1. Ino Beneklistu balyeelete kucita buyani kwaamba ayi bacikoonshe kucica kushikila akumamanino?

BENEKLISTU bali mulubilo lwa kubuumi. Soonse tulyeelete kutolelela kucica kushikila akumamanino, bakatalika kale kale abaabo bakatalika conoono. Makani mutumwi Paulo ngaakalembela Beneklistu baku Filipi inga atuyuminisha kucica kushikila akumamanino alubilo ulu. Paulo ndyaakalemba nkalata iyi, Beneklistu bamwi bakutaanguna kabali basebensela kale Yehova kwa myaaka iinji. Bakalinga kusebensela Yehova cakushomeka, nacibi boobo Paulo wakabayuminisha ayi bakalinga kweelete kutolelela kucica cakuliyumya. Wakalinga kusuni ayi batolelele kukonkela cakubonenaako cakwe kwiinda “mukucica kushika kumamanino.”—Fili. 3:14.

2. Ino nceebonshi nceenga twaambila ayi makani Paulo ngakalembela Beneklistu akalinga apaciindi ceelete?

² Makani Paulo ngakalembela Beneklistu baku Filipi akalinga apaciindi ceelete. Kuswabo ciindi libungano ndyelyakatalika, Beneklistu bakalinga kupenshekwa. Kupenshekwa kwakatalika Paulo a Sailasi ndyebakaya ku Filipi cakuma 50 C.E ndyebakayuminishikwa amushimu ayi “Kosa kuMakedoniya utucaafwe.” (Milimo 16:9) Bakacana mwanakashi wa liina lya Lidiya, uyo “wakalinga kukutika, alimwi Yehova wakacalula moyo wakwe” kwaamba ayi atambule makani abotu. (Milimo 16:14) Mukuya kwaciindi lakwe amukwashi wakwe woonse bakabombekwa. Nacibi boobo, Satana wakatalika kuleta mapensho. Basankwa bamu ndabala bakacata Paulo a Sailasi akubatola kubeendeleshi, lyalo akubabekesha ayi baleta kupilingana. Aboobo, Paulo a Sailasi bakoomwa, kubikwa mujeele, akubatanda mundabala. (Milimo 16:16-40) Ano sa bakaboolela pesule? Sobwe napaceyi! Ino mbuyani bamakwesu abenankashi bakalinga mulibungano lipya? Abalo bakaliyumya! Cakutatoonsha cakubonenaako cakwe Paulo a Sailasi cakabayuminisha abuumbi.

3. Ino nciinshi Paulo ncaakalinga kucishi ayi ncaeelete kucita kwaamba ayi atabooleli pesule, alimwi ino njimiipusho nshi njeshi tubandikeewo?

 ³ Paulo taakalinga kusuniiwo nabi paniini kuboola pesule mukusebensela Yehova. (2 Koli. 4:16) Nacibi boobo, wakalinga kucishi ayi kwaamba ayi atabooleli pesule, wakalinga kweelete kubikila maano abuumbi kucilambu. Ino nciinshi nceenga tweeya kuswa kucakubonenaako cakwe Paulo? Ino nshakubonenaako shili sha munshiku shino shitondesha kwaamba ayi aswebo inga twacikonsha kuliyumya nabi twiinde mumapensho? Alimwi ino nshetutolangila inga shatucafwa buyani kutaboola pesule?

4. Ino Paulo wakacita buyani kwaamba ayi atolelele kusebensela Yehova nabi kwaamba ayi wakalinga mubukaalo buyumu?

⁴ Amuyeeye Paulo mbwaakalinga kusebensa cankusu ndyaakalembela nkalata Beneklistu baku Filipi. Paciindi ici kaali mujeele ya muŋanda ku Loma. Taakalinga kucitewo lwaanguluko lwakuya mukushimikila. Nacibi boobo, wakatolelela kusebensa cankusu kwiinda mukushimikila baabo bakalinga kusa mukumubona akulemba makalata kumabungano akalinga kulaale. Amunshiku shino, bamakwesu abenankashi baanji batacikoonshi kweenda kuya mukushimikila, balashimikila baabo besa mukubabona paŋanda. Bamwi balashimikila kwiinda mukulembela makalata bantu mbotutacani.

