1-2. (a) Kweelana a Bene Efeso 6:16, ino nceebonshi ncotuyandikila “liyawo linene lya lushomo”? (b) Ino njimiipusho nshi njeshi tubandike?

SA mulicite “liyawo linene lya lushomo”? (Amubelenge Bene Efeso 6:16.) Cakutatoonsha mulicite. Bweenka mbuli liyawo linene lya lushomo mbolishitilisha mubili wakwe shilumamba, lushomo lulamushitilisha kumibo ibiibi mbuli bulale, kucayana, alimwi amibo Lesa njaapatite.

² Nacibi boobo, tutokala munshiku “shakweelaako,” aboobo lushomo lwesu luleeleshekwa lyoonse. (2 Timo. 3:1) Ino inga mwacita buyani kwaamba ayi mushibe na liyawo lyanu lya lushomo ndiyumu? Alimwi ino inga mwacita buyani kwaamba ayi lushomo lwanu lutolelele kuba luyumu? Amuleke tubandike shikumbulo kumiipusho iyi.

3. Ino bashilumamba bakalinga kucita buyani ku liyawo lyabo, alimwi ino nceebonshi?

³ Muciindi camu Baibo, liinji bashilumamba bakalinga kucite liyawo lyakalinga kucite cipaya. Bashilumamba bakalinga kunanikaako mafuta ku liyawo kwaamba ayi cipaya aceela shitanyonyooki. Na shilumamba wacana ayi liyawo lyakwe lyakanyonyooka, wakalinga kulibamba cakufwambaana kwaamba ayi akalisebenseshe kunkondo. Ino cakubonenaako ici cilicatene buyani amakani alushomo lwanu?

4. Ino nceebonshi mulyeelete kunolanga langa liyawo lyanu lya lushomo, alimwi ino nshiinshi nshomweelete kucita?

⁴ Bweenka mbuli bashilumamba bakale kale, amwebo mulyeelete kunolanga langa liyawo lyanu akulilama kabotu kwaamba ayi  mube balibambite kulwana. Mbuli Beneklistu, tuli munkondo yakumushimu iyo njetutolwana amishimu ibiibi. (Efe. 6:10-12) Taakuwo umwi weenga wamulaminaako liyawo lyanu lya lushomo. Ino inga mwashiba buyani ayi lushomo lwanu lulilibambite kulwana meelesho? Citaanshi, mulyeelete kupaila kuli Lesa kwaamba ayi amucaafwe. Lyalo mulyeelete kusebensesha Maswi akwe Lesa kulilanga kwaamba ayi mubone na lushomo lwanu nduyumu kweelana a Lesa mbwaasuni. (Ebu 4:12) Baibo ilaamba ayi: “Koshoma Yehova amoyo wako woonse, utashomi maano ako omwiine.” (Tus. 3:5, 6) Ano sa kuli shakacitikawo conoono nshomwakalinga kweelete kusalawo shakucita? Kucakubonenaako, sa mwakalinga kucitewo lipenshi linene lyakubula maali? Sa paciindi ico mwakeebalukaawo cishomesho cakwe Yehova ncetucana palilembo lya Bene Ebulu 13:5, mpotucana maswi akwaamba ayi: “Teshi nkamushiyeewo nabi kumulekelesha”? Sa cishomesho ici cakamucafwa kushoma ayi Yehova alaakumucafwa? Na mwakashoma, nkokwaamba ayi mutoolama kabotu liyawo lyanu lya lushomo.

5. Ino nshiinshi nsheenga mwacaana na mwalanga langa lushomo lwanu?

⁵ Mpashi inga mwakankamana ansheenga mwacaana na mwalulanga langa kabotu lushomo lwanu. Inga mwesa mukucana ayi kuli shintu shimwi nshomutaciti kabotu nshomutacishiwo nobeene. Kucakubonenaako, mpashi inga mwacana ayi kulisukama abuumbi, bubeshi, na kulefuka shakanyonyoola lushomo lwanu. Na mwacana ayi ubu mbocibete, ino nshiinshi nsheenga mwaciita kwaamba ayi lushomo lwanu lutanyonyookeli limwi?

