LUSHOMO inga lwatupa nkusu abuumbi. Kucakubonenaako, nabi kwaamba ayi Satana alisuni kutucaya lwakumushimu, lushomo lulatucafwa “kushimya mifwi inyaka mulilo iyo iwaala mubiibi.” (Efe. 6:16) Lushomo inga lwatucafwa kuliyumya nabi twiinde mumapensho anene anga ntulundu. Yesu wakalwiita bashikwiiya bakwe ayi: “Na kamucite lushomo luli mbuli luseke lwa masitadi, mulakonsha kwaambila kalundu aka ayi, ‘Swaawo apo uye waalya,’ akalo kalaakuswaawo.” (Mate. 17:20) Mukwiinga tulicishi ayi lushomo inga lwatucafwa kuyumya bushicibusa bwesu a Yehova, tulyeelete kuyeeya pamiipusho mbuli: Ino lushomo nciinshi? Ino moyo wesu ulakumwa buyani alushomo? Ino nshiinshi nsheenga twaciita kwaamba ayi tuyumye lushomo lwesu? Alimwi ino ngani ngotweelete kushoma?—Loma. 4:3.

Lushomo teshi kushomabo Baibo nshoiisha sobwe, mukwiinga “bashikaswa abalo balashoma [ayi Lesa nkwaali] alimwi balaloonda akututuma.”(Jemu. 2:19) Aboobo ino lushomo cilaamba nshi?

Baibo ilasansulula lushomo mumbasu shobilo. Cakutaanguna, “lushomo nkutatoonsha mushintu nshetutolangila.” (Ebul. 11:1a) Muntu ucite lushomo, alashoma kwaamba ayi shili shoonse Yehova nshaamba nshancinencine alimwi shilaakucitika. Kucakubonenaako, Yehova wakalwiita bene Isilaeli ayi: “Na mwebo mulakonsha kupwaya cipangano cangu camalumwi acipangano cangu camashiku, kwaamba ayi kutabi malumwi amashiku paciindi ca nshisho ceelete, nkokwaamba ayi acalo cipangano cangu a Defedi musebenshi wangu inga mwacipwaya.” (Jele. 33:20, 21) Sa mwakaloondaawo kale ayi bushiku bumwi lisuba inga lyacileka kuswa, akupa kwaamba ayi kutabi malumwi amashiku? Na tatutoonshi nkusu shipa kwaamba ayi kunooba malumwi amashiku, uko kucitika cishi ca panshi ndyecitooshinguluka lisuba, sa inga twatoonsha ayi Mulengi wa shintu shoonse ishi inga waalilwa kukumanisha nshaakashomesha? Sobwe napaceyi!—Isa. 55:10, 11; Mate. 5:18.

Cabili, lushomo “nkushinisha ayi shintu nshetutaboni nkoshili cancinencine.” (Ebul. 11:1b) Ino ncakubonenaako nshi ceenga catucafwa kushinisha ayi shintu nshetutaboni cancinencine nkoshili? Atwaambe ayi mwaana wamwiipusha ayi, ‘Ino mulishi buyani ayi muuwo nkooli?’ Nabi kwaamba ayi tamuna kuubonaawo kale muuwo, inga mwasuna kucafwa mwaana uyo kwiinda mukutondesha shintu shitutondesha ayi muuwo nkooli—shintu mbuli kuyooya, kutenkana kwa shintu mbuli shisamu, ashintu shimwi. Na mwaana washoma ayi ncakwiila shintu ishi nshancine, nkokwaamba ayi inga washoma ayi cilakonsheka kushoma cintu citaboneki. Alushomo alwalo mbolubete, luleemikana pashintu shiboneka patuba.—Loma. 1:20.

