MUTWI WAKWIIYA 34
Mbweenga Twashibila na Twapekwa Ncito Ipya
“Lesa uliluleme, aboobo teshi akalube ncito njemwakacita, alimwi alusuno ndomwakabonesha paliina lyakwe.”—EBUL. 6:10.
LWIIMBO 38 Alaakumuyumya
NSHESHI TWIIYE *
1-3. Ino nshiinshi sheenga shapa kwaamba ayi bamakwesu basebensa ncito yaciindi coonse batatoleleli muncito iyo?
BA Robert Jo abakaabo ba Mary bakaamba ayi: “Pesule lyakusebensa myaaka 21 muncito yabumishonali bashali besu boonse bone bakaciswa. Nabi kwaamba ayi twakalinga kusuni kuya mukubalama, tatuna kukondwa kwaamba ayi twakalinga kushiya ncito yesu njetwakalinga kusuni abuumbi.”
2 Ba William aba Terrie bakaamba ayi: “Ndyetwakashiba kwaamba ayi teshi tutolelele muncito yesu ceebo cakuciswa, twakalila abuumbi. Twakalinga kusuni abuumbi kutolelela kusebensela Yehova mbuli bamishonali.”
3 Ba Aleksey bakaamba ayi: “ twakalinga kucishi kwaamba ayi beshikutupensha bakalinga kusuni kucala ofesi yamusampi nkotwakalinga kusebensela. Aboobo musampi ndyewakacalwa, twakalinga kweelete kuswa ku Bethel, ici cakatucisa abuumbi.”
4. Ino njimiipusho nshi njeshi tubandike mumutwi uyu?
4 Kwiilikaawo, bamakwesu abenankashi bamwi baanji bakalinga muncito yaciindi coonse, abakalinga kusebensela ku Bethel bakapekwa ncito shimwi. * Cilaba ciyumu abuumbi kubamakwesu abenankashi bashomeka aba kushiya ncito njebasuni abuumbi. Ino nshiinshi nsheenga bacita kwaamba ayi bashibile ncito shipya? Ino inga mwabacafwa buyani? Shikumbulo kumiipusho iyi inga shatucafwa soonse kushiba mbweenga twaciita na bukaalo bwacinja mubuumi.
NSHEENGA MWACIITA NA SHINTU SHAALUKA
Ino nciinshi cipa kwaamba ayi cibe ciyumu kucileka ncito yaciindi coonse? (Amubone palagilafu 5) *
5. Ino nshiinshi sheenga shacitika na muntu wakalinga kusebensa ncito yaciindi coonse wapekwa ncito imwi ipya?
5 Inga caba ayi tutoosebensa mbuli mutanjilili walubasu, mishonali, painiya ulibetele na abo basebensela ku Bethel, soonse inga twatondesha lusuno kubantu bekala kumusena nkotusebensela akusunaako. Aboobo tulanyumfwa cibiibi kuswaako kumusena nkotwakashibila. Tulabayeeya abuumbi bamakwesu mbotwakashiya kumusena uko alimwi tulalisukama abuumbi, bunene bunene na twakaswaako ceebo ca kupenshekwa. (Mate. 10:23; 2 Koli. 11:28, 29) Kwiilikaawo, liinji kutalika ncito ipya na kuboolela nkotwakaswa, inga caba cintu ciyumu mukwiinga tulyeelete kutalika alimwi kwiiya bukaalo bupusene ambotwakashibila. Ba Robert Jo aba Mary bakaamba ayi: “Twakalinga twashibila buumi bwakookuno alimwi akushimikila mumushobo ngotwakeeya.” “Mukwiinga twekala kumwi kwa myaaka iinji, twakalinyumfwa anga mbeensu mucishi cinemisheesu.” Bamwi na bapekwa ncito ipya, inga batalika kucana mapensho amaali ngobatakalinga kwiingashilawo. Inga balinyumfwa kubulilwa shakucita, kuloonda, alimwi akulefuka. Ino nciinshi ceenga cabacafwa?
