1-2. (a) Kweelana amulawo wakwe Yesu ulembetwe palilembo lyakwe Mateyo 28:18-20, ino ni ncito nshi inene Yesu njaakapa libungano? (b) Ino njimiipusho nshi njeshi tubandike mumutwi uyu?

BATUMWI balyeelete bakasangalala abuumbi kubungana pomwi pakalundu, mukwiinga ici cakalinga ciindi Yesu ndyaakabushikwa, akubalwiita ayi bamukumanye kumusena uyu. (Mate. 28:16) Mpashi ici nceciindi Yesu “ndyaakabonekela kubashomi beendilila 500 paciindi comwi.” (1 Koli. 15:6) Ino nciinshi Yesu ncakeetila bashikwiiya bakwe kwaamba ayi bamukumanye pakalundu? Wakalinga kusuni kubapa ncito isangalasha: “Aboobo kamuya mukaiishe bantu bamishobo yoonse kwaamba ayi babe bashikwiiya.”—Amubelenge Mateyo 28:18-20.

² Bashikwiiya abo bakalingaawo Yesu ndyakaamba maswi aya, bakaba lubasu lwa libungano lya Beneklistu bamuciindi ca batumwi. Incito inene yakapekwa libungano ili, yakalinga nkwiisha bantu kwaamba ayi babe bashikwiiya bakwe Klistu. * Munshiku shino, tulicite mabungano aanji aBeneklistu bancinencine nsengwe yoonse, abalo incito yabo inene nkwiisha bantu kuba bashikwiiya. Mumutwi uyu tutoobandika miipusho yone: Ino nceebonshi ncito yakwiisha bantu kuba bashikwiiya ilayandika? Ino ncito iyi ileelikaawo nshi? Ino Beneklistu boonse balacafwilisha buyani mukwiisha muntu kuba shikwiiya? Alimwi ino nceebonshi kukalika moyo kulayandika muncito yakwiisha bantu kuba bashikwiiya?

3. Kweelana a Joni 14:6 alimwi a Joni 17:3, ino nceebonshi incito yakwiisha bantu kuba bashikwiiya ilayandika?

³ Ino nceebonshi ncito yakwiisha bantu kuba bashikwiiya ilayandika? Nceebo cakwaamba ayi muntu alyeelete kuba shikwiiya wakwe Klistu kaatana kuba shicibusa wakwe Lesa. Kwiilikaawo, abo boonse bakonkela njiisho shakwe Yesu balaba alusangalalo pacecino ciindi, akulangila kuba abuumi butamaani kunembo. (Amubelenge Joni 14:6; 17:3.) Cakutatoonsha, Yesu watupa ncito iyandika abuumbi, nacibi boobo tatubete sweenka muncito iyi. Mutumwi Paulo wakaamba pancito njaakalinga kusebensa abaabo mbwakalinga kusebensaabo ayi: “Tuli basebenshinyina bakwe Lesa.” (1 Koli. 3:9-nwt) Coolwe kubota abuumbi Yehova a Klistu ncebakapa bantu batasalalite!

4. Ino inga tweeya nshi kushakacitikila ba Ivan aba Matilde?

⁴ Incito yakwiisha bantu kuba bashikwiiya inga yatupa kusangalala abuumbi. Amuyeeye cakubonenaako ca mukwesu Ivan amukaakwe, Matilde, bakucishi ca Colombia. Bakashimikila musankwa wacanike Davier, uyo wakabalwiita ayi: “Ndisuni kwaalula buumi bwangu, sombi ndaalilwa.” Davier wakalinga ngushi kusekana shisekano shakulwana, wakalinga kusebensesha misamu ikola, kunwa abuumbi, alimwi wakalinga kukala amwanakashi Erika kabatana kweebana. Mukwesu Ivan wakaamba ayi: “Twakatalika kumufwakashila nabi kwaamba ayi wakalinga kukala kumushi kulaale. Twakalinga kucofwa ncinga mawoola aanji akwiinda munshila mwakalinga matipa abuumbi. Erika ndyaakabona ayi Davier watalika kwaalula buumi bwakwe, alakwe wakatalika kwiiya Baibo.” Mukuya kwaciindi, Davier wakacilekela limwi kusebensesha misamu ikola, kunwa bwalwa, akucita shisekano sha nkondo. Lyalo bakeebana a Erika. Matilde wakaamba ayi: “Davier a Erika ndyebakabombekwa mu 2016, twakeebaluka ayi Davier wakalinga kusuna kwaamba ayi, ‘ndisuni kwaalula buumi bwangu, ano ntokwaalilwa.’ Twakakondwa abuumbi cakwaamba ayi twakalosha minsonshi.” Cakutatoonsha, kucafwa bantu kuba bashikwiiya bakwe Klistu kulaletela lusangalalo lwancinencine.

