1. Ino nceebonshi tulyeelete kulibambila limwi kupenshekwa?

MASHIKU Mwaami Yesu kaatana kucaikwa, wakaamba ayi muntu uli woonse eshi akasale kuba shikwiiya wakwe alaakupatwa. (Joni 17:14) Kushika apacecino ciindi, Beneklistu bancine boonse balapenshekwa kubantu beshikupikisha kupaila kwancine. (2 Timo. 3:12) Inga twalangila kuya panembo kwa kupenshekwa uku, mamanino abweende bwa shintu ubu ndyatooya cisena pafwiifwi.—Mate. 24:9.

2-3. (a) Ino nshiinshi nshotweelete kushiba pamakani akuloonda? (b) Ino tutokwiiya nshi mumutwi uyu?

² Ino nshiinshi nshotweelete kucita kwaamba ayi tulibambile limwi kupenshekwa? Tatweelete kutalika kuyeeyela limwi shintu shibiibi nsheenga twalangila kutucitikila. Mukwiinga kucita boobo inga kwatupa kuloonda akulisukama abuumbi. Alimwi na twaloondela limwi kupenshekwa kakutana kushika, inga twalefuka akucileka kusebensela Yehova. (Tus. 12:25; 17:22) Boowa ncisebensesho cankusu ‘mulwani wesu, Satana’ ncaasebensesha. (1 Pita 5:8, 9) Ino nshiinshi nshotweelete kucita kwaamba ayi tukacikoonshe kuliyumya ndyeshi tukanopenshekwa?

³ Mumutwi uyu, tutokwiiya mbweenga twayumya bushicibusa bwesu a Yehova ancotutoyandikila kucita boobo pacecino ciindi. Tutokwiiya ansheenga twaciita kwaamba ayi tuyumye kutaloonda kwesu. Lyalo mukweelaako, tutokwiiya nsheenga twaciita na bantu batupata.

4. Kweelana a Bene Ebulu 13:5, 6, ino nshiinshi nshotweelete kushoma cakushinisha alimwi ino nceebonshi?

⁴ Amushome cakushinisha kwaamba ayi Yehova alimusuni alimwi teshi akamulekeleshewo. (Amubelenge Bene Ebulu 13:5, 6.) Njashi Yamulindilishi ya June 1, 1963 yakaamba ayi: “Na muntu  alimushi kabotu Lesa, alacinka manungo woonse muli nguwe ndyaatoopenshekwa.” Maswi aya ngalushinisho! Kwaamba ayi tucikoonshe kuliyumya ndyetutoopenshekwa, tulyeelete kusuna akushoma Yehova cakushinisha alimwi tatweelete kutoonsha ayi alitusuni na sobwe.—Mate. 22:36-38; Jemu. 5:11.

5. Ino nshiinshi sheenga shamucafwa kushoma ayi Yehova alimusuni?

⁵ Amubelenge Baibo bushiku abushiku kwaamba ayi imucaafwe kusena pafwiifwi a Yehova. (Jemu. 4:8) Ndyemutobelenga Baibo, amubikile maano kumibo yakwe Yehova. Amubone Yehova mbwaamusuni ndyemutobelenga pashintu nshaamba alimwi anshaacita. (Ku. 34:6) Bamwi balaalilwa kushoma ayi Lesa alibasuni mukwiinga bakakula kwakubula kutondeshekwa lusuno. Na amwebo mbomulinyumfwa, amweeleshe kuyeeya Yehova mbwamutondesha nkumbu abubotu bwakwe bushiku buli boonse. (Kulu. 78:38, 39; Loma. 8:32) Kukutumana akuyeeya pasheeshi amakani ngomubelenga mu Maswi akwe Lesa, kulaakumucafwa kubona ayi anu nshiinji Yehova nshaamucitila. Kulumba Yehova pashintu shoonse nshaamucitila, kulaakumucafwa kuyumya bushicibusa bwanu anguwe.—Kulu. 116:1, 2.

6. Kweelana a Kulumbaisha 94:17-19, ino kupaila camoyo woonse inga kwatucafwa buyani?

⁶ Munoopaila lyoonse. Amuyeeye ayi mwaana musankwa muniini wafukatilwa abaishi. Atolinyumfwa kushitilishikwa aboobo inga wabalwiita shili shoonse shamucitikila pabushiku ubu shibotu na shibiibi. Amwebo mbweenga mwalinyumfwa na kamupaila kuli Yehova ca moyo woonse bushiku abushiku. (Amubelenge Kulumbaisha 94:17-19.) Ndyemutopaila kuli Yehova, ‘amumulilile amoyo wanu woonse’ Ishiwanu shilusuno akumulwiita shoonse nshemutooloonda ashitoomusukamika. (Malo. 2:19) Ino kucita boobo kulaakumucafwa buyani? Mulaakucana Baibo ncoyaamba ayi “luumuno lwakwe Lesa ulo lwiinda pabusongo bwa bantu boonse.” (Fili. 4:6, 7) Na lyoonse kamupaila ca moyo woonse, mulaakulinyumfwa kuba pafwiifwi a Yehova.—Loma. 8:38, 39.

