Mwaaka amwaaka, bamwi bali muncito yaciindi coonse ilibetele nsengwe yoonse baleetwa kuya mukucanika Kucikolo Cakwiiya Baibo ca Gilyadi cibeta ku Watchtower Educational Center ku Patterson, New York. a Bamakwesu abenankashi baya kucikolo ici, baleeya mbweenga basebensa kabotu incito shipusenepusene nsheenga bapekwa mulibunga lyakwe Yehova. Nshobeeya shilabacafwa kuyumya akucafwa bamakwesu mumabungano alimwi a mumisampi nsengwe yoonse.

 Ncakwiila cikolo ca Gilyadi, ncikolo kucanika bamakwesu abenankashi baswa mushishi shipusenepusene nsengwe yoonse. Kucakubonenaako, abo bakacanika kucikolo ca namba 147 mu 2019 bakalinga 56 kuswa mushishi shili 29. Abo beshikucanika kucikolo ici mbaabo bali muncito yaciindi coonse ilibetele mbuli basebensela pa Bethel, bamatanjili balubasu, bamishonali na bapainiya balibetele.

 Balatalika kulibambila shacikolo kakucaalite ciindi cilaamfu kwaamba ayi cikolo citalike. Kucakubonenaako, Dipatimenti Ilanga Pashakweenda Yakumaofesi Anene (WHQ Travel) iloola matiketi akweenda a ndeke abaabo bakeetwa kuya kucikolo ca Gilyadi. Maali ngobakasebensesha kwaamba ayi mukwesu nabi nankashi womwi awomwi aye kucikolo ca Gilyadi ca namba 147 ku Patterson alimwi akuboolelaamo kumishaabo akalinga madola aku America ashika ku 1,075. Bamakwesu abenankashi bakaswa ku Solomon Islands bakatanta ndeke shili 4 kwaamba ayi baye ku Patterson, lyalo pakuboola bakatanta shotatwe, nkokwaamba ayi bakeenda mushinso wamakilomita eendilila 35,400! Maali ngobakasebensesha kuula tiketi yamuntu womwi awomwi akalinga madola aku America ashika ku 2,300. Kwaamba ayi batasebenseshi maali aanji, Dipatimenti Ilanga Pashakweenda (WHQ Travel) ilasebensesha pulogilamu ya pakompyuta kulangoola matiketi atadulite abuumbi. Alimwi nabi pesule lyakucana tiketi, pulogilamu iyi ilatolelela kubona na mutengo wamatiketi waboolako panshi. Dipatimenti iyi iloola matiketi a ndeke kwiinda mukusebensesha mapointi bamakwesu ngobapa.

 Bamakwesu abenankashi baya kucikolo ca Gilyadi balayandika kuba a shitupa (visa) kwaamba ayi baye ku United States. Aboobo Dipatimenti Ilanga Pashamilawo Yakumaofesi Anene ilabacafwa kubwesa shitupa. Maali asebenseshekwa kulembesha alimwi akubwesa citupa ca muntu womwi awomwi ngamadola aku America ashika ku 510.

 Ino tulafubilaamo buyani mulwiiyo ndobatambula bamakwesu abenankashi kucikolo ici? Ba Hendra Gunawan balasebensa mbuli munene mulibungano ku Southeast Asia. Mulibungano mobabete muli beebene bakamanisha cikolo ca Gilyadi. Ba Hendra Gunawan bakaamba ayi: “Mulibungano lyesu tamwakalingaawo bapainiya baciindi coonse. Sombi kuswabo ciindi beebene aba ndyebakesa, kusebensa cankusu alimwi akulyaaba kwabo kwakapa kwaamba ayi bamwi basalewo kutalika bupainiya. Mukuya kwaciindi nankashi umwi mulibungano lyesu wakaya akucikolo ca Bashimikila sha Bwaami!”

 Ba Sergio Panjaitan basebensela pa Bethel yaku Southeast Asia, balasebensela pomwi abaabo bakamanisha cikolo ca Gilyadi. Bakaamba ayi: “Nshobakeeya tashikwe kucafwabo mbabo, sombi shakatucafwa aswebo. Bakeeya shintu shiinji abuumbi! Sombi muciindi cakulibona kuyandika kwiinda bamwi, balalwiitaako bamwi nshobakeeya. Ici cilatuyuminisha abuumbi alimwi aswebo tulayuminishako bamwi.”

 Ino maali asebenseshekwa kwaamba ayi cikolo ici cibeeko alaswa kuli? Maali aya alaswa paayo apekwa kucafwilisha ncito ya nsengwe yoonse, ayo liinji apekwa kwiinda mukusebensesha nshila yomwi pasheesho shicanika pa donate.pr418.com. Twalumba abuumbi pamaali ngomupa, ayo acafwilisha cikolo ici kucanika bamakwesu abenankashi baswa mushishi shipusenepusene nsengwe yoonse.