MUTWI WAKWIIYA 14
Sa Mutookumanisha Ncito Yanu Cakumaninina?
“Amutolelele kushimikila makani abotu, akukumanisha cakumaninina ncito yanu.”—2 TIMO. 4:5.
LWIIMBO 57 Kushimikila Bantu Boonse
NSHESHI TWIIYE *
Yesu ndyaakabushikwa, wakabunganya bashikwiiya bakwe akubalwiita ayi “kamuya, . . . mukaiishe bantu kuba bashikwiiya” (Amubone palagilafu 1)
1. Ino basebenshi bakwe Lesa boonse balisuni kucita buyani, alimwi ino nceebonshi? (Amubone cikope cili papeeji yakutaanguna.)
KLISTU YESU wakalwiita bashikwiiya bakwe ayi ‘kamuya, . . . mukaiishe bantu bamishobo yoonse kwaamba ayi bakabe bashikwiiya.’ (Mate. 28:19) Basebenshi bakwe Lesa boonse bashomeka balisuni kwiiya mbweenga ‘bakumanisha cakumaninina’ incito iyi njebakapekwa. (2 Timo. 4:5) Alimwi iyi njencito iyandika abuumbi, yeelete kucitwa cakufwambaana kwiinda ncito imwi ili yoonse. Nacibi boobo, cimwi ciindi cilaba ciyumu kwaamba ayi tusebense cankusu muncito iyi kweelana ambweenga katusuni.
2. Ino ngamapensho nshi eenga apa kwaamba ayi cibe ciyumu kukumanisha ncito yesu?
2 Kuli ncito ashimwi shiyandika ciindi ankusu shesu. Mpashi bushiku abushiku tulyeelete kusebensa mawoola aanji kwaamba ayi tucikoonshe kucana maali akuula shiyandika sha mukwashi. Cimwi ciindi inga caba ciyumu kukumanisha mikuli yoonse yamumukwashi mpashi ceebo ca kuciswa, mapensho ashakulisukama, na mubili kucisa ceebo cakukula. Ino nshiinshi nsheenga twaciita kwaamba ayi tucikoonshe kukumanisha ncito yesu nabi ndyetutokwiinda mumapensho mbuli aya?
3. Ino nshiinshi nshetutokwiiya kuswa ku maswi Yesu ngakaamba pa Mateyo 13:23?
3 Tatweelete kubicilwa na twaalilwa kucita shiinji muncito yakwe Yehova ceebo ca bukaalo bwesu. Yesu wakalinga kucishi kwaamba ayi soonse inga tatucikoonshi kushala shisepo sha Bwaami sheelene. (Amubelenge Mateyo 13:23.) Yehova alalumba abuumbi na katucita shoonse nsheenga twacikonsha muncito yakwe. (Ebu. 6:10-12) Ano cimwi ciindi, mpashi inga twalinyumfwa ayi bukaalo bwesu inga bwatusuminisha kucita shiinji. Mumutwi uyu, tutokwiiya nshotweelete kucita kwaamba ayi tunoobikila maano abuumbi kuncito yesu, mbweenga twaceeshako shakucita mubuumi, ambweenga twaya panembo mukushimikila akwiisha. Ano cakutaanguna, atubandike kukumanisha ncito yesu cakumaninina ncocaamba.
4. Ino kukumanisha ncito yesu cakumaninina cilaambanshi?
4 Mukufwiimpya inga twaamba ayi, kukumanisha ncito yesu cakumaninina, cilaamba kusebensa ncito yakushimikila makani abotu akwiisha kushika peela nkusu shesu. Ano ici tacaambibo kusebensa mawoola aanji mukushimikila. Yehova alabikila maano akuceeco citupa kwaamba ayi tunooshimikila. Tulasebensa camoyo woonse muncito yakushimikila, mukwiinga tulisuni Yehova ababyeesu. * (Maako 12:30, 31; Kolo. 3:23) Kusebensela Lesa camoyo woonse, cilaamba kulyaaba akusebensesha nkusu shesu shoonse muncito yakwe Lesa kushika mpotweela. Kushiba kwaamba ayi kushimikila makani abotu ncoolwe cinene, inga kwatucafwa kucita shoonse nsheenga twacikonsha kushimikila bantu baanji.
