Ba Winston, amutulwiiteko mbomwakatalika kwiiya pali Lesa.

Ndakakulila mumukwashi watakalinga kusuni sha kupaila, twakalinga kukala kumushi kumusena wiitwa ayi Queensland, mucishi ca Australia. Mukwiinga twakalinga kukala kumusena wakulaale, bantu mbondakalinga kushibo mbeshikamukowa mbotwalinga kukalaabo. Ndyendakashika myaaka yakuma 12, ndakaba alusuno lwa kwiiya pali Lesa. Ndakatalika kupaila kuli Lesa, akumusenga kwaamba ayi ancaafwe kushiba cancine pali nguwe. Mukuya kwaciindi ndakalonga kuswa kumushi akucana ncito mutauni iitwa ayi Adelaide, ili kumalenge kwa cishi ca Australia. Ndyendakaya mukufwakasha kutauni iitwa ayi Sydney apo kaancite myaaka 21, ndakakumanya ba Pam, lyalo bakandwiita sha kakoto kabeshikupaila kakalinga kwiitwa ayi British-Israel, bantu aba bakalinga kushoma ayi bantu baku Britain bakaswa kumukowa wa bene Isilaeli wakasoweka. Beshibupailishi ubu bakalinga kushoma ayi bantu baku Britain mbobakalinga mishobo 10 ya bene Isilaeli, iyo yakalinga kulubasu lwakumatwa alimwi yakatolwa mubusha mumyaaka yamuma 800  B.C.E. Aboobo ndyendakaboolela ku Adelaide, ndakatalika kubandika makani aya amubyaanji ngondakalinga kusebensaakwe uyo wakalinga watalika kwiiya Baibo aBakamboni Bakwe Yehova. Pesule lyakubandikaakwe ciindi ciniini—pamakani aBakamboni anshebashoma—Ndakesa mukushiba kwaamba ayi ici ncecikumbulo kumupailo wangu waku bwanike. Ndakeeya cancine pali Mulengi wangu aBwaami bwakwe! Ndakacana “ngale iyandika abuumbi.”—Mate. 13:45, 46.

Ba Pam, amwebo mwakatalika kulangoola ngale iyi kamucilibo wacanike. Ino mwakaicana buyani?

Ndakakulila mumukwashi mobakalinga kusuni kupaila, twakalinga kukala mutauni iitwa ayi Coffs Harbour, ku New South Wales. Bashali bangu pomwi abakaapa bakasumina bupailishi bwa kakoto ka British-Israel movement. Mwanike wangu musankwa, munene wangu mwanakashi, anebo, kwiilikaawo  abeshikamukowa bamwi, ndyetwakalinga kukula twakalinga kushoma ayi Lesa alisunibo bantu bakaswa kumikowa yaku Britain. Nacibi boobo makani aya nshindakalinga kwaashoma abuumbi, alimwi nshindakalinga kulinyumfwa kuba pafwiifwi aLesa. Ndyendakalinga kucite myaaka 14, ndakaya kumaceeci apusenepusene, maceeci mbuli Anglican, Baptist, a Seventh-day Adventist. Sombi taakwe kuncafwawo kushiba Lesa.

Mukuya kwaciindi mukwashi wesu wakalongela kutauni iitwa ayi Sydney, uko nkondakashibanina aba Winston, abo bakalinga besa mukufwakasha. Bweenka mbuli mbobaambawo kale, mibandi yesu pamakani abupailishi yakabapa kwaamba ayi batalike kwiiya aBakamboni. Aboobo kuswabo ciindi cilya, makalata oonse ngobakalinga kunembela akalinga kuswitebo malembo amu Baibo! Kwaamba lushinisho, pakutaanguna ndakalisukama—alimwi nshindakalinga kukondwa. Ano mukuya kwaciindi ndakesa mukushiba ayi ici ncocancine pali Lesa.

Mu 1962, ndakalongela ku Adelaide kwaamba ayi mbe pafwiifwi aba Winston. Bakancanina kwakukala kumukwashi wa Bakamboni beebene, mukwesu—Thomas anankashi Janice Sloman—abo bakalinga bamishonali kucishi ca Papua New Guinea. Paciindi ici kaancitebo myaaka 18, bakandama kabotu abuumbi akuncafwa lwakumushimu. Aboobo anebo ndakatalika kwiiya Baibo, tapana kwiinda ciindi cilaamfu ndakashiba ayi ndacicana cancine. Ndyetwakeebana aba Winston, twakalyaaba muncito yakusebensela Yehova icite mpindu abuumbi—nabi kwaamba ayi cimwi ciindi tulacana mapensho, incito iyi yatucafwa kutola panembo kulumba kwesu ngale iyandika abuumbi njetwakacana.

