1. Ino nceebonshi tulyeelete kunyumfwila Yehova?

TULYEELETE kunyumfwila * Yehova mukwiinga ngo Mulengi wesu. Aboobo, ngoocite nkusu shakutulwiita nshotweelete kucita. (Ciyu. 4:11) Cimwi ncotweelete kunyumfwila Yehova ncakwaamba ayi ngoocishi kabotu kweendelesha. Kuswabo kale kale, bantu baleendeleshekwa abantunyinaabo. Ano na tweelanisha bweendeleshi bwabo abwakwe Yehova, tulabona ayi Yehova ngomweendeleshi ucite busongo bwiinditeewo, ucite lusuno, kubota moyo, ankuumbu.—Kulo. 34:6; Loma. 16:27; 1 Joni 4:8.

2. Ino nceebonshi tulyeelete kunyumfwila Yehova kweelana a Bene Ebulu 12:9-11?

² Yehova alisuni ayi tunoomunyumfwila, kuteshi ceebo cakwaamba ayi tulamuloonda, sombi ceebo cakwaamba ayi tulimusuni alimwi tulamubona mbuli Ishiwesu shilusuno. Munkalata njaakalembela bene Ebulu, Paulo wakaamba ayi ‘tulyeelete kulibombya kuli Ishiwesu’ mukwiinga alatwiisha kwaamba ayi “tucafwikwe.”—Amubelenge Bene Ebulu 12:9-11.

3. (a) Ino inga twatondesha buyani ayi tulanyumfwila Yehova? (b) Ino njimiipusho nshi njeshi tubandike?

³ Tulanyumfwila Lesa kwiinda mukukonkela milawo yakwe mushintu shoonse akukaka mushimu wakushoma mubusongo bwesu. (Tus. 3:5) Cilaba cuubu kunyumfwila Yehova na twaishiba kabotu mibo yakwe ibotu. Ino nciinshi ncetwaambila boobo? Mukwiinga mibo yakwe njoimweendelesha mushintu shoonse nshaacita. (Kulu. 145:9) Kwiiya shiinji pali Yehova kulatucafwa kumusuna abuumbi. Alimwi na tulisuni Yehova, teshi tukanoyandika  mulongo wa milawo ya nshotweelete anshotuteelete kucita. Tulaakwelesha cankusu kulinyumfwa bweenka mbuli Yehova mbwaalinyumfwa akubona shintu bweenka mbwaashibona akuleya kucita shintu shibiibi. (Kulu. 97:10) Nacibi boobo, cimwi ciindi cilaba ciyumu kunyumfwila Yehova. Ino nceebonshi? Alimwi ino bamanene, bashali basankwa abanakashi inga beeya nshi kuswa kucakubonenaako cakatondesha Mweendeleshi Neyemiya; Mwaami Defedi; a Maliya banyina Yesu? Mutwi uyu utootucafwa kucana shikumbulo kumiipusho iyi.

4-5. Kweelana a Bene Loma 7:21-23, ino nceebonshi teshi cuubu kunyumfwila Yehova?

⁴ Cintu comwi ceenga capa kwaamba ayi kunyumfwila Yehova kube kuyumu, mbubi mbotwakapyana akutasalala. Aboobo cimwi ciindi tatusuniiwo kumunyumfwila. Pesule lyakwaamba ayi Adamu a Efa bakaka kunyumfwila Lesa lyalo akulya cisepo ncaakabakasha, bakalisalila beene cibotu acibiibi. (Mata. 3:22) Amunshiku shino bantu baanji balakaka butanjilishi bwakwe Yehova, balisuni kulisalila beene cibotu acibiibi.

⁵ Nabi kwaamba ayi tulimushi Lesa alimwi tulimusuni, cimwi ciindi tulaalilwa kumunyumfwila. Mutumwi Paulo alakwe wakalinga kucana lipenshi ili. (Amubelenge Bene Loma 7:21-23.) Bweenka mbuli Paulo, tulisuni kucita shiluleme pameenso akwe Yehova. Sombi lyoonse tulyeelete kulwana alunkumbwa lwakucita shibiibi.