5-6. Amwaambe cikoshanyo ca muntu ucite shakucita shiinji mbweenga wabikila maano kuncito yakushimikila.
5 Amuyeeye pa musankwa wacanike usuni bunene kulisha banjo. Alisuni abuumbi kulisha banjo yakwe pali poonse mpeenga wacana ciindi. Kwaamba ayi acane maali akuula shiyandika, watalika ncito yakuulisha mugulosali kuswa pa Maande kushika pa Cisanu. Nabi kwaamba ayi alasebensa ciindi cilaamfu mugulosali, moyo wakwe ulibo pakulisha banjo. Atoyandishisha kuya panembo mukulisha kwaamba ayi akanoosebensa ncito yakulisha shilimba. Aboobo aleelesha kucana ciindi nabi ciniinibo nceenga wakala akulisha banjo.
6 Mpashi amwebo tamucikoonshi kushimikila ciindi cilaamfu kweelana ambweenga mwasuuna. Nacibi boobo, njencito njemusuni abuumbi. Mpashi muleelesha cankusu kushika bantu pamyoyo ndyemutooshimikila makani abotu. Mukwiinga mulicite mikuli iinji njomweelete kulama, inga mwatalika kutoonsha na inga mwacikonsha kubikila maano abuumbi kuncito yakushimikila.
NSHEENGA MWACIITA KWAAMBA AYI MUNOOBIKILA MAANO KUNCITO YAKUSHIMIKILA
7-8. Ino inga twatondesha buyani ayi tulakonkela cakubonenaako cakwe Yesu cakubikila maano kuncito yakushimikila?
7 Yesu wakatondesha cakubonenaako cibotu cakubikila maano kuncito yakushimikila. Kubandika pamakani a Bwaami cakalinga ncintu ciyandika abuumbi mubuumi bwakwe. (Joni 4:34, 35) Wakeenda mishinso ilaamfu abuumbi kwaamba ayi acikoonshe kushimikila bantu baanji. Lyoonse wakalinga kulangoola coolwe cakushimikila bantu mumisena mucanika bantu baanji amumaanda. Yesu wakalinga kubikila maano abuumbi kuncito yakushimikila.
8 Inga twakonkela cakubonenaako cakwe Klistu, kwiinda mukulangoola nshila sha mbweenga twashimikila makani abotu kuli koonse nkweenga twaba alimwi apaciindi cili coonse. Tulilibambite kuliima shintu shimwi kwaamba ayi tucikoonshe kwabanaamo lubasu muncito yakushimikila. (Maako 6:31-34; 1 Pita 2:21) Bamwi mulibungano balacikonsha kusebensa mbuli bapainiya balibetele, baciindi coonse, na bacafwilisha. Bamwi beeyaako mushobo umwi na kuya mukusebensela kumusena kutoyandika beshikushimikila baanji. Nacibi boobo, lubasu lunene lwakushimikila, lulacitwa abeshikushimikila beenga tabacikoonshi kucita ncito nshetwaambawo sombi balasebensa kushika peela nkusu shabo. Aboobo inga caba kwaamba ayi tulacikonsha kusebensa mawoola aanji na aniinibo, Yehova taatulangili kucita nsheenga tatucikoonshi. Alisuni kwaamba ayi soonse tunooba alusangalalo ndyetutoshimikila “makani abotu abulemu aswa kuli Lesa usangalete.”—1 Timo. 1:11; Duto. 30:11.
9. (a Ino Paulo wakatondesha buyani ayi wakalinga kubikila maano abuumbi kuncito yakushimikila nabi ndyaakalinga kusebensaako ncito yakumubili? (b Kweelana alilembo lya Milimo 28:16, 30, 31, ino Paulo wakalinga kwiibona buyani ncito yakushimikila?