5. Ino nciinshi ncotweelete kutaanguna kucita kwaamba twiishe bantu kuba bashikwiiya?

⁵ Cakutaanguna ncotweelete kucita, ‘nkulangoola’ baabo basuni kwiiya pali Yehova. (Mate. 10:11) Inga twatondesha ayi ncakwiila tuli Bakamboni bakwe Yehova na katushimikila uli woonse pali Yehova. Inga twatondesha ayi tuli Beneklistu bancine na katukonkela mulawo wakwe Klistu wakuya mukushimikila.

6. Ino nshiinshi nshotweelete kucita kwaamba ayi bantu bakutike ndyetutooshimikila?

⁶ Bantu bamwi balatondesha ayi balisuni kwiiya cancine camu Baibo ciindi cakutaanguna ndyemwabakumanya, ano bamwi balaboneka anga tabasuniiwo. Aboobo tulyeelete kutaanguna kubayuminisha kwaamba ayi basune kwiiya. Tulyeelete kulibambila kabotu kwaamba ayi tucikoonshe kushimikila kabotu. Tulyeelete kusala makani eenga apa muntu kusuna kwiiya, akulibambila ntalikilo ibotu.

7. Ino nshiinshi nsheenga mwaamba ndyemutotalika mubandi amuntu, alimwi nceebonshi ncotuyandikila kukutika akutapikishanya abantu?

⁷ Kucakubonenaako, mpashi inga mweepusha mwine ŋanda ayi: “Sa inga ndamwiipushaako mwiipusho womwi? Sobaanji munshiku shino, tuleenda mumapensho eendaamo bantu boonse nsengwe yoonse. Mulabona buyani, sa kuli mfulumeende yeenga yamana mapensho oonse ali pacishi ca panshi?” Lyalo inga mwabandika Danyelo 2:44. Na mpashi inga mwatalika ayi: “Ino nciinshi ceenga catucafwa kulela kabotu baana, Mutoobona buyani?” Lyalo inga  mwabandika Dutolonomi 6:6, 7. Amutaangune kuyeeya baabo mbweshi mushimikile kamutana kuyeeya makani ali oonse ngeshi mushimikile. Amuyeeye kwiiya Baibo nshoiisha mbweshi kubacaafwe. Amukutike ndyebatokwaamba alimwi mutabapikishi. Kucita boobo kulaakumucafwa kubanyumfwishisha alimwi balaakusuna kukutika ndyemutobandikaabo.

8. Ino nceebonshi ncotweelete kuboolelaako mankanda aanji kubantu mbotwakashimikila?

⁸ Cimwi ciindi inga twayandika kuboolelaako mankanda aanji kumuntu, kwaamba ayi atalike kwiiya Baibo. Ino nceebonshi? Cimwi ciindi cilacanika ayi muntu ngotweendela waswaawo. Cimwi ncakwaamba ayi mulyeelete kuboolelaako mankanda aanji kwaamba ayi muntu amushibe kabotu akusumina kwiiya Baibo. Bweenka mbuli imbuto mboiyandika kutililwa lyoonse kwaamba ayi ikomene, muntu usuni kwiiya alakwe inga watalika kusuna Yehova a Klistu na lyoonse katubandikaakwe Maswi akwe Lesa.

9-10. Ino nciinshi nceenga twaambila ayi Mwineklistu uli woonse alabanaamo lubasu mukulangoola bantu basuni kuba bashikwiiya?

⁹ Mwineklistu uli woonse alabanaamo lubasu mukulangoola bantu basuni kwiiya pali Lesa. Incito iyi inga twaikoshanisha akulangoola mwaana wasoweka. Munshila nshi? Atuyeeye cakubonenaako cakacitika ca mwanike musankwa wakalinga kucite myaaka yotatwe wakasoweka. Kwakalinga bantu bashika cakuma 500 bakalinga kumulangoola. Mwaana uyu wakesa mukucanika pesule lyakumulangoola kwa mawoola 20 kuswa ciindi ndyakasoweka, womwi pabaabo bakalinga kumulangoola ngowakacana mwaana uyu mu muunda wamancebele. Muntu uyu wakakaka  kumulumbaisha ayi ngowakamucana mwaana. Wakaamba ayi: “Mbantu baanji basebensela pomwi kwaamba ayi mwaana uyu acanike.”