5. Kweelana amaswi ngotucana palilembo lya Bene Filipi 3:12-14, ino nciinshi cakacafwa Paulo kubikila maano kucilambu?

⁵ Paulo taakwe kupilinganishikwa ashintu shibotu na shibiibi nshaakacitawo. Nceceeco ncakaambila ayi, wakalinga kweelete ‘kuluba sha kwisule,’ kwaamba ayi ‘akonkele shili kunembo,’ lyalo ndyeenga waswitilila mulubilo. (Amubelenge Bene Filipi 3:12-14.) Ino nshintu nshi shakalinga kweelete kupilinganya Paulo? Cakutaanguna, kaatana kuba Mwineklistu, Paulo wakalinga waya panembo abuumbi lwakumubili. Nacibi boobo ndyaakaba Mwineklistu, wakatalika kubona ayi kuya panembo kulya, kwakalingabo anga ‘nshintu sha kusowabo.’ (Fili. 3:3-8) Cabili, nabi kwaamba ayi wakalinga kulinyumfwa cibiibi ceebo cakupensha Beneklistu kale kale, taakwe kuboolela pesule mukusebensela Yehova. Catatu, taakalinga kuyeeya ayi wasebensela Yehova kwa myaaka iinji aboobo cakwana inga wookesha ano. Paulo wakacita shiinji muncito yakushimikila nabi kwaamba ayi wakeenda mumapensho aanji mbuli kwaangwa, kuumwa, kupwaikwa mabwe, bwaato kunyonyooka ndyebakalinga palweendo, kubulisha shakulya alimwi ashakufwala. (2 Koli. 11:23-27) Nabi kwaamba ayi wakacita shiinji muncito yakushimikila akupenga, Paulo wakalinga kucishi ayi alyeelete kutolelela kusebensela Yehova. Aswebo mbotweelete kucita.

6. Ino “shintu shakwisule” nsheenga twayandika kuluba shileelikaawo nshi?

⁶ Ino nshiinshi nshotweelete kucita kwaamba ayi tulube ‘sha kwisule’ bweenka mbuli Paulo mbwaakacita? Sobamwi mpashi tucicite lipenshi lyakulinyumfwa cibiibi ceebo ca shibiibi nshetwakacitawo kale kale. Na mbomulinyumfwa, ino mbuyani kutalika kwiiya pa cilubula cakwe Klistu ndyemutoocita ciiyo capalwaanu? Kwiiya, kukutumana kuyeeyawo, akupailila pamakani acilubula, inga kwamucafwa abuumbi kucileka kulinyumfwa cibiibi kutayandiki. Inga twacileka kulinyumfwa cibiibi pashibiibi Lesa nshaakatulekelela kale. Amuyeeye cakubonenaako acimwi nceenga tweeya kuswa ku mutumwi Paulo. Bamakwesu abenankashi bamwi bakashiya ncito sha maali aanji kwaamba ayi babike sha Bwaami panembo. Na amwebo mbomwakacita, sa inga taciboti kucileka kuyeeya nshomwakashiya? (Shakube. 11:4-6; Shi. 7:10) “Shintu shakwisule” inga sheelikaawo shintu nshetwakakumanisha muncito yakwe Yehova na mapensho ngotwakacikonsha kuliyumya kwisule. Ncakwiila na twalanga kwisule akuyeeya Yehova mbwakatucafwa, inga catucafwa kusena pafwiifwi a Ishiwesu. Nacibi boobo, tatweelete kunoyeeya  ayi nshetwacita shafula aboobo tulyeelete kookesha ano.—1 Koli. 15:58.

7. Kweelana a lilembo lya 1 Bene Kolinto 9:24-27, ino nciinshi ncotuyandikila kubikila maano kukuleya shintu sheenga shatupilinganya? Amwaambe cikoshanyo.