6-7. Ino nciinshi cabili ceenga capa kwaamba ayi cibe ciyumu kunyumfwila Yehova? Amwaambe cakubonenaako.

⁶ Cimwi cilengesha ayi cibe ciyumu kunyumfwila Yehova, njimilawo akubona shintu kwa bantu bakumusena nkotwakakulila. Bantu baanji inga batulwiita shintu shipusene a Yehova nshaasuni. Aboobo tulyeelete kutolelela kweelesha cankusu kwaamba ayi tutanooyeeya anga mbantu abo. Atubandike cakubonenaako comwibo.

⁷ Mumisena imwi bantu balakakatisha bacanike kusebensa cankusu akucana maali aanji. Ili ndyelipenshi lyakacana nankashi wa liina lya Mary *. Kaatana kwiiya cancine pali Yehova, wakaya mukwiiya pacikolo comwi cakalinga kupukite abuumbi kucishi nkwaakalinga kukala. Mukwashi wakwe bakamukakatisha ayi atalike ncito yakufola maali aanji alimwi yeenga yapa kwaamba ayi bantu banoomulemeka. Alakwe nshaakalinga kusuni isho. Nacibi boobo, pesule lyakwiiya cancine pali Yehova akutalika kumusuna, wakaalula nshaakalinga kusuni kucita. Nacibi boobo tacakalinga cuubu, aboobo wakaamba ayi: “Cimwi ciindi ndabona shoolwe shiinji sha kucana ncito yeenga yampa kucana maali aanji, sombi ndicishi kwaamba ayi inga yapilinganya bubaambo bwangu bwakusebensela Yehova mbuli mbontoocita. Teshi cuubu kukaka ceebo ca kumusena nkondakakulila. Aboobo ndyeelete kupaila cankusu kwaamba ayi Yehova ancaafwe kukaka bweelesho bwakusumina ncito yeenga yampa kutacita shiinji muncito yakwe.”—Mate. 6:24.

8. Ino nshiinshi nsheshi tubandikeewo?

⁸ Bweenka mbuli mbotweeya, kunyumfwila Yehova ncintu cibotu. Ano abo bakapekwa nkusu shakweendelesha bamwi mbuli, bamanene, bashali basankwa abanakashi, balyeelete kwiindaawo kunyumfwila butanjilishi bwakwe Lesa; mukwiinga kucita boobo inga kwacafwa bamwi. Atubandike shakubonenaako shamu Baibo, sha mbweenga twasebensesha kabotu nkusu Lesa nshaakatupa kwaamba ayi tusangalashe nguwe.

9. Ino ngamapensho nshi Neyemiya ngaakacana?

⁹ Yehova wakapa bamanene mukuli unene wakweembela bantu bakwe. (1 Pita 5:2) Bamanene inga beeya shiinji kuswa kucakubonenaako cakwe Neyemiya mbwaakalinga kulama bantu  bakwe Yehova. Mbuli mweendeleshi mu Juda, Neyemiya wakalinga kuciteko nkusu pabantu. (Neye. 1:11; 2:7, 8; 5:14) Atubandike mapensho amwi Neyemiya ngaakalinga kwiindaamo. Wakanyumfwa ayi bantu babisha tempele alimwi bakacileka akupa maali akalinga kweelete kucafwilisha bene Lefi kweelana a Mulawo. Bene Juda tabakalinga kukonkela Mulawo wa Sabata, bamwi bakeeba abanakashi batakalinga kulambila Yehova. Mweendeleshi Neyemiya wakalinga kweelete kubukoma bukaalo buyumu ubu.—Neye. 13:4-30.