Ba Winston, amutulwiiteko mbocakalinga ndyemwakatalika kusebensela Yehova.

Ndyetwakeebanabo aba Pam, Yehova wakacalula ‘milyaango inene’ ya ncito shiinji. (1 Koli. 16:9) Wakatucafwa kushiba coolwe cakutaanguna ngumukwesu Jack Porter, uyo wakalinga wafwakashila libungano lyesu mbuli mutanjilili walubasu. (Pacecino ciindi tutosebensa pomwi Mukomiti Yamusampi waku Australasia) Mukwesu Jack amukaakwe, Roslyn, bakatuyuminisha ayi tutalike bupainiya bwaciindi coonse—coolwe ncotwakasangalalaaco kwamyaaka 5. Ndyendakalinga kucite myaaka 29, bakampa mukuli wakusebensa mbuli mutanjilili walubasu kunsumbu ya South Pacific, iyo yakalinga kutanjililwa amusampi waku Fiji. Misena iyi yakalinga American Samoa, Samoa, Kiribati, Nauru, Niue, Tokelau, Tonga, Tuvalu, alimwi a Vanuatu.

Paciindi cilya, bantu bakalinga kukala kumisena iyi yakulaale tabakalinga kubashoma Bakamboni Bakwe Yehova, aboobo twakalinga kweelete kucenjela. (Mate. 10:16) Mumabungano aanji mwakalingabo bantu baniini, alimwi mabungano amwi tabakalinga kucikonsha kutucanina kwakukala. Aboobo twakalinga kuya mukusenga kwakukala kubantubo, alimwi lyoonse bakalinga kututambula kabotu.

Ba Winston, incito yakusansulula muliisuni abuumbi. Ino nciinshi cakamupa kusuna ncito iyi?

Paciindi cilya, bamakwesu bekala pansumbu ya Tonga bakalinga kucitebo matilakiti aniini atumabuku mumushobo waci Tonga—mushobo waambwa kucishi ca Polynesia. Ndyebatooshimikila bakalinga kusebensesha libuku lyakwiiya lyamu Cisungu lya, The Truth That Leads to Eternal Life. Aboobo ndyetwakalinga kucite cikolo ca bamanene ca nsondo 4, bamanene botatwe bakumusena uyu abo bakalinga kweeleshaako kwaamba Cisungu bakasumina ayi inga bacikonsha kusansulula libuku lya Truth muci Tongan. Ba Pam mbobakalinga kutaipa nshetwalinga kusansulula, lyalo twakashituma kumusampi waku United States kwaamba ayi baye bapulinte. Twakatola nsondo 8 kwaamba ayi incito yoonse imane. Nabi kwaamba ayi tatukwe kusansulula cakushikaawo, libuku ili lyakacafwa bantu baanji abuumbi baamba mushobo waci Tongan kwiiya cancine. Nabi kwaamba ayi nebo aba Pam teshi ndiswe basansulushi, shakacitika ishi shakatupa kutalika kusuna ncito iyi.

Ba Pam, ino buumi bwakukala pansumbu bwakalinga kupusene buyani akukala ku Australia?

Bwakalinga kupusene abuumbi! Kumisena kumwi kwakalinga mansenya abuumbi, kukasala abuumbi, bakoswe, kuciswa, alimwi cimwi ciindi shakulya kuceya. Nacibi boobo, lyoonse macolesha twakalinga kunyumfwa kabotu kulanga maanshi ndyetushiite mukaanda kesu katacite lubumbu kakalinga kwiitwa ayi fale—mumushobo waci Samoan. Mashiku na kuli mweenshi kwakalinga kutuba abuumbi cakwaamba  ayi shisamu amaanshi palweenge shakalinga kuboneka kabotu abuumbi. Shintu ishi shakalinga kutupa kukutumana akuyeeya alimwi akupaila, ico cakalinga kutucafwa kubikila maano kukuyeeya pashintu shibotu muciindi ca shibiibi.

Twakalinga kubasuni abuumbi bacanike alimwi bakalinga kukankamana kubona musungu wakaswa kucishi ca kumwi. Ndyetwakalinga kufwakashila libungano ku Niue, kasankwa kamwi kacanike kakacata lyaansa lyaba Winston akwaamba ayi, “Mulicite mapepe abotu.” Citoboneka takakwe kubonaawo kale muntu ucite booya kumaansa aboobo takakalinga kucishiwo bwakubwiita!

