Mbuli mbomwaiya mubuloshuwa iyi, Baibo ilicite njiisho sheenga shamucafwa amukwashi wanu. Yehova ulisuni kwaamba ayi munoosangalala. Wakalasha ayi na citaanshi mwayandoola bwaami bwakwe, “ulaakumupa shintu shoonse ishi.” (Mateyo 6:33) Ulisunishishi ayi mube shicibusa wakwe. Amusebenseshe ciindi ncomucite kuyumya bushicibusa bwanu aLesa. Bushicibusa aLesa ncoolwe cinene kwiinda pa shintu shoonse muntu nsheenga wabaasho.​—Mateyo 22:37, 38.

BAIBO ILAAMBA AYI: “‘Ndaakuba ishiwanu, amwebo mulaakuba bana bangu, basankwa abanakashi, Nebo neMwaami Lesa Shinkusu shoonse ndaamba.” (2 Bene Kolinto 6:18) Lesa ulisuni ayi mube shicibusa wakwe. Kupaila inga kwamucafwa kuba shicibusa wakwe Lesa. Yehova utoomwiita ayi ‘munopaila kuli nguwe lyoonse.’ (1 Bene Tesalonika 5:17) Ulayandishisha kunyumfwa shili mumoyo wanu alimwi ashimusukamika. (Bene Filipi 4:6) Na kamupaila pantu pomwi amukwashi wanu, bamumukwashi wanu balaakushiba kwaamba ayi ncakwiila mulashoma Lesa.

Teshibo kupaila kuli Lesa kweenka kuyandika, sombi mulyeelete kukutika akuli nguwe. Inga mwacita boobo kwiinda mukwiiya Maswi akwe alimwi akubelenga mabuku aamba sha muBaibo. (Kulumbaisha 1:1, 2) Amutole ciindi kuyeeya pa shintu nshemutobelenga. (Kulumbaisha 77:11, 12) Tulakutika kuli Lesa ndyetucanika kukubungana kwa Bwineklistu lyoonse.​—Kulumbaisha 122:1-4.

Cimwi ceenga cayumya bushicibusa bwesu aYehova, nkwaambilaako bamwi pali nguwe. Na mwatolelela kucita boobo, mulaakusena pafwaafwi anguwe.​—Mateyo 28:19, 20.

NSHEENGA MWACITA:

• Bushiku buli boonse munoobika ciindi cakubelenga Baibo akupaila

• Munoobikila maano kushintu shakumushimu kwiinda shakulisekesha akookesha

BAIBO ILAAMBA AYI: “Kamusena pafwaafwi aLesa alakwe ulaakusena pafwaafwi amwebo.” (Jemusi 4:8) Mulyeelete kuba apulogilamu ya kulambila kwamumukwashi alimwi akutolelela kucita kweelana ambomwakabika. (Matalikilo 18:19) Sombi kuli ashimwi shiyandika. Citaanshi mulyeelete kubika Lesa panembo mushintu shoonse nshemucita. Amuyumye bushicibusa bwamukwashi wanu aLesa kwiinda mukubandika pali nguwe “ndyemuli kumishaanu nabi kumwibo, pakookesha nabi pakusebensa.” (Dutolonomi 6:6, 7) Amube anga ngu Joshuwa, wakaamba ayi: “Sombi nebo abamuŋanda yangu, tulanoosebenselabo Mwaami Lesa.”​—Joshuwa 24:15.

NSHEENGA MWACITA:

• Lyoonse amube apulogilamu ya kwiiya alimwi ndyemutokwiiya amwaambe pa shintu sheenga shacafwa womwi awomwi mumukwashi