1. Ino shintu shaaluka buyani munshiku shino?

KWA myaaka iinji bantu baanji nsengwe yoonse bakalinga kucite nkobapaila. Ano munshiku shino shintu shaaluka abuumbi. Bantu baamba ayi tabacitewo nkobapaila batooya bufulilakobo. Alimwi mushishi shimwi mulacanika ayi bantu baanji balaamba ayi tabapailiiwo. *—Mate. 24:12.

2. Ino nshiinshi shapa kwaamba ayi bantu baanji bacileeke kupaila?

² Ino nciinshi cilengesha bantu baanji kunolibona ayi tabacitewo nkobapaila? * Bamwi balalinyumfwa boobo ceebo cakubikila maano abuumbi ku shakulikondelesha na kulisukama. (Luka 8:14) Bamwi bakatalika kushoma ayi Lesa taakuwo. Bamwi balashoma ayi Lesa nkwaali sombi kupaila nkwakale kale, takucitewo ncito, alimwi takweendelani a sayansi akuyeeya kwa munshiku shino. Mpashi liinji balanyumfwa bamatica, beshicibusa, na beshi kwaamba makani kabaamba ayi buumi bwakabaakobo bweenka kwakubula mulengi, sombi tabanyumfwiwo makani eenga abapa kushoma ayi Lesa nkwaali. Bamwi bakacileka kupaila ceebo cakusuna maali akuteendelesha kabotu kwabamatanjilili babupailishi. Mumisena imwi, mfulumeende shakabika milawo itayuminishi sha kupaila.

3. Ino mutwi uyu wakalembelwa nshi?

³ Yesu wakatupa mulawo wakwaamba ayi “kamuya mukaiishe bantu bamishobo yoonse kwaamba ayi babe bashikwiiya.” (Mate. 28:19) Ino inga twabacafwa buyani bantu batapaili kwaamba ayi basune Lesa akuba bashikwiiya bakwe Klistu? Tulyeelete kushiba kwaamba ayi bantu inga batambula na kukaka makani abotu kweelana  ambobakakomena. Kucakubonenaako, bantu bakakulila kushishi sha basungu abaabo bakakulila ku Asia balipusene mbweenga batambula makani abotu. Ino nceebonshi? Kushishi sha basungu, bantu baanji balishiiko makani aambwa mu Baibo alimwi bakanyumfwawo ayi Lesa ngowakalenga shintu shoonse. Ano ku Asia, bantu baanji tabacishiwo shiinji pamakani amu Baibo alimwi mpashi bamwi tabashomiiwo ayi kuli Mulengi. Mutwi uyu walembelwa kwaamba ayi utucaafwe kushiba nsheenga twaciita kwaamba ayi tucikoonshe kushimikila kabotu bantu baswa mushishi shipusenepusene alimwi abaabo bashoma mushintu shipusenepusene.

4. Ino nciinshi nceenga twashomena ayi abo batapaili inga bacinja?

⁴ Amushome kwaamba ayi inga bacinja. Mwaaka uli woonse, bantu baanji batakalinga kupaila balacinja akuba Bakamboni bakwe Yehova. Bamwi bakalinga kucite kale mibo ibotu, alimwi bakalinga kulinyumfwa cibiibi ceebo cakwaamba ayi bamapailishi balaamba nshebataciti. Bamwi bakalinga kucite mibo ibiibi aboobo bakalinga kweelete kucinja. Aboobo inga twashoma ayi kwiinda mulucafwo lwakwe Yehova, inga twacikonsha kucana baabo ‘bacite myoyo ibotu ilibambite kutambula buumi butamaani.’—Milimo 13:48; 1 Timo. 2:3, 4-nwt

5. Ino nciinshi liinji cipa kwaamba ayi bantu batambule makani abotu?

⁵ Amutondeshe nkumbu akwaamba munshila yeenga taikalashi bamwi. Liinji bantu balasumina makani abotu ceebo ca mbotubandikaabo, kuteshi ceebo ca maswi ngotwaamba. Balakondwa na twabatondesha nkumbu, kwaamba cabulemu, akutondesha ayi tulababikila maano. Tatubakakatishi kusumina nshetutoobalwiita. Sombi tuleelesha kushiba shakabapa kwaamba ayi batanopaila. Kucakubonenaako, tulishi kwaamba ayi bamwi tabasuniiwo kwaamba sha bupailishi amuntu ngobateshiwo. Bamwi balabona ayi teshi cibotu kwiipusha muntu nshayeeya pamakani akwe Lesa. Kwiilikaawo, bamwi balanyumfwa nsoni na bantu kabababona ayi batobelenga Baibo, bunene bunene a Bakamboni bakwe Yehova. Aboobo muli moonse mweenga cabeta, tuleelesha kubanyumfwishisha.​—2 Timo. 2:24.

