1. Ino mbaani bakacafwa bashikwiiya kwaamba ayi batalike libungano ku Filipi?

MUTUMWI Paulo, Sailasi, Luka, a Timoti ndyebakashika ku Filipi ndabala yakalinga kweendeleshekwa abene Loma, bakacana bantu baanji bakalinga kusuni kwiiya makani abotu aBwaami. Bamakwesu bone aba bakalinga kusebensa cankusu, bakacafwa bashikwiiya bapya mbobakacana kutalika libungano mundabala iyi, alimwi balyeelete bakalinga kubunganina muŋanda yakwe Lidiya, mushomi wakalinga kucite mushimu wakutambula beensu.—Milimo 16:40.

2. Ino ndipenshi nshi bamulibungano lipya ndyebakacana?

² Tapana kwiinda aciindi cilaamfu libungano lipya ili lyakatalika kwiinda mumapensho. Satana wakayunga baabo bakalinga kupatite cancine, kutalika kupikisha ncito yakushimikila yakalinga kucita Paulo a Beneklistunyina. Paulo a Sailasi bakacatwa, kukwipwa, akubikwa mujeele. Ndyebakaswa mujeele, bakaya mukufwakashila bashikwiiya bapya akubayuminisha. Lyalo Paulo, Sailasi, a Timoti bakaya, Luka alyeelete wakacaala. Ino bamulibungano lipya ili bakacita buyani? Kwiinda mulucafwo lwakwe Yehova, libungano lyakatolelela kusebensela Yehova cankusu. (Fili. 2:12) Aboobo Paulo wakabalumba abuumbi!

3. Kweelana a Bene Filipi 1:9-11, ino Paulo wakapailila makani nshi?

³ Ndipakeenda myaaka 10, Paulo wakalemba nkalata kulibungano lyaku Filipi. Ndyemutobelenga nkalata iyi, inga mwaboona kwaamba ayi ncakwiila Paulo wakalinga kubasuni bamakwesu abenankashi bamulibungano ili. Wakalemba ayi: “Ndamuyeeya abuumbi mukwiinga ndimusuni amoyo wangu woonse  alusuno luli mbuli lwakwe Klistu Yesu. (Fili. 1:8) Alimwi wakeelikawo akubalwiita ayi alabapaililaako. Wakasenga Yehova kwaamba ayi abacaafwe kukomenya lusuno lwabo, kushinisha shintu shiyandika abuumbi, kuba bantu batacite kampenda, kuleya kufumpula bamwi, akutolelela kutondesha shisepo sha bululami. Cakutatoonsha, aswebo munshiku shino inga twafubilaamo mumaswi akalemba Paulo. Aboobo atubelenge makani Paulo ngaakalembela Beneklistu baku Filipi. (Amubelenge Bene Filipi 1:9-11.) Lyalo tutobandika makani ngaakalemba munkalata iyi akwiiya mbweenga twaakonkela.

4. (a) Kweelana a 1 Joni 4:9, 10, ino Yehova wakatondesha buyani ayi alitusuni abuumbi? (b) Ino tulyeelete kumusuna buyani Lesa?

⁴ Yehova wakatondesha ayi alitusuni abuumbi kwiinda mukutuma Mwanaakwe kusa mukutufwita ceebo ca shibiibi shesu. (Amubelenge 1 Joni 4:9, 10.) Mukwiinga Lesa alitusuni abuumbi, aswebo tulayuminishikwa kumusuna. (Loma. 5:8) Ino Lesa tulyeelete kumusuna buyani? Yesu wakakumbula mwiipusho uyu ndyaakalwiita mu Falisi ayi: “Suna Yehova Lesa wako amoyo wako woonse, abuumi bwako boonse, amiyeeyo yako yoonse.” (Mate. 22:36, 37) Tulyeelete kusuna Lesa amoyo wesu woonse. Alimwi tulisuni kwaamba ayi lusuno lwesu lunooya panembo bushiku abushiku. Paulo wakalwiita Beneklistu baku Filipi ayi lusuno lwabo lulyeelete ‘kutolelela kukomena.’ Ino nshiinshi nsheenga twaciita kwaamba ayi tukomenye lusuno lwesu pali Lesa?

