1. Ino Yehova alababona buyani bantu baliceesha? Amusansulule.

YEHOVA alibasuni bantu baliceesha. Baliceeshabo mbeenga baba abushicibusa bubotu anguwe. Sombi “ali kulaale abaabo balisumpula.” (Kulu. 138:6) Soonse tulisuni kusangalasha Yehova akuba abushicibusa anguwe, aboobo tulyeelete kuba bantu baliceesha.

2. Ino tutokwiiya nshi mumutwi uyu?

² Mumutwi uyu tutobandika shikumbulo kumiipusho yotatwe: (1) Ino kuliceesha cilaamba nshi? (2) Ino nceebonshi ncotuyandikila kuba amubo uyu? (3) Ino nceebonshi nceenga cabeta ciyumu kutondesha kuliceesha na shintu shaaluka? Kweelana ambweshi twiiye, kuliceesha kulatuletela shoolwe akusangalasha Yehova.—Tus. 27:11; Isa. 48:17.

3. Ino kuliceesha cilaamba nshi?

³ Muntu uliceesha taaliboni kuyandika kwiinda bamwi alimwi taalisumpuli. Baibo ilatondesha ayi muntu uliceesha alicishi kwaamba ayi Yehova ulimwiinditeewo abuumbi, alimwi alicishi kwaamba ayi bantu bamwi balamwiindaawo mushintu shimwi.—Fili. 2:3, 4.

4-5. Ino nceebonshi nceenga twaambila ayi kuliceesha teshi mubo ngweenga twabonenabo kumuntu mbwaaboneka?

⁴ Bantu bamwi balabonekabo anga balaliceesha ceebo cakwaamba ayi tabaambi ambi. Bamwi balicite bulemu mukwiinga bashali babo bakabaiisha kulemeka bamwi. Sombi mpashi mumoyo balalisumpula abuumbi. Mukuya kwaciindi, mibo yabo yancinencine ilabonekela patuba.—Luka 6:45.

 ⁵ Bantu bamwi balaambila limwi patuba, sombi ici tacaambi ayi balalisumpula. (Joni 1:46, 47) Nacibi boobo, bantu batacite nsoni balyeelete kucenjela kwaamba ayi batabi bantu balishoma. Ncakwiila soonse tulyeelete kusebensela pakuba amubo wakuliceesha kuswa panshi lya moyo.

6. Kweelana a 1 Bene Kolinto 15:10, ino tutokwiiya nshi kuswa kucakubonenaako ca mutumwi Paulo?

⁶ Atubandike cakubonenaako ca mutumwi Paulo. Wakasebensa cankusu incito Yehova njaakamupa, yakutalika mabungano apya mumisena ipusenepusene. Alimwi alyeelete wakacita shiinji abuumbi muncito yakushimikila kwiinda mutumwi umwi uli woonse wakwe Yesu Klistu. Nacibi boobo, Paulo taakwe kulibona ayi ngowakalinga kuyandika abuumbi kwiinda bamwi. Cakuliceesha wakaamba ayi: “Nebo nshiindi mutumwi nabi womwi, alimwi nsheeleteewo akwiitwa ayi mutumwi, ceebo ndakalinga kupensha libungano lyakwe Lesa.” (1 Koli. 15:9) Lyalo, Paulo wakaamba ayi wakaba shicibusa wakwe Yehova ceebo ca nkumbu Yehova nshaakamutondesha, kuteshi ceebo cakwaamba ayi wakalinga kuyandika kwiinda batumwi bamwi na kusebensa cankusu nkwaakasebensa. (Amubelenge 1 Bene Kolinto 15:10.) Paulo wakalinga cakubonenaako cibotu ca muntu uliceesha. Ndyaakalembela nkalata Beneklistu baku Kolinto taakwe kulisumpula, nabi kwaamba ayi bamwi mulibungano bakalinga kumupikisha!—2 Koli. 10:10.

