MUTWI WAKWIIYA 25
Amucinke Manungo Muli Yehova Ndyemwalisukama
“Kulisukama kulalengesha muntu kuungumana.”—TUS. 12:25.
LWIIMBO 30 Ngu Ta, Lesa Wangu Ashicibusa Wangu
NSHESHI TWIIYE *
1. Ino nceebonshi ncotweelete kukonkela Yesu nshakaamba?
NDYAAKAAMBA sha bushinshimi bwanshiku shakweelaako, Yesu wakaamba ayi: “Amucenjele kwaamba ayi myoyo yanu italemenwi . . . ashakulisukama sha buumi.” (Luka 21:34 nwt) Ino nceebonshi tulyeelete kukonkela kucenjesha uku? Mukwiinga pacecino ciindi, soonse tuleenda mumapensho bantu boonse ngobeendaamo, ayo eenga atupa kulisukama.
2. Ino ngamapensho nshi bamakwesu ngobeendaamo?
2 Cimwi ciindi tulacana mapensho apusenepusene paciindi comwi. Atubone shakubonenaako shitokonkelaawo. Mukwesu John, * ucite bulwashi bwiitwa ayi multiple sclerosis, wakalisukama abuumbi mukaakwe ndyaakamushiya pesule lyakukala pomwi mucikwati kwa myaaka 19. Abalo bana bakwe banakashi bobilo bakacileka kusebensela Yehova. Mukwesu Bob amukaakwe Linda abalo bakalinga kucite mapensho apusenepusene kwiinda aayo akalinga kucite mukwesu John. Boonse bobilo incito yakamana akulusa ŋanda njobakalinga kukalaamo. Kwiilikaawo pamapensho oonse aya, ba Linda bakabacana abulwashi bucaya bwa moyo, kunungaawo bakatalika kuciswa abumwi bulwashi ubo bwakatalika kunyonyoola nkusu sha mubili shakulwana malwashi.
3. Ino lilembo lya Bene Filipi 4:6, 7, lilatulwiita nshi pali Yehova?
3 Inga twashoma kwaamba ayi Yehova Mulengi wesu shilusuno, alishi mbotulinyumfwa na twalisukama. Aboobo alisuni kutucafwa kwaamba ayi tucikoonshe kuliyumya ndyetwacana mapensho. (Amubelenge Bene Filipi 4:6, 7.) Tulacana shakubonenaako shiinji mu Maswi akwe Lesa, shaamba basebenshi bakwe Lesa mbobakaliyumya mumapensho. Alimwi tulacana amakani atondesha Yehova mbwakabacafwa kuliyumya mumapensho abo. Atubandike shakubonenaako shimwi.
ELIJA—“WAKALINGA MUNTU BWEENKA MBULI NDISWE”
4. Ino ngamapensho nshi Elija ngakeendaamo, alimwi ino wakalinyumfwa buyani pali Yehova?
4 Elija wakalinga kusebensela Yehova paciindi shintu ndyeshakalinga shiyumu abuumbi alimwi ndyaakalinga kucite mapensho anene. Mwaami Aabu, taakalinga mwaami ushomeka bweenka mbuli baami bamwi bakalinga kweendelesha bene Isilaeli, wakeeba Jesebelo, mwanakashi mubiibi moyo wakalinga kulambila Baali. Aabu amukaakwe bakalengesha kwaamba ayi bantu baanji batalike kulambila Baali, alimwi bakacaya bashinshimi baanji bakwe Yehova. Sombi Elija wakacikonsha kuloboka. Alimwi mukwiinga wakashoma Yehova, wakapuluka ndyekwakalinga cilanga cinene. (1 Baami 17:2-4, 14-16) Kwiilikaawo, Elija wakacinka manungo muli Yehova ciindi ndyaakalinga kupikishikwa abashinshimi bakwe Baali, abaabo bakalinga kumupaila. Wakayuminisha bene Isilaeli ayi basalewo kusebensela Yehova. (1 Baami. 18:21-24, 36-38) Elija wakabona Yehova mbwakamushitilisha akumucafwa munshila shiinji ndyaakalinga mumapensho.
Yehova wakatuma munjelo kwaamba ayi ayuminishe Elija (Amubone mapalagilafu 5-6) *
5-6. Kweelana a 1 Baami 19:1-4, ino Elija wakalinyumfwa buyani, alimwi ino Yehova wakatondesha buyani ayi wakalinga kumusuni?
