1-2. Ino nceebonshi Yesu wakalisukama abuumbi?

BUSHIKU kaatana kucaikwa, Yesu wakalisukama abuumbi. Kwakalinga kwacaalabo ciindi ciniini kwaamba ayi bamucita shibiibi bese bamupeenshe akumucaya. Nacibi boobo Yesu taakwe kulisukama ceebo cakwaamba ayi wakalinga kusa mukucaikwa. Wakalinga kusuni Baishi abuumbi alimwi wakalinga kusuni kubasangalasha. Yesu wakalinga kucishi ayi na atolelele kushomeka mumapensho ngaakalinga kusa mukwiindaamo, alaakulengesha kwaamba ayi liina lya Baishi lisalashikwe. Yesu wakalinga kusuni bantu alimwi wakalinga kucishi kwaamba ayi na watolelela kushomeka kushikila akulufu, bantu balaakuba abulindilishi bwa buumi butamaani kunembo.

² Nabi kwaamba ayi Yesu wakalisukama abuumbi, wakalinga kucite luumuno. Wakalwiita batumwi bakwe ayi “Ndamupa luumuno lwangu.” (Joni 14:27) Wakalinga kucite “luumuno lwakwe Lesa,” nkokwaamba ayi luumuno luba amuntu ceebo cakuba abushicibusa bubotu a Yehova. Luumuno ulu lwakacafwa Yesu kukalikana mumiyeeyo amumoyo.—Fili. 4:6, 7.

3. Ino ngamakani nshi ngeshi tubandike mumutwi uyu?

³ Nabi kwaamba ayi tuleenda mumapensho, taakuwo muntu eshi akeende mumapensho mbuli akeendaamo Yesu. (Mate. 16:24, 25; Joni 15:20) Bweenka mbuli Yesu, aswebo cimwi ciindi tulalisukama abuumbi. Ano ino inga twacita buyani kwaamba ayi tutalisukami abuumbi cakwaamba ayi twaalilwa kukalikana mumoyo? Atubandike shintu shotatwe Yesu nshaakacita ndyaakalinga pacishi, akwiiya mbweenga twakonkela cakubonenaako cakwe na twacana mapensho.

4. Kweelana a 1 Bene Tesalonika 5:17 ino nshakubonenaako shili shitotondesha ayi Yesu wakapaila mankanda aanji bushiku bwakweelaako kaatana kucaikwa?

⁴ Amubelenge 1 Bene Tesalonika 5:17. Yesu wakapaila mankanda aanji bushiku bwakweelaako kaatana kucaikwa. Ndyaakalinga kutondesha bashikwiiya bakwe mbobeelete kucita ciibalusho ca lufu lwakwe, wakapailila cimaande awaini. (1 Koli. 11:23-25) Kabatana kuswa kumusena nkobakalinga kusekelela Pasika, Yesu wakapaila abashikwiiya bakwe. (Joni 17:1-26) Mashiku ndyebakashika paKalundu ka Maolifi, wakapaila mankanda aanji. (Mate. 26:36-39, 42, 44) Kwiilikaawo, maswi akweelaako Yesu ngakaamba kaatana kufwa akalinga mupailo. (Luka 23:46) Yesu wakalwiita Yehova mumupailo makani oonse ashakacitika bushiku bulya kaatana kucaikwa.

5. Ino nceebonshi batumwi bakaalilwa kuliyumya?

⁵ Cintu comwi cakacafwa Yesu kuliyumya ndyaakalinga mumapensho, nkushoma Baishi kwiinda mumupailo. Ano batumwi bakaalilwa kutolelela kupaila mashiku alya. Aboobo ndyebakeeleshekwa, bakaalilwa kuliyumya. (Mate. 26:40, 41, 43, 45, 56) Kwaamba ayi tutolelele kushomeka ndyetwacana meelesho, tulyeelete kukonkela cakubonenaako cakwe Yesu kwiinda “mukupaila lyoonse.” Ino ngamakani nshi ngeenga twapaililaawo?