7. Ino mukwesu umwi wakalinga kushibikitwe abuumbi wakatondesha buyani kuliceesha?

⁷ Basebenshi bakwe Yehova baanji balayuminishikwa abuumbi acakubonenaako ca mukwesu Karl F. Klein, uyo wakalinga wamu Likoto Litanjilila. Mumakani abuumi bwakwe, Mukwesu Klein wakaamba cakuteenda mweela mapensho ngaakeendaamo kwa myaaka iinji. Kucakubonenaako, wakaamba ayi mumyaaka yamuma 1920, taakalinga kusuni bunene  kushimikila kuŋanda aŋanda, wakashimikilaakobo linkanda lyomwi akucileka kwa myaaka yobilo. Ndyaakalinga kusebensela ku Bethel, mukwesu umwi wakamululika aboobo wakakalala. Alimwi paciindi cimwi, wakalisukama abuumbi kwaciindi cilaamfu cakwaamba ayi wakalingabo anga waciswa, sombi mukuya kwaciindi wakaba kabotu. Nacibi boobo, mukwesu uyu wakalinga kucite mikuli iinji alimwi inene abuumbi. Mukwesu Klein wakalinga muntu uliceesha, mukwiinga nabi kwaamba ayi wakalinga kushibikitwe, taakwe kunyumfwa nsoni kwaamba pashintu nshaatakalinga kucita kabotu! Bamakwesu abenankashi baanji tabamuluubi mukwesu uyu, alimwi baleebaluka makani akwe atondesha ayi wakalinga muntu ushomeka. *

8. Ino lilembo lya 1 Pita 5:6 lilatucafwa buyani kubona ayi kuliceesha kulasangalasha Yehova?

⁸ Tulayandika kuliceesha mukwiinga kucita boobo, kulasangalasha Yehova. Mutumwi Pita wakaambawo pamakani akuliceesha. (Amubelenge 1 Pita 5:6.) Libuku lya Iseni Mulenkonka lyakaamba pamaswi akaamba Pita ayi: “Kulisumpula kuli anga ngu musamu ucaya. Kulisumpula kulaleta mapensho anene. Mubo wakulisumpula inga walengesha muntu ucite lushibo kuba utacite ncito kuli Lesa. Ano kuliceesha inga kwapa muntu bantu ngobasuula kuba uyandika kuli Yehova. . . . Na twaba baliceesha . . . Tulaakupekwa cilambu cibotu abuumbi.” * Aboobo, cibotu nceenga twaciita nkucita shintu sheenga shasangalasha Yehova—Tus. 23:15.

9. Ino nceebonshi bantu bamwi inga basuna kuba pafwiifwi andiswe na katuli bantu baliceesha?

⁹ Kwiilikaawo pa kusangalasha Yehova, kuliceesha kulaleta shoolwe shiinji. Kuliceesha kulapa kwaamba ayi bantu basune kuba beshicibusa besu. Ino nciinshi ncetwaambila boobo? Amuyeeye pabantu mbomusangalala kuba pomwi ambabo. (Mate. 7:12) Bantu baanji tabanyumfwi kabotu kuba pomwi abantu basunibo ayi bamwi banoocita nshebasuni akukaka kunyumfwilaako bamwi. Mubupusano, tulasangalala abuumbi kuba pomwi abamakwesu abenankashi batondesha mushimu ‘wakuyeeyelako bamwi, batondesha lusuno lwa bwanabwankashi, bacite nkumbu, alimwi baliceesha.’ (1 Pita 3:8) Na tulisuni kuba pomwi abantu bacite mibo ibotu, nkokwaamba ayi bamwi abalo inga basuna kuba pafwiifwi andiswe na katuli bantu baliceesha.