10. Ino Neyemiya wakacita buyani kwaamba ayi amane mapensho ngaakacana?

¹⁰ Neyemiya taakwe kusebensesha nkusu shakwe kukakatisha bantu kwaamba ayi bakonkele miyeeyo yakwe. Sombi wakapaila camoyo woonse kuli Yehova akusenga butanjilishi bwakwe, lyalo akwiisha bantu Mulawo wakwe Yehova. (Neye. 1:4-10; 13:1-3) Neyemiya wakaliceesha akusebensela pomwi abantu boonse, kwiilikaawo akubacafwa kuyaka alimwi lubumbu lwa Jelusalemu.—Neye. 4:15.

11. Kweelana a 1 Bene Tesalonika 2:7, 8, ino bamanene balyeelete kulama buyani bamulibungano?

¹¹ Mpashi bamanene inga tabacani mapensho mbuli aaya akacana Neyemiya, nacibi boobo, inga bakonkela cakubonenaako cakwe munshila shiinji. Kucakubonenaako, balasebensa cankusu kucafwa bamakwesu abenankashi. Alimwi tabalinyumfwiwo ayi baleenda bamwi ceebo ca nkusu sha butanjilishi nshebakapekwa. Sombi balalemeka bamakwesu abenankashi mulibungano. (Amubelenge 1 Bene Tesalonika 2:7, 8.) Mukwiinga balaliceesha alimwi balisuni bamakwesu abenankashi kuswa panshi lya moyo, balatondesha nkumbu ndyebatoobandikaabo. Mukwesu Andrew, uyo wasebensa mbuli munene kwa myaaka iinji wakaamba ayi: “Ndakesa mukushiba kwaamba ayi na munene kaatondesha nkumbu abushicibusa, bamakwesu abenankashi balayuminishikwa abuumbi. Na bamanene kabatondesha mibo iyi, bamakwesu abenankashi balabanyumfwila.” Mukwesu Tony alakwe wasebensa myaaka iinji mbuli munene wakaamba ayi: “Lyoonse ndelesha kukonkela kululika nkotucana  palilembo lya Bene Filipi 2:3 akunoobona bamwi kuba beenditeewo pali ndime. Ici cilancafwa kutakakatisha bamakwesu abenankashi ayi banonyumfwila.”

12. Ino nceebonshi bamanene ncobayandikila kuba baliceesha?

¹² Bamanene balyeelete kuba baliceesha bweenka mbuli Yehova. Nabi kwaamba ayi Yehova ngo Mweendeleshi wiinditeewo mububumbo boonse, “alakotama” akunyamuna “muntu upengete kuswa mulusuko.” (Kulu. 18:35; 113:6, 7) Alimwi Baibo ilatulwiita ayi Yehova, alipatite bantu balisumpula.—Tus. 16:5.

13. Ino nceebonshi munene alyeelete kulama mulaka wakwe?

¹³ Nshila munene mbweenga watondesha ayi alanyumfwila Yehova, ‘nkulama kabotu mulaka wakwe.’ Na munene taacishi kulama mulaka wakwe, inga waamba shibiibi na umwi taakwe kumutondesha bulemu. (Jemu. 1:26; Gala. 5:14, 15) Mukwesu Andrew, ngotwalinga twaambawo kale, wakaamba ayi: “Paciindi cimwi ndakalinga kulinyumfwa anga inga ndaamba maswi atabete kabotu kulwiita nankashi umwi utana kuntondesha bulemu mbuli munene. Sombi ndakakutumana akuyeeya shakubonenaako shamu Baibo sha basankwa bashomeka isho shakancafwa kubona kuyandika kwa kuliceesha alimwi akukalika moyo.” Munene inga watondesha ayi alanyumfwila Yehova kwiinda mukubandika calusuno akutondesha nkumbu kubamakwesu abenankashi abamanene nyina.—Kolo. 4:6.

