Muciindi cakwe Paulo, kumisena iinji takwakalingaawo maato akalinga kubwesabo bantu. Abo bakalinga kusuni kuya palweendo, bakalinga kwiipushako bantu bamwi na balishiko bwato bubwesa katundu abantu butooya kumusena nkobatooya. (Milimo 21:2, 3) Bantu bakalinga kutanta bwato nabi tabutooya nkobatooya, na bwashika mpobwiimikana, bakalinga kuseluka akutanta bumwi butooya nkobatooya.—Milimo 27:1-6.

Maato akalinga kweendabo ciindi comwi mumwaaka, alimwi beshimaato tabakalinga kucite mulongo waciindi na bushiku bwakunyamuka. Na bushiku tabuna kuca kabotu, nabi na babona ayi mishimu inga yalengesha ayi kucitike shibiibi, mbuli na babona ciyuni cinene cesa mukukala kuntambo sha bwaato akutalika kulila, nabi na babona mbasu sha bwaato bwakanyonyooka mweela mwa lweenge, beshi kweensha bwaato tabakalinga kunyamuka. Bakalinga kunyamukabo na kwaca kabotu, nabi na muuwo utopupa kabotu. Na muntu uli palweendo wacana bwaato mbweenga watanta, wakalinga kuya akatundu wakwe mpobeemika maato akulindila kushikila ndyeshi baambilishe ayi bwaato butootalikaako ano.

Muntu wakeeya abuumbi sha makani akale kale Lionel Casson wakaamba ayi: “Mundabala ya bene Loma cakalinga cuubu kubaabo bakalinga palweendo kucana bwaato butooya nkobatooya. Nkobakalinga kutantila maato mu Loma kwakalinga kumusena Lweenge lwa Tiber nkolwakalinga kusowela maanshi mu lweenge lunene. Mutauni iitwa ayi Ostia ku Loma mwakalinga musena unene pakalinga maofesi abaabo bakalinga kucite maato akalinga kuya kumisena ipusenepusene. Kwakalinga bwaato bwakalinga kuya ku Narbonne [cishi ciitwa ayi France pacecino ciindi] bumwi bwakalinga kuya ku Carthage [pacecino ciindi, Tunisia] lyalo maato amwi aya akalinga kuya kumisena kumwi. Muntu wakalinga kusuni kutanta bwaato wakalinga kweelete kuya ku maofesi abeene ba bwaato ubo bweenga bwamushisha nkwatooya.”

Kweenda pamaanshi kwakalinga kucafwa bantu kushika bwaangu nkobatooya, nacibi boobo, kwakalinga kucite mapensho amwi. Paulo ndyaakalinga muncito yabumishonali mankanda aanji wakacanikawo mumapensho apamaanshi.—2 Koli. 11:25.