1-2. (a) Ino nceebonshi ncotutolangila ayi Amagedoni ikese? (b) Ino njimiipusho nshi njeshi tubandike mumutwi uyu?

SA mwakanyumfwawo kale bantu kabaamba ayi Amagedoni ni nkondo yama boomu yeshi ikanyonyoole cishi coonse? Mubupusano akuyeeya kwa bantu, Baibo ilaamba ayi Amagedoni ilaakupa kwaamba ayi shintu shibe kabotu! (Ciyu. 1:3) Inkondo ya Amagedoni teshi ikaloobye bantu boonse! Munshila nshi?

² Baibo ilaiisha ayi inkondo ya Amagedoni ilaakunyonyoola buleelo boonse bwa bantu. Inkondo iyi ilaakunyonyoola bantu bacita shibiibi akupulusha baluleme. Alimwi ilaakupulusha bantu kwiinda mukunyonyoola abaabo banyonyoola cishi. (Ciyu. 11:18) Kwaamba ayi twaanyumfwishishe kabotu makani aya, atubandike miipusho yone: Ino Amagedoni nciinshi? Ino nshiinshi sheshi shikataangune kucitika Amagedoni kaitana kutalika? Ino inga twacita buyani kwaamba ayi tukapuluke Amagedoni? Ino inga twacita buyani kwaamba ayi tutolelele kuba bashomeka mamanino ndyaatoya cisena pafwiifwi?

3. (a) Ino liswi lyakwaamba ayi “Amagedoni” lilasansulula nshi? (b) Kweelana a Ciyubululo 16:14, 16, ino nciinshi nceenga twaambila ayi Amagedoni teshi musena wiine?

³ Amubelenge Ciyubululo 16:14, 16. Liswi lyakwaamba ayi “Amagedoni” lilacanikabo linkanda lyomwi mu Baibo, lilaswa kuliswi lyamuci Ebulu lisansulula “Kalundu ka Megido.” (Ciyu. 16:16) Megido lyakalinga liina lya ndabala yakale kale mucishi ca bene Isilaeli. (Jos. 17:11) Ano Amagedoni teshi liina lya musena ucanika pacishi ca panshi sobwe. Sombi ngamaswi asansulula ciindi ndyeshi “bamaami boonse bapacishi” bakabunganishikwe pomwi kwaamba ayi balwane Yehova. (Ciyu. 16:14). Nacibi boobo, mumutwi  uyu, tutoosebensesha liswi lya “Amagedoni” kusansulula nkondo yeshi ikatalika pesule lya kubunganshikwa kwa bamaami bapacishi. Ino tulishi buyani ayi Amagedoni ngumusena wacikoshanyobo? Cakutaanguna, taakuwo kalundu keetwa ayi Megido. Cabili, musena wa Megido nguniini abuumbi cakwaamba ayi “bamaami boonse bapacishi capanshi” abashilumamba babo, ashilwanisho shabo sha nkondo inga tabakwani. Catatu, kweelana ambweshi twiiye mumutwi uyu, nkoondo ya Amagedoni ilaakutalika ciindi “bamaami” bapacishi capanshi ndyeshi bakalwane bantu bakwe Lesa, bekala mumbasu shipusenepusene sha pacishi coonse ca panshi.

4. Ino nceebonshi Yehova ncaakaambila sha Megido kulansha kunkondo inene yakweelaako?

⁴ Ino nceebonshi Yehova ncaakaambila sha Megido kulansha kunkondo inene yakweelaako? Nceebo cakwaamba ayi Megido a Cinyika ca Jesiliilu cakalinga pafwiifwi, yakalinga misena nkobakalinga kulwanina nkondo. Cimwi ciindi, Yehova wakalinga kucafwa bantu bakwe kukoma nkondo isho. Kucakubonenaako, Lesa wakacafwa Moomboloshi Balaki kukoma bashilumamba ba bene Kenani bakalinga kutanjililwa a Sisela ‘pafwiifwi akantupu ka Megido.’ Balaki amushinshimi mwanakashi Debola bakalumba Yehova ceebo cakubacafwa kukoma. Bakeemba ayi: “Mwiculu ashalo nyenyeenshi shakalwana . . . shakalwana Sisela. Mukuuku wa maanshi mu Lweenge lwa Kishoni wakabatola boonse.”—Boombo. 5:19-21.