Ncintu ciyandika abuumbi kusena pafwiifwi a Yehova akucinka manungo muli nguwe (Amubone mapalagilafu 6-7) *
6. Ino nshiinshi nshotweelete kucita kwaamba ayi tube pafwiifwi a Yehova?
6 Amutolelele kuba pafwiifwi a Yehova. (Jemu. 4:8) Ino nshiinshi nshotweelete kucita? Atushome Yehova mbuli ‘Shikukumbula mipailo.’ (Kulu. 65:2) Kulumbaisha 62:8 ilaamba ayi: “Amumulwiite mapensho anu oonse”, Yehova inga wacita “shiinji shiinda pasheesho nsheenga twaseenga na kuyeeya.” (Efe. 3:20 nwt) Yehova alatupa shiinji shiinda pasheesho nshetusenga mumipailo. Inga watucitila anshetutana kwiingashilawo alimwi inga watucafwa kumana mapensho ngotucite munshila njetutana kuyeeyawo.
7. (a) Ino nshiinshi sheenga shatucafwa kutolelela kuba pafwiifwi a Yehova? (b) Kweelana a Bene Ebulu 6:10-12, ino nshiinshi sheshi shikacitike na twatolelela kusebensela Yehova cakushomeka?
7 Kwaamba ayi tutolelele kuba pafwiifwi a Yehova, tulyeelete kubelenga Malembo lyoonse akukutumana kuyeeyawo. Mukwesu umwi wakalinga mishonali kale kale wakaamba ayi: “Amutolelele abubaambo bwakucita kulambila kwa mukwashi akulibambila mabungano, bweenka mbuli mbomwakalinga kucita ndyemwakalinga muncito ya ciindi coonse.” Kwiilikaawo, amutolelele kwaabanamo lubasu mukushimikila makani abotu pomwi alibungano. Yehova taaluubi basebenshi bakwe batolelela kumusebensela cakushomeka, nabi kwaamba ayi inga tabasebensi mbuli mbobakalinga kusebensa kale kale.—Amubelenge Bene Ebulu 6:10-12.
8. Ino maswi ngotucana pa 1 Joni 2:15-17 inga atucafwa buyani kukala buumi bwakutalila shiinji?
8 Amukale buumi bwakutalila shiinji. Mutalekeli shakulisukama sha mucishi cakwe Satana kumuboosha kwisule lwakumushimu. (Mate. 13:22) Amukake kunyumfwila bantu bateshi basebenshi bakwe Lesa nabi beshicibusa na beshikamukowa beenga bamuyunga ayi mulyeelete kuba amaali aanji kwaamba ayi munookala kabotu. (Amubelenge 1 Joni 2:15-17.) Amucinke manungo muli Yehova, uyo wakatushomesha kutupa shintu shoonse nshetuyandika “paciindi ceelete.”—Ebul. 4:16; 13:5, 6.
9. Kweelana a Tushimpi 22:3, 7, ino nceebonshi ncotuyandikila kuleya kukongola cikongole kongole, alimwi ino nciinshi ceenga catucafwa kusala kabotu?
9 Amuleye kukongola maali cikongole kongole. (Amubelenge Tushimpi 22:3, 7.) Cimwi ciindi kulonga inga kwayanda maali aanji, aboobo ncuubu kunjila munkongole. Amuleye kukongola maali kwaamba ayi muule shintu shitayandiki. Cimwi ciindi cilaba ciyumu kushiba maali ngomweelete kukongola na muli mubukaalo buyumu. Kucakubonenaako na umwi mumukwashi waciswa. Na caba boobo, mutaluubi kwaamba ayi “mupailo akupapata” inga shamucafwa kusala kabotu. Yehova inga wakumbula mipailo yanu kwiinda mukumucafwa kukalika moyo kwaamba ayi musale kabotu.—Fili. 4:6, 7; 1 Pita. 5:7.