¹⁰ Bantu baanji balisowekete bweenka mbuli mwaana ulya wakalinga wasoweka. Tabacitewo sha kulangila, sombi balisuni lucafwo. (Efe. 2:12) Mbuli Bakamboni bakwe Yehova beendilila pa 8 miliyoni, soonse tuli muncito iyi yakulangoola bantu basuni kwiiya. Mpashi palwaanu inga mwaalilwa kucana muntu weenga wasuna kwiiya Baibo. Nacibi boobo, bamwi mbomutoosebensaabo inga bacikonsha kucana muntu usuni kwiiya cancine ncotucana mu Maswi akwe Lesa. Na mukwesu nabi nankashi wacana muntu usuni kuba shikwiiya wakwe Klistu, uli woonse wabanaamo lubasu mukulangoola uku ulaba alusangalalo.

11. Ino nshiinshi shimwi nsheenga mwaciita kwaamba ayi mucafwilishe muncito yakwiisha bantu kuba bashikwiiya, nabi tamucitewo ciiyo ca Baibo?

¹¹ Nabi kwaamba ayi pacecino ciindi tamucitewo ciiyo ca Baibo, inga mwacafwilisha kwiisha bantu kuba bashikwiiya munshila shimwi. Kucakubonenaako, na mwaboona muntu mupya, wesa kumabungano esu inga mwamutambula akumucafwa. Kucita boobo inga kwapa muntu uyo kubona ayi ncakwiila mbuli Beneklistu bancinencine tulisunene. (Joni 13:34, 35) Na kamukumbulawo kumabungano nabi shikumbulo shifwifwi, inga mwacafwa bapya kushiba mbweenga baamba nshobashoma. Inga mwasebensa ashikushimikila mupya akumucafwa kushiba mbweenga wasebensesha kabotu Malembo ndyaatooshimikila. Na mwacita boobo nkokwaamba ayi mwamwiisha kukonkela cakubonenaako cakwe Klistu.—Luka 10:25-28.

12. Sa tulyeelete kuba bayiite kwaamba ayi tucikoonshe kwiisha bantu kuba bashikwiiya? Amusansulule.

¹² Tatweelete kunoyeeya ayi tulyeelete kuba bayiite kwaamba ayi tucikoonshe kwiisha bantu kuba bashikwiiya bakwe Yesu. Ino nciinshi ncetwaambila boobo? Atubandike cakubonenaako cakwe nankashi Faustina, wa kucishi ca Bolivia. Taakalinga kucishiwo kubelenga ndyaakatalika kwiiya Baibo a Bakamboni bakwe Yehova. Kushika pacecino ciindi weeyaako paniini kubelenga. Wakabombekwa alimwi alikondetwe abuumbi kwiishako bamwi. Liinji nsondo ili yoonse alacita shiiyo sha Baibo 5. Nabi kwaamba ayi nankashi Faustina tacikoonshi kubelenga kabotu kwiinda bashikwiiya Baibo bakwe, wacafwa bantu 6 kulyaaba akubombekwa.—Luka 10:21.

13. Ino nshoolwe nshi nsheenga twacana na katwabanaamo lubasu muncito yakwiisha bantu kuba bashikwiiya nabi katucite shiinji shakucita?

¹³ Beneklistu baanji balicite mikuli iinji iyandika. Nacibi boobo, balacana ciindi cakucita shiiyo sha Baibo, aboobo balasangalala abuumbi. Atubandike cakubonenaako cakwe nankashi Melanie ukala kucishi ca Alaska. Wakalinga mushali womwi wakacaala amwaana wakalinga kucite myaaka 8. Wakalinga kusebensa ncito yakumubili akulama mushali mulwashi kansa. Nankashi Melanie wakalingabo eenka mbuli Kamboni kumusena nkwaakalinga kukala. Mukwiinga wakalinga kusuni abuumbi kucana muntu weenga wasuna kwiiya Baibo,  wakalinga kupaila lyoonse kwaamba ayi acikoonshe kuya mukushimikila nabi kwatontola buyani. Mukuya kwaciindi wakakumanya ba Sara, abo bakakondwa abuumbi ndyebakeeya ayi Lesa alicite liina. Tapana kwiinda aciindi cilaamfu, ba Sara bakasumina kwiiya Baibo. Nankashi Melanie wakaamba ayi: “Pacisanu macolesha lyoonse ndakalinga kuba ulemete abuumbi, nacibi boobo nebo amwanaangu mwanakashi twakatolelela kuya kuciiyo ca Baibo alimwi kucita boobo kwakalinga kutucafwa abuumbi. Twakalinga kunyumfwa kabotu kulangoola shikumbulo kumiipusho yakalinga kwiipusha ba Sara, alimwi twakasangalala abuumbi ndyetwakabona ayi ba Sara baba shicibusa wakwe Yehova.” Bakaliyumya cakutaloonda ndyebakalinga kupikishikwa, bakacileka kuya kuceeci nkobakalinga kupaila, lyalo bakalyaaba akubombekwa mbuli Kamboni.