7. Ino nceebonshi ncomweelete kushoma cakushinisha kwaamba ayi Bwaami bwakwe Lesa bulaakukumanisha shishomesho shakwe?

⁷ Amushome cakushinisha kwaamba ayi Lesa alaakukumanisha shoolwe sha Bwaami. (Shakube. 23:19) Na mulatoonsha shishomesho shakwe Lesa, cilaakuba cuubu Satana abasebenshi bakwe kumukonga. (Tus. 24:10; Ebu. 2:15) Ino nshiinshi nsheenga mwaciita kwaamba ayi munooshoma mu Bwaami bwakwe Lesa? Amucane ciindi cakwiiya cakubikila maano pashishomesho sha Bwaami bwakwe Lesa, a nceenga twashomena ayi ncakwiila shilaakukumanishikwa. Ino kucita boobo kulaakumucafwa buyani? Amuyeeye cakubonenaako ca mukwesu Stanley Jones, uyo wakalinga wabikwa mujeele kwa myaaka 7 ceebo ca lushomo lwakwe. * Ino nciinshi cakamucafwa kuliyumya cakushomeka? Wakaamba ayi: “Ndakalinga kucite lushomo luyumu mukwiinga ndakalinga kushomete cakushinisha  mu Bwaami bwakwe Lesa ansheshi bukakumanishe. Aboobo taakuwo wakalinga kucikonsha kunkusha kuli Yehova.” Na mulicite lushomo luyumu mushishomesho shakwe Lesa, mulaakusena pafwiifwi a Yehova alimwi teshi mukacileeke kumusebensela ceebo ca boowa.—Tus. 3:25, 26.

8. Ino mbotubona kucanika kumabungano pacecino ciindi kulatondesha nshi? Amusansulule.

⁸ Munoocanika kumabungano lyoonse. Mabungano alatucafwa kusena pafwiifwi a Yehova. Mbotubona mabungano pacecino ciindi, inga kwatucafwa kushiba na tulaakucikonsha kuliyumya muciindi ca kupenshekwa nabi sobwe. (Ebu. 10:24, 25) Ino nciinshi ncetwaambila boobo? Na tutokwaalilwa kucanika kumabungano pacecino ciindi ceebo ca tuntu tuniinibo, sa tulaakucikonsha kunembo ciindi ndyeshi tukayandike kubika buumi bwesu mumapensho kwaamba ayi tube pomwi abamakwesu abenankashi? Na tulishinishite kucanika kumabungano lyoonse pacecino ciindi, nkokwaamba ayi tulaakutolelela nabi ciindi balwani besu ndyeshi bakatukaashe. Cino nceciindi ncotweelete kunoocanika kumabungano lyoonse. Mukwiinga kucita boobo kulaakutucafwa kutaboolela mwisule nabi batupikishe na kukashikwa amfulumeende, tulaakutolelela kunyumfwila Lesa kuteshi bantu.—Milimo 5:29.

9. Ino nceebonshi ncintu cibotu kwiibaluka malembo mumutwi?

⁹ Amwiibaluke malembo ngomusuni mumutwibo. (Mate. 13:52) Mpashi inga tamucikoonshi kwiibaluka malembo oonse kabotu kabotu, nacibi boobo Yehova inga wamucafwa kwiinda mumushimu wakwe usalashi, uyo ucite nkusu shakumucafwa kwiibaluka malembo ngomwakabika mumutwi. (Joni 14:26) Mukwesu umwi wakalinga waangwa ku East Germany wakaamba ayi: “Cakalinga coolwe cinene kwaamba ayi ndakabika malembo aanji mumutwi! Nabi ndakalingabo neenka, ndakalinga kucite makani aanji kuswa mu Baibo akuyeyawo.” Malembo ayo akacafwa mukwabesu kutolelela kuba pafwiifwi a Yehova akucikonsha kuliyumya cakushomeka.

