Muciindi camu Baibo, shikulama buboni wakalinga kulama shintu sha muŋanda na shintu sha muntu umwi. Muci Ebulu amuci Giliki maswi akasansululwa ayi “shikulama buboni” cimwi ciindi alasansulula mutanjilili na shikulama shintu sha muŋanda.

Josefu mwanaakwe Jakobo ndyaakalinga musha ku Ijipiti, wakaba shikulama buboni bwa muŋanda ya mwaami wakwe. Alimwi mwaami wakwe mwine Ijipiti “wakabika shoonse mumaansaakwe Josefu.” (Mata. 39:2-6) Pesule lyakwaamba ayi Josefu waba mweendeleshi mu Ijipiti, wakasala shikulama buboni bwa muŋanda yakwe.—Mata. 44:4.

Muciindi cakwe Yesu, bantu bakalinga kucite myuunda, liinji bakalinga kukala mumandabala akulaale amyuunda yabo. Aboobo bakalinga kusala beshikulama buboni kwaamba ayi kabalama myuunda.

Ino mbantu bali buyani bakalinga kweelela kuba beshikulama buboni? Columella mwine Loma uyo wakalingaako muciindi ca batumwi wakaamba ayi musebenshi uyo wakalinga kusalwa kuba mutanjilili na shikulama buboni, “alyeelete kuba muntu ucishi kabotu kusebensa ncito.” Wakaamba ayi “alyeelete kuba muntu weenga kashinisha ayi basebenshi basebensa ncito sombi kuteshi kubasebensesha calunkutwe.” Alimwi wakeelikaawo akwaamba ayi: “Cintu ciyandika abuumbi shikulama buboni ncaeelete kushiba ncakwaamba ayi taeelete kunoolibona ayi alishishi shoonse sombi alyeelete kuba muntu usuna kwiiya shintu shipya lyoonse.”

Maswi akwe Lesa alasebensesha cakubonenaako ca shikulama buboni anciito njaasebensa kusansulula incito shimwi shicitwa mulibungano lya Bwineklistu. Kucakubonenaako, mutumwi Pita wakayuminisha Beneklistunyina kusebensesha shipo nshebakatambula kuswa kuli Lesa “kusebensela bamwi mbuli beshikulama buboni bali kabotu abo Lesa mbakatondesha nkumbu.”—1 Pita 4:10.

Yesu wakasebensesha cakubonenaako ca shikulama buboni ndyaakaamba cikoshanyo cilembetwe pa lilembo lyakwe Luka 16:1-8. Kwiilikaawo, mubushinshimi bwacitondesho cakubaawo kwakwe mbuli Mwaami, Yesu wakashomesha beshikwiiya bakwe ayi alaakusala “musebenshi ushomeka alimwi ucite maano,” na “shikulama buboni ushomeka.” Incito inene yamusebenshi uyu, nkubamba shakulya shakumushimu bashikwiiya bakwe Yesu nshebayandika munshiku shakweelaako. (Mate. 24:45-47; Luka 12:42) Ncoolwe cinene kuba pabaabo batambula mabuku ayumya lushomo, ayo shikulama buboni ushomeka ngaatubambila nsengwe yoonse.