6. Ino lushomo inga lwatucafwa buyani kutolelela kuba aluumuno?

⁶ Inga twapaila kuli Yehova akumusenga ayi ‘akomenye lushomo’ lwesu. (Luka 17:5; Joni 14:1) Tulayandika lushomo mukwiinga Satana alaakweelesha shikwiiya wakwe Yesu uli woonse. (Luka 22:31) Ino lushomo inga lwatucafwa buyani kutolelela kuba aluumuno nabi kwaamba ayi mapensho akonkana? Na lipenshi  lyatolelela pesule lyakucita shoonse nsheenga twacikonsha, lushomo lulaakutucafwa kushiya shintu mumaansa akwe Yehova. Mukwiinga tulicishi kwaamba ayi Yehova ngooshi kabotu shakucita kwiinda ndiswe, tulaba aluumuno akukalika moyo.—1 Pita 5:6, 7.

7. Ino mweeya nshi kuswa kumakani akaamba mukwesu Robert?

⁷ Mupailo ulatucafwa kutolelela kuba aluumuno lwa mumiyeeyo nabi twiinde mumapensho anene buyani. Amuyeeye cakubonenaako ca mukwesu Robert, munene ushomeka ucite myaaka yamuma 80. Wakaamba ayi: “Maswi ngotucana pa Bene Filipi 4:6, 7 ancafwa kuliyumya mumapensho aanji mubuumi. Ndakalinga kucite lipenshi lyakubula maali. Alimwi kwakaciindi ndakalinga ndacileka kusebensa mbuli munene mulibungano.” Ino nciinshi cakacafwa mukwesu Robert kutolelela kuba aluumuno? Wakaamba ayi “Na ndatalikabo kulisukama ndapaila. Ndashoma kwaamba ayi kupaila mankanda aanji alimwi cankusu, kulancafwa kuba aluumuno.”

8. Kweelana amakani ngotucana pa Joni 8:29, ino nciinshi cimwi cakapa Yesu kuba aluumuno?

⁸ Amubelenge Joni 8:29. Nabi ndyaakalinga kupenshekwa, Yesu wakalinga kucite luumuno mukwiinga wakalinga kucishi ayi atosangalasha Baishi. Wakatolelela kubanyumfwila ndyecakalinga ciyumu kucita boobo. Wakalinga kubasuni abuumbi Baishi aboobo kubasebensela ncocakalinga cintu cinene abuumbi mubuumi bwakwe. Kaatana kusa pacishi ca panshi, Yesu wakalinga “musebenshi ucishi kabotu ncito.” (Tus. 8:30) Alimwi ndyaakalinga pacishi ca panshi,  wakasebensa cankusu kwiisha bamwi pali Baishi. (Mate. 6:9; Joni 5:17) Incito iyi yakalinga kumusangalasha abuumbi Yesu.—Joni 4:34-36.

9. Ino nceebonshi tulaba aluumuno na katubikila maano kuncito yakushimikila?

⁹ Inga twakonkela cakubonenaako cakwe Yesu kwiinda mukunyumfwila Yehova “akuba ashintu shiinji shakucita muncito ya Mwaami.” (1 Koli. 15:58) Na katusebensesha “ciindi cesu coonse” muncito yakushimikila, inga katutalisukami abuumbi amapensho ngotucite. (Milimo 18:5) Kucakubonenaako, ndyetutooshimikila tulacana bantu bacite mapensho aanji kwiinda ngotucite. Nacibi boobo, na beeya kusuna Yehova akukonkela nshaamba, buumi bwabo bulaya panembo akuba alusangalalo. Na shintu sha mushobo uyu shacitika, tulashoma cakutatoonsha kwaamba ayi Yehova alaakutulama. Alimwi ici cilatupa kutolelela kuba aluumuno. Nankashi umwi ulinyumfwa kwaamba ayi taakuwo mbwaabete alimwi ulisukama abuumbi, wakacana kwaamba ayi makani aya ngancine. Wakaamba ayi: “Ndyentobikila maano abuumbi kukushimikila, nshilisukami alimwi ndaba alusangalalo. Cili boobu mukwiinga ndyentooshimikila ndalinyumfwa kuba pafwiifwi abuumbi a Yehova.”

