1-2. (a) Ino Satana wababeca buyani bantu? (b) Ino tutokwiiya nshi mumutwi uyu?

SATANA, “ishi wa bubeshi,” alabeca bantu kuswabo muciindi cakwe Adamu a Efa. (Joni 8:44) Bubeshi ubu buleelikaawo anjiisho shakubeca pamakani alufu ashicitika na muntu wafwa. Bantu balakonkela njiisho amilawo iyo ceebo cakuloonda mishimu ya bafu. Aboobo bamakwesu abenankashi “balayuma kulwanina lushomo” na kwaba malilo mumukwashi nabi kumusena nkobakala.—Judi 3.

² Ino nciinshi ceenga camucafwa kutolelela kushomeka na batomukakatisha kukonkela milawo iteendelani a Baibo nshoiisha pamakani alufu? (Efe. 6:11) Ino nshiinshi nsheenga mwaciita kwaamba ayi muyuminishe akucafwa mukwesu na nankashi utokakatishikwa kukonkela milawo itasangalashi Lesa? Mumutwi uyu tutobandika butanjilishi Yehova mbwaatupa. Cakutaanguna, atubandike Baibo nshoiisha pamakani alufu.

3. Ino bubeshi bwakutaanguna bwakaleta nshi?

³ Lesa taakwe kulenga bantu kwaamba ayi banoofwa. Sombi kwaamba ayi banokala abuumi butamaani. Ano kwaamba ayi cibe boobo, Adamu aEfa bakalinga kweelete kunyumfwila Yehova, uyo wakabapa mulawo utashuupi kukonkela wakwaamba ayi: “Sombi kutalya shisepo sha cisamu cipa lushibo lwa bubotu abubi, mukwiinga waakulyabo, ncakwiila ulaakufwa.” (Mata. 2:16, 17) Lyalo Satana kwiinda mukusebensesha nsoka wakalwiita Efa ayi: “Tabushi mbocibete ubo, teshi mukafweewo sobwe.” Cakabica abuumbi, mukwiinga Efa wakashoma bubeshi bwakwe Satana akulya cisepo. Pesule, ibaye alakwe wakalyaako.  (Mata. 3:4, 6) Munshila iyi, bubi alufu mboshakesa kubantu boonse.—Loma. 5:12.

4-5. Ino mbubeshi nshi Satana mbwaatolelela kubeca bantu?

⁴ Bweenka Lesa mbwaakaamba, Adamu a Efa bakafwa. Sombi Satana wakatolelela abubeshi bwakwe pamakani alufu. Mukuya kwaciindi, wakatalika bubeshi abumwi. Bomwi pabubeshi ubo mbwakwaamba ayi na muntu wafwa mushimu wakwe ulaya kumusena kumwi, mpashi ayi kumusena kukala mishimu ya bafu. Kushika apacecino ciindi Satana wacenjeeka bantu baanji abubeshi ubu.—1 Timo. 4:1.

⁵ Ino nceebonshi bantu baanji balashoma bubeshi bwakwe Satana? Nceebo cakwaamba ayi Satana alishi bantu mbobalinyumfwa pamakani alufu. Mukwiinga Lesa taakwe kutulenga ayi tunoofwa, taakuwo muntu usuni kufwa. (Shi. 3:11) Tulabona ayi lufu ngumulwani.—1 Koli. 15:26.

6-7. (a) Sa Satana wakacikonsha kushisa cancine pamakani alufu? Amusansulule. (b) Ino cancine camu Baibo cilatucafwa buyani kutaloonda bafu?