14. Ino ngumukuli nshi Yehova ngwaakapa bashali basankwa, alimwi ino nshiinshi nshalangila kuswa kuli mbabo?

¹⁴ Yehova wakapa mushali musankwa mukuli wakuba mutwi wamukwashi, aboobo Lesa alalangila mushali kwiisha akululamika bana bakwe. (1 Koli. 11:3; Efe. 6:4) Nacibi boobo, nkusu shakapekwa mushali musankwa shilicite mposheela—mukwiinga Yehova uyo mukwashi uli woonse nkookusha liina, alaakubapa mulandu pankusu nshaakabapa. (Efe. 3:14, 15) Bashali basankwa inga batondesha kunyumfwila Yehova kwiinda mukusebensesha nkusu shabo munshila isangalasha Yehova. Inga beeya shiinji kwiinda mukwiiya pamakani aamba pabuumi bwa Mwaami Defedi.

15. Ino nceebonshi Mwaami Defedi ncakubonenaako cibotu kubashali basankwa?

¹⁵ Yehova wakasala Defedi kuba mutwi wa mukwashi wakwe alimwi amushobo woonse wa bene Isilaeli. Mbuli Mwaami, Defedi wakalinga kucite nkusu abuumbi. Cimwi ciindi wakalinga kusebensesha nkusu shakwe munshila itabete kabotu akucita shilubo shinene. (2 Samwe. 11:14, 15) Nacibi boobo, wakatondesha kunyumfwila Yehova kwiinda  mukusumina kululikwa a Yehova. Wakalinga kupaila kuli Yehova camoyo woonse. Alimwi wakeelesha cankusu kunyumfwila kululika kwakwe Yehova. (Kulu. 51:1-4) Kwiilikaawo, wakalinga muntu uliceesha alimwi usumina lucafwo kuswa kubamwi kwiilikaawo abanakashi. (1 Samwe. 19:11, 12; 25:32, 33) Defedi wakeeyawo pashilubo shakwe akululamika buumi bwakwe boonse kusebensela Yehova.

16. Ino bashali basankwa inga beeya nshi kucakubonenaako cakwe Defedi?

¹⁶ Atubandike shimwi bashali basankwa nsheenga beeya kuswa kucakubonenaako ca Mwaami Defedi: Amusebenseshe kabotu nkusu Yehova nshaakamupa. Amusumine na mwaciita cilubo, alimwi na bamwi bamululika kuswa mu Baibo amusumine. Na mwacita boobo, mukwashi unanomulemeka ceebo cakuliceesha kwanu. Ndyemutoopaila amukwashi, amucite boobo camoyo woonse, lyalo balaakubona mbomushomete muli Yehova. Alimwi ciyandika abuumbi, amutondeshe kwaamba ayi kusebensela Yehova ncecintu ciyandika abuumbi mubuumi bwanu. (Duto. 6:6-9) Na mukwashi wabona cakubonenaako canu cibotu, balaakusuna kumukonkela.

17. Ino ngumukuli nshi Yehova ngwaakapa mushali mwanakashi?

¹⁷ Yehova wakapa mushali mwanakashi uli woonse mukuli uyandika mumukwashi, alimwi ankusu pabaana. (Tus. 6:20) Shintu shicita mushali mwanakashi anshaamba, inga shakuma baana mubuumi bwabo boonse. (Tus. 22:6) Amubone bashali banakashi nsheenga beeya kuswa kucakubonenaako cakwe Maliya, banyina Yesu.

18-19. Ino bashali banakashi inga beeya nshi kuswa kucakubonenaako cakwe Maliya?

¹⁸ Maliya wakalinga kwaashi kabotu Malembo. Wakalinga kulemeka Yehova abuumbi alimwi wakalinga kucite bushicibusa bubotu anguwe. Wakalinga kulibambite kunyumfwila butanjilishi bwakwe Yehova, nabi kwaamba ayi kucita boobo kwakalinga kusansulula kwaalula bukaalo bwakwe.—Luka 1:35-38, 46-55.