⁷ Paulo wakanyumfwishisha Yesu ndyaakaamba ayi: “Amusebense cankusu.” (Luka 13:23, 24 nwt) Paulo wakalinga kucishi ayi bweenka mbuli Klistu, wakalinga kweelete kusebensa cankusu kushikila akumamanino. Ncecakapa kwaamba ayi akoshanishe buumi bwa Bwineklistu ku lubilo lwakupingana. (Amubelenge 1 Bene Kolinto 9:24-27.) Shikucica lubilo lwakupingana alabikila maano kukumanisha akuleya shintu sheenga shamupilinganya. Kucakubonenaako, beshikucica mulubilo lwakupingana mutauni inga baba kabashingulukitwe amakwebo alimwi ashintu shimwi sheenga shabapilinganya. Ano sa muntu uli mulubilo lwakupingana inga wataanguna weemikana akutalika kweebela shintu nshebatokuulisha mumashoopu? Inga taaciti boobo na alisuni kupekwa cilambu! Aswebo sotubete mulubilo lwa kubuumi, tulyeelete kuleya cintu cili coonse ceenga catupilinganya. Na twabikila maano kucilambu akusebensa cankusu bweenka mbuli Paulo mbwaakacita, tulaakupekwa cilambu!

8. Ino ngamapensho nshi otatwe ngweshi tubandikeewo?

⁸ Atubandike mapensho otatwe eenga atupa kuboolela mwisule. Lipenshi lyakutaanguna nkutakumanishikwa kwa nshetutolangila, lyabili nkuceya kwa nkusu ceebo cakukula, lyatatu nkwiinda mumapensho atamaani. Kwiiya mbobakaliyumya bamwi mumapensho mbuli aaya inga kwatucafwa.—Fili. 3:17.

9. Ino nshiinshi sheenga shacitika na nshetwalinga kulangila tashina kucitika?

⁹ Kutakumanishikwa kwa nshetutolangila. Soonse tulalangila shintu shibotu Yehova nshaakatushomesha. Mushinshimi wakwe Yehova Abakuku ndyaakalinga kusuni abuumbi ayi Yehova anyonyoole bukaalo bwakalinga mucishi ca bene Juda, Yehova wakamulwiita ayi “tolelela kulangila.” (Aba. 2:3 nwt) Nacibi boobo, na nshetutoolangila shaboneka kucelwa, cimwi ciindi inga twalefuka akuboolela mwisule. (Tus. 13:12) Ishi nsheshakacitika mu 1914. Beneklistu bananikitwe baanji bakalinga kulangila ayi balaakuya kwiculu mu mwaaka uyu. Aboobo ino abo bakalinga kushomeka  bakacita buyani ishi ndyeshi takwe kucitika?

10. Ino beebene bamwi bakacita buyani nshebakalinga kulangila ndyeshi takwe kucitika?

¹⁰ Atubandike shakubonenaako sha Beneklistu bobilo bashomeka bakacikonsha kutolelela kushomeka. Mukwesu Royal Spatz wakabombekwa mu 1908 kaacite myaaka 20 yakushalwa. Wakalinga kushomete cakutatoonsha ayi atooya kwiculu conoono. Aboobo mu 1911 ndyaakalinga kweendela nankashi Pearl kwaamba ayi beebane wakamulwiita ayi: “Ulishi sheshi shikacitike mu 1914. Na nkweebana, tulyeelete kufwambaana!” Ano sa Beneklistu beebene aba bakaboolela mwisule ceebo cakwaamba ayi nshebakalinga kulangila tashikwe kucitika mu 1914? Sobwe, mukwiinga bakalinga kubikila maano kukucita kuyanda kwakwe Lesa, kuteshi kukutambulabo cilambu. Bakalinga kushinishite kucica lubilo cakuliyumya kushikila akumamanino. Alimwi ncakwiila, ba Royal aba Pearl bakatolelela kushomeka kushikila ciindi ndyebakamanisha buumi bwabo bwa pacishi ca panshi pesule lya myaaka iinji abuumbi. Cakutatoonsha, amwebo mulisunishishi kwaamba ayi ciindi cikashiike Yehova ndyeshi akalengeshe liina lyakwe kusalashikwa, akulengesha ayi cikashibikwe kwaamba ayi ngoweelela kweendelesha kwiculu apacishi ca panshi, akukumanisha shishomesho shakwe shoonse. Amushome cakutatoonsha kwaamba ayi Yehova alaakukumanisha shintu shoonse ishi paciindi ceelete. Aboobo atutolelele kusebensela Lesa cankusu akutaboolela mwisule na nshetwalinga kulangila tashina kucitika.