10. Ino inga twacita buyani kwaamba ayi tucane beshicibusa bapya?
10 Amube abushicibusa abantu beenga bamuyuminisha. Amulwiiteko beshicibusa banu mbomutolinyumfwa amapensho ngomutokwiindaamo, bunene bunene abo bakeendako mubukaalo buli mbuli bwaanu. Kucita boobo inga kwamucafwa kunyumfwako kabotu. (Shi. 4:9, 10) Beshicibusa mbomwakalinga kucite kale kale, balaakutolelela kuba beshicibusa banu. Nacibi boobo, mulyeelete kucana beshicibusa bamwi ndyemwatalika kusebensela kumwi. Alimwi mutaluubi kwaamba ayi mulyeelete kuliceesha kwaamba ayi mube abeshicibusa bapya. Ino nshiinshi nshomweelete kucita? Amulwiiteeko bamwi shoolwe nshemwakacana ndyemwakalinga kusebensela Yehova muncito ya ciindi coonse. Nabi kwaamba ayi bamwi inga baalilwa kunyumfwishisha ncomusunini ncito yaciindi coonse, bamwi inga basuna kwiiya shiinji akuba bashicibusa banu. Ano amucenjele kwaamba ayi mutanolilumbaisha na kwaamba bunene pashintu nshemwakacita muncito yakwe Yehova, alimwi tamweelete kubikila maano ku kwaamba pashintu shibiibi shakamucitikilawo.
11. (a) Ino inga mwacita buyani kwaamba ayi mutolelele kuba alusangalalo mucikwati canu?
11 Mutapi mulandu ngomweebenaakwe na kuciswa kwakwe nkokwakapa kwaamba ayi muswe muncito ya ciindi coonse. Alimwi na nkuciswa kwanu kwakalengesha, mutalinyumfwi cibiibi na kutalika kuyeeya ayi mwakalensha nsoni ngomweebenaakwe. Mutaluubi kwaamba ayi muli “mubili womwi,” alimwi mwakashomesha Yehova ayi mulaakutolelela kulamana mubukaalo buli boonse. (Mate. 19:5, 6) Na mwakaswa muncito yaciindi coonse ceebo cakwaamba ayi mwakaba alifumo lyakutalibambila, amushinishe kwaamba ayi mulaakucafwa mwanaanu kushiba kwaamba ayi alayandika kwiinda ncito njemwakalinga kucite. Amumulwiite mwanaanu kwaamba ayi mulamubona mbuli “cilambu” kuswa kuli Lesa. (Kulu. 127:3-5) Alimwi mutaluubi kumulwiita shoolwe shibotu nshemwakacana ndyemwakalinga muncito yaciindi coonse. Kucita boobo inga kwayuminisha mwanaanu kusebensela Yehova muncito yaciindi coonse, bweenka mbuli mbomwakacita.
MBWEENGA BAMWI BACAFWILISHA
12. (a) Ino inga twacita buyani kwaamba ayi tucafwe baabo bali muncito yaciindi coonse kutolelela muncito yabo? (b) Ino inga twacita buyani kwaamba ayi tubacaafwe kushibila muncito yabo ipya?
12 Cabota ncakwaamba ayi, mumabungano aanji bamakwesu abenankashi, balacafwa baabo bali muncito yaciindi coonse kutolelela. Balacita boobo kwiinda mukubayuminisha ayi batolelele, na kubapako lucafwo lwa maali na lucafwo lumwi luli loonse, kubacafwa kulama mukwashi wabo ndyebali muncito yaciindi coonse. (Gala. 6:2) Na abo bakalinga muncito yaciindi coonse baswa akusa kulibungano lyanu, mutababoni anga kuli cibiibi ncobakacita kwaamba ayi baswe muncito yaciindi coonse. * Sombi amubacaafwe kwaamba ayi cibe cuubu kushibila. Amubatambule camaansa obilo akubalumba pancito njobakasebensa, nabi kwaamba ayi tabacikoonshi kucita shiinji ceebo ca kuciswa. Amubandikaabo kwaamba ayi mubashibe kabotu. Amwiiye kuswa kulushibo ndobacite anshebakeendaamo.