⁶ Nabi kwaamba ayi Satana wabeca bantu baanji, cancine pamakani alufu cilishibikitwe. Pacecino ciindi, bantu baanji balishi Baibo ncoyaamba pamakani ashicitika na muntu wafwa alimwi balalwiitaako bamwi cancine, abulindilishi bwa kwaamba ayi bafu balaakubuka. (Shi. 9:5, 10; Milimo 24:15) Cancine ici cilatuyuminisha akutucafwa kutaloonda akutatoonsha shicitika na muntu wafwa. Kucakubonenaako, tatuloondi bafu nabi kulisukama ayi shibiibi shilaakucitikila bayandwa besu bakafwa. Tulishi kwaamba ayi bakafwa alimwi taakuwo ngweenga bacita cibiibi. Cilibo anga boona tulo. (Joni 11:11-14) Alimwi tulishi kwaamba ayi bafu tabacishiwo ayi ciindi citokweenda. Aboobo na bakabushikwe balaakubonabo anga peendabo ciindi ciniini, kwiilikaawo abaabo boonse bakafwa myaaka iinji yakwisule.

⁷ Cakutatoonsha twaboona kwaamba ayi Baibo nshoiisha pamakani ashicitika na muntu wafwa nshuubu kunyumfwisha. Ishi shilipusene abuumbi abubeshi bwakwe Satana bupilinganya bantu! Bubeshi bwakwe Satana bulasowa bantu akulengesha kwaamba ayi babekeshe Mulengi wesu. Kwaamba ayi tunyumfwishishe kabotu mapensho aleta bubeshi bakwe Satana, atubandike miipusho itokonkelaawo: Ino bubeshi bwakwe Satana bwabisha buyani liina lyakwe Yehova? Ino bwalengesha buyani bantu kubona anga kushoma cilubula cakwe Klistu takuyandiki? Ino bwanungawo buyani pa buumba amapensho abantu?

8. Kweelana a Jelemiya 19:5, ino bubeshi bwakwe Satana pamakani alufu bulapa bantu kumubona buyani Lesa?

⁸ Bantu balaamba shakubeca pali Yehova ceebo ca bubeshi bwakwe Satana pamakani alufu. Bubeshi ubu buleelikaawo anjiisho yakwaamba ayi Lesa alatenta bafu mumulilo. Njiisho ishi shilabisha liina lyakwe Lesa! Munshila nshi? Shilapa bantu kubona anga Lesa shilusuno ngushilunkutwe bweenka bubete Satana. (1 Joni 4:8) Ino makani aya alamupa kulinyumfwa buyani? Alimwi ciinditeewo, ino Yehova alalinyumfwa buyani? Mukwiinga ngu Lesa upatite lunkutwe luli loonse.—Amubelenge Jelemiya 19:5.

9. Ino bubeshi bwakwe Satana bwalengesha buyani bantu kubona anga kushoma cilubula cakwe Klistu caambwa pa Joni 3:16 a 15:13 takuyandiki?

⁹ Bubeshi bwakwe Satana bwapa bantu kubona anga kushoma mucilubula cakwe Klistu takuyandiki. (Mate. 20:28) Bubeshi bumwi bwakwe Satana mbwakwaamba ayi kuli cintu citolelela kuba abuumi na muntu wafwa. Na ici cakalinga cancine, nkokwaamba ayi muntu uli woonse alaakuba abuumi butamaani. Alimwi Klistu taakalinga kweelete kwaaba buumi bwakwe mbuli cilubula kwaamba ayi tukabe abuumi butamaani. Mutaluubi kwaamba ayi mulambu wakwe Klistu, njenshila inene Lesa mbwaakatondesha ayi alisuni bantu. (Amubelenge Joni 3:16; 15:13.) Ano amuyeeyebo Yehova a Mwanaakwe mbobalinyumfwa panjiisho shitondesha ayi cipo cinene ici taciyandiki!

