1-3. Ino bantu baleepusha miipusho nshi pamakani alufu, alimwi ino babupailishi balabakumbula buyani?

Baibo ilashomesha ayi bushiku bumwi “lufu teshi lukabeeko alimwi.” (Ciyubululo 21:4) Mumutwi 5, twakeeya ayi cilubula cakatupa coolwe cakuba abulindilishi bwa buumi butamaani. Nacibi boobo bantu bacifwa. (Shikushimikila 9:5) Aboobo mwiipusho unene ngwakwaamba ayi, Ino muntu na wafwa alaya kuli?

² Cikumbulo kumwiipusho uyu cilayandika abuumbi bunene bunene na twafwiitwa muntu ngotusuni. Inga twaliipusha ayi: ‘Ino waya kuli? Sa alitubwene? Sa inga watucafwa? Sa tulaakumubonawo alimwi?’

³ Bupailishi buunji bulapa shikumbulo shipusene pusene kumiipusho iyi. Bamwi balaiisha ayi na alacita shibotu, alaakuya kwiculu ano na alacita shibiibi alaakuya mukupya kumulilo wa helo. Bamwi balaiisha ayi na muntu wafwa alaaluka mushimu akutalika kukala abeshikamukowa bakwe bakafwa kale. Alimwi bamwi balaamba ayi na wafwa akoomboloshekwa, alaakushalwa, kushalilwa mumubili umwi, mpashi muntu umwi na mucinyama.

4. Ino nciinshi bupailishi buunji ncobwiisha pamakani alufu?

⁴ Twaboona kwaamba ayi bupailishi bulaiisha makani apusene pusene. Nacibi boobo baanji ncobaiisha ncintu comwibo. Balaiisha ayi na muntu wafwa, kuli cimwi mumuntu citafwiiwo. Ano sa njiisho iyi njancine?

5, 6. Ino nciinshi cicitika na muntu wafwa?

⁵ Yehova alicishi cicitika na muntu wafwa, alimwi alatulwiita  ayi na muntu wafwa, buumi bwakwe bulamana. Lufu nkutaba abuumi. Aboobo na muntu wafwa, taakuwo cintu cimwi citolelela kuba abuumi kumwi kuli koonse. * Na muntu wafwa taaboniiwo, taanyumfwiwo, nabi kuyeeya.

⁶ Mwaami Solomoni wakalemba ayi “bafwite taaku ncebeshi.” Bafu inga tabatondeshi lusuno na lupato, alimwi kucuumbwe “taakuwo ncito na kuyeeya nabi lushibo na busongo.” (Amubelenge Shikushimikila 9:5, 6, 10.) Alimwi Kulumbaisha 146:4, ilatulwiita ayi na muntu wafwa, “miyeeyo yakwe” ilafwa.

7. Ino Yesu wakaamba nshi pamakani alufu?

⁷ Shicibusa wakwe Lasalo ndyaakafwa, Yesu wakalwiita bashikwiiya bakwe ayi: “Mubyeesu Lasalo ulilete.” Nacibi boobo Yesu taakalinga kwaamba ayi Lasalo woona atokookesha. Yesu wakatolelela akwaamba ayi: “Lasalo wafwa.” (Joni 11:11-14) Aboobo Yesu wakeelanya lufu a koona. Taakwe kwaamba ayi Lasalo waya kwiculu na ali abeshikamukowa bakwe bakafwa. Alimwi taakwe kwaamba ayi Lasalo atoopenga mumulilo wa helo, na washalwa alimwi mumuntu umwi na mucinyama. Sobwe, Lasalo wakalingabo anga ngumuntu woona tulo twakufwa. Malembo amwi alakoshanisha lufu akoona tulo. Baibo ilaamba ayi Sitifini ndyaakacaikwa, “wakoona mulufu.” (Milimo 7:60) Mutumwi Paulo alakwe wakalemba ayi Beneklistu bamwi “bakoona mulufu.”—1 Bene Kolinto 15:6.

8. Ino tulishi buyani ayi Yehova taakwe kutulenga ayi tunoofwa?

⁸ Sa Lesa wakalenga Adamu aEfa kwaamba ayi bakafwe  mukuya kwaciindi? Sobwe! Yehova wakabalenga ayi banokala buumi bubotu busalalite kwamuyayaya. Yehova ndyaakalenga bantu, wakabapa aluyaando lwakuba abuumi butamaani. (Shikushimikila 3:11) Taakuwo mushali weenga wasuna bana bakwe kucembela akufwa, Yehova alakwe mbwaalinyumfwa pali ndiswe. Ano ino nceebonshi tulafwa, na Yehova wakatulenga ayi tube abuumi butamaani?