10. Ino mweeya nshi kuswa kumakani akaamba nankashi Brenda?

¹⁰ Atubandike cakubonenaako cakwe nankashi Brenda. Lakwe amwanaakwe mwanakashi balicite bulwashi bunene abuumbi. Nankashi Brenda aleendela pakancinga kabalema alimwi taacitewo ankusu. Cimwi ciindi na kaacikonsha alashimikila kuŋanda aŋanda, sombi liinji alashimikila kwiinda mukulemba makalata. Wakaamba ayi: “Ndyendakashiba ayi teshi nkooleewo mubweende bwashintu buno, ndakatalika kubikila maano kuncito yakushimikila. Kushimikila kulancafwa kutabikila maano kumapensho angu. Muciindi cakulisukama sha mapensho angu, ndabikila maano kubantu mboncana ndyentooshimikila kumusena kushimikila libungano lyesu. Alimwi lyoonse ndyentooshimikila ndayeeya pabulindilishi mbooncite bwa buumi bubotu kunembo.”

11-13. (a) Ino batumwi abeshicibusa bamwi bakatondesha buyani ayi bakalinga beshicibusa bancinencine kuli Yesu? (b) Ino Yesu wakacafwikwa buyani asheesho shakamucitila beshicibusa bakwe?

¹¹ Yesu ndyaakalinga kushimikila, batumwi bakwe bashomeka mbobakalinga beshicibusa bakwe bancinencine. Bakacita bweenka mbuli bwaamba lilembo lya Tushimpi ayi: “kuli shicibusa ngoonyumfwanaakwe kwiinda amukwanu.” (Tus. 18:24) Yesu wakalinga kubasuni abuumbi beshicibusa aba. Taakuwo shikamukowa nabi womwi wakalinga kumushoma ciindi ndyaakalinga kushimikila. (Joni 7:3-5) Paciindi cimwi, beshikamukowa bakwe bakalinga kuyeeya ayi mpashi alicinkukite. (Maako 3:21) Mubupusano, mashiku kaatana kufwa Yesu wakalwiita bashikwiiya bakwe bashomeka ayi: “Mwebo mwekala anebo mumapensho angu oonse.”—Luka 22:28.

¹² Cimwi ciindi batumwi bakwe Yesu bakalinga kumukalasha, nacibi boobo taakwe kubikila maano kushilubo shabo, sombi wakalinga kucishi ayi bakalinga kumushoma. (Mate. 26:40; Maako 10:13, 14; Joni 6:66-69) Mashiku kaatana kucaikwa, Yesu wakalwiita basankwa bashomeka aba ayi: “Ntoomwiita ayi babyaanji ceebo shoonse nshendakanyumfwa kuli baTa, ndakamulwiita.” (Joni 15:15) Cakutatoonsha, beshicibusa bakwe Yesu bakamuyuminisha abuumbi. Lucafwo ndobakamupa muncito yakushimikila, lwakamucafwa kuba alusangalalo.—Luka 10:17, 21.

¹³ Yesu wakalinga kucite beshicibusa abamwi banakashi abasankwa, abo bakamucafwa  muncito yakushimikila amunshila shimwi. Bamwi bakamwiitaako kucakulya kumaandaabo. (Luka 10:38-42; Joni 12:1, 2) Bamwi bakalinga kuyaakwe muncito yakushimikila akumucafwaako ashiyandika. (Luka 8:3) Yesu wakalinga kucite beshicibusa bali kabotu ceebo cakwaamba ayi alakwe wakalinga shicibusa uli kabotu. Wakalinga kubacitila shibotu alimwi taakalinga kubalangila kucita nsheenga tabacikoonshi. Nabi kwaamba ayi Yesu wakalinga kusalalite, wakalumba palucafwo lwakamupa beshicibusa bakwe batasalalite. Alimwi cakutatoonsha ici cakamucafwa kuba aluumuno.

14-15. Ino inga twacita buyani kwaamba ayi tube abeshicibusa bali kabotu, alimwi ino inga batucafwa buyani?

