1. Ino nceebonshi bamwi ncebaalilwa kucita ciiyo capalwaabo?

MUNSHIKU SHINO teshi cuubu kwaamba ayi muntu acane maali akuula shiyandika. Bamakwesu abenankashi baanji balasebensa mawoola aanji kwaamba ayi bacane shiyandika sha mukwashi. Bamwi baleenda mawoola aanji bushiku abushiku kwaamba ayi baye bashike nkobasebensela akuboolela. Baanji balasebensa ncito shiyumu kwaamba ayi bacane maali akuula shiyandika mukwashi. Aboobo bushiku nkobutoomanina, bamakwesu abenankashi aba balaba kabalemete abuumbi! Aboobo cilaba ciyumu kwaamba ayi bacane ciindi cakucita ciiyo capalwaabo.

2. Ino mwebo ndilili ndyemucita ciiyo capalwaanu?

² Ano makani ngakwaamba ayi tulyeelete kucana ciindi cakuliisha kabotu Maswi akwe Lesa, amabuku esu aBwineklistu. Kucita ciiyo capalwesu kulayandika abuumbi na tulisuni kuba abushicibusa bubotu a Yehova, akwaamba ayi tukatambule buumi butamaani! (1 Timo. 4:15) Bamwi balabuka macuunsa cuunsa bushiku buli boonse bantu kabatana kutalika kuyoobeka alimwi ndyebacicite nkusu. Bamwi balacana ciindi cakubelenga akukutumana kuyeeyawo pashintu shakumushimu bushiku buli boonse macolesha kabatana kuya mukoona.

3-4. Ino nshiinshi nshobakaalula kumabuku ngotutambula, alimwi ino nceebonshi?

³ Cakutatoonsha soonse tulicishi kwaamba ayi tulyeelete kucana ciindi cakucita ciiyo capalwesu. Ano ino nshiinshi nshotweelete kwiiya? ‘Shakubelenga nshiinji abuumbi,’ aboobo inga mwaamba ayi. ‘Ndaalilwa kushibelenga shoonse.’ Bamwi balacikonsha kubelenga mabuku oonse ngotucite, ano bamwi balaalilwa kucana ciindi cakucita boobo. Bamulikoto Litanjilila baliyeeshi makani aya. Nceceeco cakapa kwaamba ayi baceesheko mabuku apulintwa aayo acanika pa intaneti.

 ⁴ Kucakubonenaako, twakacileka kupulinta libuku lyakalinga kwiitwa ayi Libuku lya Mwaaka lya Bakamboni Bakwe Yehova, mukwiinga makani aanji ayuminisha ashitoocitikila bamakwesu, alacanika pa webusaiti yesu ya jw.org^® apa pulogilamu ya JW Bulodikasiti mweenshi uli woonse. Njashi Yamulindilishi yakwaabila a Sinsimuka! ilaswabo mankanda otatwe pamwaaka. Tatuna kucita sheeshi kwaamba ayi tunooba aciindi cakucita shintu shimwi, sombi kwaamba ayi tunooba aciindi cakubikila maano “kushintu shiyandika abuumbi.” (Fili. 1:10) Atubandike pashintu nshomweelete kubikila maano abuumbi ansheenga mwaciita kwaamba ayi mufubileemo mukucita ciiyo ca Baibo capalwaanu.

5-6. Ino ngamabuku nshi ngotweelete kwiiya cakubikila maano?

⁵ Ino nshiinshi nshomweelete kutaanguna kubikila maano? Tulyeelete kubikila maano kukwiiya Maswi akwe Lesa bushiku buli boonse. Bakaceeshako ano mbasu shakubelenga Baibo kwansondo ansondo kwaamba ayi tunooba aciindi cakukutumana akuyeeyawo akulangweetawo makani aamwi kuswa mumabuku esu. Tulisuni kwaamba ayi nshotubelenga kuswa mu Baibo shinoonjila mumoyo akutucafwa kusena pafwiifwi a Yehova, kuteshi kwiindulukaamobo mumavesi atondeshekwa.—Kulu. 19:14.

⁶ Ino nshiinshi shimwi nshotweelete kubelenga akwiiya cakubikila maano? Tulyeelete kulibambila ciiyo ca Njashi Yamulindilishi a Ciiyo ca Baibo Calibungano ambasu shimwi shakubungana kwamukati kansondo. Tulyeelete kubelenga Njashi Yamulindilishi ili yoonse yaswa a Sinsimuka!