6. Amwaambe shakubonenaako shitondesha ayi cimwi ciindi kulisukama kulibo kabotu

⁶ Kulisukama kumwi kuli kabotu. Kucakubonenaako, cili kabotu kulisukama pa nsheenga twaciita kwaamba ayi tusangalashe Yehova alimwi a Yesu. (1 Koli. 7:32) Cili kabotu kulisukama mbweenga twaboosha bushicibusa bwesu a Lesa, na twaciita cilubo cinene. (Kulu. 38:18) Inga twalisukama ansheenga twaciita kwaamba ayi tusangalashe ngotweebeneakwe alimwi ambweenga twalama mukwashi wesu abashominyineesu.​—1 Koli. 7:33; 2 Koli. 11:28.

7. Kweelana a Tusimpi 29:25, ino nceebonshi ncotuteelete kuloondela bantu?

⁷ Nacibi boobo, kulisukama abuumbi inga kwanyonyoola lushomo lwesu. Kucakubonenaako, mpashi inga twatalika kulisukama pamakani akuba ashakulya alimwi ashakufwala shikwene. (Mate. 6:31, 32) Aboobo mpashi inga twatalika kunoobikila maano abuumbi kukuba abubile kwaamba ayi tucileeke kulisukama. Mpashi inga twatalika akusunisha bubile na maali. Na kulisukama kweendilila, inga kwapa kwaamba ayi tucileeke kushoma bunene muli Yehova, alimwi kucita boobo inga kwanyonyoola bushicibusa bwesu anguwe. (Maako 4:19; 1 Timo. 6:10) Na mpashi inga twatalika kulisukama abuumbi abantu mbobatubona. Aboobo inga twatalika kuloonda kusekwa na kupenshekwa muciindi cakuloonda kukalasha Yehova. Kwaamba ayi tuleye kulisukama abantu mbobatubona, tulyeelete kusenga Yehova kwaamba ayi atucaafwe kuba alushomo akutaloonda.​—Amubelenge Tusimpi 29:25; Luka 17:5.

8. Ino nshiinshi nshotweelete kucita na twanyumfwa makani akubeca?

⁸ Satana, “Ishi wabubeshi,” alasebensesha bantu bakwe kwaambilisha makani akubeca pali Yehova abamakwesu abenankashi. (Joni 8:44) Kucakubonenaako, bantu bakaswa mucancine balalemba makani akubeca palibunga lyakwe Yehova kwiinda mukusebensesha Intaneti, makani aambwa pama TV alimwi anshila shimwi. Bubeshi ubu buli pa “mifwi inyaka mulilo iyo iwaala Satana.” (Efe. 6:16) Ino inga twacita buyani na muntu wesa kuli ndiswe akutalika  kwaamba makani akubeca palibunga lyakwe Yehova, alimwi apabamakwesu abenankashi? Tatweelete kumukutika! Ino nceebonshi? Mukwiinga tulashoma Yehova alimwi abamakwesu abenankashi. Alimwi tatweelete nabi paniinibo kubandika abantu bakaswa mucancine. Tatweelete kutalika kupikishanya abantu ba mushobo uyo nabi baambe makani ali buyani.

9. Ino kulefuka inga kwatupa kuba buyani?

⁹ Kulefuka inga kwaboosha lushomo lwesu panshi. Cimwi ciindi mapensho ngotwiindaamo inga apa kwaamba ayi tulefuke. Ano inga tatusuulikobo kumapensho esu. Nacibi boobo, tatweelete kunooyeyabo pamapensho esu lyoonse. Mukwiinga kucita boobo inga kwatupa kuluba shintu shoonse shibotu Yehova nshaakatushomesha. (Ciyu. 21:3, 4) Kulefuka inga kwatumana nkusu akutulengesha kwaamba ayi tucileeke kusebensela Yehova. (Tus. 24:10) Sombi ishi taasheelete kucitika kuli ndiswe.