5 Amubelenge 1 Baami 19:1-4. Nacibi boobo, Elija wakaloonda Jesebelo ndyaakamucenjesha ayi atoomucaya. Aboobo wakacicila kuBiyasheba. Wakalisukama abuumbi akutalika kuyeeya ayi ncibotu akufwabo. Ino nciinshi cakapa kwaamba ayi alinyumfwe boobo? Elija wakalinga muntu utasalalite “bweenka mbuli ndiswe.” (Jemu. 5:17) Mpashi wakaba abuumba abuumbi ceebo cakulisukama akulema. Mpashi wakalinga kubona ayi incito yakwe yakucafwa bantu kulambila Yehova yakayabo mumaanshi. Mukwiinga bene Isilaeli tabakwe kwaaluka alimwi wakalibona ayi wacaalabo eenka mbuli musebenshi wakwe Yehova. (1 Baami 18:3, 4, 13; 19:10, 14) Mpashi inga twakankamana akuyeeya ayi ‘ino nceebonshi mushinshimi ushomeka uyu ncakalinyumfwila boobu?’ Ano Yehova wakanyumfwishisha.
6 Yehova taakwe kukalalila Elija ceebo ca mbwaakalinga kulinyumfwa. Sombi wakamucafwa kwaamba ayi abe ankusu alimwi. (1 Baami 19:5-7) Lyalo Yehova wakacafwa Elija kutalika kubona shintu munshila ibete kabotu, kwiinda mukucita caankamiko cakatondesha kwaamba ayi alicite Nkusu shiinditewo. Kwiilikaawo, Yehova wakalwiita Elija ayi kuli abamwi 7,000 mu Isilaeli bakakaka kupaila Baali. (1 Baami 19:11-18) Ishi shoonse shakatondesha Elija kwaamba ayi Yehova wakalinga kumusuni.
YEHOVA MBWAATUCAFWA
7. Ino tulashoma nshi na twayeeya Yehova mbwakacafwa Elija?
7 Sa amwebo mutokwiinda mubukaalo busukamika? Cilayuminisha abuumbi kushiba kwaamba ayi Yehova wakanyumfwishisha Elija mbwaakalinga kulinyumfwa! Cilatupa kushoma kwaamba ayi alishi mbotulinyumfwa na twalisukama. Alishi nkusu shesu mposheela, nshetutooyeeya ambotutolinyumfwa. (Kulu. 103:14; 139:3, 4) Aswebo na twacinka manungo muli Yehova bweenka mbuli Elija, inga watucafwa kuliyumya ndyetwacana mapensho asukamika.—Kulu. 55:22.
8. Ino Yehova alaakumucafwa buyani kuliyumya?
8 Kulisukama inga kwamupa kuyeeya ayi mapensho anu teshi akamanewo. Alimwi kulinyumfwa boobo inga kwamupa kuba abuumba. Na mwalinyumfwa boobo, mutaluubi kwaamba ayi Yehova inga wamucafwa kuliyumya. Ino inga wamucafwa buyani? Alisuni kwaamba ayi munoomulwiita lipenshi ndyemucite ambomutoolinyumfwa. Alaakumucafwa. (Kulu. 5:3; 1 Pita 5:7) Aboobo lyoonse amumulwiite Yehova mapensho ngomucite. Nabi kwaamba ayi teshi akaambe andimwe bweenka mbuli mbwakacita kuli Elija, alaakukumbula mupailo wanu kwiinda mu Maswi akwe, Baibo, alibunga lyakwe. Makani ngotubelenga mu Baibo inga amuyuminisha akumupa kulangila. Kwiilikaawo, bamakwesu abenankashi mulibungano inga bamuyuminisha.—Loma. 15:4; Ebu. 10:24, 25.
9. Ino shicibusa ngomushoma inga wamucafwa buyani?
9 Yehova wakalwiita Elija kupaako Elisha mikuli imwi. Munshila iyi, Yehova wakapa Elija shicibusa mubotu weenga wamucafwa kuliyumya na walisukama. Aswebo na twalwiitako shicibusa mapensho ngotutokwiindaamo, inga watuyuminisha. (2 Baami 2:2; Tus. 17:17) Na taakuwo ngomwabona ayi inga mwalwiitako mapensho ngomucite, amusenge Yehova kwaamba ayi amucaafwe kucana mukwesu na nankashi ushimpite lwakumushimu weenga wamuyuminisha.
