Mu Baibo muli maswi aanji aamba bantu mbobakalinga kulinyumfwa “bweenka mbuli ndiswe.” (Jemu. 5:17) Kucakubonenaako, ncuubu kunyumfwishisha Paulo nshaakasansulula ndyaakalinga kwaamba maswi ngotucana palilembo lya Bene Loma 7:21-24: “Lyoonse na ndisuni kucita cintu cibotu, ndalicana ayi ntoocita cibiibi. . . . Maawe akomena mapensho!” Maswi aya Paulo ngakaamba pamakani ambwakalinga kulinyumfwa alatuyuminisha ndyetutolwana ashilubo shesu.

Paulo wakaambawo aamwi maswi ambwakalinga kulinyumfwa. Palilembo lya Bene Galatiya 2:20 Paulo wakaamba mbwakalinga kushomete cakushinisha ayi: Yesu ‘Mwanaakwe Lesa wakamusuna abuumbi akwaaba buumi bwakwe ceebo ca nguwe,’ palwakwe! Sa amwebo mbomulinyumfwa ubo? Mpashi cimwi ciindi.

Na tulalinyumfwa ayi taakuwo mbotubete ceebo ca shibiibi nshetwakacitawo kale kale, inga katubona anga Yehova taakwe kutulelekela alimwi tatusuniiwo, ici inga calengesha ayi twaalilwe kushoma ayi Yesu wakafwita ndiswe palweesu. Sa ncakwiila Yesu alisuni ayi tunoobona cilubula mbuli cipo? Na mboobo, ino nciinshi ncotweelete kucita kwaamba ayi tunoobona cilubula mbuli cipo? Atubandike miipusho yobilo iyi.

Yesu alisuni kwaamba ayi munoobona mulambu wakwe mbuli cipo ncaakamupa. Ano ino nciinshi nceenga twashomena ayi ishi nshancine? Amuyeeye pamakani alembetwe palilembo lyakwe Luka 23:39-43. Musankwa bamupopa pacisamu cakupenshesha pafwiifwi a Yesu. Wasumina kwaamba ayi wakacita cibiibi. Cilyeelete kwaamba ayi wakacita cibiibi cinene, mukwiinga abo bakalinga kucita shibiibi shinene mbobakalinga kwaanishikwa munshila iyi. Musankwa uyu walisukama abuumbi, aboobo wakombelela kuli Yesu ayi: “Ukanjibaluke waakunjila mu Bwaami bwako.”

Ino Yesu wakamukumbula buyani? Amuyeeyebo kucisa Yesu nkwakanyumfwa kwaamba ayi asanduluke akulanga mucita shibiibi uyu. Nabi kwaamba ayi wakalinga kunyumfwa kucisa, Yesu wakamweeta akuyuminisha musankwa ulya ayi: “Ntookulwiita lushinisho sunu ayi, ulaakuba andime mu Paladaiso.” Nakalinga kusuni, Yesu nakwiinga wakalwiitabo musankwa ulya ayi “Mwanaamuntu . . . wakesa mukwaaba buumi bwakwe kwaamba ayi alubule bantu baanji.” (Mate. 20:28) Ano sa mwaboona Yesu mbwakayuminisha cilubula mbocakalinga kusa mukumucafwa? Yesu wakamutondesha nkumbu musankwa uyu kwiinda mukumulwiita maswi akwaamba ayi “ulaakuba” alimwi aliswi lyakwaamba ayi “andime.” Alimwi wakalwiita musankwa ulya ayi alaakuba abuumi kunembo pacishi ca panshi mu paladaiso.

Cakutatoonsha, Yesu wakalinga kusuni kwaamba ayi musankwa ulya ashibe ayi mulambu Klistu ngwakalinga kusa mukupa wakalinga cipo kuli nguwe. Na Yesu wakanyumfwila nkumbu mucita shibiibi ulya utana kusebenselawo a Lesa, nkokwaamba ayi inga taalilwi kucita boobo ku Mwineklistu wakabombekwa utosebensela Lesa. Aboobo ino nciinshi ceenga catucafwa kushoma kwaamba ayi cilubula cakwe Klistu, inga catucafwa nabi twakacitawo shibiibi kale kale?

