Mavidyo apakubungana kunene alatushika pamoyo alimwi alatucafwa kunyumfwisha Baibo nshoiisha. Kubungana kunene kwamu 2020 kwakalinga kucite mutwi wakwaamba ayi “Amusangalale Lyoonse”! kwakalinga kucite mavidyo 114, kwiilikaawo amakani 43 akaambwa a Bamulikoto Litanjilila abeshikubacafwilisha. Sa mwakayeeyawo kale pakukomena kwa ncito iyi akufula kwa maali akasebenseshekwa kubamba mavidyo aya?

 Bamakwesu abenankashi bashika pafwiifwi a 900 nsengwe yoonse bakaaba ciindi alimwi alushibo lwabo kwaamba ayi bacafwilishe kubamba pulogilamu yakubungana kunene. Bakasebensa ncito iyi kwa mawoola ashika pafwiifwi a 100,000 kwa myaaka yobilo akwiindaawo. Mawoola aya aleelikaawo amawoola 70,000 ngobakasebensa kubamba cisekano camu Baibo ca mamineti ali 76 cakalinga kucite mutwi wakwaamba ayi Neyemiya: “Kusangalala Muli Yehova Nkokumupa Nkusu.”

 Ano kwaamba incito iyi ikumanishikwe, kwakalinga kuyandika maali aanji akuula shintu shiyandika baabo bakalyaaba, shintu shakusebensesha alimwi ashintu shimwi.

 Ba Jared Gossma basebensela mu Dipatimenti Ilanga Pamakani Akulekoda Mavidyo Ashakukutikabo bakaamba ayi: “Luyaando lwa Komiti Yakwiisha ya Mulikoto Litanjilila ndwakubamba mavidyo atondesha bukaalo bupusenepusene alimwi amisena ipusenepusene. Ici cilatondesha ayi tuli mukwashi womwi nsengwe yoonse. Kwaamba ayi luyaando ulu lukumanishikwe, matiimu ali 24 mushishi shipusenepusene shili 11 bakasebensela pomwi kubamba mavidyo. Kwakalinga kuyandika maali aanji, kubamba kabotu shintu alimwi akucatana pomwi kwaamba ayi tucikoonshe kusebensela pomwi nsengwe yoonse.”

 Kwaamba ayi mavidyo esu amwi aanji abambwe, kulayandika shisebensesho shilibetele amisena ilibetele kwakulekodela. Kucakubonenaako, pakulekoda filimu ya Neyemiya: “Kusangalala Muli Yehova Nkokumupa Nkusu” bakayaka twakulekodelaamo mu studyo ya Mt. Ebo ili pafwiifwi aku Patterson, New York, U.S.A. Kwaamba ayi basebenseshe kabotu maali apekwa mukuliyandila, bamakwesu bakasebensesha tumaboodi kubamba lubumbu lwakalinga kukoshenye alubumbu lwa Jelusalemu, kwaamba ayi vidyo inootondesha shintu shakalinga kucitika kalekale. Lubumbu lomwi alomwi lwakapangwa kusebensesha tumaboodi tulaamfu mamita 6, akulupenta kwaamba ayi kaluboneka anga ngamabwe. Lubumbu ulu bakalupanga munshila yakwaamba ayi kabacikonsha kulunyamuna akulutola kumusena umwi kwaamba ayi balekode mavidyo. Nacibi boobo, kwakalinga kuyandika maali ashika pafwiifwi a madola 100,000 aku America kwaamba ayi bapange lubumbu kwakulekodela filimu. a

 Kushiba makani aya kulatuyuminisha kutondesha kulumba pakubungana kunene kwa mwaaka uno. Tulishomete cakutatoonsha kwaamba ayi kusebensa cankusu kubamba pulogilamu iyi kulaakupa kwaamba ayi Yehova alumbaishikwe nsengwe yoonse. Tutoomulumba abuumbi ceebo ca maali ngomupa mukuliyandila acafwilisha ncito yansengwe yoonse kwiinda mukusebensesha donate.pr418.com alimwi anshila shimwi.