13. Ino nshiinshi nsheenga twaciita kwaamba ayi tucafwe baabo bakatambula ncito ipya?
13 Bamakwesu aba beshikutumwa kuya mukusebensela kulibungano lya kumwi, inga bayandika kubacafwa kucana kwakukala, bwakweenda, incito, ashintu shimwi shiyandika. Inga bayandika akubacafwa kushiba kabotu makani ashintu mbuli, kubete cipatela apolisi. Cintu cinene ncebayandika teshi kubanyumfwila nkumbu, sombi kubanyumfwishisha. Inga caba kwaamba ayi balicite mulwashi mumukwashi na balo beene mbalwashi. Mpashi balicite buumba bwakusowekelwa muntu ngobasuni mumukwashi. * Alimwi nabi kwaamba ayi tabatokwaambawo, inga caba kwaamba ayi balicite buumba mumoyo bwakuyeeya beshicibusa mbobakalinga kucite muncito yaciindi coonse. Cilatola ciindi kwaamba ayi buumba bwa mushobo uyu bumane alimwi cimwi ciindi bulamana maano muntu.
14. Ino bamakwesu bakacita buyani kwaamba ayi bacafwe nankashi umwi kushibila kushimikila kumusena upya?
14 Na kamushimikilaabo akubayuminisha kwiinda mukuba cakubonenaako cibotu, inga mwabacafwa kushibila bwangu. Nankashi umwi wakalinga muncito yabumishonali kwa myaaka iinji wakaamba ayi: “Nkondakaswa ndakalinga kucita shiiyo sha Baibo bushiku abushiku.” “Ano kuno nkondesa nciyumu nabibo kucalula Baibo na kutondesha vidyo ndyetutooshimikila. Nacibi boobo bamakwesu bakalinga kuya andime ndyebatoocita lweendo lwakuboolelaako ashiiyo sha Baibo. Ndyendakabona bamakwesu abenankashi mbobakalinga kusebensa cankusu alimwi cakutaloonda kucita shiiyo sha Baibo shitooya panembo, ndakatalika kubona musena wakushimikila uyu munshila ili kabotu. Ndakeeya mbweenga ndatalika mibandi kumusena upya. Ishi shoonse shakancafwa kuba alusangalalo alimwi.”
AMUTOLELELE KUSEBENSA CANKUSU!
Amubone nshila mbweenga mwacita shiinji muncito yakushimikila kumusena nkomushimikila (Amubone mapalagilafu 15-16) *
15. Ino inga mwacita buyani kwaamba ayi munosebensa kabotu kumusena upya?
15 Inga mwacikonsha kusebensa kabotu muncito ipya. Mutanoyeeya ayi tamwakalinga kucita kabotu muncito yanu, aboobo inga tamucikoonshi kucita kabotu. Amuyeeye Yehova mbwaatomucafwa pacecino ciindi akutolelela kushimikila. Amukonkele cakubonenaako ca Beneklistu bamuciindi ca batumwi. Kuli koonse nkobakaya ‘bakaya kabashimikila makani abotu.’ (Milimo 8:1, 4) Na mwatolelela kushimikila, inga mwacaafwa bantu kwiiya cancine. Kucakubonenaako, bapainiya bakatandwa mucishi cimwi, bakaya kucishi cimwi cakalinga pafwiifwi uko kwakalinga bantu baanji bakalinga kwaamba mushobo wakalinga kucishi bapainiya aba. Pakeendabo myeenshi iniini, makoto aanji apya akatalika.
16. Ino inga mwacita buyani kwaamba ayi mucane lusangalalo muncito yanu ipya?
16 Baibo ilaamba ayi: ‘Kusangalala nkwatupa Yehova nkokutupa nkusu.’ (Neye. 8:10) Tulyeelete kuba alusangalalo ceebo ca bushicibusa bwesu a Yehova, kuteshi ceebo ca ncito njaakatupa nabi twiisune buyani. Aboobo na tulisuni kuba alusangalalo, tulyeelete kuyumya bushicibusa bwesu anguwe akunoocinka manungo muli nguwe lyoonse. Mutaluubi kwaamba ayi cakapa kwaamba ayi musune bunene ncito njemwakalinga kucita kale kale, nkusebensa kwanu cankusu kwaamba ayi mucafwe bantu. Amusebense ca moyo woonse pacecino ciindi muncito yanu ipya, lyalo Yehova alaakumucafwa kwiisuna ayalo.—Shi. 7:10.
