MUTWI WAKWIIYA 38
“Amwise Kuli Ndime, . . . nebo Ntoomupa Kookesha”
“Amwise kuli ndime, mwebo noonse nomutoopenga akulemenwa, nebo ntoomupa kookesha.”—MATE. 11:28.
LWIIMBO 17 “Ndisuni”
NSHESHI TWIIYE *
1. Kweelana a Mateyo 11:28-30, ino Yesu wakashomesha nshi?
YESU wakashomesha likoto lyakalinga kumukutika ayi alaakubacitila shintu shibotu. Aboobo wakaamba ayi “Amwise kuli ndime,” “nebo ndaakumupa kookesha.” (Amubelenge Mateyo 11:28-30.) Ici cakalinga cishomesho cancinencine kuteshi kwaambabo. Kucakubonenaako, amuyeeye mwanakashi ulya wakalinga kucite bulwashi bunene.
2. Ino Yesu wakamucitila nshi mwanakashi ulya wakalinga mulwashi?
2 Mwanakashi ulya wakalinga kuyandika lucafwo lwa kushilikwa. Wakeelesha kuya ku madokota bapusenepusene kwaamba ayi mpashi inga bamushilika. Wakapenga kwa myaaka 12 kwakubula koola. Kweelana a Mulawo, mwanakashi uyu taakalinga kusalalite. (Lefi 15:25) Lyalo wakanyumfwa mpuwo ayi Yesu inga wamushilika, aboobo wakaya mukumulangoola. Ndyaakamucana, wakacata mweela lya cisani cakwe capeculu, lyalo peenkapo wakoola! Nacibi boobo, Yesu taakwe kweelabo pakumoolesha, sombi wakaamba amaswi akapa kwaamba ayi mwanakashi ulya alinyumfwe kuba muntu uyandika alimwi ucindeme. Kucakubonenaako, ndyaakalinga kwaambaakwe, Yesu wakasebensesha liswi liyuminisha alimwi lyabulemu ayi “mwanaangu.” Cakutatoonsha, maswi aya akamuyuminisha abuumbi mwanakashi ulya!—Luka 8:43-48 nwt.
3. Ino njimiipusho nshi njeshi tubandike?
3 Na mwaboona apa, mwanakashi ulya ngowakaya kuli Yesu. Wakacitawo comwi kwiinda mukuya kuli Yesu. Amunshiku shino mbocibete. Aswebo ndiswe tweelete kutaanguna kuya kuli Yesu.
Pacecino ciindi, Yesu taatoocita shaankamiko sha koolesha bantu abo baya kuli nguwe. Sombi aciita bantu ayi: “Amwise kuli ndime, . . . Nebo ndaakumupa kookesha.” Mumutwi uyu tutobandika miipusho yosanwe: Ino inga twaya buyani kuli Yesu? Ino Yesu wakasansulula nshi ndyaakaamba ayi: “Amulipatike lijoko lyangu”? Ino nshiinshi nsheenga tweeya kuswa kuli Yesu? Ino nceebonshi incito njaakatupa ilatupa kookesha na kuyuminisha? Alimwi inga twacita buyani kwaamba ayi tutolelele kuyuminishikwa mu lijoko lyakwe Yesu?“AMWISE KULI NDIME”
4-5. Ino nshiinshi nsheenga twaciita kwaamba ayi tuye kuli Klistu?
4 Nshila yomwi mbweenga twaya kuli Yesu nkwiinda mukwiiya shiinji pashintu nshaakaamba akucita. (Luka 1:1-4) Swebo sobeene ndiswe tweelete kwiiya Baibo nshoiisha pali Yesu. Inga twaya kuli Yesu kwiinda mukusalawo kubombekwa akuba shikwiiya wakwe Klistu.