9 Mutumwi Paulo alakwe wakalinga cakubonenaako cibotu cakubikila maano abuumbi kuncito yakushimikila. Ndyaakalinga ku Kolinto mulweendo lwakwe lwabili lwa bumishonali, wakacaalabo amaali aniini, aboobo wakasebensaako ncito yakupanga matente kwakaciindi. Nacibi boobo, iyi teshi njencito inene Paulo njaakalinga kusebensa. Wakasebensa ncito iyi kwaamba ayi imucaafwe muncito yakushimikila makani abotu kubene Kolinto, balo “kwakubula kusowa maali” akumuulila shiyandika. (2 Koli. 11:7) Nabi kwaamba ayi Paulo wakasebensaako ncito yakumubili, wakatolelela kubikila maano kuncito yakushimikila, alimwi wakalinga kushimikila lyoonse pabushiku bwa Sabata. Maali ngaakalinga kuyandika ndyaakakwanabo, Paulo “wakatalika kusebensesha ciindi cakwe coonse kukushimikila maswi akwe Lesa, kutondesha ba Juda bumboni bwa kwaamba ayi Yesu ngo Klistu.” (Milimo 18:3-5; 2 Koli. 11:9) Ndyebakamwaanga myaaka yobilo muŋanda yakwe ku Loma, Paulo wakashimikila makani abotu kubaabo bakalinga kumufwakashila alimwi bamwi wakabalembela makalata. (Amubelenge Milimo 28:16, 30, 31.) Paulo Wakalinga kushinishite kutasuminisha cintu cimwi cili coonse kupilinganya ncito yakwe yakushimikila. Wakalemba ayi: “Aboobo, mukwiinga tulicite ncito iyi. . . , tatubooleli mwisule.” (2 Koli. 4:1) Bweenka mbuli Paulo, aswebo inga twacikonsha kubikila maano abuumbi kuncito ya Bwaami nabi kwaamba ayi tulasebensa ncito yakumubili.
Kuli shiinji nsheenga twaciita kwaamba ayi tukumanishe ncito yesu cakumaninina (Amubone mapalagilafu 10-11)
10-11. Ino nshiinshi nsheenga twaciita kwaamba ayi tukumanishe ncito yesu nabi ndyetucite lipenshi lyakuciswa?
10 Nabi kwaamba ayi inga tatucikoonshi kushimikila kuŋanda aŋanda ceebo ca kukula na kuciswa, inga twashimikila kusebensesha nshila shimwi. Beneklistu bakutaanguna bakalinga kushimikila makani abotu kuli koonse nkweenga baba. Bakalinga kushimikila paciindi cili coonse nceenga bacana coolwe—inga caba ayi nkuŋanda aŋanda, kumisena kucanika bantu baanji, akuli koonsebo nkweenga bacana bantu. (Milimo 17:17; 20:20) Na inga tatucikoonshi kweenda mushinso, inga twekala pamusena peenda bantu baanji akunoshimikila baabo batokwiinda. Na mpashi inga twashimikila munshila yakubandikabo kubaabo mbotukumanya, kulemba makalata, na kusebensesha fooni. Beshikushimikila baanji batacikoonshi kushimikila kuŋanda aŋanda ceebo ca kuciswa ciswa na mapensho amwi, balacana lusangalalo kwiinda mukusebensesha nshila ishi ndyebatoshimikila.
11 Inga mwacikonsha kukumanisha ncito yanu cakumaninina nabi ndyemucite mapensho. Atubandike cakubonenaako ca mutumwi Paulo alimwi. Wakaamba ayi: “Mushintu shoonse ndicite nkusu kwiinda muli wooyo umpa nkusu.” (Filipi. 4:13) Paulo wakalinga kuyandika nkusu ishi ciindi ndyaakaciswa kaali palweendo lwa bumishonali. Wakasansulwita bene Galatiya ayi: “Mulishi kwaamba ayi kuciswa nkondakaciswa nkokwakampa coolwe cakwaamba ayi nshimikile makani abotu kulindimwe ciindi cakutaanguna.” (Gala. 4:13) Amwebo kuciswa, inga kwamupa coolwe cakushimikila bamwi makani abotu, mbuli bamadokota, bamanasi, abamwi batoomulama. Buunji bwa bantu aba balaba kuncito ciindi ndyetuya kumaandaabo mukushimikila.