7. Sa tulyeelete kulefuka na tatucikoonshi kweebela akubelenga makani oonse acanika pa webusaiti yesu apa JW Bulodikasiti?

⁷ Ano mpashi inga mweepusha ayi, ‘sa inga ndacikonsha kubelenga makani oonse acanika pa webusaiti yesu ya jw.org, akweebela makani oonse atondeshekwa pa JW Bulodikasiti? Shakubelenga shafula abuumbi!’ Amuyeeye cikoshanyo ici: Musena nkoboolisha shakulya kulaba shakulya shiinji shipusenepusene. Abo beshikuya mukuula inga tabacikoonshi kuula shakulya shoonse shabambwa. Aboobo balasalawo shiniini nsheenga balya. Ubu mbocibete ashakulya shakumushimu shicanika pa webusaiti yesu apa JW Bulodikasiti. Amwebo na tamucikoonshi kubelenga nabi kweebela makani oonse acanikaawo, mutalefuki. Amubelenge na kweebela nsheenga mwacikonsha. Atubandike kucita ciiyo capalwaanu ncocaamba anshomweelete kucita kwaamba ayi mufubileemo.

8. Ino nshiinshi nsheenga twaciita ndyetutobelenga Njashi Yamulindilishi, alimwi ino kucita boobo inga kwatucafwa buyani?

⁸ Ndyemutookwiya mulyeelete kubikila maano kushintu nshemutoobelenga kwaamba ayi mwiiye shiyandika. Kucita ciiyo capalwaanu teshi kubelengabo calubilo lubilo akucana shikumbulo kumiipusho yatondeshekwa. Kucakubonenaako na mutoolibambila ciiyo ca Njashi Yamulindilishi, mulyeelete kutaanguna kubelenga maswi ali palubasu lwa nsheshi twiiye, ulo lucanika kumatalikilo aciiyo. Cabili, amubelenge akuyeeya pamutwi waciiyo, tumitwi tuniini amiipusho yakwiindulukaamo. Lyalo inga mwatalika kubelenga ciiyo coonse ico paniini paniini akuyeeya nshemutobelenga. Amubikile maano kumaswi atokwaamba pa citeente cinene cili mupalagilafu, ayo liinji acanika kumatalikilo apalagilafu. Maswi ayo ngeenga amucafwa kushiba kabotu citeente citosansululwa mupalagilafu iyo. Ndyemutobelenga ciiyo mulyeelete kubona palagilafu ili yoonse mboitocatana atumitwi tuniini amutwi waciiyo. Amulembe maswi ngomwacana muciiyo ngomuteshi kabotu ashiteente shimwi nshomusuni kunyumfwishisha kabotu kwiinda mukulangwetaawo makani aamwi.

9. (a) Ino nceebonshi tulyeelete kubikila maano abuumbi kumalembo ndyetutoolibambila Njashi Yamulindilishi? Alimwi ino nshiinshi nshotweelete kucita (b) Kweelana amaswi ngotucana palilembo lya Joshuwa 1:8, Ino nshiinshi shimwi nshotweelete kucita pesule lyakubelenga lilembo?

⁹ Ciiyo ca Njashi Yamulindilishi cilatucafwa kwishiba  kabotu Baibo. Aboobo amubikile maano kumalembo, bunene bunene ayo atondeshekwa ayi amubelenge. Amubikile maano akubona maswi ali mumalembo mbwaacatene aciteente citokwaambwa mupalagilafu. Kwiilikaawo, mulyeelete kukutumana akuyeeyawo pamakani atokwaambwa mulilembo ndyemwabelenga akuyeeya mbweenga mwasebensesha makani ayo mubuumi bwanu.—Amubelenge Joshuwa 1:8.

10. Kweelana anshetwiiya palilembo lya Bene Ebulu 5:14, ino nceebonshi bashali balyeelete kucafwa baana kwiiya mbweenga bacita ciiyo capalwaabo akulangoola makani amwi ciindi ndyebatoocita kulambila kwamukwashi?