5 Nshila imwi mbweenga twaya kuli Yesu nkwiinda mukuya kubamanene bamulibungano ndyetucite lipenshi. Yesu alalama mbelele shakwe kwiinda mukusebensesha “shipo mubantu” ishi. (Efe. 4:7, 8, 11; Joni 21:16; 1 Pita 5:1-3) Tulyeelete kucitawo comwi kwiinda mukuya kuli mbabo akusenga lucafwo. Bamanene inga tabashibiwo shili mumiyeeyo yesu anshetutoyandika. Kucakubonenaako, mukwesu umwi wa liina lya Julian wakaamba ayi: “Ndakalinga kweelete kuswa pa Bethel ceebo ca kuciswa, aboobo mubyaanji wakandwiita ayi njite bamanene kwaamba ayi bese banjuminishe. Pakutaanguna ndakalinga kubona anga nshindakalinga kuyandika kuyuminishikwa. Nacibi boobo ndakasenga ayi bese banjuminishe, kufwakasha kwa bweembeshi kulya kwakalinga anga ncipo cibotu abuumbi ncentana kutambulawo kale.” Cakubonenaako ca bamanene bashomeka bobilo bakafwakashila mukwesu Julian, inga catucafwa kushiba “miyeeyo yakwe Klistu,” nkokwaamba ayi, kunyumfwisha akukonkela Klistu mbwaakalinga kuyeeya akubona shintu. (1 Koli. 2:16; 1 Pita 2:21) Na batucafwa munshila iyi nkokwaamba ayi ncakwiila batupa cipo ciinditeewo pacipo cimwi cili coonse.
“AMULIPATIKE LIJOKO LYANGU”
6. Ino Yesu wakalinga kusansulula nshi ndyaakaamba ayi: “Amulipatike lijoko lyangu”?
6 Yesu ndyaakaamba ayi: “Amulipatike lijoko lyangu,” mpashi wakalinga kusansulula “Kusumina butanjilishi bwakwe.” Na mpashi wakalinga kusansulula ayi “Amulipatike lijoko lyangu pomwi andime, lyalo tunoosebensela Yehova pomwi.” Muli moonse mwaakalinga kulansha, maswi akwaamba ayi lijoko alasansulula kusebensa.
7. Kweelana a Mateyo 28:18-20, ino twakapekwa ncito nshi, alimwi nshiinshi nsheenga twashooma?
7 Tulasumina bwiite bwakwe Yesu na twalyaaba kuli Yehova akubombekwa. Yesu wakeeta muntu uli woonse kusa kuli nguwe alimwi inga taakakiwo muntu uli woonse usuni kusebensela Lesa kuswa panshi lya moyo. (Joni 6:37, 38) Beshikwiiya bakwe Klistu boonse bakapekwa coolwe cakwaabanamo lubasu muncito Yehova njaakapa Yesu. Inga twashooma kwaamba ayi Yesu alaakunooli andiswe akutucafwa kukumanisha ncito iyi.—Amubelenge Mateyo 28:18-20.
“AMWIIYE KULI NDIME”
Amuyuminishe bamwi bweenka mbuli Yesu mbwaakacita (Amubone mapalagilafu 8-11) *
8-9. Ino nceebonshi bantu baliceesha bakalinga kusuni kusena pafwiifwi a Yesu, alimwi ino njimiipusho nshi njotweelete kuliipusha?
8 Bantu baliceesha bakasena pafwiifwi a Yesu. (Mate. 19:13, 14; Luka 7:37, 38) Ino nceebonshi? Amuyeeye bupusano bwakalinga pakati ka baFalisi a Yesu. Bamatanjilili babupailishi aba, bakalinga bantu batacite lusuno alimwi balisumpula. (Mate. 12:9-14) Yesu wakalinga muntu ucite lusuno alimwi uliceesha. BaFalisi bakalinga bantu basuni kupuka alimwi basuni kuba bayandika. Yesu wakaamba ayi tacakalinga kabotu kuba muntu wa mushobo uyo, aboobo wakaiisha bashikwiiya bakwe kuba bantu baliceesha alimwi balibambite kusebensela bamwi. (Mate. 23:2, 6-11) BaFalisi bakalinga kulyatilila bamwi kwiinda mukubakonga. (Joni 9:13, 22) Yesu wakayuminisha bamwi kwiinda mukubacitila shintu shibotu akubalwiita maswi ayuminisha.
9 Sa amwebo mulakonkela cakubonenaako cakwe Yesu? Amuliipushe ayi: ‘Sa ndishibikitwe mbuli muntu utakalali bwangu alimwi uliceesha? Sa ndasumina kusebensa ncito bamwi nshobabona ayi nsha panshi? Sa ndatondesha kubota moyo kubamwi?’