¹⁴ Beshicibusa bali kabotu balaakutucafwa kutolelela kushomeka kuli Yehova. Alimwi kwaamba ayi tube abeshicibusa bali kabotu aswebo tulyeelete kuba bantu bali kabotu. (Mate. 7:12) Kucakubonenaako, Baibo ilatulwiita ayi tulyeelete kulyaaba kusebensesha ciindi ankusu shesu kucafwa bamwi, bunene bunene abo “babulishite.” (Efe. 4:28) Sa kuli ngweenga mwayeya mulibungano lyanu utoyandika lucafwo? Sa kuli utacikoonshi kweenda ceebo cakukula na kuciswa ngweenga mwacafwilisha kuula shiyandika? Sa kuli mukwashi batacite maali mbweenga mwaabilako shakulya? Na mulicishi bwakusebensesha webusaiti yesu ya jw.org^® a JW Laibulali^® appu, sa inga mwacafwako bamwi mulibungano kushiba bwakwiisebensesha? Tulaba basangalete na katubikila maano kukucafwa bamwi.—Milimo 20:35.

¹⁵ Beshicibusa mbotucite balaakuba andiswe mumapensho, akutucafwa kutolelela kuba aluumuno. Bweenka mbuli Eliyu mbwakakutika Jobo ndyaakalinga kusansulula mapensho akwe, beshicibusa besu abalo balakutika  ndyetutobasansulwita shitotusukamika. (Jobo 32:4) Tatweelete kulangila ayi beshicibusa mbeshi batusalile shakucita, nacibi boobo tulyeelete kunyumfwila na batuyuminisha kwiinda mukusebensesha Baibo. (Tus. 15:22) Alimwi bweenka mbuli Mwaami Defedi mbwaakaliceesha akusumina lucafwo kuswa kubeshicibusa bakwe, aswebo tatweelete kukaka na beshicibusa besu balisuni kutucafwa ciindi ndyetwabulisha. (2 Sam. 17:27-29) Ncakwiila, beshicibusa ba mushobo uyo ncipo kuswa kuli Yehova.—Jemu. 1:17.

16. Kweelana a Bene Filipi 4:6, 7, ino ninshila nshi yomwibo njeenga twabetaamo aluumuno? Amusansulule.

¹⁶ Amubelenge Bene Filipi 4:6, 7. Ino nceebonshi Yehova ncatulwitila ayi luumuno ndwaapa inga twalutambula kwiinda muli “Klistu Yesu”? Mukwiinga inga twatolelelabo kuba aluumuno na twashiba kabotu akushoma lubasu lucite Yesu mukukumanisha kuyanda kwakwe Yehova. Kucakubonenaako, shibiibi shesu shoonse inga shalekelelwabo kwiinda mucilubula cakwe Yesu. (1 Joni 2:12) Makani aya alatuyuminisha abuumbi! Mbuli Mwaami wa Bwaami bwakwe Lesa, Yesu alaakukusha mapensho oonse ngotwiindaamo ceebo cakwe Satana abweende bwakwe. (Isa. 65:17; 1 Joni 3:8; Ciyu. 21:3, 4) Kuyeeya pamakani aya kulatupa kushoma kwaamba ayi ncakwiila buumi bulaakubota kunembo! Alimwi nabi kwaamba ayi Yesu wakatupa ncito iyumu, ali andiswe, alimwi alatucafwa munshiku shino shakweelaako. (Mate. 28:19, 20) Kushiba cancine ici kulatupa kutaloonda! Tulaba aluumuno mukwiinga tulicite lucafwo, bulindilishi akutaloonda.

17. (a) Ino nshiinshi Mwineklistu nshaeelete kucita kwaamba ayi abe aluumuno? (b) Kweelana acishomesho cili pa Joni 16:33, ino nciinshi nceshi tukacikonshe kucita?

¹⁷ Ano ino inga mwacita buyani kwaamba ayi mutolelele kuba aluumuno nabi ndyemwacana mapensho anene? Inga mwacita boobo kwiinda mukukonkela cakubonenaako cakwe Yesu. Cakutaanguna, amupaile akutolelela kucita boobo nabi bukaalo bwayuma buyani. Cabili, amunyumfwile Yehova akusebensa cankusu muncito yakushimikila nabi kacili ciyumu buyani. Catatu, amusumine lucafwo kuswa kubeshicibusa. Lyalo luumuno lwakwe Lesa lulaakulama myoyo yanu amiyeeyo. Alimwi bweenka mbuli Yesu, mulaakukoma mapensho ali woonse.—Amubelenge Joni 16:33.