¹⁰ Cakutatoonsha, mushali uli woonse alisuni kwaamba ayi bana bakwe banoosangalala a Kulambila Kwamukwashi nsondo ili yoonse. Nabi kwaamba ayi lyoonse bashali balyeelete kulibambila limwi nsheshi bakeeye pakulambila kwamukwashi, teshi kwaamba ayi nsondo ili yoonse balyeelete kulibambila kucita shilibetele. Alimwi nabi kwaamba ayi cimwi ciindi inga mweebela pulogilamu ya JW Bulodikasiti na kucita shimwi pomwi mbuli kupanga cikoshanyo ca bwaato bwakwe Nowa, bashali balyeelete kwiisha baana kushiba mbweenga bacita ciiyo capalwaabo. Kucakubonenaako, baana balyeelete kushiba mbweenga balibambila mabungano, na kulangoola makani eenga abacafwa kukumbula miipusho njeenga bamwi babeepusha kucikolo. (Amubelenge Bene Ebulu 5:14.) Na kababa aciindi cakucita ciiyo capalwaabo kuŋanda, cilaakubacafwa abuumbi kubikilaako maano kumakani atobandikwa kumabungano cimwi ciindi kutaakuwo mavidyo mbuli, kubungana kwalubasu, akubungana kunene. Ncakwiila kwaamba ayi bulaamfu bwaciindi nceenga mwaiisha baana bulyeelete kweendelana aciimo amibo ya baana.

11. Ino nceebonshi ncotuyandikila kucafwa shikwiiya Baibo wesu kushiba bwakucita ciiyo capalwakwe?

¹¹ Abo mbotwiisha Baibo abalo balyeelete kwiiya mbweenga bacita ciiyo capalwaabo. Na shikwiiya watalikabo kwiiya Baibo, tulakondwa na twabona mbwalibambila ciiyo mulibuku lyakwe amabuku amwi ngotusebensesha kumabungano. Nacibi boobo tulyeelete kumucafwa kwiiya mbweenga wacana makani aamwi akwiiya shiinji ndyatoocita ciiyo ca Baibo capalwakwe. Kucita boobu kulaakumucafwa kushiba bwakulangoola makani mumabuku esu eenga amucafwa na wacana lipenshi, muciindi cakwiipusha bamwi mulibungano kwaamba ayi bamulwiite shakucita.

12. Ino nciinshi ncotuyandikila kucita ciiyo capalwesu?

¹² Na tamuna kushibila kubelenga akwiiya, inga mwabona anga kucita ciiyo capalwanu takusangalashi. Ano cancine ncakwaamba ayi kulasangalasha abuumbi. Inga mwatalika paniini paniini, lyalo mukuya kwaciindi inga mwanungaako ciindi ncemucita ciiyo. Amuyeeye pamulandu ngomutoocitila ciiyo. Mutalubi kwaamba ayi cinene ncotweelete  kucitila ciiyo capalwesu ncakwaamba ayi tulisuni kutolelela kuyumya bushicibusa bwesu a Yehova. Cimwi ncotuyandikila kucita ciiyo capalwesu ncakwaamba ayi tulisuni kwiiya mbweenga twakumbula na batwiipusha miipusho ndyetutoshimikila na kucana makani eenga atucafwa palipenshi ndyetucite.

13. (a) Amusansulule nsheenga banike bacili kucikolo bacita kwaamba ayi bacikoonshe kushimikila beshicikolonyinaabo. (b) Ino maswi ngotucana palilembo lya Bene Kolose 4:6 inga twaakonkela buyani?

¹³ Kucakubonenaako bacanike bacili kucikolo inga bacana kwaamba ayi beshicikolonyinaabo boonse balashoma ayi shintu shakabaako sheenka kwakubula kulengwa. Cakutatoonsha bacanike aba inga basuna kushimikila beshicikolo abo Baibo nshoiisha pamakani akulengwa, ano mpashi balalinyumfwa ayi inga tabacikonshi. Aboobo balyeelete kuba apulogilamu yakucita ciiyo capalwabo! Inga basuna kucita ciiyo ceebo ca shintu shobilo: (1) kuyumya lushomo lwabo mucancine cakwaamba ayi Lesa ngowakalenga shintu shoonse (2) kwiiya mbweenga basansulula kabotu cancine kubamwi. (Loma. 1:20; 1 Pita 3:15) Inga basuna kuliipusha bene ayi, ‘Ino nciinshi cipa kwaamba baanji kucikolo bashome munjiisho yakusanduka?’ Lyalo amutalike kulangoola cakubikila maano makani aamba pamakani anjiisho yakusanduka mumabuku esu. Mulaakucana kwaamba ayi kusansulwita bamwi nshemushoma teshi cintu ciyumu abuumbi. Bantu baanji balashoma munjiisho yakusanduka ceebo cakwaamba ayi kuli umwi wakabalwiita. Na mwacana citeente comwi na shobilo, inga mwacikonsha kucafwa muntu usuni kwiiya cancine.—Amubelenge Bene Kolose 4:6.