17. Ino nshiinshi nshotweelete kwiibaluka pancito njetutoosebensa pacecino ciindi?
17 Tulyeelete kwiibaluka kwaamba ayi kusebensela Yehova nkwamuyayaya, ano ncito njetucite pacecino ciindi njakaciindi kaniinibo. Mucishi cipya, mpashi soonse tulaakutambula ncito shipya. Mukwesu Aleksey, ngotwabandikawo kumatalikilo, alashoma ayi nshatokwiindaamo pacecino ciindi shitomucafwa kulibambila shitoosa kunembo. Wakaamba ayi: “Ndishi kwaamba ayi Yehova ncancine nkwaali alimwi cishi cipya ncakwiila cilaakubaako, nacibi boobo ndakalinga kubona ayi Yehova alitutalamukiteeko alimwi acalo cishi cipya ciciliko palaale.” “Ano pacecino ciindi ndabonabo anga Yehova aliimfwi panembo lyangu alimwi cishi cipya cili pafwiifwi abuumbi.” (Milimo 2:25) Aboobo tacicite mulandu nabi tupekwe ncito ili buyani, atutolelele kusena pafwiifwi a Yehova. Teshi akatushiyewo, alimwi alaakutucafwa kucana lusangalalo muncito ili yoonse njeenga twapeekwa kuli koonse nkweenga twaba.—Isa. 41:13.
LWIIMBO 90 Amuyuminishanye
^ par. 5 Cimwi ciindi bamakwesu abenankashi bali muncito yaciindi coonse, inga bacileka ncito iyo, na kupekwa ncito imwi ipya. Mumutwi uyu tutobandika mapensho ngobeendaamo asheenga shabacafwa kushibila ncito ipya. Tutoobandika ambweenga bamwi babayuminisha akubacafwa anjiisho sheenga shatucafwa soonse, kushiba bwakucita na shintu shacinja mubuumi.
^ par. 4 Ubu bweenka mbocibete akubamakwesu batoosebensa ncito shimwi. Na myaaka yafula, balalekela mikuli imwi kubamakwesu bacicite nkusu. Amubone mitwi yakwiiya icite mutwi mbuli “Nobamakwesu Bacinene—Yehova Alalumba Ceebo ca Kushomeka Kwanu,” iyo itoocanika mu Njashi Yamulindilishi yamu Cibemba ya September 2018, alimwi amutwi utokwaamba ayi “Amutolelele Kuba Bakondetwe Nabi Shintu Shaaluke,” Njashi Yamulindilishi yamu Cibemba na Chitonga ya. October 2018.
^ par. 12 Bamanene bamulibungano mutooswa bamakwesu aba, balyeelete kufwambaana kulemba nkalata yakubasansulula kulibungano lipya nkobatooya, kwaamba ayi bakatolelele kusebensa mbuli bapainiya, banene, na basebenshi bacafwilisha.
^ par. 13 Amubone mutwi utokwaamba ayi “Sheenga Shacafwa Bakafwitwa,” kuswa mumagazini yamu Cibemba na Chitonga ya Awake 2018!, No. 3.
^ par. 57 BUSANSULUSHI BWASHIKOPE: Beebene batoolasha libungano nkobalinga kushimikila mbuli bamishonali.
^ par. 59 BUSANSULUSHI BWASHIKOPE: Beebene balya bakalinga bamishonali, bali kucishi kumishaabo batopaila kwaamba ayi Yehova abacaafwe kuliyumya mumapensho ngobatookwiindaamo.
^ par. 61 BUSANSULUSHI BWASHIKOPE: Kwiinda mulucafwo lwakwe Yehova, beebene aba baboolela alimwi muncito yaciindi coonse. Batosebensesha nshobakeeya ndyebakalinga bamishonali ndyebatookwaabila makani abotu kubeensu bakesa kumusena kupya nkobatooshimikila.
