1. Ino ngamakani nshi mutumwi Paulo ngakaambila Beneklistu bananikitwe?

MUTUMWI Paulo wakaamba ayi: “Bwikaalo bwanu butabi anga mbwa bantu bamucishi.” (Loma. 12:2) Paulo wakalinga kulwiita Beneklistu bamuciindi ca batumwi makani aya. Ano ino nceebonshi ncakaambila makani aya kubantu bakalinga kulyaabite kale kuli Lesa alimwi bakalinga kunanikitwe amushimu usalashi?—Loma. 1:7.

2-3. Ino Satana alacita buyani kwaamba ayi atukushe kuli Yehova, alimwi ino nciinshi ceenga catucafwa kukoma miyeeyo itabete kabotu nabi iyume buyani?

² Paulo wakalisukama mukwiinga Beneklistu bamwi balyeelete bakalinga kukonkela miyeeyo ikonkela bantu bamucishi cakwe Satana. (Efe. 4:17-19) Ici inga cacitika akulindiswe munshiku shino. Mukwiinga Satana ngomweendeleshi wa bweende bwa shintu buno, inga watucenjeeka kwiinda mukusebensesha nshila shipusenepusene. Kucakubonenaako, na tulisuni bunene kuba muntu uyandika na kupuka, Satana inga wasebensesha sheeshi sheenka kutukusha kuli Yehova. Alimwi inga watulengesha kutalika kuyeeya kweelana akuyanda kwakwe kwiinda mukusebensesha shintu nshetwakeeya kuŋanda, kucikolo, akubantu mbotubambenaabo.

³ Ano sa inga twacikonsha kukoma mibo amiyeeyo itabete kabotu nabi yeeyo ‘iyumu nta’? (2 Koli. 10:4) Paulo wakaamba ayi: “Tulanyonyoola miyeeyo ili yoonse itabete kabotu akulisumpula  uko kulengesha bantu ayi batashibi Lesa, alimwi tulakoma miyeeyo yoonse kwaamba ayi ibe yeeyo inyumfwila Klistu.” (2 Koli. 10:5) Ncakwiila na Yehova watucafwa, inga twacikonsha kukoma miyeeyo itabete kabotu. Bweenka mbuli musamu mbweenga wanyonyoola nkusu sha poizoni, Maswi akwe Lesa inga atucafwa kucileka kuyeeya mbuli bantu bamucishi cakwe Satana.

4. Ino nshiinshi buunji bwandiswe nshetwakalinga kweelete kucileka ndyetwakeeya cancine?

⁴ Amwiibaluke shintu nshemwakalinga kweelete kucileka ndyemwakeeyabo cancine camu Baibo, akusala kusebensela Yehova. Kwaamba ayi tusebensele Yehova, buunji bwandiswe twakalinga kweelete kucileka shintu shibiibi. (1 Koli. 6:9-11) Tulalumba abuumbi kwaamba ayi Yehova wakatucafwa kucileka kucita shintu shitabete kabotu!

5. Ino nshintu nshi shobilo shaambwa palilembo lya Bene Loma 12:2, nshotweelete kucita?

⁵ Nacibi boobo, tatweelete kuyeeya ayi twakaaluka aboobo cakamana. Nabi kwaamba ayi twakacileka kucita shibiibi shinene nshetwakalinga kucita katutana kubombekwa, tulyeelete kutolelela kucita shoonse nsheenga twacikonsha, kuleya shintu sheenga shapa kwaamba ayi tuboolele kukucita shibiibi nshetwakalinga kucita kale kale. Ino nshiinshi nshotweelete kucita? Paulo wakakumbula ayi: ‘Bwikaalo bwanu butabi anga mbwa bantu bamucishi, sombi amusuminishe Lesa kwaamba ayi asandule [aalule] myoyo yanu kwiinda mukumupa miyeeyo ipya.’ (Loma. 12:2) Aboobo kuli shintu shobilo nshotweelete kucita. Cakutaanguna, tatweelete ‘kukala bwikaalo,’ na kuyungwa, abwikaalo bwamucishi cino. Cabili, tulyeelete “kwaaluka” na kwaalula miyeeyo yesu.