10. Ino kuliceesha kulacafwa buyani muntu kuliyumya mumapensho?

¹⁰ Kuliceesha kulapa kwaamba ayi shintu shinotweendela  kabotu. Cakutatoonsha, cimwi ciindi inga twabona bamwi na swebo sobeene kucitilwa shintu sheenga shaboneka anga tashiluleme. Mwaami Solomoni wakaamba ayi: “Ndabona basha kabeendela pamaaki sombi banaabaami kabeenda panshi anga mbasha.” (Shi. 10:7) Cimwi ciindi bantu bacite lushibo abuumbi tabalumbaishikwi. Ano balya batacite lushibo luunji mbobalemekwa akubikilwa maano. Nacibi boobo, Solomoni wakaamba ayi tulyeelete kusumina shintu mboshibete mubuumi, muciindi cakukalala na tashina kweenda mbotwalinga kulangila. (Shi. 6:9) Kuliceesha kulaakutucafwa kutakalala nabi shintu shacitika munshila ipusene ambotwalinga kusuni.

11. Ino tulyeelete kucita buyani na batululika?

¹¹ Bukaalo bwa bushiku abushiku bulatupa coolwe cakutondesha kuliceesha. Kucakubonenaako, na twalulikwa. Tulyeelete kwiibaluka kwaamba ayi na umwi watululika nkokwaamba ayi twaciita cilubo cinene kwiinda mbotutoocibona. Na batululika, citaanguna liinji nkukaka kululikwa. Cimwi ciindi mpashi inga twapikisha muntu watululika na kupikisha nshila njaatululikilaamo. Ano na tulaliceesha, tulaakutondesha mushimu ubotu na batululika.

12. Kweelana a Tushimpi 27:5, 6, ino nceebonshi tulyeelete kulumba na umwi watululika? Amwaambe cikoshanyo.

¹² Muntu uliceesha ulalumba na bamululika. Kucakubonenaako: Atwaambe ayi muli kumabungano. Pesule lyakubandika abamakwesu abenankashi, mukwesu na nankashi wamwiita palubasu akumulwiita ayi kuli nshemwalinga kulya shacaalila mumeeno. Cakutatoonsha, inga mwanyumfwa nsoni. Ano sa inga tamuluumbi kwaamba ayi wamulwiitaako? Mpashi inga mwalumba akuyeeya ayi naakwiinga umwi wamubona bwangu akumulwiita! Aboobo tulyeelete kulumba na mukwesu na nankashi watululika. Tulyeelete kubona mukwesu na nankashi uyo mbuli shicibusa kuteshi mulwani wesu.—Amubelenge Tushimpi 27:5, 6; Gala. 4:16.

13. Ino inga twatondesha buyani ayi tulaliceesha na bamwi bapekwa mikuli mulibungano?

¹³ Na bamwi bapekwa mikuli mulibungano. Mukwesu umwi munene mulibungano wa liina lya Jason wakaamba ayi: “Na ndabona bamwi bapekwa mikuli mulibungano, ndakankamana akuliipusha ayi, ino nebo tabakwe kunsalila nshi?” Sa amwebo cimwi ciindi mbomulinyumfwa ubo? Cilibo kabotu “kusuna” kucita shiinji muncito yakwe Yehova. (1 Timo. 3:1) Nacibi boobo, tulyeelete kucenjela ambotuyeeya. Na twabula kucenjela, inga twatalika kuba amushimu wakulisumpula mumoyo. Kucakubonenaako, mukwesu inga watalika kuyeeya ayi  lakwe eenkabo ngweenga weelela kupekwa mikuli imwi mulibungano. Mpashi nankashi alakwe inga watalika kuyeeya ayi ‘beebaangu baleelela kwiinda mukwesu yooyo!’ Nacibi boobo, kuliceesha inga kwatucafwa kuleya mushimu wakulisumpula.