5. Ino tulyeelete kucita buyani kwaamba ayi tukomenye lusuno lwesu?

⁵ Tulyeelete kutaanguna kumushiba Lesa kwaamba ayi tumusuune. Baibo ilaamba ayi: “Uyo woonse utacite lusuno tamwishi Lesa, mukwiinga Lesa ndusuno.” (1 Joni 4:8) Mutumwi Paulo wakaamba ayi lusuno lwesu pali Yehova inga lwakomena na twashiba kabotu cancinencine pali nguwe akunyumfwishisha mbwaabona shintu. (Fili. 1:9) Ndyetwakatalika kwiiya Baibo, twakatalika kusuna Yehova nabi kwaamba ayi tatwakalinga kucishi shiinji pali nguwe. Ano ndyetwakeeya shiinji, lusuno lwesu lwakakomenenaako. Nceceeco kwiiya Baibo akukutumana kuyeeyawo lyoonse ncokuyandikila abuumbi—Fili. 2:16.

6. Kweelana a 1 Joni 4:11, 20, 21, ino inga twacita buyani kwaamba ayi tukomenye lusuno lwesu?

⁶ Lusuno lunene Lesa ndwaacite pali ndiswe lulyeelete kutupa kusuna bamakwesu. (Amubelenge 1 Joni 4:11, 20, 21.) Mpashi tulayeeya ayi ncuubu kutondesha bamakwesu abenankashi ayi tulibasuni. Mukwiinga soonse tulalambila Yehova akusebensa cankusu kwaamba ayi tukonkele mibo yakwe ibotu. Tulakonkela cakubonenaako cakwe Yesu, uyo wakatondesha lusuno lunene abuumbi kwiinda mukwaaba buumi bwakwe ceebo ca ndiswe. Nacibi boobo, cimwi ciindi inga caba ciyumu kukonkela mulawo wakwaamba ayi tulyeelete kusunana umwi amubye. Atubandike shakacitika mulibungano lyaku Filipi.

7. Ino tutokwiiyawo nshi pamakani Paulo ngaakaambila Yuwodia aSintiki?

⁷ Yuwodia aSintiki bakalinga benankashi bakalinga kusebensa cankusu pomwi amutumwi Paulo. Nacibi boobo, citoboneka ayi paciindi cimwi bakalinga bapusana akucileka kwaamboshanya. Munkalata Paulo njaakalembela bamulibungano mwakalinga benankashi bobilo aba, wakaamba meena abenankashi bobilo aba akubayuminisha ayi “banoonyumfwana.” (Fili. 4:2, 3) Paulo wakeelikawo akuyuminisha bamulibungano boonse ayi: “Amucite shintu shoonse cakutatongooka alimwi akupikishanya.” (Fili. 2:14) Cakutatoonsha, kululika kwakwe Paulo kwakabacafwa benankashi aba,  kwiilikaawo abamwi boonse bamulibungano kutola panembo lusuno lwabo kubamakwesu abenankashi.

8. Ino nciinshi ceenga capa kwaamba ayi cibe ciyumu kutondesha bamakwesu lusuno, ano ino inga twacita buyani kwaamba ayi tukome lipenshi ili?

⁸ Bweenka mbuli nankashi Yuwodia aSintiki, cimwi ciindi inga catuyumina kutondesha lusuno kubamakwesu abenankashi, ceebo cakubikila maano abuumbi kushilubo shabo. Soonse tulacita shilubo bushiku abushiku. Na twabikilabo maano kushilubo sha bamwi, nkokwaamba ayi cilaakuba ciyumu kubatondesha lusuno. Kucakubonenaako, inga twakalala na mukwesu walubaako kutucafwa kubotesha Ŋanda ya Bwaami. Alimwi na twatalika kuyeeya pashilubo shoonse mukwesu nshaakacita, inga catukalasha kwiindaawo akwaalilwa kumutondesha lusuno. Na twalicana mubukaalo ubu, inga cabota kuyeeya cancine cakwaamba ayi: Yehova alabona shilubo shesu asha mukwesu uyo watubishisha. Nacibi boobo, nabi tulabisha, soonse alitusuni. Aboobo aswebo tulyeelete kutondesha lusuno bweenka mbuli Yehova mbwaacita akutolelela kunyumfwana abamakwesu. Tulaakunoonyumfwana abuumbi abamakwesu abenankashi na katusebensa cankusu kubatondesha lusuno.—Fili. 2:1, 2.

9. Ino “shintu shiyandika abuumbi” Paulo nshakaamba shileelikawo nshi?

⁹ Mushimu usalashi wakatanjilila Paulo kwaamba ayi alwiite Beneklistu baku Filipi abamwi kwaamba ayi “bashinishe shintu shiyandika abuumbi.” (Fili. 1:10) Shiyandika ishi shileelikaawo kusalashikwa kwa liina lyakwe Yehova, kukumanishikwa kwa kuyanda kwakwe, luumuno akucatana mulibungano. (Mate. 6:9, 10; Joni 13:35) Inga twatondesha ayi tulisuni Yehova na katukonkela shintu ishi shiyandika abuumbi.