Mukwiinga lushomo luleemikana pakushinisha, muntu alyeelete kutaanguna “kucishiba kabotu kabotu cancine.” (1 Timo. 2:4) Nacibi boobo taeelete kweelabo pakushiba kabotu cancine. Mutumwi Paulo wakalemba ayi: “Muntu ulatondesha lushomo ndwaacite mumoyo.” (Loma. 10:10) Muntu taeelete kweelabo pakushoma cancine, sombi alyeelete kucibona ayi cilicite mpindu. Lyalo ndyeenga wayuminishikwa kutondesha lushomo, nkokwaamba ayi ndyeenga wacita shintu shisangalasha  Yehova. (Jemu. 2:20) Muntu utacishi mpindu ya cancine inga wakaka ashintu nshatobona ameenso ayi nshancine, akutolelela kushoma miyeeyo na kucita shintu kweelana akuyanda kwakwe mwiine. (2 Pita 3:3, 4; Judi 18) Ici ncecakapa kwaamba ayi bantu bamwi bamuciindi camu Baibo baalilwe kuba alushomo nabi pesule lyakubona shaankamiko shiinji. (Shakube. 14:11; Joni 12:37) Bantu basuni cancine mbweenga mushimu usalashi wacafwa kuba alushomo.—Gala. 5:22; 2 Tesa. 2:10, 11.

Mwaami Defedi wakalinga muntu womwi pabaabo bakalinga kucite lushomo luyumu. (Ebul. 11:32, 33) Nacibi boobo, teshi boonse mumukwashi wakwe Defedi bakalinga kucite lushomo luyumu. Kucakubonenaako, Eliyabu, munene wakwe Defedi, wakatondesha kubula lushomo ndyaakakalalila Defedi ceebo cakwaamba ayi taana kukondwa a Golyati mbwaakalinga kukonga bene Isilaeli. (1 Sam. 17:26-28) Taakuwo muntu ushalwa alushomo; na kulupyana kuswa kubashali bakwe, aboobo Defedi wakalinga kucite lushomo luyumu ceebo ca bushicibusa bwakwe a Lesa.

Lilembo lya Kulumbaisha 27, lilaamba shakapa kwaamba ayi Defedi abe alushomo luyumu. (Vesi. 1) Defedi wakalinga kukutumana akuyeeya Yehova mbwakamucafwawo ambwakamulwaninaako balwani bakwe. (Mavesi. 2, 3) Wakatondesha kulumba abuumbi pabubaambo bwakwe Yehova bwa kulambila. (Vesi. 4) Defedi wakalinga kulambila Lesa pomwi abashominyina kuŋanda yakwe Lesa isalalite. (Vesi. 6) Wakalinga kupaila camoyo woonse kuli Yehova (Mavesi. 7, 8) Kwiilikaawo, Defedi wakalinga kusuni kwiishikwa munshila yakwe Lesa. (Vesi. 11) Defedi wakalinga kubona lushomo kuba mubo uyandika abuumbi cakwaamba ayi wakaliipusha ayi: “Ino nakwiinga ndikuli nindatakalinga kucite lushomo?”​—Vesi. 13.

Inga mwaba alushomo luyumu bweenka mbuli lwakalinga kucite Defedi na kamuyeeya akukonkela Defedi nshaakacita kweelana a Kulumbaisha 27. Mukwiinga mulyeelete kutaanguna kushiba kabotu cancine kwaamba ayi mube alushomo, kutolelela kwiiya Maswi akwe Lesa amabuku aamba shamu Baibo, inga kwamucafwa kuba alushomo luyumu, ulo lubete cisepo ca mushimu usalashi. (Kulu. 1:2, 3) Amutole ciindi kukutumana akuyeeyawo ndyemutokwiiya. Kukutumana akuyeeya pashintu nshetutokwiiya kulacafwa muntu kulumba nshatokwiiya. Na kulumba Yehova kwesu kwaya panembo, tulayandishisha abuumbi kutondesha lushomo kwiinda mukucanika kumabungano akushimikila bamwi nshetutoolangila. (Ebul. 10:23-25) Alimwi inga twatondesha ayi tulicite lushomo na katutolelela “kupaila akutaboolela mwisule.” (Luka 18:1-8) Aboobo, “kamupaila lyoonse” kuli Yehova, akushoma ayi “ngoomulama.” (1 Tesa. 5:17; 1 Pita. 5:7) Lushomo lulatupa kucitawo comwi, alimwi na twacitawo boobo, tulayumya lushomo lwesu.​—Jemu. 2:22.