14. Ino nshiinshi nsheenga tweeya kucabonenaako cakwe Mose?

¹⁴ Inga tweeya cakubonenaako cibotu kuswa kuli Mose mbwaakacita bamwi ndyebakapekwa mikuli. Mose wakalinga kubikila maano abuumbi ku mukuli wakwe wakutanjilila bene Isilaeli. Ano ino wakacita buyani Yehova ndyaakasalilaawo bamwi kwaamba ayi banoosebensa pomwi? Taakwe kunyumfwa munyono. (Shakube. 11:24-29) Wakaliceesha akusuminisha kwaabilaako bamwi ncito yakoombolosha bantu. (Kul. 18:13-24) Aboobo bene Isilaeli bakaba aboomboloshi baanji alimwi tabakalinga kulindila ciindi cilaamfu kwaamba ayi boomboloshekwe. Munshila imwi inga twaamba ayi, Mose wakalinga kubikila maano kushintu sheenga shacafwa bantu kuteshi kukuba amikuli. Cakubonenaako cibotu abuumbi! Tutaluubi kwaamba ayi Yehova inga watusebenseshabo na katuli bantu baliceesha, aboobo cili kabotu kuba baliceesha kwiinda kuba alushibo luunji. Nabi kwaamba ayi “Yehova uli kwiculu, alababona baliceesha.”—Kulu. 138:6.

15. Ino bukaalo bwa bamakwesu abenankashi baanji bwakacinja buyani?

¹⁵ Na bukaalo bwacinja. Mumyaaka yaconoono, bamakwesu abenankashi abo basebensela Yehova kwa myaaka iinji bakatambula ncito shipya. Kucakubonenaako, mumwaaka wa 2014, bamakwesu bakalinga muncito yakweendela mbasu bakapekwa ncito shimwi. Kuswabo mwaaka weenka ulya, na mutanjilili walubasu washika myaaka 70 taeelete kutolelela. Alimwi na shikubunganya likoto lyabamanene washika myaaka 80 taeelete kutolelela. Kwiilikaawo, myaaka iinji yaiinda, bamakwesu abenankashi baanji bakalinga kusebensa pa Bethel bakatumwa mbuli bapainiya. Bamwi bakacileka ncito yaciindi coonse ceebo cakuciswa, mikuli ya mukwashi na ceebo ca shimwibo.

16. Ino bamakwesu abenankashi abo bukaalo bwakacinja bakatondesha buyani kuliceesha?

 ¹⁶ Ici tacakalinga cuubu kubamakwesu abenankashi aba, mukwiinga cakutatoonsha, bakalinga kwiisuni abuumbi incito njobakasebensa kwa myaaka iinji. Nabi kwaamba ayi bakapekwa ncito shimwi, cimwi ciindi bakalinga kulinyumfwa buumba abuumbi ceebo ca kushiya ncito njobakalinga kusuni. Nacibi boobo, bakashibila mukuya kwaciindi. Ino nciinshi cakabacafwa? Cinene cakabacafwa ndusuno lwabo pali Yehova. Bakalinga kucishi kwaamba ayi bakalyaaba kuli Lesa kuteshi kuncito na mukuli ngobakalinga kucite. (Kolo. 3:23) Balikondetwe kutolelela kusebensela Yehova muncito ili yoonse. Balatola “kulisukama [kwabo] kuli nguwe,” mukwiinga balishi ayi ngoobalama.—1 Pita 5:6, 7.

17. Ino nceebonshi tulalumba ayi Maswi akwe Lesa alatuyuminisha kuliceesha?

¹⁷ Tulalumba abuumbi kwaamba ayi Maswi akwe Lesa alatuyuminisha kuba bantu baliceesha. Kuba amubo ubotu uyu kulaakutucafwa sobeene akucafwako bamwi. Kulaakutucafwa kuliyumya na twacana mapensho mubuumi. Alimwi ciinditeewo, tulaakusena pafwiifwi a Ishiwesu wakwiculu. Tulikondetwe abuumbi mukwiinga tulishi kwaamba ayi nabi “Uli kwiculu alimwi Ulisumpukite,” alibasuni basebenshi bakwe baliceesha alimwi alababona ayi balayandika!—Isa. 57:15.