10. Ino shakeendaamo Elija shilatucafwa buyani, alimwi ino cishomesho ncetucana pa Isaya 40:28, 29 inga catucafwa buyani?
10 Yehova wakacafwa Elija kuliyumya ndyaakalinga kucite mapensho, akutolelela kusebensela Yehova cakushomeka kwa myaaka iinji. Elija nshaakeendaamo shilatucafwa kuba alushomo. Cimwi ciindi inga twalisukama abuumbi cakwaamba ayi twalema abuumba. Ano na twacinka manungo muli Yehova, alaakutupa nkusu shakwaamba ayi tutolelele kumusebensela.—Amubelenge Isaya 40:28, 29.
AANA, DEFEDI, A “ASAFU” BAKACINKA MANUNGO MULI YEHOVA
11-13. Ino nshiinshi shakasukamika basebenshi bakwe Lesa bakale kale?
11 Kuli abamwi balembetwe mu Baibo bakalisukama 1 Samwe. 1:2, 6) Aana wakaba abuumba abuumbi ceebo cakulisukama, aboobo wakalinga kulilabo lyoonse akukaka kulya cili coonse.—1 Samwe. 1:7, 10.
abuumbi. Kucakubonenaako, Aana wakalisukama abuumbi ceebo cakutaba amwaana, akusekwa a nabukashinyina. (12 Cimwi ciindi, Mwaami Defedi wakalinga kuba abuumba ceebo cakulisukama abuumbi. Amuyeeyebo mapensho ngaakalinga kucite. Wakalinyumfwa cibiibi abuumbi ceebo ca shilubo shiinji nshaakacita. (Kulu. 40:12) Abusalomu mwanaakwe ngwaakalinga kusuni abuumbi wakamubukila, ico cakapa kwaamba ayi acaikwe. (2 Samwe. 15:13, 14; 18:33) Alimwi shicibusa ngwaakalinga kusuni abuumbi alakwe wakamwaalukila. (2 Samwe. 16:23–17:2; Kulu. 55:12-14) Makani akulumbaisha aanji Defedi ngakalemba, alaamba mbwaakalisukama, mbwaakalinga kulinyumfwa alushomo luyumu ndwaakalinga kucite muli Yehova.—Kulu. 38:5-10; 94:17-19.
Ino nciinshi cakacafwa shikulumbaisha kutalika alimwi kusebensela Yehova calusangalalo? (Amubone mapalagilafu 13-15) *
13 Mukuya kwaciindi, shikulumbaisha umwi wakatalika kukumbwa bantu babiibi bakalinga kukala kabotu. Mpashi wakalinga wamulunyungu lwakwe Asafu mwine Lefi, uyo wakalinga kusebensela mu tempele ku Jelusalemu. Shikulumbaisha uyu wakalisukama abuumbi cakwaamba ayi wakaba abuumba, alimwi taakalinga kukwene ashintu nshaakalinga kucite. Kwiilikaawo wakatalika akubona ayi mukusebensela Lesa tamuwo shoolwe.—Kulu. 73:2-5, 7, 12-14, 16, 21.
14-15. Ino tutokwiiya nshi kuswa kushakubonenaako shotatwe shamu Baibo?
14 Basebenshi bakwe Yehova boonse botatwe mbotwaswa mukubandikaawo, bakacinka manungo muli Yehova kwaamba ayi abacaafwe. Bakamulwiita Yehova mumupailo shakalinga kubasukamika. Bakamulwiita shoonse kwakubula kwiinda mweela. Alimwi bakatolelela kuya kutempele mukulambila Yehova.—1 Samwe. 1:9, 10; Kulu. 55:22; 73:17; 122:1.
1 Samwe. 1:18) Defedi alakwe wakalemba ayi: “Muntu ululeme uleenda mumapensho aanji, sombi Mwaami Lesa [Yehova] ulamufuna mumapensho akwe oonse.” (Kulu. 34:19) Mukuya kwaciindi, shikulumbaisha alakwe wakalinyumfwa ayi Yehova ‘wakamucata kulyaansa lyakwe lyakululyo,’ akumutanjilila. Wakeemba ayi: “Sombi nebo ndikondetwe kuba pafwiifwi aLesa. Mwaami Lesa [Yehova] Shinkusu shoonse waba nceciyubilo cangu.” (Kulu. 73:23, 24, 28) Ino tutokwiiya nshi kuswa kushakubonenaako ishi? Tutokwiiya kwaamba ayi cimwi ciindi, aswebo inga twacana mapensho anene eenga atusukamika. Nacibi boobo, inga twacikonsha kuliyumya na katukutumana akuyeeya Yehova mbwaakacafwa bamwi, kupaila kulinguwe, akukonkela nshaatulwiita.—Kulu. 143:1, 4-8.