10. Ino tulyeelete kucita buyani kwaamba ayi Yehova atubone mbuli bantu batacite kampenda?

¹⁰ Paulo alimwi wakaamba ayi tulyeelete kuba “batacite kampenda.” Ici tacaambi ayi tulyeelete kuba basalalite. Inga tatubi batacite kampenda cakumaninina bweenka mbuli Yehova mbwaabete sobwe. Nacibi boobo, Yehova inga watubona kuba bantu batacite kampenda na katweelesha cankusu kukomenya lusuno lwesu akushinisha kucita shintu shiyandika abuumbi. Nshila yomwi njeenga twatondesha lusuno nkwiinda mukucita shoonse nsheenga twacikonsha kuleya kufumpula bamwi.

11. Ino nceebonshi ncotweelete kuleya kufumpula na kukalasha bamwi?

¹¹ Makani akuleya kufumpula bamwi ngamakani anene abuumbi. Ino nshiinshi sheenga shapa kwaamba ayi tufumpule bamwi? Inga twafumpula bamwi kwiinda mushakulikondelesha nshetusala, shakufwala nshetufwala, na incito njeenga twasala kusebensa. Mpashi isho nshemwasala teshi shibiibi. Ano na kusala uko kutoopensha njeelacaamba ya bamwi na kubakalasha, nkokwaamba ayi uyo waba mulandu unene. Yesu wakaamba ayi inga cabota kutwaangilila libwe linene munshingo akutuwaala mulweenge na twafumpula na kukalasha womwi wa mbelele shakwe Yehova!—Mate. 18:6.

12. Ino cakubonenaako cakatondesha beebene bakalinga bapainiya cilatwiisha nshi?

¹² Amubone beebene bamwi bakalinga bapainiya mbobakakonkela kucenjesha kwakwe Yesu. Bakalinga mulibungano lyomwi abeebene bamwi bakalinga bapya mucancine abo bakakulila mumikwashi mobakalinga kukashikwa kucita shintu shiinji. Beebene aba bakalinga kushoma ayi Beneklistu tabeelete kuya mukweebela filimu ili yoonse. Lyalo ndyebakanyumfwa ayi beebene bamwi aba bakalinga bapainiya bakaya mukweebela filimu, bakakankamana abuumbi. Aboobo kuswabo ciindi ici beebene aba bakalinga  bapainiya bakacileka kuya mukweebela mafilimu kushikila ciindi beebene aba bamwi bakalinga bapya mucancine ndyebakaiisha njeelacaamba yabo kushiba bwakupansaanya cibiibi acibotu. (Ebul. 5:14) Bapainiya aba bakatondesha kuteshibo mumaswi, sombi amumicito kwaamba ayi bakalinga kubasuni beebene aba bakalinga bapya mucancine.—Loma. 14:19-21; 1 Joni 3:18.

13. Ino inga twalengesha buyani umwi kucita cibiibi?

¹³ Nshila imwi njeenga twafumpula umwi, nkwiinda mukumulengesha ayi acite cibiibi. Ino ici inga cacitika buyani? Amuyeeye bukaalo ubu. Pesule lyakusebensa cankusu kwaciindi cilaamfu, shikwiiya Baibo wacikonsha kukoma lipenshi lyakukolwa. Washiba kwaamba ayi alyeelete kucilekela limwi kunwa. Waya panembo lwakumushimu akubombekwa. Mukuya kwaciindi, mukwesu womwi wamwiita kuŋanda kumishaabo akumuyuminisha kunwaako tubwalwa, kwiinda mukumulwiita ayi: “Uli Mwineklistu ano; ulicite mushimu wakwe Yehova. Cisepo comwi ca mushimu usalashi nkulikasha. Na ulacikonsha kulikasha, inga wanwaako paniinibo.” Inga cabica abuumbi na mukwesu mupya uyu wanyumfwila kuyuminisha kutabete kabotu uku, akuboolela kubucakolwa alimwi!

14. Ino mabungano aBwineklistu alatucafwa buyani kukonkela shaamba Bene Filipi 1:10?

¹⁴ Mabungano esu a Bwineklistu alatucafwa munshila shiinji kukonkela shaamba Bene Filipi 1:10. Cakutaanguna, nshetwiiya pakubungana uku shilatucafwa kushiba Yehova nshaabona ayi nshintu shiyandika abuumbi. Cabili, mabungano alatucafwa kushiba  mbweenga twakonkela nshetwiiya kwaamba ayi tube bantu batacite kampenda. Alimwi catatu, tulayuminishanya kusunana akucitilana shintu shibotu. (Ebul. 10:24, 25) Na bamakwesu batuyuminisha, lusuno lwesu pali Lesa akubamakwesu lulakomenenaako. Na katucite lusuno lunene pali Lesa abamakwesu abenankashi, tulaakucita shoonse nsheenga twacikonsha kwaamba ayi tuleye kufumpula bamakwesu.