10. Ino mweeya nshi kuswa kunkalata yakalemba nankashi umwi?

¹⁰ Atubandike cakubonenaako cakwe nankashi umwi waku America, uyo watolelela kulama kabotu lushomo lwakwe nabi ndyaatoocisisha beebaye. Wakalemba nkalata kuma ofesi esu anene, yakwaamba ayi: “Cimwi ciindi ndalisukama abuumbi alimwi akulinyumfwa kulefuka, sombi ndatolelela kuba abulindilishi. Ndalumba Yehova pashintu shoonse nshaatupa isho shitupa nkusu akutuyuminisha. Kululikwa akuyuminisha uku kulayandika abuumbi. Kulatucafwa kusebensela Yehova akuliyumya mumapensho Satana ngaaleta kwaamba ayi tulefuke.” Cakubonenaako cakwe nankashi uyu citootucafwa kushiba kwaamba ayi inga twacikonsha kuliyuma cakutaboolela mwisule! Ino nshiinshi nshotweelete kucita? Amubone mapensho mbuli bweelesho kuswa kuli Satana. Amushome kwaamba ayi Yehova alaakumuyuminisha. Alimwi mulyeelete kulumba pashakulya shakumushimu nshaatupa.

11. Ino njimiipusho nshi njotweelete kuliipusha kwaamba ayi tushibe na lushomo lwesu nduyumu nabi sobwe?

¹¹ Ino mutoobona buyani, sa lushomo lwanu lutoyandika kusebenselaawo? Sa mwacikonsha kuleya kulisukama abuumbi mumyeenshi iniini yainda? Sa mwakacikonsha kukaka kukutika akupikishanya abantu bakaswa mucancine pamakani abubeshi ngobaya caambilisha?  Alimwi sa kuli nshomwakacitaawo kwaamba ayi muleye kulefuka? Na mwakacikonsha kucita boobo nkokwaamba ayi lushomo lwanu nduyumu. Ano tulyeelete kucenjela, mukwiinga kuli ashimwi shilwanisho Satana nshaasebensesha kwaamba ayi atulwaane. Atubandikewo nshila yomwi.

12. Ino nciinshi ceenga cacitika na twasunishisha bubile?

¹² Kusunishisha bubile inga kwaboosha lushomo lwesu panshi akupa kwaamba ayi tuboolele mwisule mukusebensela Yehova. Mutumwi Paulo wakaamba ayi: “Muntu usebensa mbuli shilumamba taabanimo lubasu mumakwebo abuumi buno, kwaamba ayi akondeleshe wooyo wakamunjisha bushilumamba.” (2 Timo. 2:4) Bashilumamba ba bene Loma tabakalinga kusuminishikwa kusebensa ncito imwi. Ano ino nciinshi cakalinga kucitika na shilumamba waalilwa kukonkela mulawo uyu?

13. Ino nceebonshi shilumamba ncaatakalinga kweelete kusebensela ncito imwi?

¹³ Amuyeeye kwaamba ayi bushiku buli boonse macuunsa bashilumamba balaya mukwiiya bwakusebensesha mipeeni, ano shilumamba womwi taapo. Uli kumaliketi utokuulisha shakulya. Macolesha bashilumamba batobamba kabotu shilwanisho shabo akunona mipeeni yabo. Ano shilumamba uulisha shakulya lakwe utoolibambila shakulya shakuulisha ciilo. Macuunsa akaboolaawo cakuteengashila balwani babanjilila. Ino ngu shilumamba uli weenga wacikonsha kulwana kabotu akukondelesha munene wabashilumamba? Alimwi na amwebo mutolwanako nkondo iyi, ngushilumamba uli ngweenga mwasuna kuba akwe pafwiifwi​—uyo ubikila maano kukulibambila kabotu na uyo umwi wapilinganishikwa ashintu shimwi?

14. Mbuli bashilumamba bakwe Klistu, ino nshiinshi nshotubona ayi shilicindeme?

¹⁴ Aswebo tuli anga mbashilumamba babikila maano kukulibambila. Cinene ncotubikilaako maano, nkucita shintu sheenga shakondelesha Munene wabashilumamba wesu, Yehova alimwi a Klistu. Tulishi kwaamba ayi ici ncecintu cicindeme abuumbi kwiinda cili coonse nceenga twabaaco mucishi cino cakwe Satana. Aboobo lyoonse tulyeelete kunooba aciindi alimwi ankusu shakusebensela Yehova akulama kabotu  liyawo lyesu lya lushomo, alimwi ashilwanisho shimwi shakumushimu.