9. Ino nceebonshi mulawo Yehova ngwaakapa Adamu aEfa wakalinga uubu kukonkela?

⁹ Mumuunda wa Edeni, Yehova wakalwiita Adamu ayi: “Inga walya cisepo ca cisamu cili coonse mumuunda. Sombi cisamu cipa lushibo lwa bubotu abubi, toeelete kulya, mukwiinga waakulyabo, ncakwiila ulaakufwa.” (Matalikilo 2:9, 16, 17) Mulawo uyu wakalinga uubu kunyumfwisha akukonkela, alimwi Yehova ngowakalinga kucite nkusu shakulwiita Adamu aEfa ayi ici ncibiibi ici ncibotu. Nakwiinga bakatondesha ayi balalemeka mulawo wakwe Yehova kwiinda mukumunyumfwila. Alimwi nakwiinga bakatondesha ayi bakalumba pashintu shoonse nshaakabapa.

10, 11. (a) Ino Satana wakabayunga buyani Adamu aEfa? (b) Ino nceebonshi taakuwo ngweenga Adamu aEfa babekesha pakubisha nkobakabisha?

¹⁰ Ano cakabica ncakwaamba ayi, Adamu aEfa bakasala kutanyumfwila Yehova. Satana wakaambila Efa ayi: “Sa ncakwiila Lesa wakamukasha kulya shisepo sha cisamu cili coonse mumuunda muno?” Efa wakakumbula ayi: “Inga twalya shisepo sha cisamu cili coonse mumuunda. Sombi kukushakobo cisamu cili pakati ka muunda: ‘Lesa watukasha kulyaako shisepo nabibo kucataako; na twacita boobo tulaakufwa.’”—Matalikilo 3:1-3.

¹¹ Lyalo Satana wakaamba ayi: “Teshi mukafweewo sobwe. Lesa ulishi ayi bushiku mbweshi mukalyeeko, meenso anu alaakucaluka alimwi mulaakuba mbuli Lesa, mulaakushiba shibotu ashibiibi.” (Matalikilo 3:4-6) Satana wakalinga kusuni Efa kuyeeya ayi alakwe alicite nkusu shakulisalila eenka cibotu acibiibi. Alimwi Satana wakabeca Efa ayi taakuwo ceshi cikacitike na babula kunyumfwila Lesa. Aboobo Efa wakalya cisepo akupaako ibaye. Adamu aEfa bakalinga kucishi ayi Yehova wakabakasha kulya  cisepo cilya. Aboobo kwiinda mukulya cisepo ncaakabakasha, bakatondesha ayi bakasala kutanyumfwila mulawo wakwe Yehova wakalinga uubu kukonkela. Bakatondesha ayi tabakalinga kulemeka Ishi wabo wakwiculu shilusuno. Taakuwo ngobakalinga kweelete kubekesha pakubisha nkobakabisha!

12. Ino nceebonshi ncintu cikalasha abuumbi kwaamba ayi Adamu aEfa tabakwe kunyumfwila Yehova?

¹² Cakabica abuumbi bashali besu bataanshi tabakwe kutondesha bulemu ku Mulengi wabo! Ino inga mwalinyumfwa buyani na mwasebensa cankusu kulela mwaana musankwa na mwanakashi, ano mukuya kwaciindi baana aba bamupondokela akutalika kucita shintu nshemutana kubaambila? Cakutatoonsha ici inga camukalasha abuumbi!

13. Ino Yehova wakalinga kusansulula nshi ndyaakaamba ayi “ulaakuboolela kubulongo”?

¹³ Adamu aEfa bakasowa coolwe cakuba abuumi butamaani ceebo cakutanyumfwila Lesa. Yehova wakaambila Adamu ayi: “Uli bulongo, aboobo ulaakuboolela kubulongo.” (Amubelenge Matalikilo 3:19.) Ici cakalinga kwaamba ayi Adamu teshi akabeeko alimwi, bweenka mbocakalinga kumatalikilo Lesa kaatana kumulenga. (Matalikilo 2:7) Aboobo Adamu ndyaakabisha, wakafwa akutabaako.