10. Ino bubeshi bwakwe Satana bwanungawo buyani pa buumba amapensho abantu?

¹⁰ Bubeshi bwakwe Satana bwanungawo pa buumba amapensho abantu. Bashali basowekelwa mwaana mulufu inga balwiitikwa ayi Lesa ngowabwesa mwanaabo, mpashi kwaamba ayi aye abe munjelo kwiculu. Ano sa bubeshi bwakwe Satana ubu bulabaceeshelaako buumba na kunungaawo? Njiisho yakubeca yakutenta bantu mumulilo wa helo yapa bantu kupensha bamwi, kwiilikaawo akutenta baabo bapikisha njiisho shamu maceeci. Kweelana alibuku limwi lyaamba pa kooti ya Spanish Inquisition, abo bakalinga kupensha bantu bakalinga kubona anga nshebatoocita shakalinga kupa bantu abo mbobakalinga kupensha “kunyumfwa mbweshi bakanyumfwe ndyeshi bakanoopenshekwa mumulilo wa helo” ,aboobo bakalinga kweelete kwaana kabatana kufwa kwaamba ayi batakai mukupya kumulilo wa helo. Mushishi shiinji, bantu balashoma ayi balyeelete kulemeka, kulambila akusenga lucafwo kuswa kumishimu ya bashali babo bakulukulu bakafwa. Bamwi balapaila mishimu ya bashali baabo bakulukulu ceebo cakuloonda ayi inga besa mukubapensha. Nacibi boobo, bubeshi bwakwe Satana tabuyuminishi bantu. Sombi bulabapabo kulisukama kuteelete akuloonda.

11. Ino nshiinshi shiteendelani amalembo beshikamukowa na beshicibusa besu nsheenga batukakatisha kucita?

¹¹ Mukwiinga tulisuni Lesa a Maswi akwe, tulamunyumfwila nabi ndyetutokakatishikwa abeshikamukowa na beshicibusa kukonkela milawo ya malilo iteendelani ashaamba malembo pamakani abafu. Mpashi inga batwaambila maswi eenga atulensha nsoni, akwaamba ayi tatulemeki bafu. Na mpashi inga baamba ayi nshetutoocita shilaakupa kwaamba ayi muntu uyo wakafwa akese mukucita shibiibi ku boomi. Ino nshiinshi nsheenga twaciita kwaamba ayi tukonkele Baibo nshoiisha? Atubandike mbweenga mwakonkela njiisho shamu Baibo shitokonkelaawo.

12. Ino njimilawo nshi pa bafu bantu njobakonkela iteendelani amalembo?

¹² ‘Amulipansaanye’ cakushinisha kuswa kunjiisho amilawo iteendelani amalembo. (2 Koli. 6:17) Mucishi cimwi caku Caribbean,  bantu baanji balashoma ayi na muntu wafwa, “cibanda” cakwe cilacita kacishinguluka akupensha baabo bakalinga kumupensha ndyaakalinga muumi. Lifalensi imwi ilaamba ayi “cibanda” ico inga caleta “mapensho mumushi woonse.” Mushishi shimwi shamu Africa tabashimi mulilo mashiku pamalilo. Ino nceebonshi? Mukwiinga balashoma ayi mulilo ulatandanya shibanda. Cakutatoonsha mbuli basebenshi bakwe Yehova, tatwaabanimo lubasu mumilawo na tunshiya nshiya tuyuminisha bubeshi bwakwe Satana!—1 Koli. 10:21, 22.

13. Ino nshiinshi nshomweelete kucita na tamucishi kabotu shakucita pamilawo imwi ya malilo, kweelana ashaambwa pa Jemusi 1:5?

¹³ Na tamucishi kabotu nsheenga mwaciita pamilawo imwi ya malilo, amupaile kuli Yehova, akumusenga calushomo ayi amupe busongo. (Amubelenge Jemusi 1:5.) Lyalo amulangoole Baibo nshoiisha kwiinda mumabuku esu. Na kaciyandika amwiipusheko bamanene mulibungano. Teshi bakamulwiite nshomweelete kucita, sombi balaakumucafwa kucana njiisho shamu Baibo nsheenga mwasebensesha, mbuli sheesho nshetwabandikawo mumutwi uyu. Kucita sheeshi kulaakumucafwa kwiisha “nkusu shanu shakuyeeya,” isho sheshi shikamucaafwe “kupansaanya cibotu acibiibi.”—Ebu. 5:14.