5. Ino inkondo ya Amagedoni ilaakuba ipusene buyani a nkondo yakalwana Balaki?

⁵ Lwiimbo lwakeemba Balaki a Debola lwakamana amaswi akwaamba ayi: “Aboobo balwani banu boonse abalobe, No Yehova, sombi abo bamusuni babe anga ndisuba liswa cankusu.” (Boombo. 5:31) Andyeshi kukabe Amagedoni, Lesa ulaakunyonyoola balwani bakwe, akupulusha baabo bamusuni. Nacibi boobo, pali bupusano pankondo shobilo ishi. Ndyeshi kukabe nkondo ya Amagedoni, bantu bakwe Lesa teshi bakaabanemo lubasu mukulwana. Alimwi teshi bakabewo ashilwanisho sha nkondo! ‘Nkusu [shabo] shilaakuba mukukalika moyo akutondesha lushomo’ muli Yehova abeshinkondo bakwe bakwiculu.—Isa. 30:15; Ciyu. 19:11-15.

6. Ino Yehova alyeelete ulaakubanyonyoola buyani balwani bakwe pabushiku bwa Amagedoni?

⁶ Ino Yehova alaakucita buyani kwaamba ayi akome balwani bakwe munkondo ya Amagedoni? Inga wasebensesha nshila shipusenepusene. Kucakubonenaako, inga wasebensesha shitentaanshi, imfula ya mabwe, alimwi a tulumba. (Jobo 38:22, 23; Ese. 38:19-22) Inga wapa kwaamba ayi balwani bakwe batalike kulwana beene abeene. (2 Maka. 20:17, 22, 23) Alimwi mpashi inga wacaya bacita shibiibi kwiinda mukusebensesha baanjelo. (Isa. 37:36) Nshila ili yoonse Lesa njeshi akasebenseshe, alaakukoma. Balwani bakwe boonse balaakunyonyoolwa. Aboobo baluleme boonse balakupuluka.—Tus. 3:25, 26.

7-8. (a) Kweelana a 1 Bene Tesalonika 5:1-6, ino bamaami bapacishi balaakucita nshi? (b) Ino nceebonshi ubu bulaakuba bubeshi bubiibi abuumbi?

⁷ Bantu balaakutaanguna koolobesha ayi “luumuno akuliiba” lyalo ndyeshi “bushiku bwakwe Yehova” bukashiike. (Amubelenge 1 Bene Tesalonika 5:1-6.) “Bushiku bwakwe Yehova” butokwaambwa pa 1 Bene Tesalonika 5:2, butoosansulula “mapensho anene.” (Ciyu. 7:14) Ino tulaakushiba buyani ayi mapensho anene ali pafwiifwi kutalika? Baibo ilatulwiita ayi kulaakuba koolobesha kutana kucitikaawo kale. Ici cilaakuba ncecishibilo ca kutalika kwa mapensho anene.

⁸ Uko nkweshi kukabe koolobesha kwa “luumuno akuliiba” Baibo nkoyakaambila limwi. Ino nciinshi ceshi cikape kwaamba ayi bamaami bapacishi boolobeshe boobo? Sa bamatanjilili beshibupailishi abalo balakwaabanamo lubasu? Inga caba. Nacibi boobo, koolobesha uku kulaakubabo bubeshi bomwi buswa kubashikaswa. Ano bubeshi ubu bulaakuba bubiibi abuumbi mukwiinga bulaakulengesha bantu kubona anga kutooba  luumuno anu mapensho anene atana kucitikawo kale ndyaatootalika. Ncakwiila, “peenkapo kunyonyoolwa kulaakubashikila cakuteengashila, bweenka mbuli mwanakashi mbwaanyumfwa mumala kucisa na mwabuka.” Ino basebenshi bakwe Lesa bashomeka? Mpashi balaakukankamana abushiku bwakwe Yehova mbweshi bukashike cakuteengashila, sombi balaakuba balibambite.