Mukwiinga Yesu ngowakapa Paulo ncito yakushimikila, Paulo wakanyumfwishisha kwaamba ayi Yesu wakafwita nguwe. Munshila nshi? Wakaamba ayi: “Ndalumba Klistu Yesu Mwaami wesu, uyo wakampa nkusu, mukwiinga wakambona ayi ndashomeka kwiinda mukumpa ncito yakucita, nabi kwaamba ayi kwisule uko ndakalinga shikucobola Lesa ashikupensha bantu bakwe Lesa alimwi mukali abuumbi.” (1 Timo. 1:12-14) Incito Yesu njaakapa Paulo yakamucafwa kushoma cakutatoonsha ayi Yesu wakamutondesha nkumbu, lusuno akumushoma. Aswebo Yesu wakapa womwi awomwi wandiswe incito yakushimikila makani abotu. (Mate. 28:19, 20) Sa incito iyi inga taitucaafwi kushoma ayi Yesu wakatufwita?

Albert, mukwesu wakaboolela conoono mulibungano pesule lyakuba kunsengwe kwa myaaka pafwiifwi a 34, wakaamba ayi: “Lyoonse ndebaluka shilubo nshendakacita. Ano na ntooshimikila, ndalinyumfwa bweenka mbuli Paulo, ayi Yesu ngowakampa ncito yakushimikila. Kushimikila kulanjuminisha abuumbi akumpa kulibona ayi ndicite mpindu alimwi ndalangila ayi ndaakuba abuumi bubotu kunembo.”—Kulu. 51:3.

Ba Allan, abo bakalinga muntu utanyumfwi alimwi shinkondo kabatana kwiiya cancine, bakaamba ayi: “Nciibaluka shibiibi shoonse nshendakalinga kucita kubantu. Cimwi ciindi, ndanyumfwa cibiibi abuumbi. Ano ndalumba Yehova mukwiinga wakampa ncito yakushimikila makani abotu kubantu nabi kwaamba ayi ndi muntu utasalalite. Na ndaboona bantu mbobasumina kukutika makani abotu, lyoonse ndebaluka ayi Yehova ngumubotu alimwi ngushilusuno. Ndabona ayi alansebensesha kucafwa bamwi, abalo balinyumfwa cibiibi ceebo ca shintu shibiibi nshebakacita kale kale.”

Kushimikila makani abotu nkucita ncito ibotu alimwi kulatucafwa kubikila maano pashintu shibotu. Incito iyi ilatucafwa kushoma cakutatoonsha kwaamba ayi Yesu alicite nkumbu, lusuno, alimwi alatushoma.

Tulaakucilekabo kulinyumfwa cibiibi pashintu shibiibi nshetwakacita kale kale, na cishi cakwe Satana cino cikanyonyoolwe. Ino nciinshi ceenga catucafwa kukoma kulinyumfwa cibiibi uku?

Nankashi Jean ndyaakalinga mwanike, wakalinga kucita shibotu na kaali kumishaabo alimwi aku Ŋanda ya Bwaami, ano teshi mbocakalinga na kaali kumwi. Pacecino ciindi alalinyumfwa cibiibi abuumbi pabuumi mbwakalinga kucite, aboobo wakaamba ayi: “Ndayuminishikwa na ndayeeya cancine cakwaamba ayi ‘Lesa uleenda myoyo yesu.’” (1 Joni 3:19, 20) Aswebo inga twayuminishikwa na twashiba kwaamba ayi Yehova a Yesu balishi kabotu abuumbi kwaamba ayi tuli bantu batasalalite. Mutaluubi kwaamba ayi cilubula tacikwe kupekwa kubantu basalalite, sombi kubantu batasalalite.—1 Timo. 1:15.

Inga twashoma cakutatoonsha ayi cilubula cakapekwa kucafwa womwi awomwi wandiswe, na lyoonse katwiibaluka Yesu mbwabona bantu batasalalite, alimwi na katusebensa cankusu muncito yakushimikila makani abotu. Kucita boobo kulaakutupa kwaamba bweenka mbuli Paulo mbwakaamba ayi: Yesu “wakansuna abuumbi akwaaba buumi bwakwe ceebo ca ndime.”