1. Ino Yehova wakatupa nkusu shakucita buyani?

YEHOVA wakatupa nkusu shakulisalila buumi mbotusuni. Alatwiisha bwakusala kabotu shakucita, alimwi shintu shilatweendela kabotu na twasala shintu shimukondelesha. (Kulu. 119:173) Aboobo na twakonkela nshetwiiya kuswa mu Baibo, tulasala kabotu.​—Ebu 5:14.

2. Ino ndipenshi nshi ndyeenga twacaana pesule lyakusala shakucita?

² Nabi tusale kabotu shakucita, cimwi ciindi cilaba ciyumu kumanisha nshetwakatalika. Atubandike shakubonenaako: Mukwesu wacanike wasala ayi alisuni kumanisha kubelenga Baibo yoonse. Weeleshaako kwiibelenga kwa nsondo shiniini lyalo akucileka. Nankashi wasala ayi alisuni kucita bupainiya bwaciindi coonse ano watalika kuwayawaya kusala bushiku bwakutalika. Likoto lya bamanene basuminishanya ayi balyeelete kutalika kubikila maano abuumbi kukucita kufwakasha kwa bweembeshi mulibungano, ano pesule lya myeenshi iinji bacana kwaamba ayi tabana kutalika. Nabi kwaamba ayi shakubonenaako ishi shoonse shilipusenepusene, boonse tabakwe kukumanisha nshobakasala. Beneklistu bamuciindi ca batumwi baku Kolinto abalo ndyelipenshi ndyebakalinga kucite. Atubandike nsheenga tweeya kuswa kucakubonenaako cabo.

3. Ino bene Kolinto bakasala kucita nshi, sombi ino nciinshi cakacitika?

³ Mpashi cakalinga mumwaaka wamuma 55 Yesu kaali waboolela kale kwiculu, bene Kolinto ndyebakasala kucita cintu cimwi ciyandika. Bakanyumfwa ayi Beneklistunyinaabo ku Jelusalemu aku Judeya bakalinga mumapensho, aboobo mabungano amwi bakalinga kupa maali kwaamba ayi babacafwilishe. Mukwiinga bene Kolinto bakalinga bantu banyumfwila nkumbu alimwi bacite mushimu wakwaaba, abalo bakalinga kusuni kucafwilishaako, aboobo bakeepusha Paulo kwaamba ayi abalwiite nsheenga bacita. Wakabalwiita  shakucita akusala Taitasi kwaamba ayi acafwilishe muncito yakukolonganika maali ayo akapekwa. (1 Koli. 16:1; 2 Koli. 8:6) Ano ndipakeenda myeenshi iniini, Paulo wakesa mukucana kwaamba ayi bene Kolinto tabakwe kupa maali ngobakashomesha. Aboobo tabakalinga kulibambite kubikaawo maali, ciindi ayo akaswa kumabungano amwi ndyaakalinga kubikwa pomwi kwaamba ayi batole ku Jelusalemu.​—2 Koli. 9:4, 5.

4. Kweelana a 2 Bene Kolinto 8:7, 10, 11, ino nshiinshi Paulo nshaakayuminisha bene Kolinto?

⁴ Bene Kolinto bakalinga basala kabotu, alimwi Paulo wakabalumba ceebo ca lushomo lwabo luyumu amushimu wa bwaabi. Nacibi boobo, wakabayuminisha kwaamba ayi bakalinga kweelete kumanisha nshobakatalika. (Amubelenge 2 Bene Kolinto 8:7, 10, 11.) Ishi shakacitikila bene Kolinto shilatwiisha ayi nabibo Mwineklistu ushomeka cimwi ciindi inga waalilwa kukumanisha nshakasala kucita.