10. Ino bantu bakalinga kulinyumfwa buyani kusebensa a Yesu?
10 Yesu wakalinga kunyumfwana abuumbi abaabo mbwaakalinga kusebensaabo, alimwi wakalinga kusangalala kubaiisha. (Luka 10:1, 19-21) Wakalinga kuyuminisha bashikwiiya bakwe kwiipusha miipusho, lyalo alakwe wakalinga kubeepusha miipusho kwaamba ayi ashibe nshobakalinga kuyeeya. (Mate. 16:13-16) Bweenka mbuli imbuto yakashitilishikwa kabotu mboimena kabotu, bashikwiiya bakwe bakaya panembo. Bakabikila maano kushintu nshaakalinga kubaiisha akucata shisepo, nkokwaamba ayi bakalinga kucita ncito shibotu.
Amube muntu ngweenga bamwi babandikaakwe
Amube bantu basebensa cankusu mukushimikila
Amube bantu baliceesha alimwi basebensa cankusu *
11. Ino njimiipusho nshi njotweelete kuliipusha?
11 Sa mwakapekwa nkusu shakutanjilila bamwi? Na mboboobo, amuliipushe ayi: ‘Sa ndanyumfwana abaabo mbontanjilila kuŋanda na kuncito? Sa ndacita shintu shipa kwaamba ayi tunoonyumfwana abaabo mbontanjilila? Sa ndayuminisha bamwi kwiipusha miipusho? Sa ndakutika na bamwi kabaamba nshebatoyeeya?’ Tatweelete kuba anga mba Falisi, bakalinga kukalala na babeepusha miipusho akupensha bakalinga kubalwiita shipusene akuyeeya kwabo.—Maako 3:1-6; Joni 9:29-34.
“MULAAKUCANA KOOKESHA”
12-14. Ino nceebonshi incito Yesu njaakatupa ilatupa kookesha na kutuyuminisha?
12 Ino nceebonshi tulacana kookesha na kuyuminishikwa ndyetusebensa ncito Yesu njaakatupa? Kuli sheebo shiinji, ano atubandikewobo shiniini pasheesho.
13 Tulicite bamatanjilili beendite mutanjilili umwi uli woonse. Yehova, Mutanjilili wesu Wiinditewo, taacitewo lunkutwe kubasebenshi bakwe. Alalumba pancito njetusebensa. (Ebu. 6:10) Alimwi alatupa ankusu nshetuyandika kwaamba ayi tucikoonshe kukumanisha mukuli ngwaakatupa. (2 Bene Kolinto 4:7; Gala. 6:5) Yesu Mwaami wesu, wakatutondesha cakubonenaako ca mbotweelete kutanjilila bantu. (Joni 13:15) Abalo bamanene batulama baleelesha kukonkela cakubonenaako cakwe Yesu, “Mweembeshi munene.” (Ebu. 13:20; 1 Pita 5:2) Baleelesha kutondesha nkumbu, kuyuminisha, akutaloonda ndyebatokwiisha akutushitilisha.
14 Tulicite beshicibusa bali kabotu abuumbi. Taakuwo bantu bacite beshicibusa bacite lusuno mbuli beshicibusa mbotucite, alimwi basebensa ncito ibotu mbuli njetusebensa. Amuyeeyebo: Tulicite coolwe cakusebensa abamakwesu abenankashi bacite mibo ibotu sombi bataliboni ayi balindite bamwi. Bamakwesu bamwi balicite lushibo abuumbi muncito shimwi, sombi tabalisumpuli, alimwi balabona bamwi ayi bali beenditeewo. Balatubona ayi tuli basebenshinyinaabo abeshicibusa babo. Alimwi balitusuni abuumbi cakwaamba ayi inga basumina akwaaba buumi bwabo ceebo ca ndiswe!
15. Ino incito njetusebensa tulyeelete kwiibona buyani?
15 Tulicite ncito ibotu abuumbi. Tulaiisha bantu cancine pali Yehova akutondesha patuba bubeshi bwakwe Satana. (Joni 8:44) Satana alapensha bantu abubeshi bubapa kwaamba ayi batabiiwo abulindilishi. Kucakubonenaako, Satana alisuni tunoobona Yehova ayi teshi akatulekelelewo pa shibiibi shesu alimwi taatusuniiwo. Ubu mbubeshi bwa mwaana munene bupa bantu kulefuka! Na twesa kuli Klistu, Yehova alatulekelela shibiibi shesu. Alimwi lushinisho ndwakwaamba ayi Yehova alitusuni abuumbi soonse. (Loma. 8:32, 38, 39) Cilasangalasha abuumbi kucafwa bantu kwiiya kushoma Yehova, akubona kucita boobo mbokubacafwa mubuumi bwabo!
