Yehova Lesa alisuni kwaamba ayi bantu boonse beeye pali nguwe alimwi apa Bwaami bwakwe, teshi mulandu abukaalo mbobabeteemo. (1 Timoti 2:3, 4) Ici ncecakapa kwaamba ayi Bakamboni bakwe Yehova banopanga ma Baibo alimwi amabuku aamba shamu Baibo mumishobo ipusenepusene, kwiilikaawo amushobo wa bashinkite matwi. Alimwi libunga lyesu lyakapanga mavidyo a aanji mumishobo ya bashinkite matwi, iyo iindilila 100! Ino tulacita buyani kwaamba ayi tupange mavidyo alimwi akwaamba ayi bantu babaawo? Alimwi ino nshiinshi nshetwacita kwaamba ayi tuye panembo mukupanga mavidyo aya?

 Mavidyo amumushobo wa bashinkite matwi alapangwa abasansulushi nsengwe yoonse. Bamu tiimu yomwi ayomwi ya basansulushi cakubikila maano balabona makani ali mulibuku ndyebatoyandika kusansulula. Lyalo balasala mbweenga basansulula makani ayo mumushobo wa bashinkite matwi. Na bamanisha, balasansulula libuku ilyo kwiinda mukulekoda vidyo. Pacecino ciindi, kuli matiimu ali 60 asansulula mabuku acafwa kwiiya Baibo mumushobo wa bashinkite matwi, lyalo amwi ali 40 alasansululaako cimwi ciindi.

 Kale kale kupanga mavidyo abashinkite matwi kwakalinga kudula abuumbi. Makamela akusebensesha kulekoda vidyo alimwi ashakusebensesha shimwi shakalinga kudulite kwiinda mboshibete pacecino ciindi. Kwiilikaawo, mavidyo akalinga kulekodelwa muma situdyo ngotwakalinga kuliyakila, nabi na kuboteshabo maanda akalinga kuyakitwe kale. Maali pomwi akalinga kuyandika kwaamba ayi shoonse shikwane shiyandika tiimu ya basansulushi ba mushobo wa bashinkite matwi, akalinga kushika madola ali 30,000. b

 Libunga lyesu lyeelesha cankusu kucana nshila shimwi mbweenga kwaba kuya panembo mukupanga mavidyo alimwi akuubyako nshila bwakupanga mavidyo kwaamba ayi kube kusebensesha kabotu maali apekwa mukuliyandila. Aboobo tulasebensesha shisebensesho sha munshiku shino shisebensa kabotu alimwi shitadulite bunene. Muciindi cakusebensesha masitudyo, basansulushi balabika cisani ca gilini kulubumbu muma ofesi abo pakwiimikana ndyebatolekoda mavidyo. Na kutoyandika kulekoda bantu baanji, bamakwesu abenankashi inga balekoda lubasu lwabo kabali kuŋanda yabo na mu ofesi yabo kwakubula kuya ku situdyo.

 Alimwi twakapanga pulogilamu ya pa kompyuta yakucafwa baabo batolekodwa. Ishi shoonse shapa kwaamba ayi basansulushi banofwambaana kupanga mavidyo amumushobo wa bashinkite matwi. Bamakwesu abenankashi batoolumba pakuya panembo uku. Mukwesu wa liina lya Alexander wakaamba ayi: “Mavidyo amumushobo wa bashinkite matwi atooswa ngaanji kwiinda mbocakalinga kale kale. Ndisangalete abuumbi. Ndeebela mavidyo aya bushiku abushiku.”

 Munshiku shino, tulasebenseshabo maali amadola atashiki 5,000 kwaamba tubambile tiimu ya basansulushi shitoyandika. Aboobo ici capa kwaamba ayi tunopanga mavidyo aanji mumishobo iinji ya bashinkite matwi.

 Na basansulushi bamanisha kulekoda vidyo, ilabikwaawo pa intaneti kwaamba ayi batoyandika mavidyo ayo bacikonshe kwaacita daunilodi. Kale kale twakalinga kupanga mavidyo tepu ama DVD, ano kupanga shintu ishi kwakalinga kutola ciindi cilaamfu alimwi cakalinga kutola maali aanji. Na twalekoda twakalinga kutuma shalekodwa ku kampani kwaamba ayi bashibike mu mavidyo tepu amuma DVD. Lyalo na bamanisha mavidyo tepu ama DVD akalinga kutumwa ku mabungano. Mu 2013 mweenkabo twakasebensesha maali amadola ashika ku 2,000,000 kupanga ma DVD amushobo wa bashinkite matwi.

