MUTWI WAKWIIYA 17
Amusumine Lucafwo Lwakwe Yehova Kwaamba ayi Mukome Mishimu Ibiibi
“Tutoolwana . . . ankusu sha mishimu ibiibi ya mwiculu.”—EFE. 6:12.
LWIIMBO 55 Mutabaloondi Sobwe!
NSHESHI TWIIYE *
1. Kweelana a Bene Efeso 6:10-13, ino Yehova alatondesha buyani ayi alatubikila maano? Amusansulule.
NSHILA yomwi Yehova mbwaatondesha ayi alatubikila maano sobasebenshi bakwe, nkwiinda mukutucafwa kukoma balwani besu. Balwani besu batupensha abuumbi ngu Satana abashikaswa bakwe. Yehova alatucenjeesha pa balwani aba akutupa nshetuyandika kwaamba ayi tubakoome. (Amubelenge Bene Efeso 6:10-13.) Na twasumina lucafwo lwakwe Yehova akumushoma cakumaninina, inga twacikonsha kumukoma Satana. Aswebo inga twaba alushomo luyumu bweenka mbuli Paulo uyo wakalemba ayi: “Na Lesa kali andiswe, ino ngani weenga watupikisha?”—Loma. 8:31.
2. Ino tutokwiiya nshi mumutwi uyu?
2 Mbuli Beneklistu bancine, tatubikili maano abuumbi kushintu shicita Satana abashikaswa bakwe. Tulabikila maano kwiiya pali Yehova akumusebensela. (Kulu. 25:5) Nacibi boobo, tulyeelete kushiba Satana mbwaacenjeeka. Ino nceebonshi? Kwaamba ayi tuleye kucenjeekwa anguwe. (2 Koli. 2:11) Mumutwi uyu, tutokwiiya nshila inene Satana abashikaswa bakwe njobasebensesha kucenjeeka bantu. Tutokwiiya ambweenga twacikonsha kubakoma cakumaninina.
MISHIMU IBIIBI MBOICENJEEKA BANTU
3-4. (a) Ino kupaila mishimu cilaambanshi? (b) Ino mbantu baanji buyani bashoma sha mishimu?
3 Nshila inene Satana abashikaswa bakwe njobasebensesha kucenjeeka bantu, nkwiinda mukucita sha mishimu. Bantu bacita sha mishimu balaamba ayi balashiba shintu shimwi nsheenga bantubo tabacikoonshi kushiba na kucita. Kucakubonenaako, bamwi balaamba ayi balashiba sheshi shikacitike kunembo kwiinda mukubelenga nyenyeenshi na kusonda. Bamwi balacita shipa bantu kubona anga batokwaamba abaabo bakafwa. Bamwi balacita buloshi na kucita shamasalamushi. *
4 Ino mbantu baanji buyani bashoma sha mishimu? Ndyebakalinga kulanga langa pamakani aya mushishi shili 18 shaku Latin America a Caribbean bakacana kwaamba ayi muntu womwi pa botatwe alashoma mubuloshi na shamasalamushi. Alimwi bantu bashika pafwiifwi a namba yeenka iyi balashoma ayi inga bacikonsha kubandika amishimu. Kulangoola kumwi kwakacitwa mushishi 18 shamu Africa. Kwalo bakacana kwaamba ayi bantu beendilila pa haafu ya baabo mbobakeepusha balashoma mubuloshi. Ncakwiila kuli koonse nkotukala, tulyeelete kuleya kupaila mishimu. Mukwiinga Satana alisuni ‘kucenjeeka bantu boonse.’—Ciyu. 12:9.