6. Ino Paulo wakalinga kucita buyani ndyaakalinga kushimikila, alimwi ino cakubonenaako cakwe inga twacikonkela buyani?

⁶ Ino inga twacita buyani na muntu ngotutooshimikila taanyumfwi kabotu kwaamba maswi mbuli “Baibo,” “shilengwa,” “Lesa,” na “bupailishi”? Inga twakonkela cakubonenaako cakwe Paulo akusala maswi amwi akusebensesha. Ndyaakalinga kubandika abene Juda, Paulo wakasebensesha Malembo. Nacibi boobo, ndyaakalinga kwaamba aba Giliki baku Alopegasi, taakwe kwaambawo ayi wakalinga kusebensesha Malembo. (Milimo 17:2, 3, 22-31) Ino cakubonenaako cakwe Paulo inga twacikonkela buyani? Na twacaana muntu utashomi Baibo, inga cabota kutamutondesha ayi tutoosebensesha Baibo ndyetutobandikaakwe. Na mwabona ayi muntu taasuniiwo bamwi kumubona kaabelenga Baibo andimwe, amumutondeshe malembo munshila njeenga bamwi tabashibi, mbuli kusebensesha fooni na tabuleti.

7. Ino nshiinshi nshotweelete kucita kwaamba ayi tukonkele cakubonenaako cakwe Paulo caambwa pa 1 Bene Kolinto 9:20-23?

⁷ Amunyumfwishishe akukutika. Tulyeelete kunyumfwishisha cipa bantu mbotushimikila kushoma nshobashoma. (Tus. 20:5) Atubandike cakubonenaako cakwe Paulo alimwi. Wakakula aba Juda. Aboobo wakalinga kweelete kucinja ndyaakalinga kushimikila baabo batakalinga bene Juda, mukwiinga taakuwo ncobakalinga kucishi pa Malembo a pali Yehova. Mpashi inga twayandika kwiipusha bamwi bacishi kabotu mulibungano, kwaamba ayi  tubashibe kabotu bantu bakumusena nkotushimikila.—Amubelenge 1 Bene Kolinto 9:20-23.

8. Ino inga twatalika buyani kubandika amuntu shamu Baibo?

⁸ Cinene ncetutoyanda, nkucana ‘bantu basuni kunyumfwa.’ (Mate. 10:11) Kwaamba ayi tucite boobo, tulyeelete kwiipusha miipusho yeenga yapa bantu kwaamba mbobatoyeeya akukutika cakubikila maano. Mukwesu umwi ku England aleepusha bantu mbobayeeya pamakani ambweenga mukwashi waba alusangalalo, bwakulela baana, na mbweenga bacita na babacitila shitaluleme. Mukwesu uyu wakaamba ayi pesule lyakukutika nshobakumbula, aleepusha ayi “Ino inga mwaambawo buyani pamakani aya akalembwa myaaka pafwiifwi a 2,000 yaiinda?” Lyalo alabelenga lilembo ndyaakalibambila pafooni yakwe, kwakubula kwaamba ayi atobelenga kuswa mu “Baibo”.

9. Ino inga twacita buyani kwaamba ayi tucikonshe kushimikila bantu batasuni kubandika pali Lesa ?

⁹ Inga twacikonsha kubandika abantu batasuni kubandika pali Lesa kwiinda mukubandikaabo makani ngobeshi kale. Kucakubonenaako, bantu baanji balakankamana ashilengwa. Aboobo mpashi inga twatalika mubandi kwiinda mukwaamba ayi: “Mpashi amwebo mulishi ayi beshi sayansi balataanguna kwiiya kushilengwa mboshakapangwa, lyalo ndyeenga bapanga shakupanga panga shabo. Kucakubonenaako, beshikupanga mamaikulofooni bakataanguna kwiiya matwi mbwakapangwa, abalo beshikupanga mashini akukopa bakataanguna kwiiya meenso mbwakapangwa. Ino nshiinshi nshemushi pamakani ashilengwa? Sa inga mwaamba ayi shakabakobo sheenka, kuli wakashipanga na kuli cimwi cakapa kwaamba ayi shibeeko?” Pesule lyakukutika cakubikila maano, inga twaamba ayi: “Na beshikupanga shintu baleeya kuswa kushintu mbuli matwi ameenso mbwakapangwa, mpashi inga twayeeya mwiine ngobatokwiiyako. Makani akalemba shikulemba umwi wakale kale akankonda, wakaamba ayi: ‘Sa uyo wakapanga matwi, inga waalilwa kunyumfwa? Sa uyo wakapanga meenso, inga waalilwa kubona? . . . Ngoiisha bantu kuba alushibo!’ Beshi sayansi bamwi balasumina ayi makani aya ngancine alimwi balashoma ayi shintu shakalengwa.” (Kulu. 94:9, 10) Lyalo inga twamutondesha vidyo kuswa pa jw.org^® palubasu palembetwe ayi “Interviews and Experiences” pamakani atokwaamba ayi “Viewpoints on the Origin of Life.” (Amubone palembetwe ayi PUBLICATIONS > VIDEOS.) Na mpashi inga mwamupa buloshuwa icite mutwi utokwaamba ayi Was Life Created? na The Origin of Life—Five Questions Worth Asking.