14. Ino nshiinshi nsheenga twaciita kwaamba ayi tuleye kufumpula bamwi?

¹⁴ ‘Amulemeke Lesa mushintu shoonse nshemutoocita. Amuleye kuba mfumpu.’ (1 Koli. 10:31, 32) Ndyetutosala kukonkela milawo imwi ya malilo na sobwe, tulyeelete kuyeeyelako njeelacaamba ya bamwi, bunene bunene Beneklistunyineesu. Mukwiinga tatusuni kuba mfumpu kubamwi! (Maako 9:42) Alimwi tatusuniiwo kufumpula baabo bateshi Bakamboni. Lusuno lulaakutucafwa kubandikaabo munshila yabulemu, yeenga yapa kwaamba ayi Yehova alumbaishikwe. Tatusuniiwo kupikishanya abantu na kucobola milawo njebakonkela. Mutaluubi kwaamba ayi lusuno lulicite nkusu! Na twalutondesha kwiinda mukuyeeyelako akulemeka bamwi, inga lwalengesha baabo batupikisha kusumina cancine.

15-16. (a) Ino nceebonshi ncibotu kubalwiitila limwi bantu nshemushoma? Amwaambe cakubonenaako. (b) Ino nshiinshi nshotweelete kucita kwaamba ayi tukonkele maswi akwe Paulo ngotucana pa Bene Loma 1:16?

¹⁵ Amubalwiite bantu nkomukala ayi muli Bakamboni Bakwe Yehova. (Isa. 43:10) Na kwaba malilo mumukwashi, beshikamukowa abeshicibusa banu inga tabamukakatishi  kukonkela milawo ya malilo na mwakabalwiitila limwi nshomushoma. Ba Francisco, abo bekala ku Mozambique, bakalemba ayi: “Nebo abakaangu ba Carolina ndyetwakeeyabo cancine, twakalwiita mukwashi wesu ayi teshi tukapailewo kubafu alimwi. Mwanike wabo ba Carolina ndyaakafwa, kusala kwesu kwakeeleshekwa. Kweelana amulawo, kulaba sha kupaila nshebacita ndyebatoosansha mutuntu. Lyalo shikamukowa womwi alyeelete koona nshiku shotatwe apo mpobapukwita maanshi ngobasanshilako mutuntu. Balashoma ayi mulawo uyu ulasangalasha mushimu wa muntu wafwa. Mukwashi waba Carolina bakalinga kusuni ayi ba Carolina baye mukoona mpobakapukwita maanshi.”

¹⁶ Ano ino ba Francisco abakaabo bakacita buyani? Ba Francisco bakasansulula ayi: “Mukwiinga tulisuni Yehova alimwi tulisuni kumusangalasha, twakakaka kukonkela mulawo uyu. Beshikamukowa baba Carolina bakakalala abuumbi. Bakatwaambila ayi tatucite bulemu kubafu aboobo taakuwo shikamukowa eshi anotufwakashila na kutucafwa. Mukwiinga twakabansansulwiitawo kale nshetushoma, tatukwe kubandikaabo makani aya ndyebakalinga kukalalite. Beshikamukowa bamwi bakatwimikaninaako, akusuminisha ayi ncakwiila twakabalwiitawo kale nshetushoma. Mukuya kwaciindi, beshikamukowa baba Carolina bakanyumfwisha, aboobo twakatalika kunyumfwana alimwi. Beshikamukowa bamwi bakesaako akuŋanda kumisheesu kusa mukusenga mabuku aamba shamu Baibo.” Aswebo atutolelele kukonkela Baibo nshoiisha pamakani alufu, tutafwi nsoni.—Amubelenge Bene Loma 1:16.