15 Yehova wakabanyumfwila nkumbu akubacafwa. Aana wakacileka kulisukama. (AMUSHOME YEHOVA KWAAMBA AYI MUCIKOONSHE KULIYUMYA
Pakutaanguna, nankashi umwi wakalinga kusuni kulitalamusha, ano shintu shakamweendela kabotu ndyaakayeeya mbweenga wacafwa bamwi (Amubone mapalagilafu 16-17)
16-17. (a) Ino nceebonshi ncotuteelete kulitalamusha kuli Yehova abantu bakwe? (b) Ino nshiinshi sheenga shatuyuminisha?
16 Kuli acimwi nceenga tweeya kuswa kushakubonenaako shotatwe nshetwabandikawo. Tatweelete kulitalamusha kuli Yehova abantu bakwe. (Tus. 18:1) Nancy, wakalisukama abuumbi beebaye ndyebakamushiya, wakaamba ayi: “Nshiiku shimwi, nshindakalinga kusuni kubona na kubandika amuntu uli woonse. Ano lyoonse nabi ndacita boobo, ndakalinga kuba abuumba abuumbi.” Nankashi uyu wakacileka kulisukama abuumbi ndyaakatalika kucafwako bamwi bakalinga kucite mapensho. Wakaamba ayi: “Ndakalinga kukutika na bamwi kabasansulula mapensho ngobatokwiindaamo. Lyalo ndakesa mukucana kwaamba ayi kunyumfwila bamwi inkumbu, kwakalinga kuncafwa kutabikila maano abuumbi kumapensho angu.”
17 Inga twayuminishikwa na katucanika kumabungano lyoonse. Kucanika kumabungano kulatupa coolwe ‘cakuyuminishikwa akucafwikwa’ a Yehova. (Kulu. 86:17) Kumabungano, Yehova alatuyuminisha kwiinda mukusebensesha mushimu wakwe usalashi, Maswi akwe, abantu bakwe. Mabungano alatupa coolwe ‘cakuyuminishanya.’ (Loma. 1:11, 12) Nankashi waliina lya Sophia wakaamba ayi: “Yehova alimwi abamakwesu abenankashi bakancafwa kutolelela kuliyumya. Cintu ncendakalinga kubona kuyandika abuumbi ngamabungano. Ndakesa mukucana kwaamba ayi kusebensa cankusu muncito yakushimikila akulibungano, kwakancafwa kuliyumya akutalisukama abuumbi.”
18. Ino Yehova inga watucafwa buyani na twalisukama?
18 Na twalisukama, tulyeelete kwiibaluka kwaamba ayi Yehova taakwe kutushomeshabo ayi alaakumana mapensho esu kunembo, sombi akutucafwa pacecino ciindi, kwaamba ayi tucikoonshe kuliyumya. Alatupa “kuyanda alimwi ankusu” shakwaamba ayi tucikoonshe kuliyumya na twalisukama.—Fili. 2:13.
19. Ino ncishomesho nshi ncotucana pa Bene Loma 8:37-39?
19 Amubelenge Bene Loma 8:37-39. Mutumwi Paulo alatuyuminisha ayi taakuwo cintu nabi comwi ceenga catupansaanya alusuno lwakwe Lesa. Ino nshiinshi nsheenga twaciita kwaamba ayi tucafwe bamakwesu abenankashi bacite kulisukama? Alimwi ino cakubonenaako cakwe Yehova cakutondesha nkumbu akucafwa bamakwesu abenankashi balisukama, inga twacikonkela buyani? Tulaakubandika shikumbulo kumiipusho iyi mumutwi utokonkelaawo.
LWIIMBO 44 Mupailo wa Muntu Upengete
^ par. 5 Kulisukama abuumbi na kwaciindi cilaamfu, inga kwatuletela mapensho lwakumubili na buumba. Ino Yehova alatucafwa buyani? Mumutwi uyu tutokwiiya Yehova mbwakacafwa Elija kwaamba ayi acileeke kulisukama. Alimwi ashakubonenaako shimwi shamu Baibo, sha nsheenga twaciita kwaamba ayi Yehova atucaafwe ndyetwalisukama.
^ par. 2 Meena atokwaambwa mumutwi uyu akaalulwa.