10. Ino inga twatalika buyani mubandi amuntu utasuni kubandika pali Lesa?

¹⁰ Bantu baanji balisuni kuba abuumi bubotu kunembo. Nacibi boobo, baanji balabona ayi cishi cilaakunyonyoolwa cakumaninina. Mutanjilili walubasu umwi kucishi ca Norway wakaamba ayi bantu baanji tabasuni kubandika pali Lesa sombi liinji  balakondwa kubandika pashintu shitoocitika mucishi. Pesule lyakwaansha muntu, uleepusha ayi: “Ino mutoobona buyani sa shintu shilaakuba kabotu kunembo? Sa beshishimpamya sha cishi, beshi sayansi na bantu bamwi, mbeshi bakaboteshe shintu?” Pesule lyakukutika cakubikila maano, alabelenga na kwaambabo maswi atotondesha ayi shintu shilaakuba kabotu kunembo. Bamwi balakondwa kunyumfwa Baibo mboyakashomesha ayi cishi ca panshi teshi cikanyonyoolwewo alimwi akwaamba ayi bantu balaakuba abuumi butamaani.—Kulu. 37:29; Shi. 1:4.

11. Ino nceebonshi tulyeelete kweelesha nshila shipusenepusene ndyetutooshimikila, alimwi ino cakubonenaako cakwe Paulo ncetucana pa Bene Loma 1:14-16 inga twacikonkela buyani?

¹¹ Tulyeelete kutalika mibandi munshila shipusenepusene ndyetutooshimikila. Ino nceebonshi? Mukwiinga bantu balipusene. Makani eenga asangalasha muntu womwi, inga akalasha umwi. Bamwi balakondwa kubandika pali Lesa na makani amu Baibo, sombi bamwi balakondwa kubandika makani amwibo. Nabi kwaamba ayi bantu bali pusenepusene, tulyeelete kushimikila ku muntu wa mushobo uli woonse. (Amubelenge Bene Loma 1:14-16.) Alimwi tulyeelete kwiibaluka kwaamba ayi Yehova, ngoopa kwaamba ayi cancine cikule mu moyo wa muntu usuni kucita shiluleme.—1 Koli. 3:6, 7.

12. Ino inga twacita buyani kwaamba ayi tushimikile bantu baku Asia abo batashomi ayi kuli Mulengi?

¹² Nsengwe yoonse beshikushimikila balakumanya bantu bakaswa ku Asia, kwiilikaawo abaabo baswa kushishi mfulumeende nkoshakabika milawo ikasha sha kupaila. Mushishi shiinji shaku Asia, bantu baanji tabana kuyeeyawo kale cakubikila maano na ncakwiila kuli Mulengi nabi sobwe. Bamwi balisuni kwiiya pali Lesa aboobo balasumina kwiiya Baibo, ano bamwi balakaka. Ino inga twabacafwa buyani? Beshikushimikila bacishi kabotu bwakushimikila kubantu ba mushobo uyu, besa mukushiba kwaamba ayi cili kabotu kutaanguna amakani amwibo akubatondesha ayi mulababikila maano, lyalo mukuya kwaciindi inga mwabandikaabo njiisho shamu Baibo mboshamucafwa mu buumi bwanu.

13. Ino nshiinshi sheenga shapa muntu kusuna kwiiya Baibo? (Amubone cikope papeeji yakutaanguna.)

¹³ Cintu comwi cipa kwaamba ayi bantu basune kwiiya Baibo, nkushiba njiisho shamu Baibo mboshicafwa. (Shi. 7:12) Nankashi umwi ufwakashila bantu baamba mushobo waci Mandarin kutauni ya New York, wakaamba ayi: “Ndabikila maano kubantu akukutika cakubikila maano ndyentobandikaabo. Na ndashiba ayi bakesa conoono kuswa kucishi ca kumishaabo, Ndabeepusha ayi: ‘Sa mutooya cishibila ano? Sa mwakacana kale ncito? Ino bantu bakookuno bali buyani?’” Cimwi ciindi kucita boobu kulamucafwa kutalika mubandi wamu Baibo. Na kaceelela, nankashi uyu aleepusha ayi: “Ino nciinshi ncemubona ayi cilayandika abuumbi kwaamba ayi tunoonyumfwana abantu? Sa inga ndamutondesha mwaambi umwi wamu Baibo? Waamba ayi: ‘kubalamuna kwaambana kuli anga nkutulula bulyango mumukuti wa cishiba; kukalashanya kakutana kutalika, swaawo.’ Mutobona buyani, sa kululika uku inga kwatucafwa kunonyumfwana abamwi?” (Tus. 17:14) Mibandi ya mushobo uyu inga yatucafwa kushiba bantu basuni kwiiya shiinji.