MBWEENGA TWACEESHAKO SHAKUCITA MUBUUMI
12. Ino maswi akwaamba ayi “kubikila maano kucintu comwi” alaamba nshi?
12 Yesu wakaamba ayi: “Meenso ngomumuni wa mubili. Na liinso lyako kalilangitebo pacintu comwi, mubili woonse ulaakuba mumumuni.” (Mate. 6:22) Ino maswi aya alaamba nshi? Alasansulula ayi tulyeelete kubikila maano kucintu comwi mubuumi, kwakubula kupilinganishikwa acimwi cili coonse. Yesu wakatutondesha cakubonenaako cibotu kwiinda mukubikila maano kuncito yakushimikila, alimwi wakaiisha bashikwiiya bakwe kubikila maano kuncito yakwe Yehova a Bwaami Bwakwe. Inga twakonkela cakubonenaako cakwe Yesu, na katubona ncito yakushimikila kuba iyandika kwaamba ayi tucikoonshe “kutaanguna kuyandoola Bwaami [bwakwe Lesa] abululami.”—Mate. 6:33.
13. Ino nshiinshi nshotweelete kucita kwaamba ayi tunoobikila maano kuncito yakushimikila?
13 Cintu comwi ceenga catucafwa kubikila maano kuncito yakushimikila, nkuceeshako shakucita mubuumi kwaamba ayi tucikoonshe kucafwa bantu kwiiya pali Yehova akuba abushicibusa anguwe. * Kucakubonenaako, sa inga twaceeshako mawoola ngotusebensa ncito yakumubili kwaamba ayi tunokwabanaamo lubasu mukushimikila? Sa inga twaceeshako ncito shimwi shitusowela ciindi?
14. Ino beebene bamwi bakacita buyani kwaamba ayi babikile maano abuumbi kuncito yakushimikila?
14 Ishi nshaakacita mukwesu Elias munene mulibungano amukaakwe. Wakaamba ayi: “Tatukwe kutalikabo peenkapo bupainiya, sombi kwakalinga shimwi nshetwakalinga kweelete kucita kwaamba ayi tunoosebensa ciindi cilaamfu muncito yakushimikila. Aboobo twakatalika paniini paniini. Kucakubonenaako, twakacileka kuula shintu shiinji, kucita ncito shimwi nshetwakabona ayi shakalinga kutusowelabo ciindi, alimwi twakasenga munene wancito nkotwakalinga kusebensa kuceeshako mawoola ngotwalinga kusebensa kwaamba ayi tunooba aciindi cakushimikila. Kucita boobo kwakatucafwa kubaako aciindi cakwaabanamo lubasu mukushimikila ciindi camacolesha, kucita shiiyo shiinji sha Baibo, akwaabanamo lubasu mukushimikila mankanda obilo mukati kansondo mweenshi uli woonse. Ici cakatupa lusangalalo abuumbi!”
NSHEENGA MWACIITA KWAAMBA AYI MUNOOSHIMIKILA AKWIISHA KABOTU
Kukonkela nshetwiiya kumabungano esu amukati kansondo kulaakutucafwa kutolelela kuya panembo mukushimikila akwiisha kabotu (Amubone mapalagilafu 15-16) *
15-16. Kweelana a 1 Timoti 4:13, 15, ino nshiinshi nshotweelete kucita kwaamba ayi tuye panembo mukushimikila akwiisha kabotu? (Amubone kabokosi katokwaamba ayi “ Sheenga Shancafwa Kukumanisha Ncito Yangu Cakumaninina.”)
15 Cimwi ceenga catucafwa kukumanisha ncito yesu, nkuya panembo mukushimikila akwiisha kabotu. Kwaamba ayi muntu aye panembo mukucita ncito imwi, alyeelete kutolelela kwiiya kucita kabotu incito iyo. Mbocibete akulindiswe sobashimikila sha Bwaami. Tulyeelete kutolelela kwiiya mbweenga twashimikila akwiisha kabotu.—Tus. 1:5; Amubelenge 1 Timoti 4:13, 15.