AMUTOLELELE KUCANA KOOKESHA NDYEMULIPATIKITE LIJOKO LYAKWE YESU
16. Ino mukuli Yesu ngwakatupa ulipusene buyani amikuli imwi ili yoonse njeenga katucite?
16 Mukuli Yesu ngwaakatulwiita kunyamuna ulipusene amukuli umwi uli woonse. Kucakubonenaako, bantu baanji balalinyumfwa kulema abuumbi pesule lyakukotoka kuncito cakwaamba ayi tababiiwo alusangalalo. Ano mubupusano, swebo na twasebensela Yehova a Klistu tulalinyumfwa kuba alusangalalo abuumbi. Inga caba ayi cimwi ciindi twalema abuumbi kuncito, aboobo twalikakatishabo kuya kumabungano bushiku ubo. Ano liinji pesule lyakubungana, tulalinyumfwa kookesha akuba ankusu. Ici ncecicitika na tweelesha cankusu kuya mukushimikila akucita ciiyo ca Baibo capalweesu. Na twacikonsha kucita boobo tulayuminishikwa abuumbi akulinyumfwa kookesha!
17. Ino nciinshi ncotweelete kwiibaluka alimwi ino nceebonshi?
17 Tulyeelete kwiibaluka kwaamba ayi nkusu nshetucite mbuli bantu, shilicite mposheela. Aboobo tulyeelete kucenjela ambotusebensesha nkusu shesu. Kucakubonenaako, inga twanyonyoola nkusu shesu kwiinda mukusuna bunene kulangoola shintu shakumubili. Amunyumfwe Yesu nshaakalwiita musankwa wacanike mubile uyo wakalinga weepusha Yesu ayi: “Ino inga ndacita buyani kwaamba ayi nkabe abuumi butamaani?” Musankwa uyu wakalinga kukonkela kale Mulawo. Alyeelete wakalinga muntu uli kabotu, mukwiinga libuku lyakwe Maako lilaamba ayi Yesu “wakamulangilisha calusuno.” Yesu wakeeta mweendeleshi wacanike uyu. Wakamulwiita ayi: “Koya, ukoolishe shintu shoonse nshoocite . . . lyalo ndyeshi use unkonkele.” Musankwa uyu wakabula cakucita, sombi citooboneka anga wakaalilwa kushiya ‘bubile.’ (Maako 10:17-22) Aboobo wakalikaka lijoko lyakwe Yesu akutolelela kusebensela “buboni.” (Mate. 6:24) Nimwalinga ndimwe, naakwiinga mwakasalawo nshi?
18. Ino nciinshi ncotweelete kucita ciindi aciindi, alimwi ino nceebonshi?
18 Inga cabota na ciindi aciindi, katukutumana akuyeeya nshetutoobika panembo. Ino nceebonshi? Tulisuni kushinisha kwaamba ayi tutoosebensesha kabotu ciindi cesu. Musankwa wacanike wa liina lya Mark wakaamba ayi: “Kwa myaaka iinji ndakalinga kuyeeya anga ndakalinga kukala buumi bwakutalila shiinji. Ndakalinga painiya, sombi lyoonse ndakalinga kuyeeyabo pa maali ambweenga ndacaana shintu shimwi shakumubili. Nshindakalinga kucishi cakalinga kumpa kutaba alusangalalo. Lyalo ndakesa mukushiba kwaamba ayi ndakalinga kusowa ciindi cilaamfu ankusu shangu kukucita shintu nshendakalinga kusuni, lyalo ndakalinga kusebenseshabo ciindi ankusu shiniini kusebensela Yehova.” Mark wakaalula mbwakalinga kuyeeya akutalika kukala buumi bwaakutalila shiinji kwaamba ayi anooba aciindi cakusebensela Yehova. Wakaamba ayi: Cimwi ciindi ndayeeya shakuba amaali aanji, ano mukwiinga Yehova a Yesu balancafwa, ndabikila maano kukusebensela Yehova.”