9. Sa Yehova alaakunyonyoola cishi cakwe Satana paciindi comwi? Amusansulule.

⁹ Yehova teshi akanyonyoole cishi cakwe Satana coonse paciindi comwi, mbuli mbwaakacita muciindi cakwe Nowa. Alaakutaanguna kunyonyoola lubasu lomwi, lyalo ndyeshi akanyonyoolwe lubasu lumwi lweshi lukacaale. Cakutaanguna, alaakunyonyoola Babiloni Munene, nkokwaamba ayi bupailishi boonse bwakubeca. Lyalo munkondo ya Amagedoni, ndyeshi akanyonyoole lubasu lwakweelaako lwa cishi cakwe Satana, ulo lwiilikaawo, beshimapolitiki, bashilumamba, alimwi abeshimakwebo. Atubandike pa shakucitika shiyandika abuumbi shobilo ishi.

10. Kweelana a Ciyubululo 17:1, 6, a 18:24, ino nceebonshi Yehova nceshi akanyoonywete Babiloni Munene?

¹⁰ ‘Kupekwa mulandu kwa mwanakashi mufuule munene.’ (Amubelenge Ciyubululo 17:1, 6; 18:24.) Babiloni Munene walensha nsoni liina lyakwe Lesa abuumbi. Alayiisha bantu sha bubeshi pali Lesa. Bweenka mbuli mufuule mbwaatashomeki, bupailishi bwakubeca abwalo tabushomeki kuli Yehova ceebo cakucatana pomwi abamaami bapacishi. Bupailishi bwakubeca bulapensha bantu akubalita maali. Alimwi bwacaya bantu baanji abuumbi, kwiilikaawo abasebenshi bakwe Lesa. (Ciyu. 19:2) Ino Yehova alaakumunyonyoola buyani Babiloni Munene?

11. Ino “munyama usalalabo pyu,” uleemikaninako nshi, alimwi ino Lesa alaakumusebensesha buyani kupa mulandu Babiloni Munene?

¹¹ Yehova alaakunyonyoola “mufuule munene” kwiinda mukusebensesha “meeca likumi” “amunyama usalalabo pyu.” Munyama wacikoshanyo uyu, uleemikaninaako libunga lya United Nations. Meeca likumi aleemikaninaako malelo atokweendelesha libunga lya UN. Paciindi Lesa mwiine ncaakabambila limwi, malelo aya alaakubukila  Babiloni Munene. “Balaakubwesa shoonse nshaacite akumufuula akacaalebo matakosha” kwaamba ayi boonse bakabone shibiibi nshaakalinga kucita. (Ciyu. 17:3, 16) Abo boonse bamuyuminisha balaakukankamana abuumbi, mukwiinga Yehova alaakunyonyoola Babiloni Munene paciindi ciniinibo. Cilaakubakankamika abuumbi mukwiinga Babiloni Munene wakalinga kutangala akwaamba ayi: “Nebo ndi mwaami mwanakashi, nshiishi mukalubinje alimwi taaku bushiku mbweshi nkoongumane.”—Ciyu. 18:7, 8.

12. Ino nciinshi Yehova nceshi akabule kulekelela malelo kucita, alimwi ino nceebonshi?

¹² Lesa teshi akalekele malelo apacishi kunyonyoola bantu bakwe. Bantu bakwe baletwa a liina lyakwe, alimwi bakakonkela mulawo wakwe, wakwaamba ayi balyeelete kuswa mu Babiloni Munene. (Milimo 15:16, 17; Ciyu. 18:4) Alimwi basebensa cankusu kucafwa bamwi kwaamba ayi baswe mu Babiloni Munene. Aboobo ‘mapensho akwe’ teshi akashikile basebenshi bakwe Yehova. Nacibi boobo, balaakuyandika lushomo luyumu kwaamba ayi bakacikoonshe kuliyumya mumapensho eshi akese.