Mashiku kaatana kufwa, Yesu wakalwiita bashikwiiya bakwe ayi: “Amushome muli Lesa; mushome  amuli ndime.” (Joni 14:1) Aboobo tulyeelete kushoma muli Yehova alimwi a Yesu. Ino inga twatondesha buyani ayi tulashoma muli Yesu? Atubandike nshila shotatwe.

Cakutaanguna, amubone cilubula mbuli cipo Lesa ncaakapa ndimwe. Mutumwi Paulo wakaamba ayi: “Ndekala buumi ceebo calushomo ndooncite mu Mwanaakwe Lesa, uyo wakansuna akwaaba buumi bwakwe ceebo ca ndime.” (Gala. 2:20) Na kamushoma muli Yesu, nkokwaamba ayi mwasumina ayi cilubula inga camucafwa, inga capa kwaamba ayi Lesa amulekelele shibiibi shanu, akumupa bulindilishi bwakuba abuumi butamaani, alimwi nkokwaamba ayi mwashinisha ayi cilubula njenshila inene Yehova njaakatondesha ayi alimusuni abuumbi. (Loma. 8:32, 38, 39; Efe. 1:7) Kucita boobo, kulaakumucafwa kutatolelela kulinyumfwa cibiibi ceebo ca shibiibi Lesa nshaakamulekelela kale.​—2 Tesa. 2:16, 17.

Cabili, munopaila kuli Yehova kwiinda mu cilubula cakwe Yesu. Inga twapaila kuli Yehova “cakwaanguluka ceebo ca cilubula, kwaamba ayi tutambule luse akucana nkumbu shakwe Lesa shakutucafwa paciindi ceelete.” (Ebul. 4:15, 16; 10:19-22) Kupaila kulatupa nkusu shakukaka kukomwa abweelesho.—Luka 22:40.

Catatu, amunyumfwile Yesu. Mutumwi Joni wakalemba ayi: “Uyo ushoma mu Mwaana ulaakuba abuumi butamaani; ano uyo utanyumfwili Mwaana teshi akabone buumi, sombi bukali bwakwe Lesa bulaakukalilila pali nguwe.” (Joni 3:36) Joni apa wakalinga kutondesha bupusano bwa kuba alushomo, akutanyumfwila. Aboobo, inga mwatondesha ayi mulashoma muli Yesu kwiinda mukumunyumfwila. Inga mwanyumfwila Yesu kwiinda mukukonkela “mulawo wakwe Klistu,” nkokwaamba ayi shintu shoonse nshaakalinga kwiisha akutulwiita kucita. (Gala. 6:2) Alimwi inga mwanyumfwila Yesu kwiinda mukukonkela butanjilishi mbwaapa kwiinda mu “musebenshi ushomeka alimwi ucite maano.” (Mate. 24:45) Kunyumfwila Yesu, kulaakumupa nkusu shakuliyumya mumapensho anene.—Luka 6:47, 48.

Bushiku bumwi, musankwa wakoolobesha kuli Yesu ayi: “Ndicite lushomo! Amuncaafwe kuyumya lushomo lwangu!” (Maako 9:24) Musankwa uyu wakalinga kuciteko lushomo, sombi wakaliceesha akushiba kwaamba ayi wakalinga kuyandika lushomo luyumu. Bweenka mbuli musankwa uyu, soonse tulaakwiindawo mubukaalo mbweshi tukayandike lushomo luyumu. Alimwi cino nceciindi cibotu ndyeenga twayumya lushomo lwesu. Bweenka mbuli mbotwabona, inga twayumya lushomo lwesu na katwiiya Maswi akwe Lesa akukutumana kuyeeyawo, alimwi kucita boobo kulaakutucafwa kutola panembo lusuno lwesu pali Yehova. Kwiilikaawo, inga twayumya lushomo lwesu na katulambila Yehova pomwi abashominyineesu, kushimikila bamwi nshotushoma, akutolelela kupaila. Kuyumya lushomo lwesu kulaakulengesha kwaamba ayi tukatambule cilambu cinene abuumbi. Maswi akwe Lesa alatuyuminisha ayi: “Nomusunikwi, amuliyaake mulushomo lwanu lusalalite abuumbi . . . kwaamba ayi mutolelele kukala mulusuno lwakwe Lesa.”​—Judi 20, 21.