14. (a) Ino beshikulangoola bantu basuni kuba bashikwiiya bali koshenye buyani abaabo bacaya nswi? (b) Ino maswi akalemba Paulo pa 2 Timoti 4:1, 2 amucafwa kwiibona buyani incito yakwiisha bantu kuba bashikwiiya?

¹⁴ Amutolelele kulangoola nabi mwaalilwa kucana muntu usuni kuba shikwiiya. Mutaluubi kwaamba ayi Yesu wakakoshanisha beshikulangoola bashikwiiya kubantu beshikucaya nswi. Beshikucaya nswi inga basebensa mawoola aanji sombi kwakubula kucataawo nswi nabi yomwi. Liinji balasebensa pakati ka mashiku na macuunsa cuunsa abuumbi, alimwi cimwi ciindi baleenda mishiinso ilaamfu pamaanshi. (Luka 5:5) Beshikushimikila abalo mbobacita bweenka ubu, balasebensa mawoola aanji kwaamba ayi bacane muntu usuni kwiiya, balacita boobo pashiindi amumisena ipusenepusene. Ino nceebonshi? Kwaamba ayi bacikoonshe  kucana bantu baanji. Abo beshikusebensa cankusu balaba acoolwe cakucana bantu basuni kwiiya makani abotu. Sa amwebo inga mwasuna kweeleshaako kuya mukushimikila paciindi, nceenga mwacaana bantu basuni kwiiya na kumusena nkweenga mwacaana bantu?—Amubelenge 2 Timoti 4:1, 2.

15. Ino nceebonshi kwiisha muntu Baibo kulayandika kukalika moyo?

¹⁵ Ino nceebonshi kwiisha bantu Baibo kulayandika kukalika moyo? Mukwiinga tulyeelete kucafwa shikwiiya kushiba akusuna Baibo nshoiisha. Tulyeelete kumucafwa kushiba akusuna Mulembi wa Baibo Yehova. Alimwi tatweelete kweelabo pakumwiisha Yesu nshayanda kubaabo basuni kuba bashikwiiya bakwe, sombi tulyeelete kumucafwa kushiba Beneklistu bancinencine mbobeelete kukala. Tulyeelete kumucafwa cakukalika moyo ndyaatokweelesha kukonkela njiisho shamu Baibo. Beshikwiiya Baibo bamwi balacikonsha kwaalula miyeeyo amibo yabo pesule lya myeenshi iniinibo, ano bamwi balatola ciindi.

16. Ino cakubonenaako caba Raúl ca mwiisha nshi?

¹⁶ Shakacitikila mishonali umwi kucishi ca Peru shilatondesha bubotu bwa kukalikila moyo shikwiiya. Wakaamba ayi; “Twakamanisha mabuku obilo ashikwiiya Baibo wangu Raúl.” Nacibo boobo, wakalinga kucite mapensho anene mubuumi bwakwe. Taakalinga kunyumfwana amukaakwe, wakalinga kusebensesha maswi abiibi, alimwi bana bakwe tabakalinga kumupa bulemu. Wakalinga kucanika kumabungano lyoonse, aboobo ndakatolelela kumufwakashila akumucafwa amukwashi wakwe. Ndipakeenda myaaka iindilila yotatwe kuswa ciindi ndyaakatalika kwiiya Baibo, wakeelela kubombekwa.”

17. Ino tulaakwiiya nshi mumutwi utokonkelaawo?

¹⁷ Yesu wakatulwiita ayi ‘kamuya . . . mukaiishe bantu bamishobo yoonse kuba bashikwiiya.’ Kwaamba ayi tukumanishe ncito iyi, liinji tulyeelete kushimikila bantu babona shintu munshila ipusene abuumbi aswebo, kwiilikaawo abaabo batabete lubasu lwa bupailishi buli boonse na abo batashomi muli Lesa. Mumutwi utokonkelaawo tulaakubandika mbweenga twashimikila makani abotu kubantu aba.