13. (a) Ino Gogi ngani? (b) Kweelana a Esekelo 38:2, 8, 9, ino nciinshi ceshi cikape kwaamba ayi Gogi alwane bantu bakwe Lesa?

¹³ Kulwanwa a Gogi. (Amubelenge Esekelo 38:2, 8, 9.) Pesule lyakunyonyoolwa kwa bupailishi bwakubeca boonse, pacishi capanshi palaakucaalabo bupailishi bwa bantu bakwe Lesa bweenka, mbuli cisamu comwibo capuluka cipuupu cinene. Ici cilaakumukalasha abuumbi Satana. Aboobo alaakulengesha bashikaswa bakwe kwaamba—“maswi atasalalite”—akuyuminisha shishi kubunganishikwa akulwana basebenshi bakwe Yehova. (Ciyu. 16:13, 14) Kubunganishikwa uku kuletwa ayi “Gogi wakucishi ca MaGogi.” Shishi ndyeshi shikalwane bantu bakwe Lesa, Amagedoni ayalo ndyeshi ikatalike.—Ciyu. 16:16.

14. Ino Gogi alaakusa mukushiba nshi?

¹⁴ Gogi alaakushoma bunene “nkusu shabuntu”—beshinkondo bakwe ashilwanisho. (2 Maka. 32:8) Swebo tulaakushoma muli Yehova Lesa wesu—nabi kwaamba ayi shishi shilaakubona anga kucita boobo nkubula maano. Mukwiinga balaakuyeeya ayi, balesa bakaalilwa kufuna Babiloni Munene kukulwanwa “kumunyama” a “meeca likumi”! (Ciyu. 17:16)  Aboobo shishi shilaakuyeeya ayi cilaakuba cuubu kutunyonyoola. Shilaakulwana bantu bakwe Lesa “anga ndikumbi lyafwekelesha cishi.” (Ese. 38:16) Nacibi boobo, teshi pakeende aciindi cilaamfu Gogi alaakushiba ayi walibika mukoose mwiine. Bweenka mbwaakacita Falawo pa Lweenge Lusalala, Gogi alaakusa mukushiba ayi anu atolwana a Yehova.—Ku. 14:1-4; Ese. 38:3, 4, 18, 21-23.

15. Ino Klistu alaakukoma buyani cakumaninina?

¹⁵ Klistu abeshinkondo bakwe kuswa kwiculu, balaakushitilisha bantu bakwe Lesa kwiinda mukunyonyoola shishi abalwani babo. (Ciyu. 19:11, 14, 15) Ino nciinshi ceshi cikacitike ku mulwani wakwe Yehova munene, Satana, uyo weshi akacenjeeke shishi kwaamba ayi shilwane bantu bakwe Lesa? Yesu alaakumuwaala mucilindi citeeli pomwi abashikaswa bakwe, akucalaako kwa myaaka 1,000.—Ciyu. 20:1-3.

16. (a) Ino inga twatondesha buyani ayi tulimushi Lesa? (b) Ino kushiba Lesa kulaakutucafwa buyani pabushiku bwa Amagedoni?

¹⁶ Inga caba ayi twakeeya cancine conoono na twakala myaaka iinji mucancine, kwaamba ayi tukapuluke nkondo ya Amagedoni tulyeelete kutondesha ayi tulimushi Lesa alimwi “tulakonkela shaamba makani abotu apa mwaami wesu Yesu.” (2 Tesa. 1:7-9) Tulatondesha ayi “tulimushi Lesa” kwiinda mukushiba shintu nshaasuni, asheesho nshaatasuni, alimwi anjiisho shakwe. Kwiilikaawo, inga twatondesha ayi tulimushi Lesa kwiinda mukutondesha lusuno akumunyumfwila akulyaaba camoyo woonse kulinguwe. (1 Joni 2:3-5; 5:3) Na katutondesha ayi tulimushi Lesa, tulaakuba acoolwe ca kushibikwa anguwe. (1 Koli. 8:3) Kushibikwa a Lesa kulaakulengesha ayi akatupulushe munkondo ya Amagedoni.