6. Ino maswi akaamba Yesu palilembo lyakwe Mateyo 12:43-45 alatwiisha nshi?

⁶ Kwaaluka Paulo nkwakalinga kwaambawo, teshi kwaalulabo mbotuboneka kunsengwe. Sombi tulyeelete kwaaluka mukati akunsengwe. (Amubone kabokosi kalembetwe ayi  “ Sa Mwakaaluka Cancinencine Na Mulabonekabo Anga Mwakaaluka?”) Tulyeelete kwaalula miyeeyo yesu, nkokwaamba ayi tulyeelete kwaalula mbotubete mukati kamoyo, mbotulinyumfwa, amushintu nshetusuni. Aboobo soonse tulyeelete kuliipusha ayi, ‘Sa ntokwaalulabo mbomboneka kunsengwe na ntokwaaluka ambombete mukati kamoyo?’ Kwaaluka kutalikila mukati kamoyo kulayandika abuumbi. Yesu wakaamba nshotweelete kucita palilembo lya Mateyo 12:43-45. (Amubelenge.) Maswi aya alatwiisha cancine cakwaamba ayi: Tatweelete kweelabo pakwaalula miyeeyo itabete kabotu; sombi tulyeelete kutalika kubona shintu bweenka mbuli Yehova mbwaashibona.

7. Ino inga twacita buyani kwaamba ayi twaalule mbotubete mukati kamoyo?

⁷ Ano sa cilakonsheka kwaalula mbotubona shintu na mbotuyeeya? Maswi akwe Lesa alakumbula ayi: “Mulyeelete kutolelela kwaalula miyeeyo imweendelesha lyoonse, akufwala buntu bupya ubo bwakalengwa kweelana akuyanda kwakwe Lesa mubululami bwancinencine akushomeka.” (Efe. 4:23, 24 nwt) Aboobo inga twacikonsha kwaalula mbotubete mukati kamoyo, nabi kwaamba ayi teshi cuubu. Tatweelete kweelabo pakuleya lunkumbwa lutabete kabotu akucileka kucita shintu shibiibi. Tulyeelete ‘kwaalula miyeeyo itweendelesha.’ Ici cileelikaawo akwaaluka mushintu nshetusuni, mushintu nshetucita, acitupa kucita shintu. Ici cilakonshekabo na twatolelela kusebensa cankusu.

8-9. Ino shakacitikila mukwesu umwi shilatondesha buyani ayi tulyeelete kwaaluka kuswa mukati kamoyo?

⁸ Kucakubonenaako, mukwesu womwi wakalinga ngushinkondo kaatana kwiiya cancine. Ndyaakacileka kunwa akucita nkondo, wakeelela akubombekwa, ici cakatondesha bumboni bubotu abuumbi kumusena nkwakalinga kukala. Ano bushiku bumwi pesule lyakubombekwa, wakacana bweelesho mbwaatakwe kwiingashilawo. Musankwa umwi wakalinga kukoletwe wakaya kuŋanda yakwe akumulwiita ayi balwane. Pakutaanguna mukwesu uyu wakalikasha. Ano musankwa ukoletwe uyo ndyaakacobola liina lyakwe Yehova, mukwesu wakaalilwa kulikasha. Wakaswa pansengwe akumuuma musankwa uyo. Ino nciinshi cakalengesha? Nabi kwaamba ayi nshakeeya kuswa mu Baibo shakamucafwa kulikasha pakutaanguna, taakwe kwaaluka mumiyeeyo imweendelesha. Munshila imwi inga twaamba ayi taakwe kwaaluka kuswa mukati kamoyo.

⁹ Nacibi boobo, taakwe kuboolela mwisule, wakatolelela kweelesha. (Tus. 24:16) Wakatolelela kuya panembo kwiinda mulucafwo lwa bamanene. Mukuya kwaciindi wakeelela akuba munene mulibungano. Ano bushiku bumwi ndyaakalinga Kuŋanda ya Bwaami wakakumanya bweelesho bweenka mbuli bulya mbwaakakumanyawo kale. Musankwa umwi ukoletwe wakesa ayi aume munene womwi. Ino mukwesu uyu wakacita buyani? Wakaamba amusankwa uyo wakalinga kukoletwe cakukalika moyo akuliceesha, akumucafwa kukalikana, lyalo akumushidikila kumishaabo. Ino nciinshi cakapa kwaamba ayi mukwesu uyu acite shintu munshila iyi? Mukwesu uyu wakaalula miyeeyo imweendelesha. Wakaaluka kuswa mukati kamoyo, akuba muntu shiluumuno alimwi uliceesha. Kucita boobo kwakapa kwaamba ayi bantu balumbaishe Yehova!