5. Ino njimiipusho nshi njeshi tucane shikumbulo?

⁵ Bweenka mbuli mbocakalinga kubene Kolinto, aswebo inga twaalilwa kukumanisha nshetwasala kucita. Ino nceebonshi? Mukwiinga tatusalalite, cimwi ciindi kulaba kuyeeya ayi ndaakucita. Alimwi shintu shicitika cakuteengashila inga shapa kwaamba ayi twaalilwe kucita kweelana ambotwasala. (Shiku 9:11; Loma. 7:18) Ano ino nshiinshi nshotweelete kucita na tulisuni kwiinduluka mushintu shimwi nshetwakasala akubona na kuli mpotweelete kwaalula? Alimwi ino nshiinshi nsheenga twaciita kwaamba ayi tunoomanisha nshotwakatalika?

6. Ino nciinshi ceenga capa kwaamba ayi twaalule nshetwakasala?

⁶ Kuli shimwi shiyandika nshetwakasala nsheenga tatwaaluli. Kucakubonenaako, inga tatwaaluli na twakasala kusebensela Yehova, kubaabo bali mucikwati, inga tabaaluli kulumbila kwabo ayi balaakutolelela kushomeka mucikwati. (Mate. 16:24; 19:6) Nacibi boobo, kuli shimwi nshetusala nsheenga twaalula. Ino nceebonshi? Mukwiinga shintu shilaaluka. Ino nshiinshi nshotweelete kucita kwaamba ayi tusale kabotu shakucita?

7. Ino nciinshi ncotweelete kusenga kuli Lesa, alimwi ino nceebonshi?

⁷ Amusenge busongo. Yehova wakatanjilila Jemusi kulemba ayi: “Na umwi pakati kanu taacite busongo, asenge kuli Lesa uyo upa bantu boonse.” (Jemu. 1:5) Cancine ncakwaamba ayi, soonse tulayandika ‘busongo.’ Aboobo amucinke manungo muli Yehova ndyemutoosala, andyemutokwiinduluka musheesho nshemwakasala. Lyalo ndyeenga Yehova wamucafwa kusala kabotu.

8. Ino nshiinshi nshotweelete kucita katutana kusala shakucita?

⁸ Amulangoole makani aamwi cakubikila maano. Amulangoole makani kuswa mu Maswi akwe Lesa, amubelenge mabuku abambwa alibunga lyakwe Yehova, akubandikaako abantu mbomushoma beenga bamupandako maano. (Tus. 20:18) Kucita boobo kulayandika abuumbi kamutana kusalawo kwaamba ayi mucileke ncito, mulonge, na kamutana kusala lwiiyo lweelete lweenga lwamucafwa kucana maali akuula shiyandika akutolelela kusebensela Yehova.

9. Ino kushomeka kulatucafwa buyani?

⁹ Amuyeeye kabotu paceeco cimupa kusala kucita shintu. Yehova alabikila maano kuceeco citupa kwaamba ayi tunoocita shintu. (Tus. 16:2) Alisuni kwaamba ayi tunooshomeka mushintu shoonse. Aboobo ndyetutoosala shakucita, tulyeelete kushiba catupa kwaamba ayi tusalewo kucita shintu isho alimwi abantu bamwi abalo balyeelete kushiba. Inga caba ciyumu kukumanisha nshetwakasala kucita na twakalinga kubecabo ndyetwakalinga kusala. Kucakubonenaako, mukwesu wacanike inga wasala kutalika bupainiya bwaciindi coonse. Nacibi boobo, mukuya kwaciindi inga wacileka kucana lusangalalo muncito yakushimikila na kaalilwa kukumanisha mawoola ayandika. Mpashi walinga kuyeeya ayi cinene cakamupa kwaamba ayi atalike bupainiya nkusuna kusangalasha Yehova. Ano mpashi cancine ncakwaamba ayi wakatalika bupainiya kwaamba ayi asangalashe bashali na muntu umwi.

10. Ino nciinshi ceenga cacafwa muntu kwaaluka?

 ¹⁰ Amuyeeye shikwiiya Baibo uyo wasala kwaamba ayi acileeke kufweba. Kwansondo yomwi wacikonsha kukala kwakubula kufweba nabi kwaamba ayi nciyumu. Ano camuyumina aboobo watalika kufweba alimwi. Mukuya kwaciindi wacikonsha kucilekela limwi kufweba! Wacikonsha kukoma lipenshi lyakufweba ceebo cakusuna Yehova akusuna kucita shimusangalasha.​—Kolo. 1:10; 3:23.