5. Ino Yehova alababona buyani bantu beshikupaila mishimu?
5 Yehova ngu “Lesa ushomeka.” (Kulu. 31:5) Sa alakondwa na bantu kabapaila mishimu? Sobwe napaceyi! Yehova wakalwiita bene Isilaeli ayi: “Kutabi muntu uli woonse pakati kanu ubenga mwanaakwe musankwa na mwanakashi mumulilo, muŋanga, shimasalamushi, shikusonda, muloshi, muntu wiipusha makani kubaŋanga, beshimaloto, na muntu wiipusha makani kubafu. Mukwiinga Yehova alipatite muntu woonse ucita shintu ishi shilensha bunya.” (Duto. 18:10-12) Nabi kwaamba ayi Beneklistu tabakonkeli Milawo Yehova njaakalinga wapa bene Isilaeli, tulicishi kwaamba ayi tapilooki pamakani ambwapatite kupaila mishimu.—Mlk. 3:6.
6. (a) Ino Satana alacenjeeka buyani bantu asha mishimu? (b) Kweelana a Shikushimikila 9:5, ino Baibo ilaiisha nshi pamakani ashicitika na muntu wafwa?
6 Yehova alatucenjesha pamakani akupaila mishimu mukwiinga alicishi ayi njenshila Satana njaasebensesha kuleta mapensho pa bantu. Satana alabeca bantu kwiinda mukusebensesha sha mishimu—kwiilikaawo abubeshi bwakwaamba ayi na muntu wafwa alatolelela kuba abuumi kumusena kumwi. (Amubelenge Shikushimikila 9:5.) Satana alakonga bantu akubakusha kuli Yehova kwiinda mukusebensesha sha mishimu. Kuyanda kwakwe nkwakwaamba ayi bantu bapaila na kucita sha mishimu banooshoma nguwe muciindi cakushoma Yehova.
MBWEENGA TWALEYA KUCENJEEKWA AMISHIMU IBIIBI
7. Ino Yehova alatulwiita nshi?
7 Bweenka mbuli mbotwabandikawo kale, Yehova alatulwiita nshotweelete kucita kwaamba ayi tuleye kucenjeekwa a Satana abashikaswa bakwe. Atubandike shimwi nsheenga twaciita kwaamba ayi tukome Satana abashikaswa bakwe.
8. (a) Ino nciinshi cinene ceenga catucafwa kukaka mishimu ibiibi? (b) Ino Kulumbaisha 146:4 ilatondesha buyani ayi shaamba Satana pamakani abafu nshakubeca?
8 Munoobelenga Maswi akwe Lesa akukutumana kuyeeyawo. Ici ncecintu cinene ceenga catucafwa kukaka bubeshi buyuminisha mishimu ibiibi. Maswi akwe Lesa ali anga ngumupeeni ukolete, alayubulula bubeshi bwakwe Satana. (Efe. 6:17) Kucakubonenaako, Maswi akwe Lesa alatuyubulwita cancine cakwaamba ayi bafu tabakoonshi kubandika aboomi. (Amubelenge Kulumbaisha 146:4.) Alimwi Baibo ilatulwiita ayi Yehova eenkabo ngoocite nkusu shakutulwiita sheshi shikacitike kunembo. (Isa. 45:21; 46:10) Na lyoonse katubelenga Maswi akwe Lesa akukutumana kuyeeyawo, tulaakuba balibambite kukaka akupata bubeshi buswa kumishimu ibiibi.
9. Ino nshiinshi nshotuleya kucita kwaamba ayi tukake mishimu ibiibi?
9 Amukake cintu cili coonse cikumite kumishimu ibiibi. Mbuli Beneklistu bancine, tulaleya cili coonse cikumite kukupaila mishimu. Kucakubonenaako, tatuyi kubaŋanga na kweelesha kubandika abafu munshila imwi ili yoonse. Bweenka mbuli mbotwakeeya mumutwi wakeenda, tulaleya milawo ya malilo iyo ipa bantu kushoma ayi na muntu wafwa alatolelela kuba abuumi kumusena kumwi. Alimwi tatuyi kubantu beshi kubeca ayi balishi shakunembo na beshikusonda. (Isa. 8:19) Tulicishi kwaamba ayi kucita boobo ncibiibi mukwiinga inga kwatupa kunobandika a Satana abashikaswa bakwe.