10. Ino nshiinshi nshotweelete kucita kwaamba ayi twaalule mbotubete mukati kamoyo?

¹⁰ Muntu inga taalukibo peenkapo alimwi kwakubula kusebensa cankusu sobwe. Tulyeelete “kusebensa cankusu” kwa myaaka iinji. (2 Pita 1:5) Teshi kwaamba ayi muntu inga waaluka ceebo cakusebensela Yehova kwa myaaka iinji sobwe. Tulyeelete kucita shoonse nsheenga twacikonsha kwaamba ayi twaalule mbotubete mukati kamoyo. Kuli nsheenga twaciita kwaamba ayi tucikoonshe kwaalula mbotubete mukati kamoyo. Atubandike shimwi pasheesho.

11. Ino kupaila kulatucafwa buyani kwaalula miyeeyo itweendelesha?

¹¹ Cintu cakutaanguna alimwi ciyandika ncotweelete kucita, nkupaila. Tulyeelete kupaila bweenka mbuli shikulumbaisha mbwaakapaila ayi: “Amulenge moyo usalalite muli ndime, NobaLesa, alimwi amumbike mushimu upya, ukalikene mulindime.” (Kulu. 51:10 nwt) Tulyeelete kusumina kwaamba ayi tulayandika kwaalula miyeeyo itweendelesha akusenga Yehova kwaamba ayi atucaafwe. Ino nciinshi ceenga catucafwa kushoma ayi Yehova alaakutucafwa? Cishomesho Yehova ncaakapa bene Isilaeli batakalinga kumunyumfwila muciindi cakwe Esekelo inga catucafwa, wakaamba ayi: “Ndaakubapa moyo womwi, akubika mushimu upya muli mbabo . . . akubapa moyo unyumfwila ndime.” (Ese. 11:19) Yehova wakalinga kulibambite kucafwa bene Isilaeli kwaamba ayi baaluke, aswebo alilibambite kutucafwa.

12-13. (a) Kweelana a Kulumbaisha 119:59, ino nshiinshi nshotweelete kukutumana kuyeeyawo? (b) Ino njimiipusho nshi njotweelete kuliipusha?

¹² Cintu cimwi ciyandika ncotweelete kucita, nkukutumana akuyeeya pashintu nshotubelenga. Ndyetutobelenga Maswi akwe Lesa bushiku abushiku, tulyeelete kucana ciindi cakukutumana akuyeeyawo pashintu nshotutoobelenga, kwaamba ayi tushibe nshotweelete kwaalula mubuumi bwesu. (Amubelenge Kulumbaisha 119:59; Ebu. 4:12; Jemu. 1:25) Tulyeelete kushiba miyeeyo alunkumbwa lweenga lwatuyunga kukonkela busongo bwamucishi. Tulyeelete kusumina kwaamba ayi tulicite bulema mbotweelete kusebenselawo cankusu.

¹³ Kucakubonenaako, amuliipushe ayi: ‘Sa ndiciteko kabulema mbuli munyono?’ (1 Pita 2:1) ‘Sa ndalinyumfwa ceebo ca nkondakakulila, lwiiyo, na maali ngooncite?’ (Tus. 16:5) ‘Sa ndasuula bantu batacite shintu nsheencite na abo baswa kumishobo imwi?’ (Jemu. 2:2-4) ‘Sa ndakumbwa shintu shamucishi cakwe Satana?’ (1 Joni 2:15-17) ‘Sa ndasangalala ashakulikondelesha shitabete kabotu?’ (Kulu. 97:10; 101:3; Amosi 5:15) Shikumbulo kumiipusho iyi inga shamucafwa kushiba mbasu nshomweelete kusebenselawo. Na twacikonsha kwaalula miyeeyo itabete kabotu iyi, tulaakusangalasha Ishiwesu wakwiculu.—Kulu. 19:14.