15. Ino nshiinshi Paulo nshaakatucenjesha, alimwi ino nceebonshi?

¹⁵ Tulyeelete kuba bacenjete lyoonse! Ino nceebonshi? Mutumwi Paulo wakatucenjesha ayi ‘abo basunishi kubila baleengaila akuswa mulushomo.’ (1 Timo. 6:9, 10) Liswi lyakwaamba ayi “beengaila” lilatondesha ayi inga twapilinganishikwa akusunisha kuba ashintu nshetutayandiki akuyandika. Aboobo inga ‘twacatwa mukoose ka shiyanda mubili shiinji shabuluya.’ Muciindi cakukonkela shiyanda mubili, tulyeelete kubona shintu ishi mbuli shilwanisho Satana nshaasebensesha kunyonyoola lushomo lwesu.

16. Ino makani ngotucana pa Maako 10:17-22 alyeelete kutupa kuliipusha miipusho nshi?

¹⁶ Atwaambe ayi mpashi mulicite maali akucikonsha kuula shintu shiinji. Sa inga cabica kuula shintu nshetusuni sombi shitayandiki abuumbi? Sobwe. Ano amuyeeye pamiipusho iyi: Nabi kwaamba ayi inga twacikonsha kuula cintu cimwi, sa tulaakuba aciindi ankusu shiyandika kwaamba ayi tucisebenseshe akucilama kabotu? Alimwi sa teshi tukatalike kucisunishisha cintu ico? Sa kusunishisha shintu shakumubili nshetucite, teshi kukape kwaamba ayi tube anga ngumusankwa wacanike ulya wakakaka Yesu ndyaakamulwiita nshaakalinga kweelete kucita kwaamba ayi anoocita shiinji muncito  yakwe Lesa? (Amubelenge Maako 10:17-22.) Inga cabota abuumbi na twaceeshako shakucita mubuumi bwesu, kwaamba ayi tunoosebensesha ciindi ankusu shesu kucita kuyanda kwakwe Lesa!

17. Ino nciinshi ncotweelete kunookwiibaluka lyoonse?

¹⁷ Lyoonse tulyeelete kunookwiibaluka kwaamba ayi tuli munkondo, aboobo bushiku abushiku tulyeelete kuba balibambite kulwana. (Ciyu. 12:17) Taakuwo muntu umwi weenga watunyamwitaako liyawo lyesu lya lushomo. Tulyeelete kuyumya lushomo lwesu sobeene.

18. Ino nciinshi cakalinga kupa kwaamba ayi bashilumamba bamuciindi cakale kale banoocatisha liyawo lyabo?

¹⁸ Kale kale, shilumamba wakalinga kupekwa bulemu na watondesha ayi ngumuntu utacite boowa munkondo. Ano wakalinga kusebaana abuumbi na waboola kuŋanda kaatacite liyawo lyakwe. Tacitus mwine Loma shikulemba makani akale kale wakalemba ayi: “Cakalinga cintu cilensha nsoni abuumbi na shilumamba waswa kunkondo kaatacite liyawo lyakwe.” Ici ncecakalinga kupa kwaamba ayi bashilumamba banoocatisha cankusu liyawo lyabo.

19. Ino nshiinshi nshotweelete kucita kwaamba ayi tucatishe liyawo lyesu lya lushomo?

¹⁹ Inga twacatisha cankusu liyawo lyesu lya lushomo, kwiinda mukucanika kumabungano a Bwineklistu lyoonse, akushimikila bamwi paliina lyakwe Yehova a Bwaami bwakwe. (Ebu 10:23-25) Kwiilikaawo, tulapaila akubelenga Maswi akwe Lesa bushiku abushiku akukonkela nshetwiiya mushintu shoonse nshetucita. (2 Timo. 3:16, 17) Lyalo, taakuwo cilwanisho Satana nceenga wasebensesha ceshi cikatukome cakumaninina. (Isa. 54:17) Tulaakushitilishikwa a ‘liyawo lyesu linene lya lushomo.’ Tulaakucikonsha kuba bantu bataloondi ndyetutoosebensela pomwi abamakwesu abenankashi. Tulaakucikonsha kukoma munkondo yesu ya bushiku abushiku yakuyumya lushomo lwesu. Alimwi ciinditeewo ncakwaamba ayi tulaakuba kulubasu lwakwe Yesu ndyeshi akakome Satana abashikaswa bakwe munkondo.​—Ciyu. 17:14; 20:10.