11. Ino nceebonshi mulyeelete kusalila limwi nsheeshi mukacite?

¹¹ Amube ashakucita. Na mwasalila limwi shakucita, cilaakuba cuubu kushikumanisha. Kucakubonenaako, mpashi mwakasala ayi munanoobelenga Baibo lyoonse. Ano na tamuna kutaanguna kupanga mulongo ngweshi munookonkela, inga mwaalilwa kucita nshemwakasala. * Mpashi likoto lya bamanene inga basuminishanya ayi balyeelete kutalika kubikila maano abuumbi kukucita kufwakasha kwa bweembeshi mulibungano, ano pesule lya myeenshi iinji bacana kwaamba ayi tabana kutalika. Kwaamba ayi bacikoonshe kukumanisha nshebakasala, balyeelete kuliipusha miipusho mbuli: “Sa tulicite kale mulongo wabamakwesu abenankashi batoyandika kufwakashilwa? Sa twakapangana kale bushiku aciindi ndyetweelete kucita kufwakasha uku?”

12. Ino nshiinshi nsheenga twayandika kucita, alimwi ino nceebonshi?

¹² Amushibe nsheenga mwacikonsha. Taakuwo muntu ucite ciindi, nkusu, alimwi ashintu shoonse shiyandika kwaamba ayi akumanishe shoonse nsheenga wasuna kucita. Aboobo cili kabotu kushiba nsheenga twacikonsha ansheenga tatucikoonshi. Cimwi ciindi na kaciyandika, inga mwaalula nshemwakasala na mwabona ayi teshi mucikoonshe. (Shiku 3:6) Ano ino inga mwacita buyani na mweenduluka musheesho nshemwakasala kucita, mwaalulako shimwi, akubona ayi inga mwacikonsha? Atubandike nshila shili 5 sheenga shamucafwa kumanisha nshemwakatalika.

13. Ino inga mwacita buyani kwaamba ayi mube ankusu shakucita nshemwakasala?

¹³ Amupaile kwaamba ayi Lesa amupe nkusu shakucita. Lesa inga ‘wamupa nkusu’ shakucitawo comwi kwaamba ayi mukumanishe nshemwakasala. (Fili. 2:13) Aboobo amusenge Yehova kwaamba ayi amucaafwe amushimu usalashi uyo weenga wamupa nkusu shakucita nshemwakasala. Amutolelele kupaila nabi ciboneke anga Yehova atoocelwa kukumbula mupailo wanu. Yesu wakaamba ayi: “Amutolelele kusenga, aboobo mulaakupekwa [mushimu usalashi].”​—Luka 11:9, 13.

14. Ino njiisho njetucana pa Tusimpi 21:5 inga yamucafwa buyani kucita kweelana anshemwakasala?

¹⁴ Amube amulongo wa shakucita. (Amubelenge Tusimpi 21:5.) Kwaamba ayi muntu acikoonshe kumanisha ncito ili yoonse njaatalika, alyeelete kuba amulongo wa shakucita. Lyalo alyeelete kucita shintu kweelana anshakabika pamulongo uyo. Bweenka ubo mbocibete na mwasala shakucita, amulembe mulongo wa shintu nshomweelete kucita kwaamba ayi mukumanishe nshomwakasala. Na mulicite ncito inene njomweelete kucita, amutaangune kuyaabanya mumbasu shiniini niini, kucita boobo kulaakumucafwa kukumanisha ncito iyo. Paulo wakayuminisha bene Kolinto ayi bakalinga kweelete kulibambila limwi maali ashabupe “pabushiku bwakutaanguna bwa nsondo ili yoonse” muciindi cakulindila ayi akese lyalo nkokutalika kukolonganika maali ashabupe. (1 Koli. 16:2) Kwaabanya ncito inene mumbasu shiniini niini kulaakumucafwa kutalinyumfwa ayi mulicite shiinji shakucita nsheenga tamucikoonshi.