Amukonkele cakubonenaako ca Beneklistu bamuciindi ca batumwi kwiinda mukusowa cintu cili coonse cikumite kushamasalamushi akuleya shakulikondelesha shitondesha shamishimu (Amubone mapalagilafu 10-12)
10-11. (a) Ino bamwi muciindi ca batumwi bakacita buyani ndyebakeeya cancine? (b) Kweelana a 1 Bene Kolinto 10:21, ino nceebonshi ncotweelete kukonkela cakubonenaako ca Beneklistu bakutaanguna, alimwi inga twacita buyani ubo?
10 Amusowe cili coonse ceenga camupa kwaamba ayi munoopaila mishimu. Bantu bamwi bakalinga kukala mundabala ya Efeso muciindi ca batumwi, bakalinga kupaila mishimu. Ano ndyebakeeya cancine, bakasebensa cankusu akwaaluka. “Abalo baŋanga baanji bakaleta mabuku abo akwaatenta bantu boonse kabeebela.” (Milimo 19:19) Bantu aba bakacita shoonse nshebakalinga kucikonsha kwaamba ayi bakake mishimu ibiibi. Mabuku abo ashabuŋanga akalinga amaali aanji. Ano muciindi cakupa bamwi na kwaulisha, bakaatenta. Bakabikila maano abuumbi kukusangalasha Yehova kuteshi ku maali ngobakasowa pamabuku ayo.
11 Ino inga twacikonkela buyani cakubonenaako ca Beneklistu bamuciindi ca batumwi? Inga cabota kusowa shili shoonse sheenga shatupa kwabanaamo lubasu mushamishimu na bashikaswa. Ici cileelikaawo shintu mbuli shitumwa ashintu bantu nshobafwala na kubaasho kwaamba ayi balishitilishe kumishimu ibiibi.—Amubelenge 1 Bene Kolinto 10:21.
12. Ino njimiipusho nshi njotweelete kuliipusha pamakani ashakulikondelesha?
12 Amusale kabotu shakulikondelesha. Amuliipushe ayi: ‘Sa ndabelenga mabuku, mamagazini, na makani pa intaneti aamba shamishimu? Ino nyimbo nshenkutika, mafilimu, amapulogilamu apa TV ngonjeebela, na shisekano sha mavidyo shili buyani? Sa shilatondesha sha mishimu? Sa shilatondesha shibanda na shintu shamasalamushi? Sa shilatondesha shintu shamasalamushi kuboneka anga nshibotu?’ Ncakwiila teshi shakulikondelesha shoonse shaamba pamakani akuyeeyelabo shikumite kupaila mishimu. Ndyemutosala shakulikondelesha, amushinishe kusala sheesho sheenga shamucafwa kuleya cili coonse Yehova ncaapatite. Tulisuni kucita shoonse nsheenga twacikonsha kwaamba ayi “tutolelele kuba anjeelacaamba isalalite” pameenso akwe Lesa.—Milimo 24:16. *
13. Ino nshiinshi nshotweelete kuleya kucita?
13 Mutanoshimika pamakani ashabashikaswa. Pamakani aya, tulyeelete kukonkela cakubonenaako cakwe Yesu. (1 Pita 2:21) Kaatana kusa pacishi ca panshi, Yesu wakalinga kwiculu, alimwi wakalinga kucishi makani aanji pali Satana abashikaswa. Nacibi boobo, taakalinga kushimika pamakani ashintu shibiibi shakacita mishimu iyo. Yesu wakalinga kwiisha bantu pali Yehova, kuteshi kwaambilisha bubeshi bwakwe Satana. Inga twakonkela cakubonenaako cakwe Yesu kwiinda mukutashimika pamakani ashintu shicita bashikaswa. Muciindi cakucita boobo, tulatondesha kwiinda mumaswi esu ayi ‘myoyo yesu iliswitebo ashintu shibotu,” nkokwaamba ayi, cancine.—Kulu. 45:1.
Tatweelete kuloonda mishimu ibiibi. Mukwiinga Yehova, Yesu, alimwi abaanjelo balicite nkusu kwiindaawo (Amubone mapalagilafu 14-15) *
14-15. (a) Ino nceebonshi tatweelete kuloonda mishimu ibiibi? (b) Ino mbumboni nshi butondesha ayi Yehova alashitilisha bantu bakwe munshiku shino?