10. Ino nceebonshi ncotweelete kunokwiibaluka nyimbo?

¹⁰ Munokwiibaluka akwiimba nyimbo shilumbaisha Yehova. Paulo a Sailasi ndyebakalinga mujeele ku Filipi, bakeemba nyimbo sha kulumbaisha Yehova nshebakeebaluka. (Milimo 16:25) Ubu mbocakalinga akubamakwesu ba kucishi cakalinga kwiitwa ayi Soviet Union kale kale, abo bakalinga baangwa akutolwa kucishi ca Siberia, ino nciinshi cakabapa kutaboolela mwisule? Nankashi Mariya Fedun wakaamba ayi: “Twakeemba nyimbo shoonse nshetwakalinga kushi, kuswa mulibuku lya nyimbo.” Wakaamba  ayi nyiimbo nshobakalinga kwiimba shakabayuminisha akubacafwa kulinyumfwa kuba pafwiifwi a Yehova. Sa amwebo mulayuminishikwa na kamwiimba nyimbo sha Bwaami nshomusuni? Anu mulyeelete kubika mumutwi inyimbo isho!—Amubone kabokosi kalembetwe ayi  “Amumpe Nkusu.”

11-12. (a) Kweelana a 1 Samwelo 17:37, 45-47, ino nciinshi cakacafwa Defedi kutaloonda? (b) Ino nciiyo nshi ciyandika ncetutokwiiyawo?

¹¹ Kuliyumya ndyetutoopenshekwa, kulayandika kutaloonda. Ino inga mwacita buyani na mwabona kwaamba ayi tamucite mubo wakutaloonda? Mutaluubi kwaamba ayi cipa muntu kutaloonda teshi ciimo na nkusu nshaacite. Amuyeeye cakubonenaako cakwe Defedi ndyaakalinga mwanike, ciindi ndyaakalwana Golyati. Mukumweelanya a Golyati ndundwa minkulwa, Defedi wakalinga muniini, utacite nkusu, alimwi utacishiwo akulwana nkondo. Alimwi taakalinga kucitewo amupeeni. Nacibi boobo, Defedi taakwe kuloondaawo. Sombi cakutaloonda wakalwana ndundwa minkulwa ulya wakalinga kulisumpula.

¹² Ino nciinshi cakacafwa Defedi kutaloonda? Wakalinga kushomete cakushinisha ayi Yehova ali anguwe. (Amubelenge 1 Samwelo 17:37, 45-47.) Defedi taakwe kubikila maano kukulyeelanya abunene bwakwe Golyati. Sombi wakabikila maano kukuceya kwakwe Golyati mumeenso akwe Yehova. Ino nshiinshi nshotutokwiiyawo? Inga twaba bantu bataloondi na katushoma cakutatoonsha ayi Yehova ali andiswe akushoma ayi balwani besu taakuwo mbobabete mumeenso akwe Lesa Shinkusu shoonse. (2 Maka. 20:15; Kulu. 16:8) Ino nciinshi ceenga cayumya kutaloonda kwesu pacecino ciindi, kupenshekwa kakutana kutalika?

13. Ino kutaloonda kwesu inga twakuyumya buyani? Amusansulule.

¹³ Inga twayumya kutaloonda kwesu, na katwabanaamo lubasu mukushimikila makani abotu a Bwaami bwakwe Lesa. Ino nciinshi ncetwaambila boobo? Mukwiinga kushimikila kulatwiisha kushoma Yehova akutaloonda bantu. (Tus. 29:25) Bweenka mbuli misisa mboiyuminaako na muntu kaacita shiyumya mubili, tulayumya kutaloonda kwesu na katushimikila kuŋanda aŋanda, mumisena mucanika bantu baanji, munshila yakubandikabo, amumisena yamakwebo. Na katushimikila cakutaloonda pacecino ciindi, nkokwaamba ayi tulaakucikonsha kutolelela kucita boobo nabi incito yesu ndyeshi ikakashikwe.—1 Tesa. 2:1, 2.

14-15. Ino nciinshi ncetutokwiiya kuswa kucakubonenaako cakwe nankashi Nancy Yuen a Valentina Garnovskaya?

¹⁴ Inga tweeya cakubonenaako cibotu kuswa kubenankashi bobilo bashomeka, abo bakatondesha kutaloonda kulibetele. Nankashi Nancy Yuen  wakalinga mufwiifwi mamita 1.5, nacibi boobo taakalinga kucite boowa. * Wakakaka kucileka kushimikila makani abotu a Bwaami bwakwe Lesa. Aboobo bakamwaanga myaaka iindilila 20 kucishi ca China. Bakapokola bakalinga kumwiipusha miipusho bakaamba ayi “tabakwe kubonaawo kale muntu uyuminina nshaashoma” mbuli nankashi uyu.

¹⁵ Nankashi, Valentina Garnovskaya wakaangwa mankanda otatwe kucishi cakalinga kwiitwa ayi Soviet Union kwa myaaka 21. * Ino bakamwaangila nshi? Wakalinga kushinishite kutacileka kushimikila cakwaamba ayi bakapokola bakatalika kubona ayi “ngu kapondo mubiibi abuumbi.” Ino nciinshi cakapa benankashi bobilo aba bashomeka kuba bantu bataloondi? Bakalinga kushinishite ayi Yehova ali kulubasu lwabo.