15. Ino nshiinshi nshomweelete kucita pesule lyakulemba mulongo washakucita?

¹⁵ Kulemba kabotu mulongo wa nshemwasala kucita, kulaakumucafwa kucita kweelana ambomwasala. (1 Koli. 14:40) Kucakubonenaako, bamanene bakayuminishikwa ayi balyeelete kusala  munene womwi weelete kunoolemba shili shoonse likoto lya bamanene nshebasala kucita, kwiilikaawo aumwi weelete kushinisha kwaamba ayi isho shasalwa shacitwa alimwi akulemba bushiku ndyesheelete kucitwa. Na bamanene bakonkela bubaambo ubu, cilaakuba cuubu kukumanisha nshobasala kucita. (1 Koli. 9:26) Amwebo inga mweeleshako kukonkela sheeshi shicita bamanene. Kucakubonenaako, inga mwalemba mulongo washintu nshomweelete kucita bushiku abushiku, alimwi ico ncomusuni kutaanguna kucita inga mwacibika peculu lya mulongo uyo. Kucita boobo kulaakumucafwa kumanisha nshemwatalika alimwi mulaakunoosebensesha kabotu ciindi canu.

16. Ino nshiinshi nshotweelete kucita kwaamba ayi tukumanishe nshotwasala kucita, alimwi ino ishi shilicatene buyani amaswi ngotucana pa Bene Loma 12:11?

¹⁶ Amusebense cankusu. Kukonkela shoonse nshomwabika pamulongo akumanisha nshemwatalika kulayandika kusebensa cankusu. (Amubelenge Bene Loma 12:11.) Paulo wakalwiita Timoti ayi “tolelela kulyaaba” “akubikila maano abuumbi kukwiisha.” Inga twakonkela maswi akwe Paulo mushintu shili shoonse nsheenga twasuna kucita muncito yakwe Yehova.​—1 Timo. 4:13, 16.

17. Ino Bene Efeso 5:15, 16 inga yatucafwa buyani kukumanisha nshotwakasala kucita?

¹⁷ Amucisebenseshe kabotu ciindi. (Amubelenge Bene Efeso 5:15, 16.) Amubike ciindi ndyeshi mukacite nshomwasala alimwi mutaaluli ciindi ico. Mutalindili ayi kushikila shintu shikabe kabotu, lyalo ndyeshi mukacite nshomwasala kucita; mpashi teshi mukaciboneewo ciindi ico. (Shiku 11:4) Mutanoosowa ciindi ankusu shanu pashintu shitayandiki abuumbi cakwaamba ayi mwaalilwa kucita shintu shiyandika. (Fili. 1:10) Na kacikonsheka, amusale ciindi ndyeenga bantu tabamupilinganyi kucita nshomwasala. Amubalwiite bamwi kwaamba ayi tamusuniiwo kumupilinganya. Inga mwashimya fooni yanu alimwi akuleya kubelenga mameseji ndyemutoocita shintu shiyandika abuumbi. *

18-19. Ino nciinshi ceenga camucafwa kutolelela kweelesha kukumanisha nshomwasala kucita, nabi ciyume buyani?

¹⁸ Amubikile maano kushibotu nsheshi mukacane. Shiswa mushintu nshetusala kucita shili anga nkumusena kutooya muntu uli palweendo. Na ncakwiila mulisuni kuya mukushika nkomutooya, mulatolelela nabi mwacana ayi bacala nshila aboobo mulyeelete kusebensesha imwi. Ubu mbocibete na twabikila maano kushiswaamo musheesho nshotwasala kucita, tatubooleli mwisule nabi twashiba ayi tulyeelete kwaalula shimwi kwaamba ayi tukumanishe nshotwasala kucita.​—Gala. 6:9.

¹⁹ Kusala kabotu ncintu ciyumu, alimwi teshi cuubu kukumanisha sheesho nshotwasala kucita. Ano Yehova inga wamucafwa kwiinda mukumupa busongo alimwi ankusu nshomutoyandika kwaamba ayi mucikoonshe kumanisha nshemwakatalika.