19. Ino nciinshi ncotuyandikila kushiba kabotu bwakusebensa?
19 Tulyeelete kucita shintu shotatwe kwaamba ayi tutolelele kucana kookesha ndyetupatikite lijoko lyakwe Yesu. Cakutaanguna, tulyeelete kushiba kabotu bwakusebensa. Iyi ncito njakwe Yehova, aboobo tulyeelete kusebensa kweelana akuyanda kwakwe. Swebo tuli basebenshi, Yehova ngo Mwine ncito. (Luka 17:10) Teshi tukacikoonshe kusebensa kabotu na katukakatila kusebensa kweelana akuyanda kwesu. Nabi ŋombe icite nkusu buyani inga taisebensi kabotu na lyoonse kaitasuni kukonkela butanjilishi bwa wooyo waipatika mu lijoko. Ano na twasebensa ncito yakwe Yehova kweelana akuyanda kwakwe tulaakuswitilila. Atwiibaluke kwaamba ayi taakuwo muntu nabi womwi weenga walengesha kwaamba ayi incito yakwe Yehova yaalilwe kukumanishikwa!—Loma. 8:31; 1 Joni 4:4.
20. Ino nciinshi ncotweelete kulipatikila lijoko lyakwe Yesu?
20 Cabili, amusebense amoyo womwi. Tulasebensa kwaamba ayi tulumbaishe Ishiwesu shilusuno, Yehova. Abo bakalinga kusebensela Yehova amoyo wakulisuna muciindi ca batumwi, bakaalilwa kutolelela muncito Yesu njaakalinga wabapa. (Joni 6:25-27, 51, 60, 66; Fili. 3:18, 19) Abo bakalinga kusebensela Yehova ceebo cakwaamba ayi bakalinga kumusuni alimwi bakalinga kusuni abantu babyaabo, bakatolelela kuba alusangalalo. Tabakwe kucileka kulipatika lijoko mubuumi bwabo boonse abulindilishi bwakuba pomwi a Klistu kwiculu. Aswebo tulyeelete kutolelela kulipatika lijoko lyakwe Yesu amoyo wakusebensela Yehova ceebo cakwaamba ayi tulimusuni.
21. Kweelana a Mateyo 6:31-33, ino nshiinshi nsheenga twalangila Yehova kutucitila?
21 Catatu, tulyeelete kutolelela kuba abulindilishi. Twakasala buumi bwakulyaaba akusebensa cankusu. Yesu wakatucenjesha ayi tulaakupenshekwa. Nacibi boobo, inga twalangila ayi Yehova alaakutupa nkusu shakuliyumya. Kutolelela kuliyumya kulaakuyumya lushomo lwesu. (Jemu. 1:2-4) Alimwi inga twalangila ayi Yehova alaakutupa nshetuyandika, Yesu alaakutulama kabotu, bamakwesu abenankashi balaakutuyuminisha. (Amubelenge Mateyo 6:31-33; Joni 10:14; 1 Tesa. 5:11) Cakutatoonsha, tulicite shoonse nshetuyandika kwaamba ayi tuliyuumye mumapensho?
22. Ino nshiinshi sheshi shikatupe kuba alusangalalo?
22 Mwanakashi ulya wakashilikwa a Yesu wakayuminishikwa pabushiku bweenka bulya. Ano kwaamba ayi atolelele kucana kookesha kwa muyayaya wakalinga kweelete kuba shikwiiya wakwe Klistu ushomeka. Mutobona ayi wakacita buyani? Amuyeeyebo cilambu cakuba pomwi a Yesu kwiculu na ncakwaamba ayi wakasumina kulipatika lijoko lyakwe Yesu! Na kuli nshaakashiya pakwaamba ayi abe shikwiiya wakwe Klistu, inga tasheelani ashoolwe nshaakalinga kusa mukucana. Inga caba ayi tulicite bulindilishi bwakuba abuumi kwiculu na pacishi capanshi kwa muyayaya, tulaakuba alusangalalo mukwiinga twakasumina kusa kuli Yesu.
LWIIMBO 13 Klistu, Cakubonenaako Cesu
^ par. 5 Yesu atootwiita ayi tuye kuli nguwe. Ino nshiinshi nshotweelete kucita kwaamba ayi tuye kuli nguwe? Mutwi uyu utootucafwa kucana cikumbulo kumwiipusho uyo, akutucafwa kushiba kusebensa pomwi a Klistu mbokutupa kookesha na kutuyuminisha.