14. Ino nceebonshi ncotuyandikila kusala kabotu beshicibusa?

¹⁴ Cintu cimwi ciyandika ncotweelete kucita, nkusala beshicibusa bali kabotu. Beshicibusa inga bayunga muntu kucita shibotu na shibiibi. (Tus. 13:20) Bantu mbotusebensaabo na abo mbotwiiyabo kucikolo, inga tabatucafwiiwo kubona shintu mbuli Yehova mbwashibona. Nacibi boobo, inga twacana beshicibusa bancinencine mulibungano. Bamakwesu abenankashi mulibungano, mbobantu beenga batuyuminisha “kutondesha lusuno akucita ncito shibotu.”—Ebu. 10:24, 25.

15-16. Ino nshiinshi Satana nshaacita kwaamba ayi aalule mbotuyeeya?

¹⁵ Mutaluubi kwaamba ayi Satana weemikana cakushinisha pakwaalula miyeeyo yesu. Alasebensesha njiisho shipusenepusene kwaamba ayi tucileeke kuyeeya kweelana anshetwakeeya kuswa mu Maswi akwe Lesa.

¹⁶ Satana watolelela kwiipusha miipusho mbuli ilya njaakeepusha Efa mumuunda wa Edeni ayi: “Sa ncakwiila Lesa wakaamba ayi . . . ?” (Mata. 3:1) Mucishi cino ceendeleshekwa a Satana, bantu baleepusha miipusho yeenga yapa kwaamba ayi tutalike kutoonsha nshetushoma, miipusho mbuli: ‘Sa ncakwiila Lesa alakasha kweebana kwabasankwa na banakashi beenka beenka? Sa ncakwiila Lesa alakasha kusekelela Kilisimasi na bushiku bwakushalwa? Sa ncakwiila Lesa alaamba ayi tamweelete kubikwa bulowa? Sa ncakwiila Lesa shilusuno alakasha ayi tamweelete  kusekana na kubandika ashikamukowa na shicibusa wakakushikwa mulibungano?’

17. Ino nshiinshi nshotweelete kucita na muntu watwiipusha miipusho yeenga yatupa kutalika kutoonsha nshetushoma, alimwi ino Bene Kolose 2:6, 7 ilatondesha nshi?

¹⁷ Tulyeelete kushoma cakushinisha kwaamba ayi shintu nshetwiiya nshancine. Na twaalilwa kucana shikumbulo kumiipusho ya shintu nshetushoma, tulaakutalika kutoonsha kwaamba ayi mpashi nshetushoma teshi shancine. Kutolelela kutoonsha nshetushoma, inga kwatupa kutalika kubona shintu bweenka mbuli bantu bakucishi. Aboobo ino nshiinshi nshotweelete kucita? Maswi akwe Lesa alatulwiita ayi tulyeelete kwaalula miyeeyo yesu, kwaamba ayi tushinishe sobeene “kuyanda kwakwe Lesa kubotu kutambulika alimwi kutacite kampenda.” (Loma. 12:2) Kwiiya Maswi akwe Lesa lyoonse, kulaakutucafwa kushinisha sobeene kwaamba ayi nshetwiiya kuswa mu Baibo shancinencine. Alimwi inga twashoma cakutatoonsha kwaamba ayi njiisho shakwe Yehova, ncakwiila shililuleme. Lyalo bweenka mbuli cisamu cishimpite miyanda, aswebo tulaakuba bashimpite alimwi ‘bayumu mulushomo.’—Amubelenge Bene Kolose 2:6, 7.

18. Ino nshiinshi nshotweelete kunoocita kwaamba ayi tuleye kuyeeya mbuli bantu bamucishi cakwe Satana mbobayeeya?

¹⁸ Taakuwo muntu umwi weenga watuyuminishila lushomo lwesu. Aboobo amutolelele kwaalula miyeeyo imweendelesha. Kamupaila lyoonse akukombelela Yehova kwaamba ayi amupe mushimu wakwe. Munookutumana akuyeeyawo ndyemutobelenga Maswi akwe Lesa, akutolelela kulanga langa paceeco cimupa kucita shintu. Amusale beshicibusa beenga bamucafwa, alimwi munoocanika abantu beenga bamucafwa kwaalula miyeeyo yanu. Kucita boobu kulaakumucafwa kuleya kuyeeya mbuli bantu bamucishi cakwe Satana mbobayeeya, alimwi mulaakucikonsha kukoma “miyeeyo ili yoonse itabete kabotu akulisumpula uko kulengesha bantu ayi batashibi Lesa.”—2 Koli. 10:5.