17. Ino “kunyumfwila makani abotu a mwaami wesu Yesu cilaamba nshi”?

¹⁷ “Makani abotu apa mwaami wesu Yesu” aleelikaawo makani oonse acancine Yesu ngaakalinga kwiisha, ayo ngotucana mu Maswi akwe Lesa. Tulanyumfwila makani abotu kwiinda mukwaakonkela mubuumi bwesu. Ici cileelikaawo akunyumfwila mulawo wakubika sha Bwaami panembo lya shintu shimwi shili shoonse mubuumi bwesu, kukonkela njiisho shakwe Lesa shiluleme, akwaabanamo lubasu mukwaambilisha Bwaami bwakwe  Lesa. (Mate. 6:33; 24:14) Inga twakonkela makani abotu kwiinda mukucafwa bamakwabo Yesu bananikitwe ndyebatookumanisha mikuli yabo inene abuumbi.—Mate. 25:31-40.

18. Ino bamakwabo Klistu bananikitwe balaakutondesha buyani nkumbu kubaabo babacafwilisha?

¹⁸ Basebenshi bakwe Lesa bananikitwe, conoono balaakupa cilambu ba “mbelele shimwi” ceebo ca lucafwo ndobakapekwa. (Joni 10:16) Munshila nshi? Inkondo ya Amagedoni kaitana kutalika, bamulikoto lya 144,000 balaakuba kabali bapekwa kale buumi bwa muyayaya kwiculu mbuli bana bakwe Lesa bakumushimu. Aboobo balaakuba lubasu lwa beshinkondo bakwiculu abo beshi bakese mukunyonyoola Gogi akupulusha “likoto linene” lya bantu bakwe Lesa. (Ciyu. 2:26, 27; 7:9, 10) Ncakwiila, bamulikoto linene balicite coolwe cinene abuumbi cakucafwilisha basebenshi bakwe Lesa bananikitwe ndyebacili pacishi capanshi!

19-20. Ino nciinshi ceenga catucafwa kutolelela kushomeka nabi twiinde mumapensho ali buyani Amagedoni ndyeli pafwiifwi?

¹⁹ Munshiku shino shakweelaako shikatasha, bantu bakwe Yehova baanji batokwiinda mumapensho. Nacibi boobo, inga twacikonsha kuliyumya alusangalalo. (Jemu. 1:2-4) Cintu cinene ceenga catucafwa kuliyumya, nkutacileka kupaila. (Luka 21:36) Tatweelete kweelabo mukupaila, sombi tulyeelete kukonkela nshetupaila kwiinda mukwiiya Maswi akwe Lesa bushiku abushiku akukutumana kuyeeyawo, akuyeeya pa bushinshimi bweshi bukakumanishikwe conoono. (Kulu. 77:12) Kucita sheeshi akwaabanamo lubasu mukushimikila lyoonse, kulaakuyumya lushomo lwesu akutucafwa kutolelela kulangila!

²⁰ Amuyeeyebo mbweshi mukakoondwe abuumbi Yehova ndyeshi akanyonyoole Babiloni Munene ankoondo ya Amagedoni ndyeshi ikamaane! Alimwi amuyeeyebo mbweshi mukakoondwe ciindi muntu uli woonse ndyeshi akalemeke liina lyakwe Lesa akushiba ayi ngoocite nkusu shakutweendelesha! (Ese. 38:23) Ncakwiila, abo bamushi kabotu Lesa, akunyumfwila Mwanaakwe, akuliyumya kushikila kumamanino, balalangila Amagedoni.—Mate. 24:13.