14-16. (a) Ino inga mwacita buyani kwaamba ayi mushibe makani aanji alibuku lyamu Baibo ndyomuteshi kabotu? (b) Amusansulule mbweenga Malembo atondeshekwa amucafwa kunyumfwishisha kabotu makani acanika mulibuku lyakwe Amosi. (Amubone kabokosi kalembetwe ayi “ Mbweenga Mwanyumfwishisha Kabotu Baibo!!”)

¹⁴ Atwaambe ayi kunembo uku tulaakutalika kwiiya makani kuswa mulibuku lyomwi pamabuku abushinshimi afwiifwi, mpashi ngamakani ngomuteshiwo kabotu. Nceenga mwataanguna kucita nkwiiya shiinji pamakani ngaakalemba mushinshimi uyo. Ano ino nshiinshi nsheenga mwaciita kwaamba ayi mucikoonshe kucita boobo?

¹⁵ Amutaangune kuliipusha ayi: ‘Ino ngamakani nshi ngoonshi pamulembi walibuku ili? Ino wakalinga aani, wakalinga kukala kuli, wakalinga kusebensa ncito nshi?’ Kushiba makani aanji awooyo wakalemba libuku inga kwatucafwa kunyumfwisha maswi amushobo wa shikoshanyo nshaakasebensesha. Ndyemutobelenga Baibo, amubikile maano ku maswi eenga amucafwa kunyumfwisha mibo yakalinga kucite wakalemba libuku ilyo.

¹⁶ Kuboolawo, inga mweeya shiinji na mwashiba ciindi libuku ndyemutobelenga ndyelyakalembwa. Kwaamba ayi mushibe makani ayo, amulange palubasu palembetwe ayi “Mulongo Wamabuku Amu Baibo” kweela kwa Baibo ya New World Translation of the Holy Scriptures. Kwiilikaawo, inga mweenduluka mucaati itokwaamba ayi “Bashinshimi Abaami Bamu Juda Alimwi Isilaeli na A6 mu Baibo ya New World Translation of the Holy Scriptures. Na mutokwiiya libuku lyaamba pa bushinshimi, inga cabota na mwashiba kabotu bantu mbobakalinga kukala paciindi libuku ilyo ndyelyakalembwa. Ino njimiyeeyo amibo nshi yakalinga kupukite mushinshimi njaakatumwa kwaamba ayi abacaafwe bantu kucileka? Ino mbaani bamwi bakalingaako paciindi mushinshimi uyo ndyaakalingaako? Kwaamba ayi munyumfwishishe kabotu, inga mwayandika kulangoola mumabuku amwi. Kucakubonenaako, kwaamba ayi munyumfwishe kabotu shakalinga kucitika paciindi mushinshimi Amosi ndyaakalingaako, inga mwayandika kubelenga mavesi acanika mulibuku lya 2 Baami a 2 Makani, atondeshekwa pamulongo wamalifalensi alibuku lyakwe Amosi 1:1. Kwiilikaawo, inga mwabelenga amakani acanika mulibuku lyakwe Osiya, uyo utooboneka ayi wakalingaako ciindi Amosi ndyaakalinga muumi. Mabuku oonse aya inga amucafwa kushiba buumi mbobwakalinga muciindi cakwe Amosi.—2 Baami 14:25-28; 2 Maka. 26:1-15; Hos. 1:1-11; Amosi 1:1.

17-18. Amwaambe shakubonenaako shili mumapalagilafu na shaanu shitondesha mbweenga kubikila maano kumakani aboneka anga nganiini niini kwamupa kusangalala aciiyo ca Baibo capalwaanu.