 Bashinkite matwi bakalinga kulumba abuumbi pa shintu ishi nshebakalinga kubambilwa. Nacibi boobo, mavidyo aya teshi lyoonse ndyecakalinga kuba cuubu kwaasebensesha, bunene bunene mavidyo tepu na ma DVD ndyaakalinga kuya cifulilaako. Cimwi ciindi twakalinga kuyandika mavidyo tepu ama DVD aanji kwaamba ayi tulekodebo libuku lyomwi lyamu Baibo. Mukwesu wa liina lya Gilnei waku Brazil wakaamba ayi: “Lyoonse na tulisuni kubelenga lilembo, twakalinga kuyandika kushiba vidyo tepu icite lilembo ilyo lyalo akulangoola lilembo ilyo. Tecakalinga cuubu.” Nankashi wa liina lya Rafayane uyo wakasebenseshawo kale ma DVD amumushobo wa bashinkite matwi, wakaamba ayi: “Cakalinga kulemya na utoocita ciiyo ca palwaako. Cakalinga kututolela ciindi cilaamfu kwaamba ayi tucane malembo alimwi amakani amwi mumabuku. Alimwi bamakwesu abenankashi bakalinga kuya amavidyo tepu na ma DVD muncito yakushimikila ayo ngobakalinga kutondesha pa TV ya muntu usuni kwiiya. Bamakwesu bamwi bakalinga kubwesa ama DVD puleya abo. Nacibi boobo, kapatana kwiinda aciindi cilaamfu kwakesa twakweebelelawo vidyo kusebensesha DVD, alimwi bamakwesu baanji bakatusebensesha. Ba Bobby bakala ku United States bakaamba ayi: “Na muntu wamutondesha lilembo lyalo koosuni kumutondesha alimwi, liinji twakalinga kukushamo DVD iliimo akubikamo imwi. Ici cakalinga kutola ciindi cilaamfu alimwi cakalinga kupa kwaamba ayi tutanosebensesha bunene Baibo pakubandikishanya abantu.”

 Mu 2013, libunga lyakwe Yehova lyakakusha JW Library Sign Language app. Bamakwesu abenankashi balasebensesha app iyi kucita daunilodi akweebela mavidyo abashinkite matwi kusebensesha mafooni na matabuleti. Pakutaanguna pa app iyi pakalinga kucanikabo mumushobo wa American Sign Language. Lyalo kusa mukushika mu 2017, bakaibamba kwaamba ayi mishobo yoonse ya bashinkite matwi italike kucanika pa JW Library Sign Language app. Bamakwesu abenankashi nsengwe yonse bakasangalala abuumbi. Mukwesu wa liina lya Juscelino waku Brazil wakaamba ayi: “Ndakalinga kubonabo anga nkubeca! Ndakabona ayi Bamu Likoto Litanjilila balitusuni sobashinkite matwi alimwi balisuni ayi tutolelele kuba Beneklistu bashimpite lwakumushimu bweenka mbuli baabo bacikonsha kwaamba. Ndakasangalala abuumbi alimwi JW Library yakaampa kusunisha kwiiya Baibo.”

 Pacecino ciindi tulapanga mavidyo mumishobo yoonse ya bashinkite matwi akwaabika pa webusaiti yesu alimwi apa JW Library Sign Language app. Aboobo, mabuku amumishobo ya bashinkite matwi alasansululwa, kulekodwa alimwi akwaabika pa intaneti munshiku shiniinibo kwiinda mbocakalinga kale kale, cakwaamba ayi cakalinga kutola myeenshi na myaaka kwaamba ayi bantu babe angawo. Alimwi mumishobo iinji ya bashinkite matwi mabuku akasansululwa kwiinda mukulekoda vidyo alaswita pomwi aayo amumishobo ya baabo bacikonsha kwaamba.

 Amunyumfwe nshobakaamba bamakwesu abenankashi bamwi bashinkite matwi. Nankashi wa liina lya Klízia wakaamba ayi: “Taakuwo libunga libikila maano bashinkite matwi mbuli libunga lyesu, balatubambila cakulya cakumushimu munshila yuubu kubaaco. Taakuwo beenga batucitila nshelitucitila libunga lyakwe Yehova.” Ba Vladimir bakaamba ayi: “Mavidyo alaampa kushoma ayi Yehova alabikila maano bantu bashinkite matwi bweenka mbwaabikila maano bantu bacikonsha kunyumfwa.”

 Liinji mumavidyo abanshikite matwi mulaba maswi akwaamba ayi: “Libuku ili teshi lyakuulisha. Ndubasu lwa ncito yakwiisha Baibo icitwa nsengwe yoonse, icafwilishikwa amaali apekwa mukuliyandila.” Tulalumba abuumbi pa maali ngomupa mukuliyandila, alimwi aanji alapekwa kwiinda mukusebensesha nshila shicanika pa donate.pr418.com. Maali ngomupa alapa kwaamba ayi tucikonshe kupanga ma Baibo alimwi amabuku acafwa kwiiya Baibo mumishobo yoonse, kwiilikaawo abaabo basebensesha mushobo wa bashinkite matwi.