14 Mutanoloonda mishimu ibiibi. Mucishi cibiibi cino, shintu shibiibi inga shatucitikila. Cakuteengashila inga twawiita mumapensho, kuciswa, na kufwa. Sombi tatweelete kuyeeya ayi mishimu ibiibi njoyalengesha. Baibo ilatulwiita ayi “shiindi shamapensho akucitikilwa shintu shakuteengashila” inga shashikila muntu uli woonse. (Shi. 9:11) Alimwi Yehova watondesha kale kwaamba ayi alicite nkusu abuumbi kwiinda bashikaswa. Kucakubonenaako, Lesa taakwe kulekelela Satana kwaamba ayi acaye Jobo. (Jobo 2:6) Muciindi cakwe Mose, Yehova wakatondesha ayi wakalinga kucite nkusu kwiinda bapailishi beshimasalamushi ba bene Ijipiti. (Ku. 8:18; 9:11) Kwiinda munkusu shakwe Yehova, Yesu wakatondesha ayi alicite nkusu kwiinda Satana abashikaswa ciindi ndyaakabawaala pacishi ca panshi kuswa kwiculu. Alimwi conoonobo, Yesu alaakuwaala Satana abashikaswa bakwe mucilindi citeeli kwaamba ayi batakacenjeekiwo bantu alimwi.—Ciyu. 12:9; 20:2, 3.
15 Tulicite bumboni buunji butondesha Yehova mbwaashitilisha bantu bakwe munshiku shino. Alimwi amuyeeyebo: Kushika apacecino ciindi tutoshimikila akwiisha cancine mumbasu shoonse sha cishi ca panshi. (Mate. 28:19, 20) Kucita boobo kwapa kwaamba ayi micito ibiibi yakwe Satana ibonekele patuba. Cakutatoonsha, naakalinga kucikonsha, naakwiinga Satana wakatukasha kucita ncito yesu, ano taacitewo nkusu shakucita boobo. Aboobo tatweelete kuloonda mishimu ibiibi. Tulicishi kwaamba ayi “meenso akwe Yehova, alalanga-langa cishi coonse kwaamba ayi atondeshe nkusu shakwe kucafwa baabo bamushoma camoyo woonse.” (2 Maka. 16:9) Na katushomeka kuli Yehova, bashikaswa taakuwo nsheenga batucita.
SHOOLWE YEHOVA NSHAAPA BAABO BASUMINA LUCAFWO LWAKWE
16-17. Amwaambe cakubonenaako ca umwi mbwakatondesha kutaloonda kwaamba ayi akake kupaila mishimu ibiibi.
16 Tulyeelete kuyuma, bunene bunene na beshikamukowa nabi beshicibusa balisuni kwaamba ayi twaabanemo lubasu mukupaila mishimu. Yehova alabapa shoolwe abo bayuma akukaka kupaila mishimu. Atubandike cakubonenaako cakwe nankashi Erica, ukala ku Ghana. Erica wakalinga kucite myaaka 21 ndyaakatalika kwiiya Baibo. Mukwiinga baishi bakalinga bapailishi ba beshimasalamushi, wakalinga kweelete kwabanaamo lubasu mukukonkela mulawo wakulya nyama njobakalinga kutaanguna kubenga kubalesa ba baishi. Erica ndyaakakaka, beshikamukowa bakwe bakalinyumfwa ayi wacobola balesa. Alimwi bakashoma ayi balesa abo batoobacinkusha akubapensha amalwashi.