Twakalinga kunyumfwa nkumbu abuumbi na twaboona bantu mbobakalinga kupengete abuumi mbobwakalinga buyumu. Bakalinga kucite misena iboneka kabotu sombi tabakalinga kucitewo shipatela shiinji amaanshi abotu akunwa. Nacibi boobo, bamakwesu tabakalinga kulisukama. Bakalinga kushibilite kukala buumi ubu. Bakalinga kusangalete ceebo cakuba pomwi amikwashi yabo, musena pakubunganina akucikonsha kulumbaisha Yehova. Cakubonenaako cabo cakatucafwa kubikila maano kushintu shiyandika abuumbi akukala buumi bwakutalila shiinji.

Ba Pam, cimwi ciindi mwakalinga kulibambila nweenka maanshi akunwa ashakulya munshila njemutana kushibila. Ino mwakacikonsha buyani?

Ndyeelete kulumba bata. Mukwiinga bakanjiisha shintu shiinji shicafwa mbuli, kukunka mulilo akutelekela pankuni ansheenga ndaciita na tulicitebo shintu shiniini shakusebensesha. Lweendo lumwi ndyetwakalinga kufwakashila libungano ku Kiribati, twakekala mukaanda kaniini kabwiisu alubumbu lwa shisamu. Kwaamba ayi nteleke, ndakakaba kalindi kaniini muŋanda akukunkawo mulilo kusebensesha shipapu. Ndakalinga kuya mukwiimikana mumulaini kumukalo kwaamba ayi nteke maanshi akunwa. Kwaamba ayi bacikonshe kuteka maanshi apamukalo, bakalinga kusebensesha kasamu kakalinga kulaampa mamita mpashi obilo akukulikako ntambo nkokeela mbuli mbobacita kundobo. Ano muciindi cakubika ndobo kuntambo, bakalinga kubikaako cikopo cakutekesha. Kwakalinga kulindilana na umwi wamanisha kuteka aumwi alakwe nkuwaalamo cikopo akucishindika akasamu kwaamba ayi citapule bwangu maanshi. Ndakalinga kubona anga ncuubu ano ndyecakashika ciindi cakwaamba ayi ndime ntooteka ndyendakashiba ayi anu nciyumu abuumbi. Ndakalinga kucita na ndawaala cikopo mumaanshi tacakalinga kupila, ndakeelesha mankanda aanji, sombi cakalinga kweelabo peculu! Aboobo bakanseka abuumbi, lyalo mwanakashi womwi wakesa mukuncafwa. Bantu bakumusena uku lyoonse bakalinga kutucafwa abuumbi.

Noonse nobilo mwakalinga kwiisuni abuumbi incito yanu yakusebensela pansumbu. Amutulwiiteko shakacitika shilibetele nshemutaluubi

Ba Winston: Cakatutolela ciindi kwaamba ayi twiiye milawo imwi. Kucakubonenaako, na bamakwesu batubambila cakulya, liinji bakalinga kumanisha shakulya shoonse nshobakalinga kucite. Pakutaanguna, tatwakalinga kucishi ayi tulyeelete kubashiilaako abalo shakulya na batubambila. Aboobo twakalinga kulya shoonse nshebatubambila! Nacibi boobo, ndyetwakashiba mbocakalinga kweelete kuba twakatalika kubashiilaako. Nabi kwaamba ayi kuli nshetwakalinga kwaalilwa, bamakwesu bakalinga kunyumfwisha. Alimwi bakalinga kukondwa lyoonse na twesa mukufwakashila libungano pesule ya myeenshi 6. Paciindi cilya ndiswebo sweenka soBakamboni bakalinga kuswa kumusena kumwi kusa mukubafwakashila.

Kufwakasha kwesu kwakacafwa bamwi mumushi kushiba cancine pa Bakamboni. Baanji kumusena uku bakalinga kuyeeya ayi bamakwesu bakalipangilabo beene bupailishi. Aboobo bantu ndyebakatubona amukaangu ayi twesa mukufwakashila libungano kuswa kumusena kumwi, bakesa mukushiba ayi bamakwesu abenankashi ndubasu lwa libunga linene nsengwe yoonse libikila maano.