¹⁹ Nobashali banakashi, kuli nshila shiinji mbweenga mwakonkela cakubonenaako cakwe Maliya. Cakutaanguna, mulyeelete kutolelela kuba abushicibusa bubotu a Yehova kwiinda mukucita ciiyo ca Baibo capalwaanu akupaila lyoonse palwaanu. Cabili, mulyeelete kuba bantu balibambite kwaalula bukaalo bwanu kwaamba ayi musangalashe Yehova. Kucakubonenaako, mpashi mwakakomena abashali bakalinga kufwambaana kukalala lyoonse akwaamba ca bukali kubaana. Aboobo mpashi amwebo mwakalinga kubona ayi cilibo kabotu kulela baana munshila iyi. Cimwi ciindi inga caba ciyumu kukalika moyo akutakalala bwangu nabi pesule lyakwiiya Yehova mbwaasuni ayi munoolela baana, bunene bunene na mwalema  alimwi na baana tabasuni kumunyumfwila. (Efe. 4:31) Ici nceciindi ncomweelete kupaila kuli Yehova kwaamba ayi amucaafwe. Mushali mwanakashi Lydia wakaamba ayi: “Cimwi ciindi, ndyeelete kupaila cankusu kwaamba ayi ntaambi cabukali na mwanaangu musankwa wakaka kunyumfwila. Cimwi ciindi ndeemikana kaantana kuposha maswi, akutalika kupaila mumoyo kwaamba ayi Yehova ancaafwe. Mupailo ulancafwa kukalika moyo.”—Kulu. 37:5.

20. Ino ndipenshi nshi bashali bamwi ndyebacana, alimwi ino inga balikoma buyani?

²⁰ Bashali bamwi balaba alipenshi lyakwaalilwa kutondesha lusuno kubana babo. (Taitasi 2:3, 4) Balaalilwa ceebo cakwaamba ayi bakakula kwakubula kutondeshekwa lusuno kuswa kubashali babo. Na amwebo mbomwakakula ubo, tamweelete kubooshawo cilubo ico cakacita bashali banu. Mushali ukonkela kuyanda kwakwe Yehova inga weeya kutondesha lusuno kubana bakwe. Inga caba ciyumu kwaalula mbwayeeya, mbwaalinyumfwa, alimwi ambwaacita shintu. Sombi ici tacaambi ayi inga taacikoonshi kwaaluka, uko kweenga kwamucafwa mwiine akucafwa mukwashi wakwe.

21-22. Kweelana a Isaya 65:13, 14, ino mbubotu nshi mbotucana na katunyumfwila Yehova?

²¹ Mwaami Defedi wakalinga kubushi bubotu bwa kunyumfwila Yehova. Wakalemba ayi: “Milasho yakwe Yehova ililuleme, ilalengesha moyo kusangalala; milawo yakwe Yehova ilisalalite, ilapa kwaamba ayi meenso acaluke. Musebenshi wanu wacenjeshekwa anjiyo; kwikonkela, kulaletela cilambu cinene.” (Kulu. 19:8, 11) Munshiku shino, tulabubona bupusano buli pakati kabaabo banyumfwila Yehova abaabo bakaka kululika kwakwe kwa lusuno. Abo banyumfwila Yehova “balaakunosangalala ceebo cakukondwa kweshi kukanooli mumyoyo yabo.”—Amubelenge Isaya 65:13, 14.

²² Na bamanene, bashali basankwa abanakashi kabanyumfwila Yehova, balaba abuumi bubotu, mikwashi yabo ilaba isangalete, alimwi libungano lyoonse lilaba licatene abuumbi. Alimwi ciinditeewo pa sheeshi shoonse, Yehova alasangalala. (Tus. 27:11) Taakuwo coolwe ceenga ceenda kusangalasha Yehova!