¹⁷ Kubelenga Baibo kulabota na katucite lusuno lwakwiiya shiinji. Kucakubonenaako, atwaambe ayi mutobelenga capita 12 mulibuku lyakwe Sekaliya yaamba sha bushinshimi bwakaamba palufu lwakwe Mesiya. (Seka. 12:10) Ndyemwashika muvesi 12, mwacana maswi akwaamba ayi “mukwashi wa bamuŋanda yakwe Natani ulaakulila” abuumbi ceebo ca lufu lwakwe Mesiya. Muciindi cakubelengawobo lubilo pamakani aya, mweemikana paniini akuliipusha ayi: ‘Ino mukwashi wa bamuŋanda yakwe Natani ulicatene buyani a Mesiya? Sa kuli kumwi nkweenga ndacana makani aamwi?’ Lyalo mwalangoola akucana makani aamwi. Lifalensi ya malembo yamutondesha 2 Samwelo 5:13, 14, iyo itokwaamba ayi Natani wakalinga mwanaakwe Defedi. Lifalensi yabili ngu, Luka 3:23, 31, iyo itootondesha ayi Yesu wakalinga wamulunyungu lwakwe Natani uyo wakalinga shikamukowa mukulukulu wakwe Maliya. (Amubone makani acafwa kwiiya pali Luka 3:23.) Lyalo makani ngomweeya amusangalasha! Mulicishi kwaamba ayi kuli bushinshimi butondesha ayi Yesu alaakuswa mulunyungu lwakwe Defedi. (Mate. 22:42) Ano Defedi wakalinga kucite baana basankwa beendilila 20. Aboobo inga mwakankamana kwaamba ayi Sekaliya wakaamba cakululama ayi mukwashi wakwe Natani ulaakulila ceebo ca lufu lwakwe Yesu

¹⁸ Atubandike cakubonenaako acimwi. Mucapita yakutaanguna ya libuku lyakwe Luka, tulacana maswi akwaamba ayi munjelo Gabuliyelo wakaya kuli Maliya akumulwiita sha mwaana ngwaakalinga kusa mukushala ayi: “Uyu mwaana ulaakuba munene alimwi ulaakunokwiitwa ayi Mwanaakwe Lesa wa kwiculu Wiindaawo, alimwi Yehova Lesa alaakumupa cuuna ca bwaami cakwe Defedi baishi, alimwi alaakuba Mwaami muŋanda yakwe Jakobo kwamuyayaya.” (Luka 1:32, 33) Mpashi inga twabikilabo maano kulubasu lwakutaanguna  lwa maswi akaamba munjelo Gabuliyelo ayi, Yesu ulaakunokwiitwa ayi “Mwanaakwe Lesa wa kwiculu Wiindaawo.” Ano Gabuliyelo wakaambila limwi ayi Yesu “alaakuba Mwaami.” Aboobo inga twakutumana akuyeeya Maliya mbwakayeeya pamaswi akaamba munjelo. Sa wakayeeya ayi maswi akaamba Gabuliyelo akalinga kusansulula ayi Yesu alaakupyana Mwaami Elodi na umwi wakalinga kusa mukupyana Elodi? Na Yesu wakalinga kusa mukuba mwaami, nkokwaamba ayi Maliya wakalinga kusa mukuba banyina mwaami, alimwi mukwashi wabo wakalinga kusa mukukala muŋanda ya bwaami. Nacibi boobo Baibo tayaambiwo ayi Maliya wakeepushawo Gabuliyelo makani amushobo uyu alimwi taakuwo nabi pomwibo mpotucana maswi akwaamba ayi Maliya wakasengawo kupekwa cuuna ca bwaami kwiculu, mbuli bashikwiiya bakwe Yesu bamwi bobilo mbobakacita. (Mate. 20:20-23) Makani aya alatucafwa kushoma cakushinisha kwaamba ayi ncakwiila Maliya wakalinga mwanakashi uliceesha abuumbi!

19-20. Kweelana alilembo lyakwe Jemusi 1:22-25 a 4:8, ino nciinshi ncotubelengela akwiiya Maswi akwe Lesa?

¹⁹ Tutaluubi kwaamba ayi, cinene ncotweelete kubelengela akwiiya Maswi akwe Lesa amabuku esu nceebo cakwaamba ayi tulisuni kuba abushicibusa bubotu a Yehova. Alimwi tulisuni kushiba kabotu ‘mbotubete’ anshotweelete kwaalula mubuumi bwesu kwaamba ayi tusangalashe Lesa. (Amubelenge Jemusi 1:22-25; 4:8.) Aboobo lyoonse katutana kutalika kucita ciiyo capalwesu, tulyeelete kusenga Yehova kwaamba ayi atupe mushimu wakwe. Tulyeelete kumukombelela kwaamba ayi atucaafwe kwiiya shiinji kuswa kumakani ngeshi tubelenge akutucafwa kubona nshotweelete kwaalula.

²⁰ Aboobo soonse atube bweenka mbuli musebenshi wakwe Lesa ushomeka uyo shikulumbaisha ngwaakasansulula ayi: “alacana kusangalala mukukonkela mulawo wakwe Yehova, alimwi alabelenga mulawo uyo akuyeeyawo mashiku amalumwi. . . . Shoonse nshaacita shilaakuswitilila.”—Kulu. 1:2, 3.