CIIYO 3
Laabu wakashoma Yehova
Atuyeeye ayi tuli mu mushi wa Jeliko. Mushi uyu uli mucishi ca Kenani, umo bantu mobatashomi Yehova. Mwanakashi wiitwa ayi Laabu mwakalinga kukala.
Laabu ndyaakalinga mwanike, wakanyumfwa ubo Mose mbwakapansanya maanshi palweenge lusalala ambwakatanjilila bene Isilaeli kuswa kuIjipiti. Alimwi wakanyumfwa ubo Yehova mbwakacafwa bene Isilaeli kukoma balwani babo munkondo. Paciindi ici, wanyumfwa ayi bene Isilaeli babungana pafwaafwi amushi wa Jeliko!
Laabu wakashitilisha beshikusensa mukwiinga wakashoma muli Yehova
Bushiku bumwi kumacolesha, bene Isilaeli bobilo baya mukusensa mushi wa Jeliko. Bashika muŋanda yakwe Laabu. Wabatambula akubanjisha muŋanda yakwe. Mashiku, mwaami wa kuJeliko washiba ayi kuli beshi kusensa mu mushi alimwi ayi bali muŋanda yakwe Laabu. Mpeeke mwaami watuma bantu ayi baye babacate. Laabu wabashisa beshi kusensa bobilo paciluli cipapalete ca ŋanda yakwe akwaambila bantu ba mwaami ayi: ‘Ncakwiila basankwa bobilo balinga besa, ono baswakale mumushi. Na mwabakonkela inga mwabacana!’ Sa ulicishi calengesha Laabu kushitilisha beshikusensa?— Mukwiinga ulashoma Yehova alimwi ulicishi kwaamba ayi Lesa ulakupa bene Isilaeli cishi ca Kenani.
Beshikusensa kabatana kuswa muŋanda yakwe Laabu, bamushomesha ayi lakwe abamumukwashi wakwe balakupuluka bunyonyooshi bwa Jeliko. Sa ulicishi ncobamwaambila kucita?— Bamwaambila ayi: ‘Bwesa ntaambo isalala, uyaange paliwindo lyako. Na ukacite boobo, boonse bali muŋanda yako balakupuluka.’ Laabu wacita kweelana ambobamwaambila beshikusensa. Sa ulicishi cakesa mukucitika?—
Yehova wakapulusha Laabu abamumukwashi wakwe
Ndipakeendabo nshiku shiniini, bene Isilaeli bashinguluka mushi mubuumwite. Bacita boobo kwanshiku shosanwe abomwi, linkanda lyomwi pabushiku. Ono pabushiku bwasanu ashobilo, bashinguluka mushi mankanda osanwe aobilo. Kuswawaawo boolobesha boonse. Mpeeke Yehova walengesha lubumbu lwa mushi kuwa. Sombibo ŋanda icite lutaambo lusalala paliwiindo njoyacaala! Sa waibona ŋanda pa pikica?— Laabu alimwi amukwashi wakwe bapuluka!
Ino nciinshi nceenga weeya kuli Laabu?— Laabu wakashoma Yehova mukwiinga wakeeya shintu shibotu pali nguwe. Awebo utookwiiya shintu shiinji shibotu pali Yehova. Sa ulamushoma mbuli Laabu mbwakacita?— Tulicishi ayi ulamushoma!