15. Ino kucata “shisepo sha bululami” cilaamba nshi?

¹⁵ Paulo wakapaila cankusu kwaamba ayi Beneklistu baku Filipi babe ‘ashisepo sha bululami.’ (Fili. 1:11) Cakutatoonsha, “shisepo sha bululami” ishi shakalinga kwiilikaawo lusuno lwabo pali Yehova abantu. Ici cileelikaawo akushimikila bamwi palushomo lwabo muli Yesu apa bulindilishi bubotu mbobacite. Palilembo lya Bene Filipi 2:15 tulacana cikoshanyo cakwaamba ayi, “kubala mbuli mumuni mucishi ici.” Maswi aya alatucafwa kwiibaluka kwaamba ayi Yesu wakalinga kwiita bashikwiiya bakwe ayi “mumuni wa cishi.” (Mate. 5:14-16) Alimwi wakabapa mulawo “wakwiisha bantu kuba bashikwiiya,” alimwi ayi “balaakuba bakamboni . . . kushikila amucishi coonse ca panshi.” (Mate. 28:18-20; Milimo 1:8) Tulacata “shisepo sha bululami” na katusebensa cankusu muncito iyi iyandika abuumbi.

16. Ino Bene Filipi 1:12-14 ilatondesha buyani ayi inga twacikonsha kubala mbuli mumuni nabi tube mubukaalo buyumu buyani? (Amubone cikope cili papeeji yakutaanguna.)

¹⁶ Inga twacikonsha kubala mbuli mumuni nabi tube mubukaalo buyumu buyani. Cimwi ciindi bukaalo bweenga bwaboneka anga butoopilinganya ncito yakushimikila makani abotu inga bwaba coolwe cakushimikila. Kucakubonenaako, mutumwi Paulo wakalemba nkalata kubene Filipi ndyaakalinga kwangitwe muŋanda ku Loma. Nabi kwaamba ayi Paulo wakalinga kwangitwe, taakwe kucileka  kushimikila baabo bakalinga kumulindilila abaabo bakalinga kusa mukumubona. Paulo wakashimikila cankusu mubukaalo mbwakalingaamo alimwi kucita boobo kwakacafwa bamakwesu kuba alushomo ankusu “shakwaamba maswi akwe Lesa cakutaloonda.”—Amubelenge Bene Filipi 1:12-14; 4:22.

17. Ino bamakwesu bamwi balacita buyani kwaamba ayi bacikoonshe kutolelela kushimikila nabi ndyebali mubukaalo buyumu?

¹⁷ Bamakwesu abenankashi baanji balatondesha kutaloonda bweenka mbuli Paulo mbwaakacita. Balekala mushishi incito yesu yakushimikila moyakakashikwa, aboobo balalangoola nshila shimwi mbweenga bashimikila makani abotu. (Mate. 10:16-20) Mucishi cimwi incito yesu moyakakashikwa, mutanjilili walubasu wakalwiita beshikushimikila ayi uli woonse anoshimikila kubeshikamukowa bakwe, mbwabambenaabo, beshicikolonyina, mbwaasebensaabo, abaabo mbwaashi. Ndipakeenda myaaka yobilo mabungano akafula abuumbi. Mpashi nkomukala ncuubu kushimikila kumuntu uli woonse. Nacibi boobo, inga tweeyako comwi kuswa kubamakwesu abenankashi mbobacita na incito yesu yakashikwa. Tulyeelete kulangoola nshila mbweenga twaabanamo lubasu mukushimikila, akushoma kwaamba ayi Yehova inga watupa nkusu sha kukoma mapensho ali woonse.—Fili. 2:13.

18. Ino nshiinshi nshotweelete kushinisha kucita?

¹⁸ Cino nceciindi ncotweelete kukonkela maswi Yehova ngaakatanjilila mutumwi Paulo kulembela Beneklistu baku Filipi. Atushinishe kubikila maano kushintu shiyandika abuumbi, kuba bantu batacite kampenda, bantu batakalashi na kufumpula bamwi, akuba ashisepo sha bululami. Kucita boobo kulaakutucafwa kukomenya lusuno lwesu akuleta bulemu kuli Ishiwesu shilusuno Yehova.