11-12. Ino nciinshi nceenga twaambila ayi nga twatolelela kusebensela Yehova cakushomeka nabi nkusu shakumubili ndyeshitooya bumana? Amwaambe cakubonenaako.

¹¹ Kuceya kwa nkusu ceebo cakukula. Shikucica alyeelete kuba ankusu abuumbi. Ano mwebo tamweelete kuba ankusu shakumubili kwaamba ayi mutolelele kuba bayumu lwakumushimu. Alimwi bamakwesu baanji batacite nkusu abuumbi shakumubili balatolelela kuya panembo lwakumushimu.(2 Koli. 4:16) Kucakubonenaako, Mukwesu Arthur Secord wakasebensa myaaka 55 ku Bethel alimwi wakashika amyaaka 88 kaacili ku Bethel. Bushiku bumwi banaasi bakalinga kumulama bakaya mpwakalinga kulete, bakamulanga akwaamba cakuyuminisha ayi: “Mukwesu Secord, kwalo mwamusebensela Yehova cakushikaawo.”Nacibi boobo, mukwesu uyu taakwe kubikilabo maano mbwakasebensela Yehova kale kale. Wakalanga naasi akuseka lyalo akukumbula ayi: “Ncowaamba ncancine. Ano cintu cinene teshi mbotwakasebensela Lesa kale kale. Sombi nshetutoocita pacecino ciindi ambweshi tukatolelele kunembo.”

¹² Mpashi amwebo mwasebensela Yehova kwa myaaka iinji, ano pacecino ciindi mutokwaalilwa kusebensa mbuli mbomwakalinga kucita kale kale ceebo cakukula na kuciswa ciswa. Na ishi nshomutookwiindaamo mutalefuki. Amushome cakutatoonsha kwaamba ayi Yehova teshi akalube kushomeka kwanu. (Ebul. 6:10) Alimwi pacecino  ciindi, mutaluubi kwaamba ayi teshi kufula kwa myaaka yakusebensela Yehova kutondesha ayi tulimusuni. Sombi tulatondesha lusuno lwesu, kwiinda mukutondesha mushimu wakubona shintu munshila ili kabotu, akumusebensela kushika peela nkusu shesu. (Kolo. 3:23) Yehova taatulangili kucita nsheenga tatucikoonshi.—Maako 12:43, 44.

13. Ino shakeendaamo ba Anatoly aba Lidiya inga shatucafwa buyani kutolelela kusebensela Yehova cakuliyumya nabi ndyetutokwiinda mumapensho?

¹³ Mapensho atamaani. Basebenshi bakwe Lesa bamwi beenda mubukaalo buyumu akupenshekwa kwa myaaka iinji. Kucakubonenaako, mukwesu Anatoly Melnik * wakalinga kucitebo myaaka 12 baishi ndyebakatolwa mujeele akutumwa kucishi ca Siberia, mushinso wiindilila makilomita 7,000 kuswa kumusena kwakalinga mukwashi wakwe ku Moldova. Ndipakeendabo mwaaka womwi, mukwesu Anatoly, banyina, abankambiyakwe abalo bakatolwa kucishi ca Siberia. Mukuya kwaciindi, boonse bakacikonsha kunoocanika kumabungano kumushi umwi, nabi kwaamba ayi bakalinga kweelete kweenda mushinso wamakilomita ali 30 kumusena kutontola abuumbi. Mukwesu Melnik wakamana myaaka yotatwe mujeele eenka kwakubula mukwashi wakwe, ba Lidiya, amwanaabo mwanakashi uyo wakalinga kucitebo mwaaka womwi. Mukwesu Anatoly amukwashi wakwe bakatolelela kusebensela Yehova cakushomeka nabi ndyebakalinga kwiinda mumapensho kwa myaaka iinji. Pacecino ciindi mukwesu Anatoly ulicite myaaka 82 alimwi ali mu Komiti Yamusampi waku Central Asia. Bweenka mbuli mukwesu Anatoly abakaakwe ba Lidiya, aswebo atutolelele kuliyumya akucita nsheenga twacikonsha muncito yakwe Yehova.—Gala. 6:9.