16. Ino nciinshi ceenga catupa kutaloonda kwancinencine?

¹⁶ Bweenka mbuli mbotwabandikawo, tatweelete kushoma munkusu shesu kwaamba ayi tucikoonshe kuyumya kutaloonda kwesu. Sombi tulyeelete kushoma kwaamba ayi Yehova ali andiswe alimwi ngweshi akatulwanine nkondo. (Duto. 1:29, 30; Seka. 4:6) Ici nceenga catupa kutaloonda kwancinencine.

17-18. Kweelana alilembo lyakwe Joni 15:18-21, ino Yesu wakatulwiita nshi? Amusansulule.

¹⁷ Tulakondwa na bantu kabatupa bulemu, nacibi boobo tatweelete kulibona ayi taakuwo mbotubete na bantu batupata. Yesu wakaamba ayi: “Mulicite coolwe nomutoopatwa kubantu, kusuulwa akutukanwa alimwi akwaambwa ayi muli babiibi ceebo ca Mwanaamuntu.” (Luka 6:22) Ino Yesu wakalinga kusansulula nshi?

¹⁸ Yesu taakalinga kusansulula ayi Beneklistu balaakunokondwa ceebo cakupatwa abantu sobwe. Sombi wakalinga kutulwiita shakalinga kusa mukucitika. Tatubete lubasu lwa cishi cino.  Tulakonkela njiisho shakwe Yesu, akushimikila makani ngaakalinga kushimikila. Ici ncecipa kwaamba ayi bantu bamucishi batupaate. (Amubelenge Joni 15:18-21.) Tulisuni kusangalasha Yehova. Aboobo tatulisukamiwo na bantu batupata ceebo cakwaamba ayi tulisuni Ishiwesu.

19. Ino cakubonenaako ca batumwi inga twacikonkela buyani?

¹⁹ Tamweelete kunyumfwa nsoni kuba Kamboni wakwe Yehova ceebo ca shintu shaamba bantu. (Mika 4:5) Inga twacikonsha kutaloonda bantu na twayeeya shakacitikila batumwi ndyebakalinga ku Jelusalemu, pesule lya kucaikwa kwakwe Yesu. Bakalinga kucishi ayi bapailishi ba bene Juda bakalinga kubapatite abuumbi. (Milimo 5:17, 18, 27, 28) Sombi bakatolelela kuya kutempele bushiku abushiku akulitondesha ayi mbashikwiiya bakwe Yesu kwiinda mukushimikila. (Milimo 5:42) Tabakwe kucileka kushimikila ceebo cakuloonda. Aswebo inga twakoma kuloonda bantu kwiinda mukutalishisa ayi tuli Bakamboni bakwe Yehova—kuncito, kucikolo, akumushi nkotukala.—Milimo 4:29; Loma. 1:16.

20. Ino nciinshi cakapa batumwi kuba basangalete nabi bantu ndyebakalinga kubapatite?

²⁰ Ino nciinshi cakapa batumwi kuba bantu basangalete? Nceebo cakwaamba ayi bakalinga kucishi bantu ncobakabapatila, alimwi bakalinga kubona ayi ncoolwe kupatwa ceebo cakucita kuyanda kwakwe Yehova. (Luka 6:23; Milimo 5:41) Mutumwi Pita wakalemba ayi: “Na kamupenga ceebo ca bululami, nkokwaamba ayi mulicite coolwe.” (1 Pita 2:19-21; 3:14) Na twashiba kwaamba ayi bantu balitupatite ceebo cakucita shiluleme, teshi tukacileeke kusebensela Yehova nabi batupate buyani.

21-22. (a) Ino nciinshi ncomwasala kunoocita kwaamba ayi mulibambile kupenshekwa? (b) Ino tulaakwiiya nshi mumutwi utokonkelaawo?

²¹ Tatucishiwo kupenshekwa ndyeshi kukatalike na incito yesu ndyeshi ikakashikwe amfulumeende. Nacibi boobo, tulishi kwaamba ayi cino nceciindi cakulibambila, kwiinda mukuyumya bushicibusa bwesu a Yehova, kuyumya kutaloonda kwesu, akushiba nsheenga twaciita na bantu batupata ceebo cakucita shiluleme. Kulibambila limwi pacecino ciindi, kulaakutucafwa kutolelela kusebensela Yehova.

²² Ano ino inga twacita buyani, na kupaila kwesu kwakashikwa? Mumutwi utokonkelaawo, tulaakwiiya njiisho shamu Baibo sheenga shatucafwa kutolelela kusebensela Yehova nabi kupaila kwesu ndyekwakashikwa.