16 Ino nshiinshi nshotweelete kucita kwaamba ayi tutolelele kuya panembo mukushimikila akwiisha kabotu? Tulyeelete kubikila maano abuumbi kushintu nshetwiiya pakubungana kwesu kwa Buumi Anciito. Nshetwiiya pakubungana uku shilatucafwa kushiba mbweenga twaya panembo mukushimikila. Kucakubonenaako, nshaamba ceyamani kubaabo balinga kucite lubasu lwa bashikwiiya, inga shatucafwa kwiiya nsheenga twasebensesha ndyetutooshimikila. Inga twayeeya mbweenga twashisebensesha ndyetutooshimikila makani abotu. Inga twasenga lucafwo ku mukwesu utanjilila kakoto kesu ka kushimikila na kusebensaakwe muncito yakushimikila, kusebensa abeshikushimikila bekala myaaka iinji mucancine, bapainiya, nabi mutanjilili walubasu. Inga twasangalala abuumbi anciito yakushimikila akwiisha, na twashiba kabotu bwakusebensesha Shitabatisho Nshetusebensesha Ndyetutokwiisha.
17. Ino nshiinshi sheshi shikacitike na mukakumanishe ncito yanu cakumaninina?
17 Yehova wakatupa coolwe cinene abuumbi ‘cakusebensela pomwi anguwe’! (1 Koli. 3:9) Na ‘mwashishiba kabotu shintu shiyandika abuumbi’ akubikila maano kuncito yakushimikila, ‘mulaakusebensela Yehova cakukondwa.’ (Filimo. 1:10; Kulu. 100:2) Mbuli musebenshi wakwe Lesa, inga mwashooma kwaamba ayi Yehova alaakumupa nkusu nshemutoyandika kwaamba ayi mucikoonshe kukumanisha ncito yanu nabi mube amapensho ali buyani. (2 Koli. 4:1, 7; 6:4) Na bukaalo bwanu bulamupa kusebensa abuumbi na paniini muncito yakushimikila, inga mwacana “lusangalalo” na kamusebensa camoyo woonse. (Gala. 6:4) Inga mwatondesha ayi mulisuni Yehova ababyaanu, na mwakumanisha ncito yanu cakumaninina. Na ‘mukacite boobo mulaakulipulusha nobeene alimwi abaabo batoomukutika.’—1 Timo. 4:16.
LWIIMBO 58 Kulangoola Bantu Basuni Luumuno
^ par. 5 Yesu wakatupa ncito yakushimikila makani abotu a Bwaami akucafwa bantu kuba bashikwiiya. Mutwi uyu utootucafwa kwiiya mbweenga twakumanisha ncito iyi cakumaninina, nabi ndyetuli mubukaalo buyumu. Tutokwiiya ambweenga twaya panembo mukushimikila kabotu akuba alusangalalo ndyetutoshimikila.
^ par. 4 KUSANSULULA MASWI: Incito yesu mbuli Beneklistu ileelikaawo kushimikila akwiisha, kuyaka akubamba misena njetusebensesha mukulambila Lesa, anciito yakupa lucafwo ciindi ndyekwaba mapensho anene.—2 Koli. 5:18, 19; 8:4.
^ par. 13 Amubone shintu 7 shilembetwe mu Njashi Yamulindilishi ya July 2016, pe. 10 yamu Cibemba na Chitonga pakabokosi katokwaamba ayi “Mbweenga Mwaceeshako Shakucita Mubuumi Bwanu.”
^ par. 62 BUSANSULUSHI BWACIKOPE: Nankashi kumabungano amukati kansondo, atoocita citondesho ca nsheenga twaamba palweendo lwakuboolelaako. Pesule lyakucita lubasu lwakwe, atoolemba mu buloshuwa ya Kwiisha mbweenga wasebensesha shitokwaamba ceyamani wa kubungana. Lyalo pacibelu ndyatoshimikila, atosebensesha nshaakeeya kuswa kumabungano.