14. Ino Paulo wakalinga kucishi ayi alyeelete kucita buyani kwaamba ayi akatambule cilambu?

¹⁴ Paulo wakalinga kushomete ayi alaakucikonsha kucica kushikila akumamanino. Mbuli Mwineklistu unanikitwe wakalinga kulangila “bwiite bakwiculu bwakaswa kuli Lesa.” Nacibi boobo, wakalinga kucishi ayi alyeelete kutolelela “kweelesha cankusu” kwaamba ayi akatambule cilambu. (Fili. 3:14) Paulo wakalwiita Beneklistu baku Filipi cikoshanyo cibotu abuumbi kwaamba ayi babikile maano abuumbi kucilambu.

15. Ino Paulo wakasebensesha buyani cikoshanyo ca kuba balelwa kwaamba ayi ayuminishe Beneklistu baku Filipi kutolelela “kweelesha cankusu”?

¹⁵ Paulo wakeebalusha Beneklistu baku Filipi kwaamba ayi balaakuba balelwa mu Bwaami bwakwiculu. (Fili. 3:20) Ino nceebonshi bakalinga kweelete kunokwiibaluka ayi balaakuba balelwa kwiculu? Paciindi cilya, bantu baanji bakalinga kusuni abuumbi kuba balelwa bamu Loma  mukwiinga bakalinga kufubilaamo. * Nacibi boobo, Beneklistu bananikitwe bakalinga kusa mukuba balelwa ba bweendeleshi bwiinditeewo, ubo mbobakalinga kusa mukufubilaamo abuumbi. Bweendeleshi bwakwiculu bwakalinga kwiinditewo abuumbi pa bweendeleshi bwa bene Loma! Nceceeco Paulo ncaakayuminishila Beneklistu baku Filipi ayi “bukaalo bwanu bulyeelete kweendelana amakani abotu ayo aamba shakwe Klistu.” (Fili. 1:27.) Beneklistu bananikitwe munshiku shino, abalo balatondesha cakubonenaako cibotu kwiinda mukutolelela kusebensa cankusu kwaamba ayi bakatambule cilambu ca buumi butamaani kwiculu.

16. Kweelana alilembo lya Bene Filipi 4:6, 7, ino Beneklistu boonse abo batolangila kuba abuumi butamaani kwiculu abaabo beshi bakekale pacishi ca panshi balyeelete kutolelela kucita buyani?

¹⁶ Beneklistu batolangila kuba abuumi butamaani kwiculu na pacishi ca panshi, boonse balyeelete kweelesha cankusu kwaamba ayi bakatambule cilambu. Nabi twiinde mumapensho ali buyani, tatweelete kuyeeya shakwisule alimwi tatweelete kusuminisha cintu cimwi cili coonse kutulengesha kucileka kusebensela Yehova. (Fili. 3:16) Mpashi myaaka yeendawo, sombi nshetutolangila tashitoocitika, na mpashi nkusu shitooya buceya ceebo cakukula. Mpashi twaliyumya mubukaalo buyumu akupenshekwa kwa myaaka iinji. Muli moonse mweenga cabeta, “mutanoolisukama pacintu nabi comwi.” Sombi, mumipailo yanu yoonse amusenge shintu shoonse nshemutacite kuli Lesa, lyalo alaakumupa luumuno lwiinditeewo abuumbi.—Amubelenge Bene Filipi 4:6, 7.

17. Ino tulaakwiiya nshi mumutwi utokonkelaawo?

¹⁷ Bweenka mbuli shikucica mulubilo lwakupingana uyo uli pafwiifwi akushika kumamanino mbwasebensa cankusu, atutolelele kubikila maano kushikila kumamanino alubilo lwa kubuumi. Atutolelele kusebensa kushika peela nkusu shesu, na kweelana abukaalo bwesu alimwi atutolelele kubikila maano kushintu shibotu nshetutolangila. Ino inga twacita buyani kwaamba ayi tutolelele kuliyumya? Mutwi utokonkelaawo ulaakutucafwa kushiba nshotweelete kubikila maano abuumbi ansheenga twaciita kwaamba ayi “tushinishe shintu shiyandika abuumbi.”—Fili. 1:9, 10.