17 Beshikamukowa bakwe Erica bakeelesha kumukakatisha kwaamba ayi akonkele mulawo uyo, sombi wakayuma kukaka, nabi kwaamba ayi wakalinga kucishi ayi ici citolengesha ayi bamutande paŋanda. Bakamboni bamwi bakatalika kukala akwe. Munshila iyi, Yehova wakapa Erica coolwe cakuba amukwashi upya—bashominyina abo bakesa mukuba mbuli bamakwaabo kulinguwe. (Maako 10:29, 30) Nabi kwaamba ayi bashikamukowa bakwe bakamukaka akutenta shintu shakwe, Erica wakatolelela kushomeka kuli Yehova akubombekwa, alimwi pacecino ciindi atosebensa mbuli painiya waciindi coonse. Taloondiiwo bashikaswa sobwe. Kwaamba pamukwashi wakwe, Erica wakaamba ayi, “Lyoonse ndapaila kwaamba ayi mukwashi wangu bakacane lusangalalo lusa ceebo cakushiba Yehova akuba alwaanguluko ndotucana ceebo cakusebensela Lesa shilusuno.”
18. Ino nshoolwe nshi Yehova nshaatupa na twamushoma?
18 Teshi kwaamba ayi soonse tulaakwiinda mubweelesho bweenka mbuli boobu. Nacibi boobo, soonse tulyeelete kukaka mishimu ibiibi akushoma Yehova. Na tukacite boobo, tulaakutambula shoolwe shiinji, alimwi tulaakuleya kucenjeekwa abubeshi bwakwe Satana. Kwiilikaawo teshi tukacileeke kusebensela Yehova ceebo cakuloonda bashikaswa. Ano cinene kwiindaawo, tulaakuyumya bushicibusa bwesu a Yehova. Shikwiiya Jemusi wakalemba ayi; “Amulibombye kuli Lesa.” “Amupikishe Diabolosi, lyalo ulaakumutalamuka. Amusene pafwiifwi aLesa alakwe alaakusena pafwiifwi amwebo.”—Jemu. 4:7, 8.
LWIIMBO 150 Amulangoole Lesa Kwaamba ayi Mukapuluke
^ par. 5 Mukwiinga Yehova alitusuni, alatuceenjesha pamakani amishimu ibiibi ashibiibi sheenga shacita mishimu iyo. Ino mishimu ibiibi ilabacenjeeka buyani bantu? Ino nshiinshi nshotweelete kucita kwaamba ayi tuleye mishimu ibiibi? Mumutwi uyu tutokwiiya Yehova mbwaatucafwa kwaamba ayi tuleye kucenjeekwa amishimu ibiibi.
^ par. 3 KUSANSULULA MASWI: Kupaila mishimu cilaamba kushoma akucita shintu shikumite kubashikaswa. Ici cileelikaawo akushoma ayi mishimu ya bantu bakafwa ilatolelela kuba abuumi na muntu wafwa alimwi mishimu iyi ilabandika abantu boomi kwiinda mumuntu umwi mbuli (baŋanga na beshi shamishimu). Kupaila mishimu kuleelikawo ashintu mbuli buloshi akusonda. Mumutwi uyu, maswi akwaamba ayi masalamushi atosansulula shintu shikumite kumishimu ibiibi. Alimwi inga asansulula kulowa muntu na kumupa musamu wakwaamba ayi cibanda ciswe pamubili na kukusha mashingo.
^ par. 12 Bamanene tabacite nkusu shakubika milawo ya shakulikondelesha nshotweelete kusala. Sombi, Mwineklistu uli woonse ndyatosala shakubelenga, kweebela na shisekano, alyeelete kusebensesha njeelacaamba yakwe yakaiishikwa kabotu Baibo. Mitwi ya mikwashi bakonkela Baibo nshoiisha balashinisha kwaamba ayi shakulikondelesha shasala bamumukwashi wabo shitokweendelana anjiisho shamu Baibo.—Amuye pa jw.org/leh® akubona mutwi utokwaamba ayi “Sa Mulakasha Mafilimu, Mabuku, na Inyimbo Shimwi?” amuye palembetwe ayi SHAPALINDISWE > MIIPUSHO BANTU NJOBEPUSHA ABUUMBI.
^ par. 54 BUSANSULUSHI BWACIKOPE: Cikope citotondesha Yesu mbuli Mwaami wesu shinkusu kwiculu uyo utootanjilila likoto lya baanjelo. Cuuna ca Bwaami cakwe Yehova cili peculu pabo.