17. Ino nshiinshi nshotweelete kucita na Mwineklistunyineesu wasowekelwa muyandwa?

¹⁷ Na Mwineklistunyineesu wafwitwa, tulyeelete kucita shoonse nsheenga twacikonsha kuba “shicibusa wancinencine . . . , mukwanu wakashalilwa kukucafwa mumapensho.” (Tus. 17:17) Ino inga twatondesha buyani ayi tuli “shicibusa wancinencine,” bunene bunene na mukwesu nabi nankashi wasowekelwa muyandwa batomukakatisha kukonkela milawo iteendelani amalembo? Atubandike njiisho shobilo shamu Baibo sheenga shatucafwa kumuyuminisha.

18. Ino nceebonshi Yesu wakalosha minsonshi, alimwi ino nshiinshi nsheenga tweeya kuswa kucakubonenaako cakwe?

 ¹⁸ “Amulile abaabo batoolila.” (Loma. 12:15) Mpashi inga caba ciyumu kushiba nsheenga twaamba kwaamba ayi tuyuminishe batoolila. Cimwi ciindi kuloshabo minsonshi yesu inga kwacafwa batoolila kushiba ayi tulababikila maano. Lasalo shicibusa wakwe Yesu ndyaakafwa, Maliya, Malita, abamwi bakamulila mukwabo alimwi shicibusa wabo. Yesu ndyaakashika pesule lya nshiku shone, alakwe “wakalosha minsonshi,” nabi wakalinga kucishi kwaamba ayi atoomubusha. (Joni 11:17, 33-35) Kulila kwakwe Yesu kwakatondesha Yehova mbwaakalinyumfwa palufu lwakwe Lasalo. Alimwi kwakatondesha beshikamukowa bakwe Lasalo kwaamba ayi ncakwiila Yesu wakalinga kubasuni, cakutatoonsha ici cakabayuminisha abuumbi Maliya a Malita. Bweenka ubu mbocibete akubamakwesu abenankashi, na babona mbotubasuni ambotubabikilaako maano, balashiba kwaamba ayi tababete beenka sombi balishingulukitwe abeshicibusa balibambite kubacafwa.

19. Ino maswi ngotucana palilembo lyakwe Shikushimikila 3:7 inga twaakonkela buyani ndyetutoyuminisha Mwineklistunyineesu wasowekelwa?

¹⁹ “Ciindi cakukutumana aciindi cakwaamba.” (Shi. 3:7) Cimwi nceenga twaciita kwaamba ayi tuyuminishe Mwineklistunyineesu wasowekelwa, nkukutikisha ndyaatokwaamba. Tulyeelete kumuleka waamba shoonse shili kumoyo wakwe, alimwi tatweelete kukalala na atokwaamba “caambe aambe.” (Jobo 6:2, 3) Inga waamba boobo mpashi ceebo ca buumba akupikishikwa kutooswa kubeshikamukowa bateshi Bakamboni. Aboobo amupaile akwe. Amusenge “Shikukutika mipailo” kwaamba ayi amupe nkusu akuyeeya kabotu. (Kulu. 65:2) Na bukaalo kabusuminisha, amubelenge akwe Baibo. Na makani eelela kuswa mumabuku esu, mbuli makani ayuminisha akacitikila umwi.

20. Ino tulaakwiiya nshi mumutwi utokonkelaawo?

²⁰ Ncoolwe cinene abuumbi kushiba cancine pamakani alufu abulindilishi bubotu abuumbi bwakwaamba ayi bafu balaakubuka! (Joni 5:28, 29) Aboobo mushintu nshetucita anshetwaamba, atutolelele kukonkela Baibo nshoiisha akulwiitako bamwi lyoonse na twacaana coolwe cakucita boobo. Mumutwi utokonkelaawo tulaakwiiya Satana mbwaabeca bantu kwiinda mukupaila mishimu. Tulaakwiiya ncetuyandikila kuleya shakucita cita ashakulikondelesha sheenga shatupa kupaila mishimu.