kwaabanamo lubasu mushakusekelela sha bupailishi alimwi amushamapolitiki. Kumatalikilo beshikamukowa bamwi inga batukalalila abuumbi. (Mate. 10:35, 36) Sombi tatweelete kunoyeeya ayi teshi bakaciinje. Kucileka kubacafwa kushiba nshetushoma, kulibo anga nkuboombolosha ayi aba camana teshi bakacane buumi butamaani. Yehova taakwe kutupa ncito yakoombolosha bantu—iyi ni ncito yakapekwa kuli Yesu. (Joni 5:22) Kukalika moyo inga kwapa kwaamba ayi beshikamukowa besu basune kwiiya cancine mukuya kwaciindi.—Amubone kabokosi kalembetwe ayi “ Amusebenseshe Webusaiti Yesu Ndyemutokwiisha.”

11-13. Ino nshiinshi nshomweeyawo pamakani akwe nankashi Alice mbwaakacita banyina ndyebakalinga kumupikisha?

¹¹ Amubatondeshe nkumbu, sombi mutabaleeki ayi baalule nshomwakasala. (Tus. 15:2) Atubandike cakubonenaako cakwe nankashi Alice. Wakeeya pali Yehova ndyaakalinga kukala kulaale abuumbi abashali bakwe batakalinga kushoma muli Lesa alimwi bakalinga beshimapolitiki. Wakesa mukushiba ayi wakalinga kweelete kufwambaana kubalwiita makani abotu ngaakalinga kwiiya. Wakaamba ayi: “Na ncelwe kulwiita bashali bangu ayi ndacileka kushoma nshendakalinga kushoma kale kale akucita”, “balaakukalala abuumbi.” Aboobo wakabalembela nkalata akubeepusha nshobalinga kuyeeya pamakani amu Baibo ngaakalinga kubona ayi inga abakondelesha, makani mbuli lusuno. (1 Koli. 13:1-13) Wakabalumba kwaamba ayi bakamulela kabotu akumulama, alimwi wakabatumina ashipo. Ndyaakaya mukubafwakashila, wakacita shoonse nshaakalinga kucikonsha kwaamba ayi acafwe banyina incito shapa lubaansa. Pakutaanguna bashali bakwe nankashi Alice tabana kukondwa ndyakabalwiita pashintu shipya nshaakalinga kwiiya kuswa mu Baibo.

¹² Nankashi Alice ndyaakalinga kuŋanda kumishaabo abashali bakwe, wakatolelela abubaambo bwakwe bwakubelenga Baibo bushiku abushiku. Wakaamba ayi: “Kucita boobo kwakacafwa bama kunyumfwisha ayi Baibo cakalinga cintu ciyandika abuumbi kuli ndime.” Kwaamba ayi banyumfwishishe cakapa mwanaabo kwaaluka, baishi nankashi Alice bakatalika kusuna kushiba shicanika mu Baibo, alimwi bakalinga kusuni ayi bacane mpeenga bapikishila shili mu Baibo. Nankashi Alice wakaamba ayi: “Ndakabapa Baibo akubikamo kakalata kaniini nkondakalemba.” Ino nshiinshi shakacitika? Muciindi cakucana nsheenga bapikisha, baishi nankashi Alice bakayuminishikwa abuumbi anshobakabelenga mu Maswi akwe Lesa.

¹³ Tatweelete kuboolela mwisule, sombi tulyeelete kuba bacenjete, nabi ndyetutokwiinda mumapensho. (1 Koli. 4:12b) Kucakubonenaako, nankashi Alice wakatolelela kuliyumya ndyaakalinga kupikishikwa abanyina. Wakaamba ayi: “Ndyendakabombekwa, Bama bakanjita ayi ‘mwaana mubiibi.’” Ino nankashi Alice wakacita buyani? Wakaamba ayi: “Muciindi cakuumunabo, ndakabasansulwita mubulemu kwaamba ayi ndalisalila  neenka kuba Kamboni wakwe Yehova, aboobo taakuwo weenga waalula kusala kwangu. Ndakeelesha kushomesha bama ayi ndibasuni abuumbi. Twakalila soonse pomwi, akutelekela pomwi shakulya shibotu. Aboobo kuswabo ciindi cilya, bama bakatalika kubona kwaamba ayi ncakwiila Baibo yakalinga kuncafwa kuba muntu uli kabotu.”