Ba Pam: Kuli cintu cakacitika ndyetwakalinga ku Kiribati nceshi nkabule kuluba, twakacana libungano mwakalinga bamakwesu abenankashi baniinibo. Mwakalingabo munene womwi, mukwesu Itinikai Matera, mukwesu uyu wakacita shoonse nshaakalinga kucikonsha kwaamba ayi atulame kabotu. Bushiku bumwi wakesa kuŋanda abasiketi mwakalinga liyi lyomwibo. Wakaamba ayi; “ndaletela ndimwe,” Paciindi cilya maiyi ankuku taakalinga kubonekawo. Ici cakatuyuminisha abuumbi alimwi teshi nkalubewo.

 Ba Pam, pesule lya myaaka iinji mwakaba alifumo sombi mwaana wakeendilila. Ino nciinshi cakamucafwa kuliyumya?

Mu 1973 ndakamita ndyetwakalinga kusebensela ku South Pacific. Twakaboolela ku Australia, lyalo ndipakeendabo myeenshi 4 mwaana wakeendilila. Ba Winston abalo cakabacisa abuumbi; mukwiinga abalo wakalinga mwanaabo. Mukuya kwaciindi buumba bwakatalika kuya buceya, sombi tabukwe kumaninina kushikila ndyendakabelenga Njashi Yamulindilishi ya April 15, 2009. Palubasu lwa “Miipusho Kuswa Kubeshikubelenga” pakalinga mwiipusho ayi: “Sa mwaana wakafwita mulifumo muli banyina alaakubushikwa?” Magazini iyi yakatuyuminisha abuumbi mukwiinga yakaamba ayi Yehova alaakushiba nsheshi akacite pabaana bakafwa munshila iyi alimwi tulishi ayi lyoonse alacita shibotu. Alaakukusha kucisa koonse nkotweendaamo ceebo cakukala mucishi cino cibiibi, akulwiita Mwanaakwe ‘kunyonyoola ncito shoonse shakwe Satana.’ (1 Joni 3:8) Magazini iyi yakatucafwa kulumba abuumbi paceebo ca “ngale” njetucite mbuli bantu bakwe Yehova! Ncakwiila Bwaami bwakatupa kuba abulindilishi bubotu abuumbi.

Pesule lyakusowekelwa mwaana, twakaboolela alimwi muncito yaciindi coonse. Twakasebensako myeenshi iniini kumusampi waku Australia, lyalo twakatalika alimwi incito yakufwakashila mabungano. Mu 1981, pesule lyakusebensa myaaka 4 kumishi yaku New South Wales aku Sydney, bakatwiita kuya mukusebensela kumusampi wakalinga kwiitwa ayi Australia, uko nkotutosebensela apacecino ciindi.

Ba Winston, ino nshemwakeendaamo ndyemwakalinga kusebensela kunsumbu ya South Pacific shamucafwa buyani ndyemutoosebensa Mukomiti Yamusampi waku Australasia?

Shancafwa munshila shiinji. Cakutaanguna, musampi waku Australia wakalinga kweelete kutanjilila ncito ku American Samoa aku Samoa. Lyalo, musampi waku New Zealand bakaupankanya pomwi amusampi waku Australia. Aboobo musampi wa Australasia uleelikawo cishi ca Australia, American Samoa a Samoa, nsumbu ya Cook, New Zealand, Niue, Timor-Leste, Tokelau, a Tonga—muunji ndakafwakashilamo mbuli shikwiimikaninaako musampi. Nshendaakeendaamo ndyendakalinga kusebensa abamakwesu abenankashi bashomeka mumisena yoonse iyi shancafwa kusebensa kabotu ndyentosebensela kuofesi yamusampi ano.

Mukumanisha, inga ndaamba ayi nshotweendaamo nebo aba Pam, shatwiisha kwaamba ayi, teshi banene beenka beshikuba alusuno lwakulangoola Lesa. Bacanike abalo balalangoola “ngale iyandika abuumbi”—nabi kwaamba ayi beshikamukowa bamwi tabasuniiwo. (2 Baami 5:2, 3; 2 Maka. 34:1-3) Cakutatoonsha, Yehova ngu Lesa shilusuno usuni kwaamba ayi bacanike abanene bakacane buumi butamaani!

Peenda myaaka 50 ano kuswa ciindi nebo aba Pam ndyetwakatalika kusuna kushiba pali Lesa, ndyetwakatalikabo kulangoola tatwakalinga kucishi ayi nshiinshi nsheshi tukacane. Ncakwiila, cancine ca Bwaami cili anga ni ngale ya muulo unene abuumbi! Tulaakutolelela kucatisha cakushinisha ngale iyi ankusu shesu shoonse!