14. Ino nciinshi ncotufwita?

 ¹⁴ Nakwiinga Adamu aEfa bakanyumfwila Lesa, nakwiinga kabaliiko apacecino ciindi. Ano bakabisha ceebo cakutanyumfwila Lesa, aboobo mukuya kwaciindi bakafwa. Bubi buli anga mbulwashi bubiibi mbotwakapyana kuswa kubashali besu bataanshi. Soonse tulashalwa abubi, aboobo ncotufwita. (Bene Loma 5:12) Ano ubu teshi Lesa mbwaakalinga kusuni ndyaakalenga bantu. Lesa taakalinga kusuni ayi bantu banoofwa, alimwi Baibo ilaamba ayi lufu “ngumulwani.”—1 Bene Kolinto 15:26.

15. Ino kushiba cancine pamakani alufu kulatwaangulula buyani?

¹⁵ Kushiba cancine pamakani alufu kulatwaangulula kuswa kunjiisho shakubeca. Baibo ilaiisha ayi bafu tabanyumfwiwo kucisa nabi kukalala. Inga tatubandiki ambabo, abalo tabakoonshi kubandika andiswe. Inga tatubacafwiwo, abalo inga tabatucaafwi. Tatweelete kubaloonda, mukwiinga bafu inga tabatucitiwo cibiibi cili coonse. Nacibi boobo, bupailishi buunji bulaamba ayi na muntu wafwa alaya kumusena kumwi alimwi ayi inga twamucafwa na twapa maali beshibupailishi. Ano na twashiba cancine pamakani alufu, inga tatushomi makani akubeca ayo.

16. Ino mbubeshi nshi bupailishi buunji mbobwiisha pamakani alufu?

¹⁶ Satana alasebensesha bupailishi bwakubeca, kubeca bantu ayi bafu mboomi kumusena kumwi. Kucakubonenaako, babupailishi bamwi balaiisha ayi na muntu wafwa mushimu wakwe ulaya kumusena kumwi. Sa amwebo nshobaiisha nkomupaila, na mpashi mulaiiya shancine Baibo nshoyaamba pamakani alufu? Satana alakusha bantu kuli Yehova kwiinda mukusebensesha bubeshi.

17. Ino nceebonshi nceenga twaambila ayi njiisho yakutenta bantu ku helo ilacobola Yehova?

¹⁷ Bupailishi buunji nshobwiisha shilakankamika.  Kucabonenaako, bamwi balaiisha ayi bantu babiibi balaya mukupya mu mulilo utamaani ku helo. Bubeshi ubu bulacobola Yehova. Lesa inga tapenshiwo bantu munshila ya mushobo uyu! (Amubelenge 1 Joni 4:8.) Inga mwamuyeeyela buyani muntu weenga waanisha mwanaakwe kwiinda mukumutenta maansa mumulilo? Cakutatoonsha inga mwaamba ayi muntu uyu ngumubiibi abuumbi. Alimwi inga tamusuniwo akukala pafwiifwi amuntu wamushobo uyo. Ubu Satana mbwaasuni ayi tunoobona Yehova!

18. Ino nceebonshi tatweelete kuloonda bafu?

¹⁸ Babupailishi bamwi balaiisha ayi na muntu wafwa, alaba mushimu. Balaamba ayi na mishimu iyo katwiipa bulemu inga yatucafwa. Na twaalilwa kuipa bulemu, balaamba ayi inga yesa mukutucita shintu shibiibi. Bantu baanji balabushoma bubeshi ubu. Balaloonda bafu, aboobo balapaila mishimu muciindi cakupaila Yehova. Ano mutaluubi kwaamba ayi bafu taakuwo nceenga banyumfwa nabi kucita cili coonse, aboobo tatweelete kubaloonda. Yehova ngo Mulengi wesu. Ngo Lesa wancinencine, aboobo eenkabo ngotweelete kupaila.—Ciyubululo 4:11.

19. Ino kushiba shancine pamakani alufu kulatucafwa buyani?

¹⁹ Kushiba shancine pamakani alufu, kulatwaangulula kuswa kububeshi bwa bupailishi bwakubeca. Alimwi cancine cilatucafwa kunyumfwishisha shishomesho shakwe Yehova pabuumi bwesu ashili kunembo.

20. Ino tulaakwiiya nshi mumutwi utookonkelaawo?

²⁰ Musebenshi wakwe Lesa womwi wakale kale, Jobo, wakeepusha Lesa ayi: “Na muntu wafwa, sa inga waba abuumi alimwi?” (Jobo 14:14) Sa ncakwiila muntu wakafwa inga waba abuumi alimwi? Cikumbulo Lesa ncaatupa kuswa mu Baibo cilayuminisha abuumbi. Nceshi tukeeye mumutwi utookonkelaawo.