14. Ino nceebonshi tatweelete kuleka beshikamukowa kwaamba ayi baalule nshetwakasala?

¹⁴ Inga catola ciindi kwaamba ayi beshikamukowa banyumfwishe kwaamba ayi kusebensela Yehova, ncintu ciyandika kuli ndiswe. Kucakubonenaako, nankashi Alice ndyaakasala kucita bupainiya muciindi cakukonkela shakalinga kusuni bashali bakwe, banyina bakatalika kulila alimwi. Nacibi boobo Alice taakwe kuboolela mwisule. Wakaamba ayi: “Na walekelela beshikamukowa kwaamba ayi baalule cintu comwi ncowakasala, nkokwaamba ayi balaakukwaalula amushimwi.” Ano na watondesha nkumbu akuyumaawo, bamwi balanyumfwa.” Ishi nsheshakacitika akuli nankashi Alice. Bashali bakwe boonse bobilo mbapainiya ano, alimwi baishi batoosebensa mbuli munene mulibungano.

15. Kweelana a Mateyo 5:14-16 alimwi a 1 Pita 2:12, ino “ncito shibotu” shicita bamwi inga shabacafwa buyani beshikamukowa?

¹⁵ Yehova alasenya bantu kuli nguwe kwiinda “muncito shibotu” sha Beneklistu mulibungano. (Amubelenge Mateyo 5:14-16; 1 Pita 2:12.) Na ngomweebenaakwe teshi Kamboni Wakwe Yehova, sa wakakumanyawo kale bamakwesu abenankashi bamulibungano? Nankashi Pauline ngotwabandikawo kale, wakeeta bamakwesu abenankashi kwaamba ayi beebaye ba Wayne babashiibe. Ba Wayne balebaluka mukwesu womwi mbwakabacafwa kushiba kabotu Bakamboni mbobabete. Bakaamba ayi: “Wakalembesha bushiku bomwi bwakookesha kuncito kwaamba  ayi ese tweebele pomwi cisekano pa tv. Shakacita mukwesu ishi shakacafwa ba Wayne kushiba ayi mukwesu uyu alisuni abantu kuteshi kupaila kweenkabo.

16. Ino nceebonshi tulyeelete kwiita beshikamukowa kusa kumabungano?

¹⁶ Nshila yomwi mbweenga twacafwa beshikamukowa, nkwiinda mukubeeta kumabungano. (1 Koli. 14:24, 25) Ba Wayne bakesa kumabungano ciindi cakutaanguna pa Ciibalusho, mukwiinga cakalinga ciindi cakwaamba ayi bakomboka kale kuncito alimwi kubungana takuna kutola ciindi cilaamfu. Bakaamba ayi: “Nshikwe kunyumfwishisha kabotu shakalinga kwaambwa mulikani, sombi cakankondelesha mbantu.” Bakesa mpondakalinga akuŋansha akuntambula camaansa obilo. Alimwi ndakabona kwaamba ayi balisunene cancinencine.” Beebene bamwi bakatondesha nkumbu abuumbi kuli ba Pauline, bakalinga kubacafwa kulela mwaana ciindi camabungano alimwi andyebali muncito yakushimikila. Aboobo ba Wayne ndyebakasala kusuna kushiba shakalinga kushoma bakaabo ba Pauline, bakalwiita mukwesu ayi atalike kubaiisha Baibo.

17. Ino nshiinshi nshotuteelete kulipetaawo mulandu, sombi ino nceebonshi tatweelete kunoobona ayi beshikamukowa inga tabaciinji?

¹⁷ Tutolangila kwaamba ayi beshikamukowa abalo bakatalike kusebensela Yehova. Nacibi boobo, cimwi ciindi inga tweelesha kucita shoonse nsheenga twacikonsha kwaamba ayi tucafwe beshikamukowa besu kuba basebenshi bakwe Lesa, sombi inga caala kwaamba ayi bese mucancine. Na caba boobo, tatweelete kulipa mulandu ceebo cakusala kwabo. Mukwiinga inga tatubakakatishi kwaamba ayi basumine nshetushoma. Sombi na babona lusangalalo ndomucite ceebo cakusebensela Yehova, inga basuna kwiiya. Aboobo amubapailileeko. Amubandikaabo munshila ili kabotu. Mutacileeki kweelesha kubashimikila! (Milimo 20:20) Amushome kwaamba ayi Yehova alaakumucafwa. Alimwi na beshikamukowa banu bakasale kukutika kuli ndimwe, balaakupuluka!