14. Ino mukwesu umwi alabashimikila buyani bantu baku shishi sha kwicwe batashomi muli Lesa?

¹⁴ Ino nshiinshi nsheenga twaamba kubaabo bashoma ayi taakuwo Lesa? Mukwesu ucishi kabotu bwakushimikila bantu batapaili bacanika kushishi sha kwicwe wakaamba ayi: “Liinji kuno na muntu waamba ayi, nshishomiwo ayi Lesa nkwaali,’ nkokwaamba ayi atosansulula ayi taashomiwo balesa bantu baanji mbobapaila kumusena uko. Aboobo anebo ndasuminisha akwaamba ayi ncakwiila balesa bakapangwa abantu teshi bancinencine. Liinji ndabelenga Jelemiya 16:20 yaamba ayi: ‘Sa bantu balakonsha kulipangila balesa babo?’ Lyalo ndeepusha ayi: ‘Ino balesa bakupanga a Lesa wancinencine balipusene buyani?’ Ndakutika cakubikila  maano, lyalo akubelenga Isaya 41:23 yaamba ayi: ‘Amutwaambile sheshi shikacitike kunembo, kwaamba ayi tushibe ayi ncakwiila muli balesa.’ Lyalo ndamutondesha cakubonenaako ca Yehova mbwakaambila limwi sheshi shikacitike kunembo.”

15.Ino nshiinshi nsheenga tweeya kuswa kucakubonenaako ca mukwesu wakulubasu lwa kwicwe kwa Asia?

¹⁵ Mukwesu umwi wakulubasu lwa kwicwe kwa Asia wakaamba ayi: “Ndabatondesha shakubonenaako shitondesha busongo bwamu Baibo, bushinshimi bwakakumanishikwa, amilawo yeendelesha bubumbo. Lyalo ndabatondesha shintu ishi mboshitucafwa kushiba ayi kuli Mulengi. Na muntu wasumina ayi ncakwiila Lesa nkwaali, ndatalika kumutondesha Baibo nshoyaamba pali Yehova.”

16. Kweelana a Bene Ebulu 11:6, ino nceebonshi shikwiiya Baibo alyeelete kushoma ayi Lesa nkwaali akushoma Baibo nshoyaamba, alimwi ino inga twamucafwa buyani?

¹⁶ Ndyetutokwiisha Baibo bantu batapaili, tulyeelete kutolelela kubacafwa kushoma ayi Lesa nkwaali. (Amubelenge Bene Ebulu 11:6.) Alimwi tulyeelete kubacafwa kushoma Baibo nshoyaamba. Aboobo inga twayandika kubooshawo mankanda aanji ndyetutokwiisha shiteente shimwi. Inga cabota na lyoonse ndyetutoobaiisha katubatondesha bumboni butucafwa kushoma ayi ncakwiila Baibo nga Maswi akwe Lesa. Mpashi inga mwabandikaabo bushinshimi bwamu Baibo mbobwakakumanishikwa, Baibo mboilulamika na yaamba pamakani asha sayansi, makani akale kale, na mboitucafwa mubuumi.

17. Ino nshibotu nshi sheenga shaswaamo na katutondesha ayi tulisuni bantu?

¹⁷ Tulacafwa bantu kuba bashikwiiya bakwe Klistu kwiinda mukubatondesha lusuno, inga caba ayi balapaila nabi sobwe. (1 Koli. 13:1) Ndyetutobaiisha tulisuni kubikila maano abuumbi kubatondesha ayi Lesa alitusuni, alimwi alisuni kwaamba ayi aswebo tutondeshe ayi tulimusuni. Mwaaka uli woonse bantu batakalinga kusuniwo kupaila kale kale, baleeya cancine akubombekwa mukwiinga bakeeya kusuna Yehova. Anu tulyeelete kunoobona ayi muntu wa mushobo uli woonse inga watalika kupaila Lesa, aboobo atubabikile maano. Amukutike ndyebatokwaamba. Amweeleshe kunyumfwishisha cakapa kwaamba ayi bashome nshobashoma. Amubatondeshe cakubonenaako cibotu ca nshobeelete kucita kwaamba ayi babe shikwiiya wakwe Klistu.